Ezekiel 4
The Book of Ezekiel
܀ ܚܙܩܝܐܝܠ ܕ ܀
1 ܐܰܢ̱ܬ ܕܶܝܢ ܒܰܪܢܳܫܳܐ: ܣܰܒ ܠܳܟ ܠܒܶܬܳܐ ܘܣܺܝܡܶܝܗ̇ ܩܕܳܡܰܝܟ: ܘܰܪܫܽܘܡ ܥܠܶܝܗ̇ ܡܕܺܝܢ̱ܬܳܐ ܐܽܘܪܺܫܠܶܡ.
2 ܘܰܥܒܶܕ ܥܠܶܝܗ̇ ܐܽܘܠܨܳܢܳܐ: ܘܰܒܢܺܝ ܥܠܶܝܗ̇ ܩܰܠܩܽܘ̈ܡܶܐ: ܘܰܐܟܡܶܢ ܥܠܶܝܗ̇ ܟܡܺܐܢ̈ܶܐ: ܘܰܐܫܪܳܐ ܥܠܶܝܗ̇ ܡܰܫܖ̈ܝܳܬܳܐ: ܘܰܥܒܶܕ ܠܳܗ̇ ܙܘܺܝܕܢ̈ܶܐ ܟܰܕ ܚܳܕܪܳܐ.
3 ܘܰܐܢ̱ܬ ܣܰܒ ܠܳܟ ܛܺܓܢܳܐ ܕܦܰܪܙܠܳܐ: ܘܰܥܒܶܕܳܝܗܝ ܐܶܣܬܳܐ ܕܦܰܪܙܠܳܐ ܒܰܝ̈ܢܰܝܟ ܠܰܡܕܺܝܢ̱ܬܳܐ: ܘܛܰܝܶܒ ܐܰܦܰܝ̈ܟ ܥܠܶܝܗ̇: ܘܬܶܗܘܶܐ ܒܰܚܒܽܘܫܝܳܐ ܘܬܶܐܠܨܺܝܗ̇: ܗܳܕܶܐ ܐܳܬܶܐ ܗܺܝ ܠܰܕܒܶܝܬ ܝܺܣܪܳܐܶܝܠ.
4 ܘܰܐܢ̱ܬ ܕܡܰܟ ܥܰܠ ܣܶܛܪܳܐ ܕܣܶܡܳܠܳܐ: ܘܣܺܝܡ ܥܰܘܠܳܐ ܕܒܶܝܬ ܝܺܣܪܳܐܶܝܠ ܥܠܰܘܗܝ: ܡܶܢܝܳܢ ܝܰܘ̈ܡܳܬܳܐ ܕܕܳܡܶܟ ܐܰܢ̱ܬ ܥܠܰܘܗܝ ܬܶܫܩܽܘܠ ܥܰܘܠܗܽܘܢ.
5 ܘܶܐ̱ܢܳܐ ܝܶܗܒܶ݀ܬ ܠܳܟ ܬܪܶܝܢ ܥܰܘ̈ܠܺܝܢ ܠܡܶܢܝܳܢܳܐ ܕܝܰܘ̈ܡܳܬܳܐ: ܬܠܳܬܡܳܐܐ ܘܬܶܫܥܺܝܢ ܝܰܘܡܺܝ̈ܢ: ܘܬܶܫܩܽܘܠ ܥܰܘܠܳܐ ܕܒܶܝܬ ܝܺܣܪܳܐܶܝܠ.
6 ܘܰܬܫܰܡܠܶܐ ܗܳܠܶܝܢ: ܘܬܶܕܡܰܟ ܥܰܠ ܣܶܛܪܳܟ ܕܝܰܡܺܝܢܳܐ: ܘܬܶܫܩܽܘܠ ܥܰܘܠܳܐ ܕܒܶܝܬ ܝܺܗܽܘܕܳܐ ܐܰܪܒܥܺܝܢ ܝܰܘܡܺܝ̈ܢ: ܝܰܘܡܳܐ ܠܫܰܢ̱ܬܳܐ ܝܶܗܒܶ݀ܬ ܠܳܟ.
7 ܘܥܰܠ ܐܽܘܠܨܳܢܳܗ̇ ܕܽܐܘܪܺܫܠܶܡ ܬܛܰܝܶܒ ܐܰܦܰܝ̈ܟ: ܘܰܕܪܳܥܳܟ ܬܰܥܫܶܢ: ܘܬܶܬܢܰܒܶܐ ܥܠܶܝܗ̇.
8 ܗܳܐ ܐܰܪܡܺܝ݀ܬ ܥܠܰܝܟ ܫܺܫ̈ܠܳܬܳܐ: ܘܠܳܐ ܬܶܬܗܦܰܟ ܡܶܢ ܣܶܛܪܳܟ ܠܣܶܛܪܳܟ: ܥܕܰܡܳܐ ܕܢܶܫܠܡܽܘܢ ܝܰܘ̈ܡܳܬܳܐ ܕܰܚܒܽܘܫܝܳܟ.
9 ܘܣܰܒ ܠܳܟ ܚ̈ܶܛܶܐ ܘܰܣܥܳܖ̈ܶܐ: ܘܓܽܘܡ̈ܶܐ ܘܰܛܠܰܦ̈ܚܶܐ: ܘܕܽܘܚܢܳܐ ܘܟܽܘ̈ܢܬܶܐ: ܘܰܐܪܡܳܐ ܐܶܢܽܘܢ ܒܡܳܐܢܳܐ ܚܰܕ: ܘܰܥܒܶܕ ܐܶܢܽܘܢ ܠܳܟ ܠܰܚܡܳܐ: ܠܡܶܢܝܳܢܳܐ ܕܝܰܘ̈ܡܳܬܳܐ ܕܕܳܡܶܟ ܐܰܢ̱ܬ ܥܰܠ ܣܶܛܪܳܟ: ܬܠܳܬܡܳܐܐ ܘܬܶܫܥܺܝܢ ܝܰܘܡܺܝ̈ܢ ܬܶܐܟܠܺܝܘܗܝ.
10 ܘܡܶܐܟܽܘܠܬܳܟ ܬܶܗܘܶܐ ܥܶܣܪܺܝܢ ܡܰܬܩܳܠܺܝ̈ܢ ܒܝܰܘܡܳܐ: ܡܶܢ ܥܶܕܳܢܳܐ ܠܥܶܕܳܢܳܐ.
11 ܘܡܰܝ̈ܳܐ ܒܰܟܝܳܠܬܳܐ ܬܶܫܬܶܐ. ܚܕܳܐ ܡܶܢ ܫܶܬ ܡܢܰܘ̈ܳܬܶܗ ܕܗܶܡܺܝܢܳܐ: ܡܶܢ ܥܶܕܳܢܳܐ ܠܥܶܕܳܢܳܐ ܬܶܫܬܶܐ.
12 ܘܪܰܥܦܳܐ ܕܰܣܥܳܖ̈ܶܐ ܬܶܐܟܽܘܠ: ܕܰܡܛܰܘܰܝ ܥܰܠ ܟܒܳܝ̈ܶܐ ܕܒܰܪܢܳܫܳܐ ܠܥܺܢܰܝܗܽܘܢ.
13 ܐܳܡܰܪ ܡܳܪܝܳܐ: ܗܳܟܰܢܳܐ ܢܶܐܟܠܽܘܢ ܒܢܰܝ̈ ܝܺܣܪܳܐܶܝܠ ܠܰܚܡܗܽܘܢ ܒܛܰܢܦܽܘܬܳܐ: ܒܶܝܬ ܥܰܡ̈ܡܶܐ ܕܶܐܕܚܽܘܩ ܐܶܢܽܘܢ ܠܬܰܡܳܢ.
14 ܘܶܐܡܪܶܬ ܐܰܠܳܗܳܐ ܡܳܪܶܐ ܡܳܖ̈ܰܘܳܬܳܐ: ܢܰܦܫܝ ܠܳܐ ܗܘܳܬ ܡܛܰܢܦܳܐ: ܘܰܕܡܰܪܥܳܐ ܘܕܰܬܒܺܝܪܳܐ ܠܚܰܝܘܬܳܐ ܠܳܐ ܐܶܟ̣ܠܶܬ ܡܶܢ ܛܰܠܝܽܘܬܝ ܘܰܥܕܰܡܳܐ ܠܝܰܘܡܳܢܳܐ: ܘܠܳܐ ܥܰܠ ܠܦܽܘܡܝ ܒܶܣܪܳܐ ܛܰܢܦܳܐ.
15 ܘܶܐܡܰܪ ܠܺܝ: ܗܳܐ ܝܶܗܒܶ݀ܬ ܠܳܟ ܟܒܳܝ̈ܶܐ ܕܬܰܘܖ̈ܶܐ ܚܠܳܦ ܟܒܳܝ̈ܶܐ ܕܰܒܢܰܝ̈ܢܳܫܳܐ: ܕܬܶܥܒܶܕ ܠܰܚܡܳܟ ܥܠܰܝܗܶܝܢ.
16 ܘܶܐܡܰܪ ܠܺܝ ܒܰܪܢܳܫܳܐ: ܗܳܐ ܬܳܒܰܪ ܐ̱ܢܳܐ ܩܰܢܝܳܐ ܕܰܥܒܽܘܪܳܐ ܒܽܐܘܪܺܫܠܶܡ: ܘܢܶܐܟܠܽܘܢ ܠܰܚܡܳܐ ܒܡܰܬܩܳܠܳܐ: ܘܡܰܝ̈ܳܐ ܒܨܰܗܳܘ̈ܢܶܐ ܒܰܟܝܳܠܬܳܐ ܢܶܫܬܽܘܢ.
17 ܘܢܶܗܘܽܘܢ ܨܪܺܝܟܺܝܢ ܠܠܰܚܡܳܐ ܘܰܠܡܰܝ̈ܳܐ: ܘܰܢܣܽܘܦܽܘܢ ܓܒܰܪ ܘܰܐܚܽܘܗܝ: ܘܢܶܬܡܣܽܘܢ ܒܥܰܘܠܗܽܘܢ.