Ezekiel 20
The Book of Ezekiel
܀ ܚܙܩܝܐܝܠ ܟܟ ܀
1 ܘܰܗܘܳܐ ܒܫܰܢ̱ܬܳܐ ܫܒܺܝܥܳܝܬܳܐ ܒܰܥܣܰܪܬܳܐ ܒܝܰܪܚܳܐ ܚܡܺܝܫܳܝܳܐ: ܐܶܬܰܘ ܓܰܒܖ̈ܶܐ ܡܶܢ ܣܳܒ̈ܶܐ ܕܺܝܣܪܳܐܶܝܠ: ܠܡܶܫܐܰܠ ܡܶܢ ܡܳܪܝܳܐ: ܘܺܝܬܶܒܘ ܩܕܳܡܰܝ.
2 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
3 ܒܰܪܢܳܫܳܐ: ܡܰܠܶܠ ܥܰܡ ܣܳܒ̈ܶܐ ܕܰܒܢܰܝ̈ ܝܺܣܪܳܐܶܝܠ: ܘܶܐܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܠܰܡܫܰܐܳܠܽܘܬܰܢܝ ܐܳܬܶܝܢ ܐܢ̱ܬܽܘܢ: ܚܰܝ ܐ̱ܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܕܠܳܐ ܐܶܬܶܠ ܠܟܽܘܢ ܦܶܬܓܳܡܳܐ.
4 ܕܽܘܢ ܐܶܢܽܘܢ: ܕܽܘܢ ܐܶܢܽܘܢ ܒܰܪܢܳܫܳܐ: ܘܚܰܘܳܐ ܐܶܢܽܘܢ ܛܰܢܦܽܘܬܳܐ ܕܰܐܒܳܗܰܝ̈ܗܽܘܢ: ܘܶܐܡܰܪ ܠܗܽܘܢ.
5 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܒܝܰܘܡܳܐ ܕܰܓܒܺܝܬ ܠܺܝܣܪܳܐܶܝܠ ܐܰܪܝܡܺ݀ܬ ܐܺܝܕܝ ܥܰܠ ܙܰܪܥܳܐ ܕܒܶܝܬ ܝܰܥܩܽܘܒ: ܘܶܐܬܓܠܺܝ݀ܬ ܠܗܽܘܢ ܒܰܐܪܥܳܐ ܕܡܶܨܪܶܝܢ: ܘܰܐܪܺܝܡܶ݀ܬ ܐܺܝܕܝ ܘܶܐܡܪܶܬ ܠܗܽܘܢ: ܐܶܢܳܐ ܐ̱ܢܳܐ ܡܳܪܝܳܐ ܐܰܠܳܗܟܽܘܢ.
6 ܒܶܗ ܒܝܰܘܡܳܐ ܗܰܘ: ܐܰܪܺܝܡܶ݀ܬ ܠܗܽܘܢ ܐܺܝܕܝ ܕܰܐܦܶܩ ܐܶܢܽܘܢ ܡܶܢ ܐܰܪܥܳܐ ܕܡܶܨܪܶܝܢ: ܠܰܐܪܥܳܐ ܕܝܶܗܒܶ݀ܬ ܠܗܽܘܢ: ܕܡܰܪܕܝܳܐ ܚܰܠܒܳܐ ܘܕܒܫܳܐ: ܫܽܘܒܚܳܐ ܗ̱ܝ ܕܟܽܠܗܶܝܢ ܡܕܺܝ̈ܢܳܬܳܐ.
7 ܘܶܐܡܪܶܬ ܠܗܽܘܢ: ܐܰܥܒܰܪܘ ܐ̱ܢܳܫ ܦܬܰܟܪܶܗ ܡܶܢ ܥܰܝܢܰܘ̈ܗܝ: ܘܰܒܕܶܚ̈ܠܳܬܳܐ ܕܡܶܨܪܶܝܢ ܠܳܐ ܬܶܬܛܰܢܦܽܘܢ: ܐܶܢܳܐ ܐ̱ܢܳܐ ܡܳܪܝܳܐ ܐܰܠܳܗܟܽܘܢ.
8 ܘܡܰܪܡܪܽܘܢܝ ܘܠܳܐ ܨܒܰܘ ܠܡܶܫܡܰܥ: ܘܠܳܐ ܐܰܥܒܰܪܘ ܦܬܰܟܖ̈ܶܐ ܡܶܢ ܥܺܢܰܝ̈ܗܽܘܢ: ܘܠܳܐ ܫܒܰܩܘ ܕܶܚ̈ܠܳܬܳܐ ܕܡܶܨܪܶܝܢ: ܘܶܐܡܪܶܬ ܕܶܐܫܽܘܕ ܚܶܡܬܝ ܥܠܰܝܗܽܘܢ: ܘܶܐܫܰܡܠܶܐ ܪܽܘܓܙܝ ܒܗܽܘܢ ܒܓܰܘ ܐܰܪܥܳܐ ܕܡܶܨܪܶܝܢ.
9 ܘܚܳܣܶ݀ܬ ܡܶܛܽܠ ܫܶܡܝ ܕܠܳܐ ܢܶܬܛܰܘܰܫ ܒܶܝܬ ܥܰܡ̈ܡܶܐ: ܕܶܐܬܓܠܺܝ݀ܬ ܥܠܰܝܗܽܘܢ ܠܥܰܝܢܰܝ̈ܗܽܘܢ: ܕܰܐܦܶܩ ܐܶܢܽܘܢ ܡܶܢ ܐܰܪܥܳܐ ܕܡܶܨܪܶܝܢ.
10 ܘܰܐܦܩܶ݀ܬ ܐܶܢܽܘܢ ܡܶܢ ܐܰܪܥܳܐ ܕܡܶܨܪܶܝܢ: ܘܰܐܝܬܺܝ݀ܬ ܐܶܢܽܘܢ ܠܡܰܕܒܪܳܐ.
11 ܘܝܶܗܒܶ݀ܬ ܠܗܽܘܢ ܦܽܘܩ̈ܕܳܢܰܝ: ܘܕܺܝܢܰܝ̈ ܐܰܘܕܥܶ݀ܬ ܐܶܢܽܘܢ: ܕܶܐܢ ܥܳܒܶܕ ܠܗܽܘܢ ܒܰܪܢܳܫܳܐ ܚܳܝܶܐ ܒܗܽܘܢ.
12 ܘܳܐܦ ܫܰܒܰܝ̈ ܝܶܗܒܶ݀ܬ ܠܗܽܘܢ: ܕܢܶܗܘ̈ܝܳܢ ܐܳܬܳܐ ܒܰܝ̈ܢܰܝ ܘܰܠܗܽܘܢ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ ܕܰܡܩܰܕܶܫ ܠܗܽܘܢ.
13 ܘܡܰܪܡܪܽܘܢܝ ܕܒܶܝܬ ܝܺܣܪܳܐܶܝܠ ܒܡܰܕܒܪܳܐ: ܘܰܒܦܽܘܩ̈ܕܳܢܰܝ ܠܳܐ ܗܰܠܶܟܘ. ܘܕܺܝܢܰܝ̈ ܐܰܣܠܺܝܘ: ܕܶܐܢ ܥܳܒܶܕ ܠܗܽܘܢ ܒܰܪܢܳܫܳܐ ܚܳܝܶܐ ܒܗܽܘܢ: ܘܫܰܒܰܝ̈ ܛܰܘܶܫܘ: ܘܶܐܡܪܶܬ ܕܶܐܫܽܘܕ ܪܽܘܓܙܝ ܥܠܰܝܗܽܘܢ ܒܡܰܕܒܪܳܐ ܘܰܐܘܒܶܕ ܐܶܢܽܘܢ.
14 ܘܚܳܣܶ݀ܬ ܡܶܛܽܠ ܫܶܡܝ: ܕܠܳܐ ܢܶܬܛܰܘܰܫ ܠܥܺܝܢ ܥܰܡ̈ܡܶܐ ܕܰܐܦܩܶ݀ܬ ܐܶܢܽܘܢ ܠܥܺܢܰܝ̈ܗܽܘܢ.
15 ܐܳܦ ܐܶܢܳܐ ܐܰܪܺܝܡܶ݀ܬ ܠܗܽܘܢ ܐܺܝܕܝ ܒܡܰܕܒܪܳܐ: ܕܠܳܐ ܐܰܥܶܠ ܐܶܢܽܘܢ ܠܰܐܪܥܳܐ ܕܝܶܗܒܶ݀ܬ ܠܗܽܘܢ: ܕܡܰܪܕܝܳܐ ܚܰܠܒܳܐ ܘܕܶܒܫܳܐ: ܫܽܘܒܚܳܐ ܗ̱ܝ ܕܟܽܠܗܶܝܢ ܡܕܺܝ̈ܢܳܬܳܐ.
16 ܥܰܠ ܕܰܐܣܠܺܝܘ ܕܺܝܢܰܝ̈: ܘܫܰܒܰܝ̈ ܛܳܒ ܛܰܘܶܫܘ: ܘܒܳܬܰܪ ܦܬܰܟܖ̈ܰܝܗܽܘܢ ܐܶܙܰܠ ܠܶܒܗܽܘܢ.
17 ܘܚܳܣܰܬ ܥܰܝܢܝ ܥܠܰܝܗܽܘܢ: ܕܠܳܐ ܐܶܚܰܒܶܠ ܐܶܢܽܘܢ: ܘܠܳܐ ܐܰܣܺܝܦ ܐܶܢܽܘܢ ܒܡܰܕܒܪܳܐ.
18 ܘܶܐܡܪܶܬ ܠܰܒܢܰܝ̈ܗܽܘܢ ܒܡܰܕܒܪܳܐ: ܒܦܽܘܩ̈ܕܳܢܶܐ ܕܰܐܒܳܗܰܝ̈ܟܽܘܢ ܠܳܐ ܬܗܰܠܟܽܘܢ: ܘܕܺܝܢܰܝ̈ܗܽܘܢ ܠܳܐ ܬܶܛܪܽܘܢ: ܘܒܰܦܬܰܟܖ̈ܰܝܗܽܘܢ ܠܳܐ ܬܶܬܛܰܢܦܽܘܢ.
19 ܐܶܢܳܐ ܐ̱ܢܳܐ ܡܳܪܝܳܐ ܐܰܠܳܗܟܽܘܢ: ܒܦܽܘܩ̈ܕܳܢܰܝ ܗܰܠܶܟܘ: ܘܕܺܝܢܰܝ̈ ܛܰܪܘ ܘܰܥܒܶܕܘ ܐܶܢܽܘܢ.
20 ܘܩܰܕܶܫܘ ܫܰܒܰܝ̈ ܘܢܶܗܘ̈ܝܳܢ ܐܳܬܳܐ ܒܰܝ̈ܢܰܝ ܘܰܠܟܽܘܢ: ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ ܐܰܠܳܗܟܽܘܢ.
21 ܘܡܰܪܡܪܽܘܢܝ ܒܢܰܝ̈ܳܐ ܘܰܒܦܽܘܩ̈ܕܳܢܰܝ ܠܳܐ ܗܰܠܶܟܘ: ܘܕܺܝܢܰܝ̈ ܠܳܐ ܢ̣ܛܰܪܘ: ܘܠܳܐ ܥܒܰܕܘ ܐܶܢܽܘܢ: ܕܶܐܢ ܥܳܒܶܕ ܠܗܽܘܢ ܒܰܪܢܳܫܳܐ ܚܳܝܶܐ ܒܗܽܘܢ: ܘܫܰܒܰܝ̈ ܛܰܘܶܫܘ: ܘܶܐܡܪܶܬ ܕܶܐܫܽܘܕ ܚܶܡܬܝ: ܘܶܐܫܰܡܠܶܐ ܥܠܰܝܗܽܘܢ ܪܽܘܓܙܝ ܒܡܰܕܒܪܳܐ.
22 ܘܚܳܣܶ݀ܬ ܡܶܛܽܠ ܫܶܡܝ: ܕܠܳܐ ܢܶܬܛܰܘܰܫ ܒܶܝܬ ܥܰܡ̈ܡܶܐ ܕܰܐܦܩܶ݀ܬ ܐܶܢܽܘܢ ܠܥܺܢܰܝ̈ܗܽܘܢ.
23 ܐܶܠܳܐ ܐܰܪܺܝܡܶ݀ܬ ܠܗܽܘܢ ܐܺܝܕܝ ܒܡܰܕܒܪܳܐ: ܕܶܐܒܰܕܰܪ ܐܶܢܽܘܢ ܒܥܰܡ̈ܡܶܐ: ܘܶܐܕܪܶܐ ܐܶܢܽܘܢ ܒܰܐܖ̈ܥܳܬܳܐ.
24 ܥܰܠ ܕܠܳܐ ܥ̣ܒܰܕܘ ܕܺܝܢܰܝ̈: ܘܰܐܣܠܺܝܘ ܦܽܘܩ̈ܕܳܢܰܝ ܘܛܰܘܶܫܘ ܫܰܒܰܝ̈: ܘܒܳܬܰܪ ܦܬܰܟܖ̈ܶܐ ܕܰܐܒܳܗܰܝ̈ܗܽܘܢ ܐܶܙܰܠ̈ܝ ܥܰܝܢܰܝ̈ܗܽܘܢ.
25 ܘܶܐ̱ܢܳܐ ܝܶܗܒܶ݀ܬ ܠܗܽܘܢ ܦܽܘܩܕܳܢ̈ܶܐ ܕܠܳܐ ܫܰܦܺܝܪܺܝܢ: ܘܕܺܝ̈ܢܶܐ ܕܠܳܐ ܢܺܚܽܘܢ ܒܗܽܘܢ.
26 ܘܛܰܢܦܶ݀ܬ ܐܶܢܽܘܢ ܒܡܰܘ̈ܗܒܳܬܗܽܘܢ: ܡܳܐ ܕܰܡܩܰܪܒܺܝܢ ܒܽܘܟܖ̈ܶܐ: ܘܰܐܘܒܶܕ ܐܶܢܽܘܢ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.
27 ܡܶܛܽܠ ܗܳܢܳܐ ܒܰܪܢܳܫܳܐ: ܡܰܠܶܠ ܥܰܡ ܕܒܶܝܬ ܝܺܣܪܳܐܶܝܠ ܘܶܐܡܰܪ ܠܗܽܘܢ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܬܽܘܒ ܒܗܳܕܶܐ ܓܰܕܶܦܘ ܩܕܳܡܝ ܐܰܒܳܗܰܝ̈ܟܽܘܢ: ܒܥܰܘܠܗܽܘܢ ܕܰܐܥܠܺܝܘ ܒܺܝ.
28 ܘܰܐܝܬܺܝܬ ܐܶܢܽܘܢ ܠܰܐܪܥܳܐ ܕܰܐܪܺܝܡܬ ܐܺܝܕܝ ܠܡܶܬܠܳܗ̇ ܠܗܽܘܢ: ܘܰܚܙܰܘ ܟܽܠ ܪܳܡܬܳܐ ܕܪܳܡܳܐ: ܘܟܽܠ ܐܺܝܠܳܢ ܕܡܰܛܰܠ: ܘܕܰܒܰܚܘ ܬܰܡܳܢ ܕܶܒܚܰܝ̈ܗܽܘܢ: ܘܩܰܪܶܒܘ ܬܰܡܳܢ ܩܽܘܖ̈ܒܳܢܰܝܗܽܘܢ: ܘܣ̣ܳܡܘ ܬܰܡܳܢ ܪܺܝܚܳܐ ܕܰܣܘܳܬܗܽܘܢ: ܘܢܰܩܺܝܘ ܬܰܡܳܢ ܢܽܘܩܳܝܗܽܘܢ.
29 ܘܶܐܡܪܶܬ ܠܗܽܘܢ: ܡܳܢܳܐ ܗ̱ܝ ܦܪܰܟܳܐ ܕܳܐܬܶܝܢ ܐܢ̱ܬܽܘܢ ܠܬܰܡܳܢ: ܘܶܐܬܩܪܺܝ ܫܡܳܗ̇ ܦܪܰܟܳܐ ܥܕܰܡܳܐ ܠܝܰܘܡܳܢܳܐ.
30 ܡܶܛܽܠ ܗܳܢܳܐ: ܒܰܪܢܳܫܳܐ: ܐܶܡܰܪ ܠܰܕܒܶܝܬ ܝܺܣܪܳܐܶܝܠ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܶܢ ܒܽܐܘܪܚܳܐ ܕܰܐܒܳܗܰܝ̈ܟܽܘܢ ܡܶܬܛܰܢܦܺܝܢ ܐܢ̱ܬܽܘܢ: ܘܒܳܬܰܪ ܦܬܰܟܖ̈ܰܝܗܽܘܢ ܛܳܥܶܝܢ ܐܢ̱ܬܽܘܢ.
31 ܘܰܡܩܰܪܒܺܝܢ ܐܢ̱ܬܽܘܢ ܡܰܘܗ̈ܒܳܬܟܽܘܢ: ܘܡܰܥܒܪܺܝܢ ܐܢ̱ܬܽܘܢ ܒܢܰܝ̈ܟܽܘܢ ܒܢܽܘܪܳܐ: ܘܡܶܬܛܰܢܦܺܝܢ ܐܢ̱ܬܽܘܢ ܒܰܦܬܰܟܖ̈ܰܝܟܽܘܢ ܥܕܰܡܳܐ ܠܝܰܘܡܳܢܳܐ: ܘܨܳܒܶܝܢ ܐܢ̱ܬܽܘܢ ܕܬܶܫܐܠܽܘܢ ܡܶܢܝ ܒܶܝܬ ܝܺܣܪܳܐܶܝܠ: ܚܰܝ ܐ̱ܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܕܠܳܐ ܐܶܬܶܠ ܠܟܽܘܢ ܦܶܬܓܳܡܳܐ.
32 ܘܗܳܝ ܕܰܒܪܶܥܝܳܢܟܽܘܢ ܠܳܐ ܬܶܗܘܶܐ: ܕܳܐܡܪܺܝܬܽܘܢ ܢܶܗܘܶܐ ܐܰܝܟ ܥܰܡ̈ܡܶܐ ܘܰܐܝܟ ܫܰܖ̈ܒܳܬܳܐ ܕܰܐܪܥܳܐ: ܘܰܢܫܰܡܶܫ ܠܩܰܝ̈ܣܶܐ ܘܰܠܟܺܐܦ̈ܶܐ.
33 ܚܰܝ ܐ̱ܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܕܒܺܐܝܕܳܐ ܬܰܩܺܝܦܬܳܐ ܘܒܰܕܪܳܥܳܐ ܪܳܡܳܐ: ܘܰܒܪܽܘܓܙܳܐ ܐܰܫܺܝܕܳܐ ܐܰܡܠܟ ܥܠܰܝܟܽܘܢ.
34 ܘܰܐܦܶܩܟܽܘܢ ܡܶܢ ܥܰܡ̈ܡܶܐ: ܘܶܐܟܰܢܶܫܟܽܘܢ ܡܶܢ ܐܰܖ̈ܥܳܬܳܐ ܕܶܐܬܒܰܕܰܪܬܽܘܢ ܒܗܶܝܢ: ܘܒܺܐܝܕܳܐ ܥܰܫܺܝܢܬܳܐ ܘܒܰܕܪܳܥܳܐ ܪܳܡܳܐ: ܘܰܒܪܽܘܓܙܳܐ ܐܰܫܺܝܕܳܐ.
35 ܐܰܝܬܶܝܟܽܘܢ ܠܡܰܕܒܪܳܐ ܕܥܰܡ̈ܡܶܐ: ܘܶܐܕܽܘܢܟܽܘܢ ܬܰܡܳܢ ܐܰܦܺܝ̈ܢ ܠܽܘܩܒܰܠ ܐܰܦܺܝ̈ܢ.
36 ܐܰܝܟ ܕܕܳܢܶ݀ܬ ܥܰܡ ܐܰܒܳܗܰܝ̈ܟܽܘܢ ܒܡܰܕܒܪܳܐ ܕܰܐܪܥܳܐ ܕܡܶܨܪܶܝܢ: ܗܳܟܰܢܳܐ ܐܶܕܽܘܢ ܥܰܡܟܽܘܢ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
37 ܘܰܐܥܒܰܪܟܽܘܢ ܬܚܶܝܬ ܫܰܒܛܳܐ: ܘܰܐܥܶܠܟܽܘܢ ܒܡܰܪܕܽܘܬܳܐ ܕܕܺܝܰܬܺܩܺܐ.
38 ܘܶܐܓܒܶܐ ܡܶܢܟܽܘܢ ܐܰܝܠܶܝܢ ܕܡܳܪܕܺܝܢ ܘܡܰܥܠܶܝܢ ܒܺܝ: ܡܶܢ ܐܰܪܥܳܐ ܕܒܶܝܬ ܡܰܥܡܰܪܗܽܘܢ ܐܰܦܶܩ ܐܶܢܽܘܢ: ܘܠܰܐܪܥܳܐ ܕܺܝܣܪܳܐܶܝܠ ܠܳܐ ܢܶܥܠܽܘܢ: ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.
39 ܐܰܢ̱ܬܽܘܢ ܕܶܝܢ ܕܒܶܝܬ ܝܺܣܪܳܐܶܝܠ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܶܢ ܠܳܐ ܫܳܡܥܺܝܢ ܐܢ̱ܬܽܘܢ ܠܺܝ: ܙܶܠܘ ܦܠܽܘܚܘ ܐ̱ܢܳܫ ܦܬܰܟܖ̈ܰܘܗܝ: ܘܬܽܘܒ ܠܳܐ ܬܛܰܘܫܽܘܢ ܫܡܳܐ ܕܩܽܘܕܫܝ: ܒܡܰܘ̈ܗܒܳܬܟܽܘܢ ܘܒܰܦܬܰܟܖ̈ܰܝܟܽܘܢ.
40 ܡܶܛܽܠ ܕܰܒܛܽܘܪܳܐ ܕܩܽܘܕܫܝ: ܒܛܽܘܖ̈ܶܐ ܖ̈ܳܡܶܐ ܕܺܝܣܪܳܐܶܝܠ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܬܰܡܳܢ ܢܶܦܠܚܽܘܢܳܢܝ ܟܽܠܗܽܘܢ ܕܒܶܝܬ ܝܺܣܪܳܐܶܝܠ ܓܡܺܝܪܳܐܺܝܬ: ܬܰܡܳܢ ܐܶܨܛܒܶܐ ܒܗܽܘܢ: ܘܬܰܡܳܢ ܐܶܦܩܽܘܕ ܪܺܝܫܝܳܬܗܽܘܢ ܘܪܺܝܫ ܥܰܠ̈ܠܳܬܗܽܘܢ: ܘܪܺܝܫ ܡܰܘ̈ܗܒܳܬܗܽܘܢ ܒܟܽܠ ܩܽܘܕܫܰܝ̈ܗܽܘܢ.
41 ܒܪܺܝܚܳܐ ܒܰܣܺܝܡܳܐ ܐܶܩܰܒܶܠܟܽܘܢ: ܡܳܐ ܕܰܐܦܶܩܬܟܽܘܢ ܡܶܢ ܥܰܡ̈ܡܶܐ: ܘܟܰܢܶܫܬܟܽܘܢ ܡܶܢ ܡܕܺܝ̈ܢܳܬܳܐ ܕܶܐܬܒܰܕܰܪܬܽܘܢ ܒܗܶܝܢ: ܘܶܐܬܩܰܕܫܶ݀ܬ ܒܟܽܘܢ ܠܥܺܝܢ ܥܰܡ̈ܡܶܐ.
42 ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ: ܡܳܐ ܕܰܐܥܶܠܬܟܽܘܢ ܠܰܐܪܥܳܐ ܕܺܝܣܪܳܐܶܝܠ: ܠܰܐܪܥܳܐ ܕܰܐܪܺܝܡܶ݀ܬ ܐܺܝܕܝ ܠܡܶܬܠܳܗ̇ ܠܰܐܒܳܗܰܝ̈ܟܽܘܢ.
43 ܘܬܶܬܕܰܟܪܽܘܢ ܬܰܡܳܢ ܐܽܘܖ̈ܚܳܬܟܽܘܢ: ܘܟܽܠܗܶܝܢ ܨܶܢ̈ܥܳܬܟܽܘܢ ܕܶܐܬܛܰܢܰܦܬܽܘܢ ܒܗܶܝܢ: ܘܢܶܬܩܰܡ̈ܛܳܢ ܐܰܦܰܝ̈ܟܽܘܢ ܒܟܽܠܗܶܝܢ ܒܺܝ̈ܫܳܬܳܐ ܕܰܥܒܰܕܬܽܘܢ.
44 ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ: ܕܚܳܣܶ݀ܬ ܥܠܰܝܟܽܘܢ ܡܶܛܽܠ ܫܶܡܝ: ܘܠܳܐ ܐܰܝܟ ܐܽܘܖ̈ܚܳܬܟܽܘܢ ܒܺܝ̈ܫܳܬܳܐ: ܘܠܳܐ ܐܰܝܟ ܨܶܢ̈ܥܳܬܟܽܘܢ ܫܳܛ̈ܝܳܬܳܐ ܥܶܒܕܶܬ ܠܟܽܘܢ ܒܶܝܬ ܝܺܣܪܳܐܶܝܠ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
45 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
46 ܒܰܪܢܳܫܳܐ: ܣܺܝܡ ܐܰܦܰܝ̈ܟ ܠܽܐܘܪܚܳܐ ܕܬܰܝܡܢܳܐ: ܘܚܽܘܪ ܠܬܰܝܡܢܳܐ: ܘܶܐܬܢܰܒܳܐ ܥܰܠ ܥܳܒܳܐ ܕܰܒܬܰܝܡܢܳܐ.
47 ܘܶܐܡܰܪ ܠܥܳܒܳܐ ܕܰܒܬܰܝܡܢܳܐ: ܫܡܰܥ ܦܶܬܓܳܡܶܗ ܕܡܳܪܝܳܐ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܫܳܒܶܩ ܐ̱ܢܳܐ ܒܳܟ ܢܽܘܪܳܐ: ܘܬܶܐܟܽܘܠ ܟܽܠܗܽܘܢ ܩܰܝܣܰܝ̈ܟ ܖ̈ܓܰܝܳܐ ܘܝܰܒܺܝ̈ܫܶܐ: ܘܠܳܐ ܬܶܕܥܰܟ ܫܰܠܗܶܒܺܝܬܳܐ ܕܡܶܬܓܰܘܙܠܳܐ: ܘܢܺܐܩ̈ܕܳܢ ܒܳܗ̇ ܟܽܠ ܐܰܦܺܝ̈ܢ: ܡܶܢ ܬܰܝܡܢܳܐ ܘܰܥܕܰܡܳܐ ܠܓܰܪܒܝܳܐ.
48 ܘܢܶܚܙܽܘܢܳܗ̇ ܟܽܠ ܒܣܰܪ: ܕܶܐܢܳܐ ܡܳܪܝܳܐ ܐܰܘܚܶܕܬܳܗ̇ ܘܠܳܐ ܬܶܕܥܰܟ.
49 ܘܶܐܡܪܶܬ ܐܳܘ ܡܳܪܶܐ ܡܳܖ̈ܰܘܳܬܳܐ: ܗܳܐ ܗܶܢܽܘܢ ܐܳܡܪܺܝܢ ܠܺܝ ܡܰܡܬܶܠ ܡ̈ܰܬܠܶܐ ܐܰܢ̱ܬ.