Ezekiel 47
The Book of Ezekiel
܀ ܚܙܩܝܐܝܠ ܡܙ ܀
1 ܘܰܗܦܰܟ ܐܰܥܠܰܢܝ ܠܬܰܪܥܶܗ ܕܒܰܝܬܳܐ: ܘܰܚܙܺܝ݀ܬ ܡܰܝ̈ܳܐ ܕܢܳܦܩܺܝܢ ܡܶܢ ܬܚܶܝܬ ܐܶܣܟܽܘܦܬܳܐ ܡܰܕܢܚܳܝܬܳܐ ܕܒܰܝܬܳܐ: ܘܗܶܢܽܘܢ ܡܰܝ̈ܳܐ ܢܳܚܬܺܝܢ: ܡܶܢ ܣܶܛܪܶܗ ܕܒܰܝܬܳܐ: ܡܶܢ ܬܰܝܡܶܢܳܝܶܗ ܕܡܰܕܒܚܳܐ.
2 ܘܰܐܦܩܰܢܝ ܒܬܰܪܥܳܐ ܓܰܪܒܝܳܝܳܐ: ܘܰܐܟܪܟܰܢܝ ܡܶܢ ܠܒܰܪ ܥܰܠ ܬܰܪܥܳܐ ܕܕܳܪܬܳܐ ܕܚܳܐܰܪ ܠܡܰܕܢܚܳܐ: ܘܰܚܙܺܝ݀ܬ ܡܰܝ̈ܳܐ ܕܢܳܦܩܺܝܢ ܡܶܢ ܣܶܛܪܶܗ ܕܝܰܡܺܝܢܳܐ.
3 ܘܟܰܕ ܢ̣ܦܰܩ ܓܰܒܪܳܐ ܡܫܰܒܰܚ: ܘܰܡܫܽܘܚܬܳܐ ܒܺܐܝܕܶܗ: ܘܰܡܫܰܚ ܐܳܠܶܦ ܐܰܡܺܝ̈ܢ: ܘܰܐܥܒܪܰܢܝ ܒܡܰܝ̈ܳܐ ܥܕܰܡܳܐ ܠܩܽܘܖ̈ܨܠܶܐ.
4 ܘܰܡܫܰܚ ܐܳܠܶܦ ܐܰܡܺܝ̈ܢ: ܘܰܐܥܒܪܰܢܝ ܒܡܰܝ̈ܳܐ ܥܕܰܡܳܐ ܠܒܽܘܖ̈ܟܶܐ: ܘܰܡܫܰܚ ܐܳܠܶܦ ܐܰܡܺܝ̈ܢ: ܘܰܐܥܒܪܰܢܝ ܒܡܰܝ̈ܳܐ ܥܕܰܡܳܐ ܠܚܰܨ̈ܶܐ.
5 ܘܰܡܫܰܚ ܐܳܠܶܦ ܐܰܡܺܝ̈ܢ: ܪܓܶܠܬܳܐ: ܕܠܳܐ ܐ̱ܢܳܫ ܡܶܫܟܰܚ ܠܡܶܥܒܪܳܗ̇: ܡܶܛܽܠ ܕܰܣܓܺܝܘ ܡܰܝ̈ܳܐ ܘܥܶܫܢܰܬ ܪܓܶܠܬܳܐ: ܘܠܳܐ ܐ̱ܢܳܫ ܡܶܫܟܰܚ ܠܡܶܥܒܪܳܗ̇.
6 ܘܶܐܡܰܪ ܠܺܝ: ܚܳܙܶܐ ܐܰܢ̱ܬ ܒܰܪܢܳܫܳܐ. ܘܰܐܘܒܠܰܢܝ ܘܰܐܘܬܒܰܢܝ ܥܰܠ ܣܶܦܬܳܗ̇ ܕܰܪܓܶܠܬܳܐ.
7 ܘܟܰܕ ܝܶܬܒܶ݀ܬ: ܚܙܺܝ݀ܬ ܥܰܠ ܣܶܦܬܳܗ̇ ܕܰܪܓܶܠܬܳܐ: ܐܺܝ̈ܠܳܢܶܐ ܕܛܳܒ ܣܰܓܺܝܐܺܝܢ ܡܶܟܳܐ ܘܡܶܟܳܐ.
8 ܘܶܐܡܰܪ ܠܺܝ: ܡܰܝ̈ܳܐ ܗܳܠܶܝܢ ܕܢܳܦܩܺܝܢ ܠܰܓܠܺܝܠܳܐ ܕܰܒܡܰܕܢܚܳܐ: ܘܢܳܚܬܺܝܢ ܠܓܰܪܒܝܳܐ: ܘܢܳܦܠܺܝܢ ܒܝܰܡܳܐ ܒܡܰܝ̈ܳܐ ܣܖ̈ܰܝܳܐ: ܘܒܳܣܡܺܝܢ ܡܰܝ̈ܳܐ.
9 ܘܟܽܠ ܢܰܦܫܳܐ ܚܰܝܬܳܐ ܕܡܰܘܠܕܳܐ ܐܰܬܰܪ ܕܺܐܝܬ ܡܰܝ̈ܳܐ ܕܰܪܓܶܠܬܳܐ: ܚܳܐܶܝܢ ܘܗܳܘܶܝܢ ܢܽܘܢ̈ܶܐ ܣܰܓܺܝ̈ܐܶܐ: ܡܶܛܽܠ ܡܰܝ̈ܳܐ ܕܢܳܦܠܺܝܢ ܬܰܡܳܢ ܘܒܳܣܡܺܝܢ ܡܰܝ̈ܳܐ.
10 ܘܩܳܝܡܺܝܢ ܥܠܰܘܗܝ ܨܰܝ̈ܳܕܶܐ: ܡܶܢ ܥܺܝܢ ܓܳܕ ܘܰܥܕܰܡܳܐ ܠܥܺܝܢ ܥܶܓܠܺܝܢ: ܡܰܫܛܚ̈ܶܐ ܠܰܡܨܝ̈ܕܳܬܳܐ ܢܶܗܘܶܐ: ܘܢܶܗܘܽܘܢ ܒܶܗ ܢܽܘܢ̈ܶܐ ܣܰܓܺܝ̈ܐܶܐ ܐܰܝܟ ܕܝܰܡܳܐ ܪܰܒܳܐ.
11 ܘܡܰܦܩܳܢܰܘ̈ܗܝ ܘܡܰܥܠܳܢܰܘ̈ܗܝ ܠܳܐ ܢܶܒܣܡܽܘܢ: ܐܶܠܳܐ ܢܶܗܘܽܘܢ ܡܶܠܚܳܐ.
12 ܘܒܳܗ̇ ܒܰܪܓܶܠܬܳܐ ܢܶܫܘܚܽܘܢ ܥܰܠ ܣܦܳܖ̈ܶܝܗ̇: ܡܶܟܳܐ ܘܡܶܟܳܐ: ܟܽܠ ܐܺܝܠܳܢ ܕܡܶܐܟܽܘܠܬܳܐ: ܠܳܐ ܢܶܬܪܽܘܢ ܛܰܖ̈ܦܰܝܗܽܘܢ: ܘܠܳܐ ܢܶܓܡܪܽܘܢ ܦܺܐܖ̈ܰܝܗܽܘܢ: ܘܰܒܟܽܠ ܪܺܝܫ ܝܰܪܚܳܐ ܢܶܗܘܽܘܢ ܡܒܰܟܪܺܝܢ: ܡܶܛܽܠ ܕܡܰܝ̈ܳܐ ܕܫܳܬܶܝܢ ܡܶܢ ܡܰܩܕܫܳܐ ܢܳܦܩܺܝܢ: ܢܶܗܘܽܘܢ ܦܺܐܖ̈ܰܝܗܽܘܢ ܠܡܶܐܟܰܠ: ܘܛܰܖ̈ܦܰܝܗܽܘܢ ܠܳܐܣܝܽܘܬܳܐ.
13 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܢܰܚ̈ܠܶܐ ܕܰܬܚܽܘ̈ܡܶܐ ܕܝܳܪܬܺܝܢ ܠܳܗ̇ ܠܰܐܪܥܳܐ: ܠܰܬܪܶܥܣܰܪ ܫܰܒ̈ܛܶܐ ܕܺܝܣܪܳܐܶܝܠ: ܘܰܕܝܰܘܣܶܦ ܠܚܰܒܠܳܐ.
14 ܕܬܺܐܪܬܽܘܢܳܗ̇ ܐ̱ܢܳܫ ܡܶܢ ܐܰܚܰܘ̈ܗܝ: ܕܰܐܪܺܝܡܶ݀ܬ ܐܺܝܕܝ ܠܡܶܬܠܳܗ̇ ܠܰܐܒܳܗܰܝ̈ܟܽܘܢ: ܘܬܶܬܦܰܠܰܓ ܠܟܽܘܢ ܐܰܪܥܳܐ ܠܝܽܘܪܬܳܢܳܐ.
15 ܘܗܳܢܰܘ ܬܚܽܘܡܳܐ ܕܰܐܪܥܳܐ: ܠܓܰܪܒܝܳܐ ܡܶܢ ܝܰܡܳܐ ܪܰܒܳܐ: ܐܽܘܪܚܳܐ ܕܚܶܬܪܽܘܢ ܕܥܳܐܠܳܐ ܠܨܰܕܰܕ.
16 ܘܰܚܡܳܬ ܘܒܶܪܽܘܬ: ܘܰܣܦܰܪܘܺܝܡ ܕܒܰܝܢܳܬ ܬܚܽܘ̈ܡܶܐ ܕܕܰܪܡܣܽܘܩ: ܘܒܰܝܢܳܬ ܬܚܽܘ̈ܡܶܐ ܕܰܚܡܳܬ: ܘܰܚܨܳܪ ܡܶܨܥܳܝܬܳܐ ܕܒܰܬܚܽܘܡܳܐ ܕܚܰܘܪܳܢ.
17 ܘܢܶܗܘܶܐ ܬܚܽܘܡܳܐ ܡܶܢ ܝܰܡܳܐ ܠܰܚܨܳܪ ܥܺܝܢܳܢ ܕܒܰܬܚܽܘܡܳܐ ܕܕܰܪܡܣܽܘܩ: ܘܨܶܦܽܘܢ ܕܰܒܓܰܪܒܝܳܐ ܕܒܰܬܚܽܘܡܳܐ ܕܰܚܡܳܬ: ܗܳܕܳܐ ܗ̱ܝ ܪܽܘܚܳܐ ܕܓܰܪܒܝܳܐ.
18 ܘܡܶܢ ܪܽܘܚܳܐ ܕܡܰܕܢܚܳܐ: ܡܶܢ ܒܶܝܬ ܚܰܘܪܳܢ: ܘܡܶܢ ܒܶܝܬ ܕܰܪܡܣܽܘܩ: ܘܡܶܢ ܒܶܝܬ ܓܶܠܥܳܕ: ܘܡܶܢ ܒܶܝܬ ܐܰܪܥܳܐ ܕܺܝܣܪܳܐܶܝܠ: ܘܝܽܘܪܕܢܳܢ ܡܬܰܚܰܡ ܥܰܠ ܝܰܡܳܐ ܡܰܕܢܚܳܝܳܐ ܕܬܳܡܰܪ: ܗܳܕܳܐ ܗ̱ܝ ܪܽܘܚܳܐ ܕܡܰܕܢܚܳܐ.
19 ܘܪܽܘܚܳܐ ܕܬܰܝܡܢܳܐ: ܡܶܢ ܬܳܡܳܪ ܘܰܥܕܰܡܳܐ ܠܡܰܝ̈ ܡܪܺܝܒܬ: ܩܰܕܺܝܫ ܝܽܘܪܬܳܢܶܗ ܕܝܰܡܳܐ ܪܰܒܳܐ.
20 ܘܰܡܬܰܚܰܡ ܥܕܰܡܳܐ ܠܰܢܟܳܚ ܕܺܐܝܬ ܒܡܰܥܠܳܢܳܐ ܕܰܚܡܳܬ: ܗܳܕܳܐ ܗ̱ܝ ܪܽܘܚܳܐ ܕܡܰܥܪܒܳܐ.
21 ܘܰܬܦܰܠܓܽܘܢܳܗ̇ ܠܰܐܪܥܳܐ ܗܳܕܶܐ ܠܫܰܖ̈ܒܳܬܳܐ ܕܺܝܣܪܳܐܶܝܠ.
22 ܘܡܳܐ ܕܦܰܠܶܓܬܽܘܢܳܗ̇ ܝܳܪܬܽܘܬܳܐ ܠܟܽܘܢ: ܘܠܰܐܝܠܶܝܢ ܕܡܶܬܦܢܶܝܢ ܠܘܳܬܝ ܕܥܳܡܪܺܝܢ ܒܰܝܢܳܬܟܽܘܢ: ܘܰܐܘܠܶܕܘ ܒܢܰܝ̈ܳܐ ܒܰܝܢܳܬܟܽܘܢ: ܢܶܗܘܽܘܢ ܐܰܝܟ ܒܢܰܝ̈ ܝܺܣܪܳܐܶܝܠ: ܘܥܰܡܟܽܘܢ ܢܦܰܠܓܽܘܢ ܝܳܪܬܽܘܬܳܐ ܒܰܝܢܳܬ ܫܰܖ̈ܒܳܬܳܐ: ܕܺܝܣܪܳܐܶܝܠ.
23 ܘܫܰܪܒܬܳܐ ܕܺܐܝܬ ܒܳܗ̇ ܐܰܝܢܳܐ ܕܡܶܬܦܢܶܐ ܠܘܳܬܝ: ܒܳܗ̇ ܢܶܬܠܽܘܢ ܠܶܗ ܝܳܪܬܽܘܬܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.