Ezekiel 17
The Book of Ezekiel
܀ ܚܙܩܝܐܝܠ ܝܙ ܀
1 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܐܰܚܽܘܕ ܐܽܘܚܰܕܬܳܐ: ܘܰܐܡܬܶܠ ܡܰܬܠܳܐ ܥܰܠ ܕܒܶܝܬ ܝܺܣܪܳܐܶܝܠ.
3 ܘܶܐܡܰܪ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܢܶܫܪܳܐ ܪܰܒܳܐ ܕܪܰܘܪܒܺܝܢ ܓܶܦܰܘ̈ܗܝ: ܘܰܐܪܺܝܟܺܝܢ ܓܶܠܦܳܢܰܘ̈ܗܝ: ܘܡܰܠ̈ܝܳܢ ܛܶܦܖ̈ܰܘܗܝ: ܘܥܰܒܺܝܛ ܡܶܠܓܶܗ: ܐܶܬܳܐ ܠܠܶܒܢܳܢ: ܘܰܢ̣ܣܰܒ ܡܶܢ ܓܒܰܝ̈ܳܐ ܕܥܰܖ̈ܩܶܐ.
4 ܘܰܩ̣ܛܰܡ ܪܺܝܫ ܡܰܪܒܺܝܬܶܗ: ܘܰܐܝܬܝܶܗ ܠܰܐܪܥܳܐ ܕܰܟܢܰܥܢ: ܘܣܳܡܶܗ ܒܰܡܕܺܝܢ̱ܬܳܐ ܕܬܰܓܳܖ̈ܶܐ.
5 ܘܰܢ̣ܣܰܒ ܡܶܢ ܙܰܪܥܳܐ ܕܰܐܪܥܳܐ: ܘܰܐܪܡܺܝ ܒܡܰܕܒܪܳܐ: ܢܶܨܒܬܳܐ ܥܰܠ ܡܰܝ̈ܳܐ ܣܰܓܺܝ̈ܐܶܐ: ܘܣܳܡܳܗ̇ ܠܕܰܘܩܳܐ.
6 ܘܺܝܥܳܬ ܘܰܗܘܳܬ ܓܦܶܬܳܐ ܡܪܰܥܰܕܬܳܐ ܘܡܰܟܺܝܟܰܬ ܩܰܘܡܬܳܐ: ܕܢܶܬܚܙܽܘܢ ܫܰܒܽܘ̈ܩܶܝܗ̇ ܥܠܰܘܗܝ: ܘܥܶܩܳܖ̈ܶܝܗ̇ ܢܶܗܘܽܘܢ ܬܚܽܘܬܰܘܗܝ: ܘܰܗܘܳܬ ܓܦܶܬܳܐ ܘܥܶܒܕܰܬ ܫܰܒܽܘ̈ܩܶܐ: ܘܦ̣ܶܫܛܰܬ ܥܢܳܩܶܝ̈ܗ̇.
7 ܗܳܐ ܢܶܫܪܳܐ ܐ̱ܚܪܺܢܳܐ ܪܰܒܳܐ ܕܪܰܘܪܒܺܝܢ ܓܶܦܰܘ̈ܗܝ: ܘܣܰܓܺܝ̈ܐܳܢ ܛܶܦܖ̈ܰܘܗܝ: ܘܰܓܦܶܬܳܐ ܗܳܕܶܐ ܐܰܟܪܟܰܬ ܥܶܩܳܖ̈ܶܝܗ̇ ܥܠܰܘܗܝ: ܘܕܳܠ̈ܝܳܬܳܗ̇ ܐܰܪܡܝܰܬ ܥܠܰܘܗܝ: ܕܢܰܫܩܶܝܗ̇ ܡܶܢ ܡܶܕܪܳܐ ܕܢܶܨܒܬܳܗ̇.
8 ܒܚܰܩܠܳܐ ܫܰܦܺܝܪܬܳܐ ܘܰܒܡܰܝ̈ܳܐ ܣܰܓܺܝ̈ܐܶܐ ܢܨܺܝܒܳܐ: ܕܬܶܥܒܶܕ ܛܰܖ̈ܦܶܐ ܘܬܶܛܥܰܢ ܦܺܐܖ̈ܶܐ: ܘܬܶܗܘܶܐ ܓܦܶܬܳܐ ܫܒܺܝܚܬܳܐ.
9 ܐܶܡܰܪ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܠܳܐ ܬܰܟܫܰܪ. ܐܶܠܳܐ ܥܶܩܳܖ̈ܶܝܗ̇ ܢܶܬܦܰܣܩܽܘܢ: ܘܦܺܐܖ̈ܶܝܗ̇ ܢܶܬܡܣܽܘܢ ܘܢܺܐܒܫܽܘܢ: ܘܟܽܠܗܽܘܢ ܛܰܖ̈ܦܶܐ ܕܡܰܘܥܺܝܬܳܗ̇ ܢܺܐܒܫܽܘܢ: ܘܠܳܐ ܒܰܕܪܳܥܳܐ ܪܳܡܳܐ ܘܠܳܐ ܒܥܰܡ̈ܡܶܐ ܣܰܓܺܝ̈ܐܶܐ: ܢܶܥܩܪܺܝܗ̇ ܡܶܢ ܥܶܩܳܪܳܗ̇.
10 ܗܳܐ ܢܨܺܝܒܳܐ ܐܶܠܳܐ ܠܳܐ ܬܰܟܫܰܪ: ܘܡܳܐ ܕܢܶܫܒܰܬ ܒܳܗ̇ ܪܽܘܚܳܐ ܕܫܰܘܒܳܐ: ܝܳܒܫܳܐ ܒܡܶܕܪܳܐ ܕܡܰܘܥܺܝܬܳܗ̇.
11 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
12 ܒܰܪܢܳܫܳܐ: ܐܶܡܰܪ ܠܒܰܝܬܳܐ ܡܡܰܪܡܪܳܢܳܐ: ܠܳܐ ܝܳܕܥܺܝܬܽܘܢ ܡܳܢܳܐ ܐܶܢܶܝܢ ܗܳܠܶܝܢ: ܐܶܡܰܪ ܠܗܽܘܢ: ܗܳܐ ܐܳܬܶܐ ܡܰܠܟܳܐ ܕܒܳܒܶܠ ܠܽܐܘܪܺܫܠܶܡ: ܘܕܳܒܰܪ ܠܡܰܠܟܳܗ̇ ܘܰܠܪܰܘܖ̈ܒܳܢܶܝܗ̇ ܘܡܰܘܒܶܠ ܠܗܽܘܢ ܠܒܳܒܶܠ.
13 ܘܢܳܣܶܒ ܡܶܢ ܙܰܪܥܳܐ ܕܡܰܠܟܽܘܬܳܐ: ܘܰܡܩܺܝܡ ܥܰܡܶܗ ܩܝܳܡܳܐ: ܘܥܳܐܶܠ ܥܰܡܶܗ ܒܡܰܘܡܳܬܳܐ: ܘܕܳܒܰܪ ܠܫܰܠܺܝ̈ܛܶܐ ܕܰܐܪܥܳܐ ܕܠܳܐ ܢܶܬܬܪܺܝܡܽܘܢ.
14 ܐܶܠܳܐ ܬܶܗܘܶܐ ܡܰܠܟܽܘܬܗܽܘܢ ܡܰܟܺܝܟܳܐ: ܘܢܶܛܪܽܘܢ ܩܝܳܡܶܗ: ܘܰܢܩܺܝܡܽܘܢ ܥܰܡܶܗ.
15 ܘܢܶܡܪܰܕ ܥܠܰܘܗܝ: ܘܰܢܫܰܕܰܪ ܐܺܝܙܓܰܕܰܘ̈ܗܝ ܠܡܶܨܪܶܝܢ: ܕܢܶܬܠܽܘܢ ܠܶܗ ܖ̈ܰܟܫܳܐ ܘܥܰܡܳܐ ܣܰܓܺܝܐܳܐ: ܠܳܐ ܢܰܟܫܰܪ ܘܠܳܐ ܢܶܬܦܰܨܶܐ ܡܰܢ ܕܗܳܟܰܢܳܐ ܥ̣ܒܰܕ.
16 ܚܰܝ ܐ̱ܢܳܐ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܕܒܰܐܬܪܳܐ ܕܰܐܩܺܝܡܺܝܘܗܝ ܡܰܠܟܳܐ: ܘܫ̣ܳܛ ܡܰܘܡܳܬܝ ܘܒܰܛܶܠ ܩܝܳܡܝ: ܒܓܰܘ ܒܳܒܶܠ ܢܡܽܘܬ.
17 ܘܠܳܐ ܒܚܰܝܠܳܐ ܪܰܒܳܐ: ܘܳܐܦܠܳܐ ܒܖ̈ܰܟܫܳܐ ܣܰܓܺܝܐܳܐ: ܢܶܥܒܶܕ ܥܰܡܶܗ ܦܶܪܥܽܘܢ ܩܪܳܒܳܐ: ܐܶܠܳܐ ܒܰܟܡܺܐܢ̈ܶܐ ܘܰܒܕܰܘ̈ܩܶܐ ܢܰܘܒܶܕ ܢܰܦ̈ܫܳܬܳܐ ܣܰܓܺܝ̈ܐܳܬܳܐ.
18 ܥܰܠ ܕܫ̣ܳܛ ܡܰܘܡܳܬܳܐ ܘܒ̣ܰܛܶܠ ܩܝܳܡܳܐ: ܢܰܫܠܶܡ ܐܺܝܕܶܗ ܘܠܳܐ ܢܶܬܦܰܨܶܐ: ܥܰܠ ܕܰܥ̣ܒܰܕ ܗܳܠܶܝܢ ܟܽܠܗܶܝܢ.
19 ܡܶܛܽܠ ܗܳܠܶܝܢ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ. ܚܰܝ ܐ̱ܢܳܐ: ܥܰܠ ܕܫ̣ܳܛ ܡܰܘܡܳܬܝ: ܘܒܰܛܶܠ ܩܝܳܡܝ: ܐܰܣܩܺܝܗ̇ ܒܪܺܝܫܶܗ.
20 ܘܶܐܦܪܽܘܣ ܡܨܺܝܕܬܝ ܥܠܰܘܗܝ ܘܢܶܬܬܚܶܕ ܒܳܗ̇: ܘܰܐܘܒܠܺܝܘܗܝ ܠܒܳܒܶܠ ܠܰܐܪܥܳܐ ܕܟܰܠܕܳܝ̈ܶܐ: ܘܶܐܕܽܘܢܺܝܘܗܝ ܬܰܡܳܢ ܥܰܠ ܥܰܘܠܳܐ ܕܰܐܥܠܺܝ ܒܺܝ.
21 ܘܟܽܠܗܽܘܢ ܚܺܐܖ̈ܰܘܗܝ ܘܟܽܠܗܽܘܢ ܩܰܖ̈ܺܝܒܰܘܗܝ ܢܶܦܠܽܘܢ ܒܚܰܪܒܳܐ: ܘܰܐܝܠܶܝܢ ܕܡܶܫܬܰܚܪܺܝܢ ܢܶܬܕܪܽܘܢ ܠܟܽܠ ܪܽܘܚ: ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ ܡ̣ܰܠܠܶܬ.
22 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܶܣܰܒ ܡܶܢ ܓܒܰܝ̈ܳܐ ܕܥܰܖ̈ܩܶܐ ܪܳܡܳܐ: ܘܡܶܢ ܪܺܝܫܶܗ ܐܶܩܛܽܘܡ ܠܶܒܶܗ: ܘܶܐܨܽܘܒ ܥܰܠ ܛܽܘܖ̈ܶܐ ܖ̈ܳܡܶܐ ܘܰܡܥܰܠܰܝ̈ܳܐ.
23 ܒܛܽܘܖ̈ܶܐ ܕܺܝܣܪܳܐܶܝܠ ܐܶܨܒܺܝܘܗܝ: ܘܢܶܛܥܰܢ ܛܰܖ̈ܦܶܐ ܘܢܶܥܒܶܕ ܦܺܐܖ̈ܶܐ: ܘܢܶܗܘܶܐ ܐܰܪܙܳܐ ܫܒܺܝܚܳܐ: ܘܬܶܫܟܰܢ ܒܶܗ ܟܽܠܳܗ̇ ܦܳܪܰܚܬܳܐ ܕܓܶܦܳܐ: ܘܰܒܛܶܠܳܠܳܐ ܕܣܰܘ̈ܟܰܘܗܝ ܢܶܫܟܢܽܘܢ.
24 ܘܢܶܕܥܽܘܢ ܟܽܠܗܽܘܢ ܐܺܝ̈ܠܳܢܶܐ ܕܕܰܒܪܳܐ: ܕܶܐܢܳܐ ܡܳܪܝܳܐ ܐܰܡܟܶ݀ܬ ܩܰܝܣܳܐ ܪܳܡܳܐ: ܘܰܐܪܺܝܡܶ݀ܬ ܩܰܝܣܳܐ ܡܰܟܺܝܟܳܐ: ܘܰܐܘܒܫܶ݀ܬ ܩܰܝܣܳܐ ܪܰܛܺܝܒܳܐ: ܘܰܐܘܥܺܝ݀ܬ ܩܰܝܣܳܐ ܝܰܒܺܝܫܳܐ: ܐܶܢܳܐ ܡܳܪܝܳܐ ܡ̣ܰܠܠܶܬ ܘܥ̣ܶܒܕܶܬ.