Ezekiel 46
The Book of Ezekiel
܀ ܚܙܩܝܐܝܠ ܡܘ ܀
1 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܬܰܪܥܳܐ ܕܕܳܪܬܳܐ ܓܰܘܳܝܬܳܐ ܕܚܳܐܰܪ ܠܡܰܕܢܚܳܐ: ܢܶܗܘܶܐ ܐܰܚܺܝܕ ܫܬܳܐ ܝܰܘܡܺܝ̈ܢ ܕܡܶܬܥܒܶܕ ܒܗܽܘܢ ܥܒܳܕܳܐ: ܘܰܒܝܰܘܡܳܐ ܕܫܰܒܬܳܐ ܢܶܬܦܬܰܚ: ܘܰܒܝܰܘܡܳܐ ܕܪܺܝܫ ܝܰܪܚܳܐ ܢܶܬܦܬܰܚ.
2 ܘܢܶܥܽܘܠ ܡܕܰܒܪܳܢܳܐ ܒܡܰܥܠܳܢܳܐ ܕܶܐܣܟܽܘܦܬܳܐ ܕܬܰܪܥܳܐ ܡܶܢ ܠܒܰܪ: ܘܰܢܩܽܘܡ ܥܰܠ ܐܶܣܟܽܘܦܬܶܗ ܕܬܰܪܥܳܐ: ܘܰܢܩܰܪܒܽܘܢ ܟܳܗ̈ܢܶܐ ܝܰܩܕܰܘ̈ܗܝ ܫܰܠ̈ܡܶܐ ܘܩܽܘܖ̈ܒܳܢܰܘܗܝ: ܘܢܶܣܓܽܘܕ ܒܶܐܣܟܽܘܦܬܳܐ ܕܬܰܪܥܳܐ ܘܢܶܦܽܘܩ: ܘܬܰܪܥܳܐ ܠܳܐ ܢܶܬܬܚܶܕ ܥܕܰܡܳܐ ܠܪܰܡܫܳܐ.
3 ܘܢܶܣܓܕܽܘܢ ܥܰܡܳܐ ܕܰܐܪܥܳܐ ܒܡܰܥܠܳܢܶܗ ܕܬܰܪܥܳܐ ܗܰܘ: ܒܫܰܒ̈ܶܐ ܘܰܒܪܺܝܫ ܝܰܖ̈ܚܶܐ ܩܕܳܡ ܡܳܪܝܳܐ.
4 ܘܝܰܩ̈ܕܶܐ ܫܰܠ̈ܡܶܐ ܕܰܡܩܰܪܶܒ ܡܕܰܒܪܳܢܳܐ ܩܕܳܡ ܡܳܪܝܳܐ ܒܝܰܘܡܳܐ ܕܫܰܒܬܳܐ: ܫܬܳܐ ܐܶܡܖ̈ܺܝܢ ܕܠܰܝܬ ܒܗܽܘܢ ܡܽܘܡܳܐ: ܘܕܶܟܪܳܐ ܕܠܰܝܬ ܒܶܗ ܡܽܘܡܳܐ.
5 ܘܰܣܡܺܝܕܳܐ ܢܶܥܒܶܕ: ܣܰܐܬܳܐ ܠܬܰܘܪܳܐ: ܘܣܰܐܬܳܐ ܠܕܶܟܪܳܐ: ܘܠܶܐܡܪܳܐ ܐܰܝܟ ܕܡܳܛܶܐ ܒܺܐܝ̈ܕܰܘܗܝ: ܡܶܫܚܳܐ ܕܶܝܢ ܗܶܡܺܝܢܳܐ ܠܣܰܐܬܳܐ.
6 ܘܰܒܝܰܘܡܳܐ ܕܪܺܝܫ ܝܰܪܚܳܐ: ܬܰܘܪܳܐ ܕܠܰܝܬ ܒܶܗ ܡܽܘܡܳܐ: ܘܶܫܬܳܐ ܐܶܡܖ̈ܺܝܢ ܕܠܰܝܬ ܒܗܽܘܢ ܡܽܘܡܳܐ: ܘܕܶܟܪܳܐ ܕܠܰܝܬ ܒܶܗ ܡܽܘܡܳܐ.
7 ܘܰܣܡܺܝܕܳܐ ܢܶܥܒܶܕ: ܣܰܐܬܳܐ ܠܬܰܘܪܳܐ: ܘܣܰܐܬܳܐ ܠܕܶܟܪܳܐ: ܘܠܶܐܡܪܳܐ ܐܰܝܟ ܕܡܳܛܶܐ ܒܺܐܝܕܰܘ̈ܗܝ: ܡܶܫܚܳܐ ܕܶܝܢ ܗܶܡܺܝܢܳܐ ܠܣܰܐܬܳܐ.
8 ܘܡܳܐ ܕܥܳܐܶܠ ܡܕܰܒܪܳܢܳܐ: ܒܶܐܣܟܽܘܦܬܶܗ ܕܬܰܪܥܳܐ ܢܶܥܽܘܠ ܘܒܳܗ̇ ܢܶܦܽܘܩ.
9 ܘܡܳܐ ܕܥܳܐܠܺܝܢ ܥܰܡܳܐ ܕܰܐܪܥܳܐ ܩܕܳܡ ܡܳܪܝܳܐ ܒܙܰܒܢܳܐ ܕܥܰܕܥܺܐܕܳܐ: ܡܰܢ ܕܥܳܐܶܠ ܒܬܰܪܥܳܐ ܓܰܪܒܝܳܝܳܐ ܠܡܶܣܓܰܕ: ܢܶܦܽܘܩ ܠܶܗ ܒܬܰܪܥܳܐ ܬܰܝܡܢܳܝܳܐ: ܘܡܰܢ ܕܥܳܐܶܠ ܒܬܰܪܥܳܐ ܬܰܝܡܢܳܝܳܐ: ܢܶܦܽܘܩ ܠܶܗ ܒܬܰܪܥܳܐ ܓܰܪܒܝܳܝܳܐ: ܘܠܳܐ ܢܶܗܦܽܘܟ ܒܬܰܪܥܳܐ ܕܥܳܐܶܠ: ܐܶܠܳܐ ܠܩܽܘܒܠܶܗ ܢܶܦܽܘܩ.
10 ܡܕܰܒܪܳܢܳܐ ܕܶܝܢ ܕܒܰܝܢܳܬܟܽܘܢ: ܒܬܰܪܥܳܐ ܕܥܳܐܶܠ ܒܶܗ ܢܶܦܽܘܩ.
11 ܘܰܒܙܰܒܢܳܐ ܕܥܰܕܥܺܐܕܳܐ: ܢܶܗܘܶܐ ܣܡܺܝܕܳܐ ܣܰܐܬܳܐ ܠܬܰܘܪܳܐ: ܘܣܰܐܬܳܐ ܠܕܶܟܪܳܐ: ܘܠܶܐܡܪܳܐ ܐ̱ܢܳܫ ܐܰܝܟ ܕܡܳܛܶܐ ܒܺܐܝ̈ܕܰܘܗܝ: ܡܶܫܚܳܐ ܕܶܝܢ ܗܶܡܺܝܢܳܐ ܠܣܰܐܬܳܐ.
12 ܘܡܳܐ ܕܰܡܩܰܪܶܒ ܡܕܰܒܪܳܢܳܐ ܝܰܩ̈ܕܶܐ ܫܰܠ̈ܡܶܐ: ܐܰܘ ܩܽܘܖ̈ܒܳܢܶܐ ܦܽܘܪܫܳܢܳܐ ܠܡܳܪܝܳܐ: ܢܶܬܦܬܰܚ ܠܶܗ ܬܰܪܥܳܐ ܕܚܳܐܰܪ ܠܡܰܕܢܚܳܐ ܕܰܐܚܺܝܕ: ܘܰܢܩܰܪܶܒ ܝܰܩܕܰܘ̈ܗܝ ܫܰܠ̈ܡܶܐ ܘܩܽܘܖ̈ܒܳܢܰܘܗܝ: ܘܢܶܐܚܕܺܝܘܗܝ ܠܬܰܪܥܳܐ ܘܗܳܝܕܶܝܢ ܢܶܦܽܘܩ: ܐܰܝܟ ܕܥܳܒܶܕ ܒܝܰܘܡܳܐ ܕܫܰܒܬܳܐ.
13 ܘܶܐܡܪܳܐ ܒܰܪ ܫܰܢ̱ܬܳܐ ܕܠܰܝܬ ܒܗ ܡܽܘܡܳܐ: ܢܶܗܘܶܐ ܡܩܰܪܶܒ ܒܝܰܘܡܳܐ: ܝܰܩܕܳܐ ܫܰܠܡܳܐ ܠܡܳܪܝܳܐ: ܡܶܢ ܨܦܰܪ ܠܰܨܦܰܪ.
14 ܘܰܣܡܺܝܕܳܐ ܢܩܰܪܶܒ ܥܠܰܘܗܝ ܡܶܢ ܨܦܰܪ ܠܰܨܦܰܪ: ܚܰܕ ܡܶܢ ܫܬܳܐ ܠܣܰܐܬܳܐ: ܘܡܶܫܚܳܐ ܚܕܳܐ ܡܶܢ ܬܠܳܬ ܡܢܰܘ̈ܳܬܶܗ ܕܗܶܡܺܝܢܳܐ: ܠܰܡܦܳܠܶܗ ܠܰܣܡܺܝܕܳܐ ܠܡܳܪܝܳܐ: ܢܳܡܽܘܣܳܐ ܠܥܳܠܰܡ ܐܰܡܺܝܢܳܐܺܝܬ.
15 ܘܰܢܩܰܪܒܽܘܢ ܐܶܡܖ̈ܶܐ ܘܰܣܡܺܝܕܳܐ ܘܡܶܫܚܳܐ ܡܶܢ ܨܦܰܪ ܠܰܨܦܰܪ: ܝܰܩܕܳܐ ܫܰܠܡܳܐ ܐܰܡܺܝܢܳܐܺܝܬ.
16 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܡܕܰܒܪܳܢܳܐ ܟܰܕ ܢܶܬܶܠ ܡܰܘܗܰܒܬܳܐ ܠܚܰܕ ܡܶܢ ܒܢܰܘ̈ܗܝ: ܝܳܪܬܽܘܬܶܗ ܠܰܒܢܰܘ̈ܗܝ ܬܶܗܘܶܐ.
17 ܘܟܰܕ ܢܶܬܶܠ ܡܰܘܗܰܒܬܳܐ ܡܶܢ ܝܳܪܬܽܘܬܶܗ ܠܚܰܕ ܡܶܢ ܥܰܒܕܰܘ̈ܗܝ: ܬܶܗܘܶܐ ܠܶܗ ܥܕܰܡܳܐ ܠܫܰܢ̱ܬܳܐ ܕܡܶܬܚܰܪܰܪ: ܘܬܶܗܘܶܐ ܠܶܗ ܠܰܡܕܰܒܪܳܢܳܐ: ܝܳܪܬܽܘܬܳܐ ܕܶܝܢ ܕܰܒܢܰܘ̈ܗܝ ܠܗܽܘܢ ܬܶܗܘܶܐ.
18 ܘܠܳܐ ܢܶܣܰܒ ܡܕܰܒܪܳܢܳܐ ܡܶܢ ܝܳܪܬܽܘܬܶܗ ܕܥܰܡܳܐ: ܘܠܳܐ ܢܶܥܠܽܘܒ ܐܶܢܽܘܢ ܡܶܢ ܝܽܘܪܬܳܢܗܽܘܢ: ܐܶܠܳܐ ܡܶܢ ܝܳܪܬܽܘܬܶܗ ܢܰܘܪܶܬ ܠܰܒܢܰܘ̈ܗܝ: ܕܠܳܐ ܢܶܬܒܰܕܪܽܘܢ ܥܰܡܝ ܐ̱ܢܳܫ ܡܶܢ ܝܳܪܬܽܘܬܶܗ.
19 ܘܰܐܥܠܰܢܝ ܒܡܰܥܠܳܢܳܐ ܕܥܰܠ ܓܶܢ̱ܒ ܬܰܪܥܳܐ ܕܰܐܟܣܶܕܪܳܐ ܓܰܘܳܝܬܳܐ ܕܩܽܘܕܫܳܐ ܕܟܳܗ̈ܢܶܐ: ܕܚܳܝܪܳܐ ܠܓܰܪܒܝܳܐ: ܘܰܚܙܺܝ݀ܬ ܕܺܐܝܬ ܬܰܡܳܢ ܐܰܬܪܳܐ ܒܰܫܦܽܘܠܶܝ̈ܗ̇ ܡܶܢ ܡܰܥܪܒܳܐ.
20 ܘܶܐܡܰܪ ܠܺܝ: ܗܳܢܰܘ ܐܰܬܪܳܐ ܕܰܡܒܰܫܠܺܝܢ ܒܶܗ ܟܳܗ̈ܢܶܐ ܬܰܕܟܺܝܬܳܐ ܕܰܚܛܳܗ̈ܶܐ: ܘܳܐܦܶܝܢ ܒܶܗ ܣܡܺܝܕܳܐ: ܕܠܳܐ ܢܶܦܩܽܘܢ ܠܕܳܪܬܳܐ ܒܰܪܳܝܬܳܐ ܘܰܢܩܰܕܫܽܘܢܶܗ ܠܥܰܡܳܐ.
21 ܘܰܐܦܩܰܢܝ ܠܕܳܪܬܳܐ ܒܰܪܳܝܬܳܐ: ܘܰܐܥܒܪܰܢܝ ܥܰܠ ܐܰܪܒܥܳܐ ܣܶܛܖ̈ܶܝܗ̇ ܕܕܳܪܬܳܐ: ܘܰܚܙܺܝ݀ܬ ܕܳܪܬܳܐ ܒܰܣܛܰܪ ܕܳܪܬܳܐ: ܘܕܳܪܬܳܐ ܐ̱ܚܪܺܬܳܐ ܒܣܶܛܪܳܐ ܐ̱ܚܪܺܢܳܐ ܕܕܳܪܬܳܐ.
22 ܒܰܐܪܒܥܳܐ ܣܶܛܖ̈ܶܝܗ̇ ܕܕܳܪܬܳܐ ܕܳܖ̈ܶܐ ܕܰܩ̈ܕܩܳܬܳܐ: ܐܰܪܒܥܺܝܢ ܐܰܡܺܝ̈ܢ ܐܽܘܪܟܗܶܝܢ: ܘܰܬܠܳܬܺܝܢ ܦܬܳܝܗܶܝܢ.
23 ܘܰܐܟܣܶܕܖ̈ܶܐ ܚܳܕܖ̈ܳܢ ܠܰܐܖ̈ܒܰܥܬܰܝܗܶܝܢ.
24 ܘܶܐܡܰܪ ܠܺܝ: ܗܳܢܰܘ ܒܶܝܬ ܛܰܒܳܚ̈ܶܐ: ܕܰܡܒܰܫܠܺܝܢ ܒܶܗ ܕܶܒܚܬܳܐ ܕܥܰܡܳܐ ܡܫܰܡܫܳܢܰܘ̈ܗܝ ܕܒܰܝܬܳܐ.