Ezekiel 37
The Book of Ezekiel
܀ ܚܙܩܝܐܝܠ ܠܙ ܀
1 ܥܰܠ ܚܰܝܰܬ ܡܺܝ̈ܬܶܐ. ܘܰܗܘܳܬ ܥܠܰܝ ܐܺܝܕܶܗ ܕܡܳܪܝܳܐ: ܘܰܐܦܩܰܢܝ ܒܪܽܘܚܶܗ ܡܳܪܝܳܐ: ܘܰܐܫܪܝܰܢܝ ܒܰܦܩܰܥܬܳܐ: ܘܡܰܠܝܳܐ ܗܘܳܬ ܓܰܖ̈ܡܶܐ.
2 ܘܰܐܥܒܪܰܢܝ ܥܠܰܝܗܽܘܢ ܚܕܳܖ̈ܳܝܗܽܘܢ: ܘܰܚܙܺܝ݀ܬ ܕܣܰܓܺܝܐܺܝܢ ܛܳܒ ܒܰܦܩܰܥܬܳܐ: ܘܛܳܒ ܝܰܒܺܝܫܺܝܢ.
3 ܘܶܐܡܰܪ ܠܺܝ: ܒܰܪܢܳܫܳܐ: ܚܳܐܶܝܢ ܓܰܖ̈ܡܶܐ ܗܳܠܶܝܢ: ܘܶܐܡܪܶܬ ܐܰܢ̱ܬ ܗܽܘ ܝܳܕܰܥ ܡܳܪܶܐ ܡܳܖ̈ܰܘܳܬܳܐ.
4 ܘܶܐܡܰܪ ܠܺܝ ܐܶܬܢܰܒܳܐ ܥܰܠ ܓܰܖ̈ܡܶܐ ܗܳܠܶܝܢ ܘܶܐܡܰܪ ܠܗܽܘܢ ܓܰܖ̈ܡܶܐ ܝܰܒܺܝ̈ܫܶܐ: ܫܡܰܥܘ ܦܶܬܓܳܡܶܗ ܕܡܳܪܝܳܐ.
5 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ ܠܓܰܖ̈ܡܶܐ ܗܳܠܶܝܢ: ܗܳܐ ܐܶܢܳܐ ܡܰܥܶܠ ܐ̱ܢܳܐ ܒܟܽܘܢ ܪܽܘܚܳܐ ܘܬܺܚܽܘܢ.
6 ܘܶܐܬܶܠ ܥܠܰܝܟܽܘܢ ܓܝܳܕ̈ܶܐ: ܘܰܐܣܶܩ ܥܠܰܝܟܽܘܢ ܒܶܣܪܳܐ: ܘܶܐܩܪܽܘܡ ܥܠܰܝܟܽܘܢ ܡܶܫܟܳܐ: ܘܶܐܬܶܠ ܒܟܽܘܢ ܪܽܘܚܳܐ ܘܬܺܚܽܘܢ: ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.
7 ܘܶܐܬܢܰܒܺܝ݀ܬ ܐܰܝܟ ܕܦܰܩܕܰܢܝ: ܘܟܰܕ ܐܶܬܢܰܒܺܝ݀ܬ: ܗܘܳܐ ܩܳܠܳܐ ܘܙܰܘܥܳܐ: ܘܰܩ̣ܪܶܒܘ ܓܰܖ̈ܡܶܐ ܓܰܪܡܳܐ ܠܘܳܬ ܫܳܪܺܝܬܶܗ.
8 ܘܰܚܙܺܝ݀ܬ ܕܰܣܠܶܩܘ ܥܠܰܝܗܽܘܢ ܓܝܳܕ̈ܶܐ ܘܒܶܣܪܳܐ: ܘܶܐܬܩܪܶܡ ܥܠܰܝܗܽܘܢ ܡܶܫܟܳܐ ܡܶܢ ܠܥܶܠ: ܘܪܽܘܚܳܐ ܠܰܝܬ ܗܘܳܬ ܒܗܽܘܢ.
9 ܘܶܐܡܰܪ ܠܺܝ: ܐܶܬܢܰܒܳܐ ܥܰܠ ܪܽܘܚܳܐ: ܐܶܬܢܰܒܳܐ ܒܰܪܢܳܫܳܐ: ܘܶܐܡܰܪ ܠܪܽܘܚܳܐ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܬܳܝ ܪܽܘܚܳܐ ܡܶܢ ܐܰܪܒܰܥ ܖ̈ܽܘܚܶܐ: ܘܦܽܘܚܝ ܒܗܳܠܶܝܢ ܩܛܺܝ̈ܠܶܐ ܘܢܺܚܽܘܢ.
10 ܘܶܐܬܢܰܒܺܝ݀ܬ ܐܰܝܟ ܕܦܰܩܕܰܢܝ: ܘܥܶܠܰܬ ܒܗܽܘܢ ܪܽܘܚܳܐ ܘܰܚܝܰܘ: ܘܩܳܡܘ ܥܰܠ ܖ̈ܶܓܠܰܝܗܽܘܢ: ܚܰܝܠܳܐ ܕܛܳܒ ܣܰܓܺܝ.
11 ܘܶܐܡܰܪ ܠܺܝ: ܒܰܪܢܳܫܳܐ: ܗܳܠܶܝܢ ܓܰܖ̈ܡܶܐ ܟܽܠܗܽܘܢ ܕܰܒܢܰܝ̈ ܝܺܣܪܳܐܶܝܠ ܐܶܢܽܘܢ: ܕܳܐܡܪܺܝܢ ܗܘܰܘ ܝܺܒܶܫܘ ܓܰܖ̈ܡܰܝܢ: ܘܶܐܒܰܕ ܣܰܒܪܰܢ: ܘܰܒܛܶܠܢ ܠܰܢ.
12 ܡܶܛܽܠ ܗܳܢܳܐ ܐܶܬܢܰܒܳܐ ܘܶܐܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܦܳܬܰܚ ܐ̱ܢܳܐ ܩܰܒܖ̈ܰܝܟܽܘܢ: ܘܡܰܝܬܶܐ ܐ̱ܢܳܐ ܠܟܽܘܢ ܠܰܐܪܥܳܐ ܕܺܝܣܪܳܐܶܝܠ.
13 ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ: ܡܳܐ ܕܦܶܬܚܶ݀ܬ ܩܰܒܖ̈ܰܝܟܽܘܢ: ܘܡܳܐ ܕܰܐܣܶܩܬܟܽܘܢ ܡܶܢ ܩܰܒܖ̈ܰܝܟܽܘܢ.
14 ܐܶܬܶܠ ܪܽܘܚܝ ܒܟܽܘܢ ܘܬܺܚܽܘܢ: ܘܶܐܫܒܽܘܩܟܽܘܢ ܒܰܐܪܥܟܽܘܢ: ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ: ܐܶܡܪܶܬ ܘܥܳܒܶܕ ܐ̱ܢܳܐ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ. ܥܰܠ ܕܣܳܠܩܺܝܢ ܘܗܳܘܶܝܢ ܚܰܕ ܥܰܡܳܐ ܘܰܚܕܳܐ ܡܰܠܟܽܘܬܳܐ
15 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
16 ܐܰܢ̱ܬ ܕܶܝܢ ܒܰܪܢܳܫܳܐ: ܣܰܒ ܠܳܟ ܩܰܝܣܳܐ ܚܰܕ: ܘܰܟܬܽܘܒ ܥܠܰܘܗܝ ܝܺܗܽܘܕܳܐ ܘܰܒܢܰܝ̈ ܝܺܣܪܳܐܶܝܠ ܚܰܒܖ̈ܰܘܗܝ: ܘܣܰܒ ܩܰܝܣܳܐ ܐ̱ܚܪܺܢܳܐ: ܘܰܟܬܽܘܒ ܥܠܰܘܗܝ ܝܰܘܣܶܦ ܒܩܰܝܣܳܐ ܕܰܐܦܪܶܝܡ: ܘܟܽܠܗܽܘܢ ܒܢܰܝ̈ ܝܺܣܪܳܐܶܝܠ ܚܰܒܖ̈ܰܘܗܝ.
17 ܘܩܰܪܶܒ ܐܶܢܽܘܢ ܚܰܕ ܠܘܳܬ ܚܰܕ: ܘܢܶܗܘܽܘܢ ܚܰܕ ܩܺܝܣ ܒܺܐܝܕܳܟ.
18 ܘܶܐܢ ܐܶܡܰܪܘ ܠܳܟ ܒܢܰܝ̈ ܥܰܡܳܟ ܚܰܘܳܢ ܡܳܢܳܐ ܐܶܢܶܝܢ ܗܳܠܶܝܢ.
19 ܐܶܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܢܳܣܶܒ ܐ̱ܢܳܐ ܩܰܝܣܳܐ ܕܝܰܘܣܶܦ ܕܒܺܐܝܕܶܗ ܕܰܐܦܪܶܝܡ: ܘܫܰܒ̈ܛܶܐ ܕܺܝܣܪܳܐܶܝܠ ܚܰܒܖ̈ܰܘܗܝ: ܘܶܐܬܶܠ ܐܶܢܽܘܢ ܥܰܡ ܩܰܝܣܳܐ ܕܺܝܗܽܘܕܳܐ: ܘܶܐܥܒܶܕ ܐܶܢܽܘܢ ܚܰܕ ܩܰܝܣ: ܘܢܶܗܘܽܘܢ ܚܰܕ ܒܺܐܝܕܝ.
20 ܘܩܰܝ̈ܣܶܐ ܕܟܳܬܶܒ ܐܰܢ̱ܬ ܥܠܰܝܗܽܘܢ: ܐܰܚܽܘܕ ܐܶܢܽܘܢ ܒܺܐܝܕܳܟ ܠܥܺܢܰܝ̈ܗܽܘܢ.
21 ܘܶܐܡܰܪ ܠܗܽܘܢ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܢܳܣܶܒ ܐ̱ܢܳܐ ܠܰܒܢܰܝ̈ ܝܺܣܪܳܐܶܝܠ: ܡܶܢ ܒܰܝܢܳܬ ܥܰܡ̈ܡܶܐ ܕܶܐܙܰܠܘ ܠܘܳܬܗܽܘܢ: ܘܶܐܟܰܢܶܫ ܐܶܢܽܘܢ ܘܰܐܝܬܶܐ ܐܶܢܽܘܢ ܠܰܐܪܥܗܽܘܢ.
22 ܘܶܐܥܒܶܕ ܐܶܢܽܘܢ ܥܰܡܳܐ ܚܰܕ ܒܰܐܪܥܳܐ ܒܛܽܘܖ̈ܶܐ ܕܺܝܣܪܳܐܶܝܠ: ܘܚܰܕ ܡܰܠܟܳܐ ܢܶܗܘܶܐ ܠܟܽܠܗܽܘܢ: ܘܬܽܘܒ ܠܳܐ ܢܶܗܘܽܘܢ ܬܪܶܝܢ ܥܰܡ̈ܡܺܝܢ: ܘܬܽܘܒ ܠܳܐ ܢܶܬܦܰܠܓܽܘܢ ܠܬܰܪܬܶܝܢ ܡܰܠ̈ܟܘܳܢ.
23 ܘܬܽܘܒ ܠܳܐ ܢܶܬܛܰܢܦܽܘܢ ܒܰܦܬܰܟܖ̈ܰܝܗܽܘܢ: ܘܰܒܛܰܢ̈ܦܘܳܬܗܽܘܢ ܘܰܒܟܽܠܶܗ ܥܰܘܠܗܽܘܢ: ܘܶܐܦܪܽܘܩ ܐܶܢܽܘܢ ܡܶܢ ܟܽܠܶܗ ܒܶܝܬ ܡܰܥܡܰܪܗܽܘܢ ܕܰܚܛܰܘ ܒܶܗ: ܘܶܐܕܰܟܶܐ ܐܶܢܽܘܢ ܘܢܶܗܘܽܘܢ ܠܺܝ ܥܰܡܳܐ: ܘܶܐ̱ܢܳܐ ܐܶܗܘܶܐ ܠܗܽܘܢ ܐܰܠܳܗܳܐ
24 ܘܥܰܒܕܝ ܕܰܘܺܝܕ ܢܰܡܠܶܟ ܥܠܰܝܗܽܘܢ: ܘܪܳܥܝܳܐ ܚܰܕ ܢܶܗܘܶܐ ܠܟܽܠܗܽܘܢ: ܘܰܒܕܺܝ̈ܢܰܝ ܢܗܰܠܟܽܘܢ: ܘܦܽܘܩܕܳܢܰܝ̈ ܢܶܛܪܽܘܢ ܘܢܶܥܒܕܽܘܢ ܐܶܢܽܘܢ.
25 ܘܢܶܬܒܽܘܢ ܒܰܐܪܥܳܐ ܕܝܶܗܒܶ݀ܬ ܠܥܰܒܕܝ ܝܰܥܩܽܘܒ: ܕܺܝܬܶܒܘ ܒܳܗ̇ ܐܰܒܳܗܰܝ̈ܗܽܘܢ: ܘܢܶܬܒܽܘܢ ܒܳܗ̇ ܗܶܢܽܘܢ ܘܰܒܢܰܝ̈ܗܽܘܢ: ܘܰܒܢܰܝ̈ ܒܢܰܝ̈ܗܽܘܢ ܠܥܳܠܰܡ: ܘܕܰܘܺܝܕ ܥܰܒܕܝ ܢܶܗܘܶܐ ܠܗܽܘܢ ܡܕܰܒܪܳܢܳܐ ܠܥܳܠܰܡ.
26 ܘܰܐܩܺܝܡ ܠܗܽܘܢ ܩܝܳܡܳܐ ܕܰܫܠܳܡܳܐ ܘܰܩܝܳܡܳܐ ܕܥܳܠܰܡ ܢܶܗܘܶܐ ܥܰܡܗܽܘܢ: ܘܰܐܣܓܶܐ ܐܶܢܽܘܢ: ܘܶܐܬܶܠ ܡܰܩܕܫܝ ܒܰܝܢܳܬܗܽܘܢ ܠܥܳܠܰܡ.
27 ܘܢܶܗܘܶܐ ܒܶܝܬ ܡܰܫܪܰܝ ܒܗܽܘܢ: ܘܶܐܗܘܶܐ ܠܗܽܘܢ ܐܰܠܳܗܳܐ: ܘܗܶܢܽܘܢ ܢܶܗܘܽܘܢ ܠܺܝ ܥܰܡܳܐ.
28 ܘܢܶܕܥܽܘܢ ܥܰܡ̈ܡܶܐ ܕܶܐܢܳܐ ܐ̱ܢܳܐ ܡܳܪܝܳܐ ܕܰܡܩܰܕܶܫ ܐ̱ܢܳܐ ܠܺܝܣܪܳܐܶܝܠ: ܡܳܐ ܕܰܗܘܳܐ ܒܗܽܘܢ ܡܰܩܕܫܝ ܠܥܳܠܰܡ.