Ezekiel 25
The Book of Ezekiel
܀ ܚܙܩܝܐܝܠ ܟܗ ܀
1 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܣܺܝܡ ܐܰܦܰܝ̈ܟ ܥܰܠ ܒܢܰܝ̈ ܥܰܡܽܘܢ: ܘܶܐܬܢܰܒܳܐ ܥܠܰܝܗܽܘܢ.
3 ܘܶܐܡܰܪ ܠܰܒܢܰܝ̈ ܥܰܡܽܘܢ: ܫܡܰܥܘ ܦܶܬܓܳܡܶܗ ܕܡܳܪܶܐ ܡܳܖ̈ܰܘܳܬܳܐ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܶܐܡܰܪܬܽܘܢ ܐܰܚܳܢ ܥܰܠ ܡܰܩܕܫܝ ܕܶܐܬܛܰܘܰܫ: ܘܥܰܠ ܐܰܪܥܳܐ ܕܺܝܣܪܳܐܶܝܠ ܕܚܶܪܒܰܬ: ܘܥܰܠ ܕܒܶܝܬ ܝܺܗܽܘܕܳܐ ܕܶܐܙܰܠܘ ܒܰܫܒܺܝܬܳܐ.
4 ܡܶܛܽܠ ܗܳܢܳܐ ܗܳܐ ܝܳܗܶܒ ܐ̱ܢܳܐ ܠܶܟܝ ܠܰܒܢܰܝ̈ ܡܰܕܢܚܳܐ ܠܝܽܘܪܬܳܢܳܐ: ܘܢܶܥܡܰܪ ܒܶܟܝ ܚܰܝܠܗܽܘܢ: ܘܢܶܩܫܽܘܢ ܒܶܟܝ ܡܰܫܟܢܰܝ̈ܗܽܘܢ: ܗܶܢܽܘܢ ܢܶܐܟܠܽܘܢ ܦܺܐܖ̈ܰܝܟܝ: ܘܗܶܢܽܘܢ ܢܶܫܬܽܘܢ ܚܰܠܒܶܟܝ.
5 ܘܶܐܬܠܺܝܗ̇ ܠܪܰܒܰܬ ܠܰܪܒܳܥܳܐ ܕܓܰܡ̈ܠܶܐ: ܘܠܰܒܢܰܝ̈ ܥܰܡܽܘܢ ܠܡܰܪܒܥܳܐ ܕܥܳܢ̈ܳܐ: ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.
6 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܰܢܩܰܫܬܝ ܒܺܐܝܕܰܝ̈ܟܝ: ܘܰܪܦܰܣܬܝ ܒܖ̈ܶܓܠܰܝܟܝ: ܘܰܚܕܺܝܬܝ ܒܢܰܦܫܶܟܝ ܥܰܠ ܐܰܪܥܳܐ ܕܺܝܣܪܳܐܶܝܠ.
7 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܐܶܢܳܐ ܡܪܺܝܡ ܐ̱ܢܳܐ ܐܺܝܕܝ ܥܠܰܝܟܝ: ܘܶܐܬܠܶܟܝ ܒܶܙܬܳܐ ܠܥܰܡ̈ܡܶܐ ܘܰܐܣܺܝܦܶܟܝ ܡܶܢ ܥܰܡ̈ܡܶܐ: ܘܰܐܘܒܕܶܟܝ ܡܶܢ ܡܕܺܝ̈ܢܳܬܳܐ: ܘܰܐܚܪܒܶܟܝ ܘܬܶܕܥܺܝܢ ܕܶܐܢܳܐ ܐ̱ܢܳܐ ܡܳܪܝܳܐ. ܥܰܠ ܡܽܘܐܳܒ.
8 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܶܐܡܰܪ ܡܽܘܐܳܒ ܘܣܳܥܺܝܪ: ܗܳܐ ܒܟܽܠܗܽܘܢ ܥܰܡ̈ܡܶܐ ܕܒܶܝܬ ܝܺܗܽܘܕܳܐ.
9 ܡܶܛܽܠ ܗܳܢܳܐ ܗܳܐ ܡܰܪܬܰܥ ܐ̱ܢܳܐ ܟܰܬܦܶܗ ܕܡܽܘܐܳܒ ܡܶܢ ܡܕܺܝ̈ܢܳܬܳܐ: ܡܶܢ ܡܕܺܝ̈ܢܳܬܶܗ ܘܡܶܢ ܚܕܳܪܰܘܗܝ: ܫܽܘܒܚܳܐ ܕܰܐܪܥܳܐ ܕܒܶܝܬ ܐܰܫܺܝܡܽܘܢ ܘܕܰܒܥܶܠܡܽܘܢ ܘܰܕܩܽܘܪܝܰܬܺܝܡ.
10 ܕܰܒܢܰܝ̈ ܡܰܕܢܚܳܐ: ܘܕܰܒܢܰܝ̈ ܥܰܡܽܘܢ: ܐܶܬܠܺܝܗ̇ ܠܝܽܘܪܬܳܢܳܐ: ܕܠܳܐ ܬܶܬܕܟܰܪ ܪܰܒܰܬ ܕܰܒܢܰܝ̈ ܥܰܡܽܘܢ ܒܥܰܡ̈ܡܶܐ.
11 ܘܰܒܡܽܘܐܳܒ ܐܶܥܒܶܕ ܕܺܝܢܳܐ: ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ. ܥܰܠ ܐܰܕܽܘܡ.
12 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܰܥܒܰܕ ܐܰܕܽܘܡ ܦܽܘܪܥܳܢܳܐ ܠܰܕܒܶܝܬ ܝܺܗܽܘܕܳܐ: ܘܶܐܠܰܡ ܐܶܠܡܳܐ ܘܛܰܢ ܒܗܽܘܢ.
13 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܐܶܢܳܐ ܡܪܺܝܡ ܐ̱ܢܳܐ ܐܺܝܕܝ ܥܰܠ ܐܰܕܽܘܡ: ܘܡܰܘܒܶܕ ܐ̱ܢܳܐ ܡܶܢܗ̇ ܒܢܰܝ̈ܢܳܫܳܐ ܘܰܒܥܺܝܪܳܐ: ܘܶܐܥܒܕܺܝܗ̇ ܠܚܽܘܪܒܳܐ ܡܶܢ ܬܰܝܡܰܢ ܘܕܳܪܳܢ: ܘܰܒܚܰܪܒܳܐ ܬܶܦܶܠ.
14 ܘܶܐܥܒܶܕ ܦܽܘܪܥܳܢܝ ܒܰܐܕܽܘܡ: ܒܝܰܕ ܥܰܡܝ ܝܺܣܪܳܐܶܝܠ: ܘܢܶܬܦܰܪܥܽܘܢ ܡܶܢ ܐܰܕܽܘܡ ܐܰܝܟ ܪܽܘܓܙܝ ܘܰܐܝܟ ܚܶܡܬܝ: ܘܢܶܕܥܽܘܢܶܗ ܠܦܽܘܪܥܳܢܝ ܐܳܡܰܪ ܡܳܪܶܐ ܡܳܖ̈ܰܘܳܬܳܐ. ܥܰܠ ܦܠܶܫܬ.
15 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܰܥܒܰܕܘ ܦܶܠܫܬܳܝ̈ܶܐ ܦܽܘܪܥܳܢܳܐ: ܘܶܐܬܦܪܰܥܘ ܦܽܘܪܥܳܢܳܐ ܒܪܶܓܬܳܐ ܕܢܰܦܫܗܽܘܢ: ܕܰܢܚܰܒܠܽܘܢ ܪܳܚܡܽܘܬܳܐ ܕܥܳܠܰܡ.
16 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܡܪܺܝܡ ܐ̱ܢܳܐ ܐܺܝܕܝ ܥܰܠ ܦܶܠܫܬܳܝ̈ܶܐ: ܘܡܰܘܒܶܕ ܐ̱ܢܳܐ ܠܰܩܪܺܛܺܐ: ܘܡܰܘܒܶܕ ܐ̱ܢܳܐ ܫܰܪܟܳܐ ܕܰܣܦܳܖ̈ܰܝ ܝܰܡܳܐ.
17 ܘܶܐܥܒܶܕ ܡܶܢܗܽܘܢ ܦܽܘܖ̈ܥܳܢܰܝ ܪܰܘܖ̈ܒܶܐ ܒܡܰܟܣܳܢܽܘܬܳܐ ܘܰܒܪܽܘܓܙܳܐ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ: ܡܳܐ ܕܥܶܒܕܶܬ ܡܶܢܗܽܘܢ ܦܽܘܖ̈ܥܳܢܰܝ.