Ezekiel 39
The Book of Ezekiel
܀ ܚܙܩܝܐܝܠ ܠܛ ܀
1 ܘܰܐܢ̱ܬ ܒܰܪܢܳܫܳܐ: ܐܶܬܢܰܒܳܐ ܥܰܠ ܓܽܘܓ ܘܶܐܡܰܪ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܐܶܢܳܐ ܥܠܰܝܟ ܓܽܘܓ: ܡܕܰܒܪܳܢܳܐ ܘܪܺܝܫܳܐ ܕܡܳܫܳܟ ܘܰܕܬܽܘܒܺܝܠ.
2 ܘܶܐܫܰܝܢܳܟ ܘܶܐܟܰܢܫܳܟ: ܘܰܐܣܩܳܟ ܡܶܢ ܫܦܽܘܠܰܝ̈ ܓܰܪܒܝܳܐ: ܘܰܐܝܬܶܝܟ ܠܛܽܘܖ̈ܶܐ ܕܺܝܣܪܳܐܶܝܠ.
3 ܘܰܐܦܶܕ ܩܶܫܬܳܟ ܡܶܢ ܣܶܡܳܠܳܟ: ܘܓܶܐܖ̈ܰܝܟ ܡܶܢ ܝܰܡܺܝܢܳܟ.
4 ܘܰܒܛܽܘܖ̈ܶܐ ܕܺܝܣܪܳܐܶܝܠ ܬܶܦܶܠ: ܐܰܢ̱ܬ ܘܟܽܠܶܗ ܚܰܝܠܳܟ: ܘܥܰܡ̈ܡܶܐ ܣܰܓܺܝ̈ܐܶܐ ܕܥܰܡܳܟ: ܠܦܳܪܰܚܬܳܐ ܕܰܫܡܰܝܳܐ ܘܰܠܚܰܝܽܘܬܳܐ ܕܰܐܪܥܳܐ: ܝܰܗܒܬܳܟ ܠܡܶܐܟܽܘܠܬܳܐ.
5 ܘܥܰܠ ܐܰܦܰܝ̈ ܕܰܒܪܳܐ ܬܶܦܶܠ: ܡܶܛܽܠ ܕܶܐܢܳܐ ܡܰܠܠܶܬ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
6 ܘܶܐܫܰܕܰܪ ܢܽܘܪܳܐ ܥܰܠ ܡܳܓܽܘܓ: ܘܥܰܠ ܝܳܬܒܰܝ̈ ܓܳܙܖ̈ܳܬܳܐ ܕܰܒܫܶܠܝܳܐ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.
7 ܘܰܫܡܳܐ ܕܩܽܘܕܫܝ ܐܰܘܕܰܥ ܒܓܰܘ ܥܰܡܝ ܝܺܣܪܳܐܶܝܠ: ܘܬܽܘܒ ܠܳܐ ܐܶܛܰܘܶܫ ܫܡܳܐ ܕܩܽܘܕܫܝ: ܘܢܶܕܥܽܘܢ ܥܰܡ̈ܡܶܐ ܕܶܐܢܳܐ ܐ̱ܢܳܐ ܡܳܪܝܳܐ ܩܰܕܺܝܫܳܐ ܕܺܝܣܪܳܐܶܝܠ.
8 ܗܳܐ ܡܛܳܐ ܠܡܶܐܬܳܐ ܝܰܘܡܳܐ ܕܶܐܡܪܶܬ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
9 ܘܢܶܦܩܽܘܢ ܥܳܡܽܘܖ̈ܶܐ ܕܩܽܘܖ̈ܝܳܐ ܕܺܝܣܪܳܐܶܝܠ: ܘܢܶܫܒܩܽܘܢ ܢܽܘܪܳܐ ܒܙܰܝܢܳܐ ܘܰܒܣܰܟܖ̈ܶܐ ܘܰܒܢܰܝ̈ܙܟܶܐ: ܘܰܒܩܶܫ̈ܬܳܬܳܐ ܘܰܒܓܶܐܖ̈ܶܐ: ܘܰܒܚܽܘܛܖ̈ܶܐ ܕܺܐܝ̈ܕܰܝܳܐ: ܘܰܒܖ̈ܽܘܡܚܶܐ: ܘܢܰܘܩܕܽܘܢ ܡܶܢܗܽܘܢ ܒܢܽܘܪܳܐ: ܫܒܰܥ ܫܢܺܝ̈ܢ.
10 ܘܠܳܐ ܢܶܣܬܰܢܩܽܘܢ ܥܰܠ ܩܰܝ̈ܣܶܐ ܕܚܰܩܠܳܐ ܘܰܕܥܳܒܳܐ: ܐܶܠܳܐ ܡܶܢ ܙܰܝܢܗܽܘܢ ܢܰܘܩܕܽܘܢ ܒܢܽܘܪܳܐ ܘܢܶܫܒܽܘܢ ܠܰܐܝܠܶܝܢ ܕܰܫܒܰܘ ܐܶܢܽܘܢ: ܘܢܶܒܙܽܘܢ ܠܰܐܝܠܶܝܢ ܕܒܰܙܘ ܐܶܢܽܘܢ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
11 ܒܶܗ ܒܝܰܘܡܳܐ ܗܰܘ: ܐܶܬܶܠ ܬܰܡܳܢ ܕܽܘܟܬܳܐ ܠܓܽܘܓ ܠܩܰܒܪܳܐ ܒܺܝܣܪܳܐܶܝܠ: ܢܰܚܠܳܐ ܪܰܒܳܐ ܕܰܒܡܰܕܢܚܳܝܶܗ ܕܝܰܡܳܐ: ܘܢܶܣܟܪܽܘܢܶܗ ܠܢܰܚܠܳܐ: ܘܢܶܩܒܪܽܘܢܶܗ ܬܰܡܳܢ ܠܓܽܘܓ: ܘܰܠܟܽܠܶܗ ܚܰܝܠܶܗ: ܘܢܶܬܩܪܶܐ ܢܰܚܠܳܐ ܕܣܰܘܦܳܢܶܗ ܕܓܽܘܓ.
12 ܘܰܠܫܰܒܥܳܐ ܝܰܖ̈ܚܺܝܢ: ܢܶܩܒܪܽܘܢ ܐܶܢܽܘܢ ܕܒܶܝܬ ܝܺܣܪܳܐܶܝܠ: ܘܬܶܬܕܰܟܶܐ ܐܰܪܥܳܐ.
13 ܘܢܶܩܒܪܽܘܢ ܐܶܢܽܘܢ ܟܽܠܶܗ ܥܰܡܳܐ ܕܰܐܪܥܳܐ: ܘܢܶܗܘܶܐ ܠܗܽܘܢ ܫܡܳܐ ܒܝܰܘܡܳܐ ܕܡܶܫܬܰܒܰܚ ܐ̱ܢܳܐ ܐܳܡܰܪ ܡܳܪܝܳܐ.
14 ܘܡܶܢ ܒܳܬܰܪ ܫܰܒܥܳܐ ܝܰܖ̈ܚܺܝܢ: ܢܶܗܘܽܘܢ ܓܰܒܖ̈ܶܐ ܡܗܰܠܟܺܝܢ ܐܰܡܺܝܢܳܐܺܝܬ ܒܰܐܪܥܳܐ: ܘܩܳܒܪܺܝܢ ܠܰܐܝܠܶܝܢ ܕܶܐܫܬܚܰܪܘ ܒܰܐܪܥܳܐ: ܕܬܶܬܕܰܟܶܐ.
15 ܘܟܽܠ ܕܥܳܒܰܪ ܒܰܐܪܥܳܐ: ܘܚܳܙܶܐ ܓܰܪܡܳܐ ܕܒܰܪܢܳܫܳܐ: ܢܰܨܘܶܐ ܥܰܠ ܓܰܒܶܗ ܨܘܳܝܳܐ: ܥܕܰܡܳܐ ܕܳܐܬܶܝܢ ܫܳܩܠܺܝܢ ܠܶܗ ܗܳܢܽܘܢ ܕܩܳܒܪܺܝܢ ܒܢܰܚܠܳܐ ܕܓܽܘܓ.
16 ܘܢܶܫܬܰܡܰܗ ܫܡܳܗ̇ ܕܰܡܕܺܝܢ̱ܬܳܐ ܥܰܫܺܝܢܬܳܐ: ܘܰܢܕܰܟܽܘܢܳܗ̇ ܠܰܐܪܥܳܐ.
17 ܐܰܢ̱ܬ ܕܶܝܢ ܒܰܪܢܳܫܳܐ: ܐܶܡܰܪ ܠܟܽܠܳܗ̇ ܦܳܪܰܚܬܳܐ ܕܰܫܡܰܝܳܐ: ܘܰܠܟܽܠܳܗ̇ ܚܰܝܽܘܬܳܐ ܕܕܰܒܪܳܐ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܶܬܟܰܢܰܫܘ ܘܬܰܘ ܡܶܢ ܟܠ ܕܽܘܟܳܐ: ܠܕܶܒܚܬܳܐ ܪܰܒܬܳܐ ܕܕܳܒܰܚ ܐ̱ܢܳܐ ܠܟܽܘܢ ܒܛܽܘܖ̈ܶܐ ܕܺܝܣܪܳܐܶܝܠ: ܘܬܶܐܟܠܽܘܢ ܒܶܣܪܳܐ ܘܬܶܫܬܽܘܢ ܕܡܳܐ.
18 ܒܶܣܪܳܐ ܕܓܰܢ̱ܒܳܖ̈ܶܐ ܬܶܐܟܠܽܘܢ: ܘܰܕܡܳܐ ܕܪܰܘܖ̈ܒܳܢܶܐ ܕܰܐܪܥܳܐ ܬܶܫܬܽܘܢ: ܕܕܶܟܖ̈ܶܐ ܘܕܰܡܦܰܛܡ̈ܶܐ. ܘܰܕܬܰܝܫ̈ܶܐ ܘܰܕܬܰܘܖ̈ܶܐ: ܘܕܰܐܖ̈ܘܳܢܶܐ ܕܒܰܝܫܳܢ ܟܽܠܗܽܘܢ.
19 ܘܬܶܐܟܠܽܘܢ ܒܶܣܪܳܐ ܘܬܶܣܒܥܽܘܢ: ܘܬܶܫܬܽܘܢ ܕܡܳܐ ܘܬܶܪܘܢ: ܡܶܢ ܕܶܒܚܬܳܐ ܪܰܒܬܳܐ ܕܕܳܒܰܚ ܐ̱ܢܳܐ ܠܟܽܘܢ.
20 ܘܬܶܣܒܥܽܘܢ ܡܶܢ ܦܳܬܽܘܪܝ: ܒܶܣܪܳܐ ܕܖ̈ܰܟܫܳܐ ܘܰܕܖ̈ܳܟܒܰܝܗܽܘܢ: ܘܰܕܓܰܢ̱ܒܳܖ̈ܶܐ: ܘܰܕܟܽܠܗܽܘܢ ܓܰܒܖ̈ܶܐ ܩܖ̈ܰܒܬܳܢܶܐ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
21 ܘܶܐܥܒܶܕ ܫܽܘܒܚܝ ܒܥܰܡ̈ܡܶܐ: ܘܢܶܚܙܽܘܢ ܟܽܠܗܽܘܢ ܥܰܡ̈ܡܶܐ ܕܺܝܢܳܐ ܕܥܶܒܕܶܬ: ܘܺܐܝܕܝ ܕܣܳܡܶ݀ܬ ܒܗܽܘܢ.
22 ܘܢܶܕܥܽܘܢ ܕܒܶܝܬ ܝܺܣܪܳܐܶܝܠ: ܕܶܐܢܳܐ ܐ̱ܢܳܐ ܡܳܪܝܳܐ ܐܰܠܳܗܗܽܘܢ: ܡܶܢ ܝܰܘܡܳܐ ܗܰܘ ܘܰܠܗܰܠ.
23 ܘܢܶܕܥܽܘܢ ܥܰܡ̈ܡܶܐ: ܕܡܶܛܽܠ ܥܰܘܠܗܽܘܢ ܐܶܫܬܒܺܝܘ ܒܢܰܝ̈ ܝܺܣܪܳܐܶܝܠ: ܕܰܐܥܠܺܝܘ ܒܺܝ: ܘܰܐܗܦܟܶ݀ܬ ܐܰܦܰܝ̈ ܡܶܢܗܽܘܢ: ܘܰܐܫܠܡܶ݀ܬ ܐܶܢܽܘܢ ܒܺܐܝܕܳܐ ܕܣܳܢܰܐܝ̈ܗܽܘܢ: ܘܰܢܦܰܠ̣ܘ ܟܽܠܗܽܘܢ ܒܚܰܪܒܳܐ.
24 ܘܰܐܝܟ ܛܰܢܦܽܘܬܗܽܘܢ ܘܰܐܝܟ ܥܰܘܠܗܽܘܢ ܦܶܪܥܶ݀ܬ ܐܶܢܽܘܢ: ܘܰܐܗܦܟܶ݀ܬ ܐܰܦܰܝ̈ ܡܶܢܗܽܘܢ.
25 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܡܶܟܺܝܠ ܡܰܦܢܶܐ ܐ̱ܢܳܐ ܫܒܺܝܬܶܗ ܕܝܰܥܩܽܘܒ: ܘܰܡܪܰܚܶܡ ܐ̱ܢܳܐ ܥܰܠ ܟܽܠܶܗ ܒܶܝܬ ܝܺܣܪܳܐܶܝܠ: ܘܛܳܐܶܢ ܐ̱ܢܳܐ ܡܶܛܽܠ ܫܡܳܐ ܕܩܽܘܕܫܝ.
26 ܘܰܢܩܰܒܠܽܘܢ ܟܽܠܳܗ̇ ܒܶܗܬܰܬܗܽܘܢ ܘܥܰܘܠܗܽܘܢ ܕܰܐܥܠܺܝܘ ܒܺܝ: ܡܳܐ ܕܺܝܬܶܒܘ ܒܰܐܪܥܗܽܘܢ ܒܫܶܠܝܳܐ: ܘܠܰܝܬ ܠܗܽܘܢ ܡܰܗܪܳܢܳܐ.
27 ܡܳܐ ܕܟܰܢܫܶܬ ܐܶܢܽܘܢ ܡܶܢ ܥܰܡ̈ܡܶܐ: ܘܩܰܪܒܶ݀ܬ ܐܶܢܽܘܢ ܡܶܢ ܡܕܺܝ̈ܢܳܬܳܐ ܕܰܒܥܶܠܕܒܳܒܰܝ̈ܗܽܘܢ: ܘܶܐܬܩܰܕܫܶ݀ܬ ܒܗܽܘܢ ܠܥܺܝܢ ܥܰܡ̈ܡܶܐ ܣܰܓܺܝ̈ܐܶܐ.
28 ܘܢܶܕܥܽܘܢ ܕܶܐܢܳܐ ܡܳܪܝܳܐ ܐܰܠܳܗܗܽܘܢ: ܐܰܫܒܺܝ݀ܬ ܐܶܢܽܘܢ ܠܒܶܝܬ ܥܰܡ̈ܡܶܐ: ܘܶܐ̱ܢܳܐ ܐܶܟܰܢܶܫ ܐܶܢܽܘܢ ܠܰܐܪܥܗܽܘܢ: ܘܠܳܐ ܐܰܘܬܰܪ ܡܶܢܗܽܘܢ ܬܰܡܳܢ.
29 ܘܠܳܐ ܐܰܗܦܶܟ ܐܰܦܰܝ̈ ܡܶܢܗܽܘܢ: ܐܶܠܳܐ ܐܶܫܽܘܕ ܪܽܘܚܝ ܥܰܠ ܟܽܠܶܗ ܒܶܝܬ ܝܺܣܪܳܐܶܝܠ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.