Ezekiel 27
The Book of Ezekiel
܀ ܚܙܩܝܐܝܠ ܟܙ ܀
1 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܐܰܢ̱ܬ ܕܶܝܢ ܒܰܪܢܳܫܳܐ: ܐܶܠܺܝ ܐܽܘܠܺܝܬܳܐ ܥܰܠ ܨܽܘܪ.
3 ܘܶܐܡܰܪ ܠܨܽܘܪ ܕܝܳܬܒܳܐ ܒܡܰܥܠܳܢܳܐ ܕܝܰܡܳܐ: ܬܶܐܓܽܘܪܬܳܐ ܕܥܰܡ̈ܡܶܐ ܘܰܕܓܳܙܖ̈ܳܬܳܐ ܣܰܓܺܝ̈ܐܳܬܳܐ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܨܽܘܪ: ܐܰܢ̱ܬܝ ܐܶܡܰܪܬܝ ܕܶܐܢܳܐ ܐ̱ܢܳܐ ܟܠܺܝܠܳܐ ܕܫܽܘܒܚܳܐ.
4 ܬܚܽܘܡܰܝ̈ܟܝ ܒܠܶܒܳܐ ܕܝܰܡ̈ܡܶܐ: ܘܰܒܢܰܝ̈ܟܝ ܫܰܟ̣ܠܶܠܘ ܫܽܘܦܪܶܟܝ.
5 ܥܰܖ̈ܩܶܐ ܘܕܰܦ̈ܶܐ ܐܰܝܬܺܝܘ ܠܶܟܝ ܡܶܢ ܣܳܢܺܝܪ: ܘܰܐܖ̈ܙܶܐ ܡܶܢ ܠܶܒܢܳܢ ܢ̣ܣܰܒܘ: ܕܢܶܥܒܕܽܘܢ ܠܶܟܝ ܥܳܕܖ̈ܶܐ.
6 ܘܡܶܢ ܒܰܠܽܘ̈ܛܶܐ ܕܒܰܝܫܳܢ ܥ̣ܒܰܕܘ ܠܺܩܰܝ̈ܟܝ: ܘܕܰܦܰܝ̈ܟܝ ܥ̣ܒܰܕܘ ܕܫܶܢܳܐ ܕܦܺܝܠܳܐ: ܡܶܢ ܓܳܙܖ̈ܳܬܳܐ ܕܟܶܬܳܝ̈ܶܐ.
7 ܘܰܩܖ̈ܳܡܶܐ ܕܒܽܘܨܳܐ ܕܨܶܒܬܶܟܝ ܐܰܝܬܺܝܘ ܡܶܢ ܡܶܨܪܶܝܢ: ܕܢܶܗܘܶܐ ܠܶܟܝ ܐܳܬܳܐ: ܘܬܶܟܠܬܳܐ ܘܰܐܪܓܘܳܢܳܐ: ܐܰܝܬܺܝܘ ܠܶܟܝ ܡܶܢ ܓܳܙܪܳܬܳܐ ܕܰܐܠܶܣ ܠܬܰܟܣܺܝܬܶܟܝ.
8 ܥܳܡܽܘܖ̈ܶܐ ܕܨܰܝܕܳܢ ܘܕܰܐܪܘܰܕ ܗܘܰܘ ܕܳܒܖ̈ܰܝ ܠܺܩܰܝ̈ܟܝ: ܚܰܟܺܝܡܰܝ̈ܟܝ ܨܽܘܪ ܗܘܰܘ ܡܰܠܳܚܰܝ̈ܟܝ.
9 ܣܳܒ̈ܶܐ ܕܰܓܒܶܠ ܘܚܰܟܺܝܡܶܝ̈ܗ̇: ܗܘܰܘ ܒܳܕܩܰܝ̈ ܒܕܳܩܰܝܟܝ̈: ܣܦܺܝܢ̈ܶܐ ܟܽܠܗܶܝܢ ܕܝܰܡܳܐ: ܘܡܰܠܳܚܰܝ̈ܗܶܝܢ ܗܘܰܘ ܡܶܢ ܡܰܥܖ̈ܳܒܰܝܟܝ.
10 ܦܳܖ̈ܣܳܝܶܐ: ܘܠܽܘ̈ܕܳܝܶܐ: ܘܦܽܘܛܳܝ̈ܶܐ: ܓܰܒܖ̈ܶܐ ܩܖ̈ܰܒܬܳܢܶܐ ܗܘܰܘ ܒܚܰܝ̈ܠܰܝܟܝ: ܣܰܟܖ̈ܶܐ ܘܣܰܢܘܖ̈ܳܬܳܐ ܬܠܰܘ ܒܶܟܝ: ܘܰܗܘܰܘ ܠܶܟܝ: ܫܽܘܒܚܳܐ.
11 ܒܢܰܝ̈ ܐܳܪܘܰܕ ܘܚܰܝܠܰܝܟܝ̈ ܩܳܝܡܺܝܢ ܗܘܰܘ ܥܰܠ ܫܽܘܖ̈ܝܟܝ: ܘܢܳܛܪܺܝܢ ܡܰܓܕܠܰܝܟܝ̈: ܫܳܠܛܰܝ̈ܗܽܘܢ ܬܠܰܘ ܥܰܠ ܫܽܘܖ̈ܰܝܟܝ ܟܰܕ ܚܳܕܪܺܝܢ: ܘܫܰܡܠܺܝܘ ܫܽܘܦܪܶܟܝ.
12 ܬܰܪܫܺܝܫ ܒܶܝܬ ܬܶܐܓܽܘܪܬܶܟܝ ܘܣܽܘܓܳܐܐ ܕܥܽܘܬܪܶܟܝ: ܣܺܐܡܳܐ ܘܦܰܪܙܠܳܐ: ܘܰܐܢܟܳܐ ܘܰܐܒܳܪܳܐ: ܐܰܝܬܺܝܘ ܠܶܟܝ ܠܙܶܒܢܳܐ.
13 ܝܳܘܳܢ ܘܬܽܘܒܺܝܠ ܘܡܳܫܳܟ ܬܰܓܳܖ̈ܰܝܟܝ: ܒܢܰܦ̈ܫܳܬܳܐ ܕܰܒܢܰܝ̈ܢܳܫܳܐ ܘܡܳܐܢ̈ܶܐ ܕܰܢܚܳܫܳܐ.
14 ܡܶܢ ܒܶܝܬ ܬܽܘܓܰܪܡܳܐ: ܖ̈ܰܟܫܳܐ ܘܦܰܖ̈ܳܫܶܐ ܘܟܽܘܕܢܰܘ̈ܳܬܳܐ ܐܰܝܬܺܝܘ ܠܶܟܝ ܠܙܶܒܢܳܐ.
15 ܒܢܰܝ̈ ܕܳܪܳܢ ܬܰܓܳܖ̈ܰܝܟܝ: ܘܓܳܙܖ̈ܳܬܳܐ ܣܰܓܺܝ̈ܐܳܬܳܐ: ܒܶܝܬ ܬܶܐܓܽܘܪܬܳܐ ܕܺܐܝܕܰܝ̈ܟܝ: ܩܰܖ̈ܢܳܬܳܐ ܕܡܶܫܚܳܐ ܘܰܠܒܽܘܢܬܳܐ ܐܰܝܬܺܝܘ ܠܶܟܝ ܩܽܘܖ̈ܒܳܢܶܐ.
16 ܐܰܕܽܘܡ ܒܶܝܬ ܬܶܐܓܽܘܪܬܶܟܝ ܘܣܽܘܓܳܐܐ ܕܰܥܒܳܕܰܝ̈ܟܝ: ܐܰܪܓܘܳܢܳܐ ܘܒܽܘܨܳܐ ܘܦܶܬܟܳܐ ܘܬܶܟܠܬܳܐ ܘܫܶܐܖ̈ܳܝܶܐ ܦܬܽܘܬܟܳܐ ܐܰܝܬܺܝܘ ܠܶܟܝ ܠܙܶܒܢܳܐ.
17 ܝܺܗܽܘܕܳܐ ܘܰܐܪܥܳܐ ܕܺܝܣܪܳܐܶܝܠ: ܗܶܢܽܘܢ ܐܶܢܽܘܢ ܬܰܓܳܖ̈ܰܝܟܝ: ܚ̈ܶܛܶܐ: ܘܪܽܘܙܳܐ: ܘܕܽܘܚܢܳܐ: ܘܕܶܒܫܳܐ: ܘܡܶܫܚܳܐ: ܘܰܖ̈ܗܶܛܢܶܐ: ܐܰܝܬܺܝܘ ܠܶܟܝ ܠܙܶܒܢܳܐ.
18 ܕܰܪܡܣܽܘܩ ܒܶܝܬ ܬܶܐܓܽܘܪܬܶܟܝ ܘܣܽܘܓܳܐܐ ܕܰܥܒܳܕܰܝ̈ܟܝ ܘܣܽܘܓܳܐܐ ܕܥܽܘܬܪܶܟܝ: ܒܚܰܡܪܳܐ ܫܰܡܺܝܢܳܐ ܘܥܰܡܪܳܐ ܚܶܘܳܪܳܐ.
19 ܘܕܳܢ ܘܝܳܘܳܢ: ܡܶܢ ܐܽܘܙܶܠ ܐܰܝܬܺܝܘ ܠܶܟܝ ܠܙܶܒܢܳܐ: ܦܰܪܙܠܳܐ ܕܬܶܦܠܚܺܝܢ. ܘܰܩ̈ܣܰܝܳܐ ܘܰܩ̈ܢܰܝܳܐ ܐܰܝܬܺܝܘ ܠܶܟܝ ܠܙܶܒܢܳܐ.
20 ܕܳܪܳܢ ܒܶܝܬ ܬܶܐܓܽܘܪܬܶܟܝ: ܐܰܝܬܺܝܘ ܠܶܟܝ ܣܽܘܓܳܐܐ ܕܰܒܥܺܝܪܳܐ ܛܰܪܩܬܳܐ.
21 ܘܕܶܟܖ̈ܶܐ ܘܶܐܡܖ̈ܶܐ ܘܰܓ̈ܕܰܝܳܐ ܐܰܝܬܺܝܘ ܠܶܟܝ.
22 ܬܰܓܳܖ̈ܶܐ ܕܰܫܒܳܐ ܘܰܕܪܰܥܡܳܐ: ܒܶܣ̈ܡܳܢܶܐ ܛܰܖ̈ܩܶܐ ܘܟܺܐܦ̈ܶܐ ܛܳܒ̈ܳܬܳܐ ܘܕܰܗܒܳܐ ܐܰܝܬܺܝܘ ܠܶܟܝ ܠܙܶܒܢܳܐ.
23 ܚܳܪܳܢ ܘܟܰܢܳܐ ܘܥܰܕܰܢ ܬܰܓܳܖ̈ܰܝ ܫܰܒܳܐ: ܘܳܐܬܽܘܪ ܒܶܝܬ ܬܶܐܓܽܘܪܬܶܟܝ.
24 ܗܳܠܶܝܢ ܐܶܢܽܘܢ ܬܰܓܳܖ̈ܰܝܟܝ: ܕܡܰܝܬܶܝܢ ܠܶܟܝ ܡܳܐܢ̈ܶܐ ܕܬܶܟܠܬܳܐ ܘܰܕܦܶܬܟܳܐ: ܘܣܺܝ̈ܡܳܬܳܐ ܛܳܒ̈ܳܬܳܐ ܟܕ ܚܙܺܝ̈ܩܳܢ ܒܚܰܒ̈ܠܶܐ ܘܒܶܐܠܦ̈ܶܐ ܕܥܰܪܩܳܐ.
25 ܒܢܰܝ̈ ܬܰܪܫܺܝܫ ܕܰܒܡܰܥܖ̈ܳܒܰܝܟܝ ܐܰܝܬܺܝܘ ܠܶܟܝ ܡܰܘ̈ܒܠܶܐ: ܘܶܐܬܡܠܺܝܬܝ ܘܰܥܫܶܢܬܝ ܛܳܒ ܛܳܒ.
26 ܘܰܒܠܶܒܳܐ ܕܝܰܡ̈ܡܶܐ: ܘܰܒܡܰܝ̈ܳܐ ܣܰܓܺܝ̈ܐܶܐ ܐܰܥܠܽܘܟܝ ܕܳܒܖ̈ܰܝ ܠܺܩܰܝ̈ܟܝ: ܪܽܘܚܳܐ ܕܫܰܘܒܳܐ ܬܒܰܪܬܶܟܝ ܒܠܶܒܳܐ ܕܝܰܡ̈ܡܶܐ.
27 ܘܥܽܘܬܪܶܟܝ ܘܰܐܓܪܶܟܝ ܕܡܶܢ ܡܰܥܖ̈ܳܒܰܝܟܝ: ܟܽܠܗܽܘܢ ܓܒܰܝ̈ܳܐ ܩܖ̈ܰܒܬܳܢܰܝܟܝ ܘܡܰܠܳܚܰܝ̈ܟܝ ܘܒܳܕܩܰܝ̈ ܒܕܳܩܰܝ̈ܟܝ ܕܡܶܢ ܡܰܥܖ̈ܳܒܰܝܟܝ: ܟܽܠܗܽܘܢ ܓܰܒܖ̈ܶܐ ܩܖ̈ܰܒܬܳܢܰܝܟܝ: ܘܟܽܠܶܗ ܟܶܢܫܳܐ ܕܰܒܓܰܘܟܝ: ܢܶܦܠܽܘܢ ܒܠܒܳܐ ܕܝܰܡ̈ܡܶܐ ܒܝܰܘܡܳܐ ܕܡܰܦܽܘܠܬܶܟܝ.
28 ܠܩܳܠܳܐ ܕܺܝܠܶܠܬܳܐ ܕܣܰܦܳܢܰܝ̈ܟܝ ܢܙܽܘܥܽܘܢ ܕܰܚܕܳܖ̈ܰܝܟܝ.
29 ܘܢܶܚܬܽܘܢ ܡܶܢ ܣܦܺܝ̈ܢܰܝܗܽܘܢ ܟܽܠܗܽܘܢ ܕܳܒܖ̈ܰܝ ܠܺܩ̈ܶܐ: ܘܡܰܠܳܚ̈ܶܐ ܘܟܽܠܗܽܘܢ ܣܰܦܳܢ̈ܶܐ ܕܝܰܡܳܐ ܒܰܐܪܥܳܐ ܢܩܽܘܡܽܘܢ.
30 ܘܢܰܝܠܠܽܘܢ ܥܠܰܝܟܝ ܝܺܠܠܬܳܐ ܪܰܒܬܳܐ ܘܡܰܪܺܝܪܬܳܐ: ܘܢܰܪܡܽܘܢ ܥܰܦܪܳܐ ܒܖ̈ܺܝܫܰܝܗܽܘܢ: ܘܢܶܬܦܰܠܦܠܽܘܢ ܒܩܶܛܡܳܐ.
31 ܘܢܶܓܙܽܘܢ ܥܠܰܝܟܝ ܖ̈ܺܝܫܰܝܗܽܘܢ: ܘܢܶܬܟܰܒܢܽܘܢ ܣܰܩ̈ܶܐ: ܘܢܶܒܟܽܘܢ ܥܠܰܝܟܝ ܡܰܪܺܝܪܳܐܺܝܬ ܒܡܰܖ̈ܩܕܳܬܳܐ.
32 ܘܢܶܐܠܽܘܢ ܥܠܰܝܟܝ ܒܢܰܝ̈ܗܽܘܢ ܐܽܘܠ̈ܝܳܬܳܐ: ܘܢܺܐܡܪܽܘܢ: ܡܰܢ ܗܺܝ ܐܺܝܬ ܗܘܳܬ ܐܰܝܟ ܨܽܘܪ ܕܝܳܬܒܳܐ ܗܘܳܬ ܒܓܰܘ ܝܰܡܳܐ.
33 ܟܰܕ ܢ̣ܦܰܩ ܩܶܢܝܳܢܶܟܝ ܡܶܢ ܝܰܡܳܐ: ܐܰܣܒܰܥܬܝ ܥܰܡ̈ܡܶܐ ܣܰܓܺܝ̈ܐܶܐ: ܘܡܶܢ ܣܽܘܓܳܐܐ ܕܥܽܘܬܪܶܟܝ ܘܰܕܬܶܐܓܽܘܪܬܶܟܝ: ܐܰܥܬܰܪܬܝ ܡܰܠ̈ܟܶܐ ܕܰܐܪܥܳܐ.
34 ܒܙܰܒܢܳܐ ܕܶܐܬܬܒܰܪܬܝ ܘܰܢ̣ܦܰܠܬܝ ܒܥܽܘܡܩܰܘ̈ܗܝ ܕܝܰܡܳܐ: ܬܶܐܓܽܘܪܬܶܟܝ ܘܟܽܠܶܗ ܟܶܢܫܶܟܝ ܢ̣ܦܰܠܘ ܒܓܰܘܟܝ.
35 ܟܽܠܗܽܘܢ ܥܳܡܖ̈ܰܝ ܓܳܙܖ̈ܳܬܳܐ ܬܡܰܗܘ ܥܠܰܝܟܝ: ܘܡܰܠܟܰܝ̈ܗܽܘܢ ܬܘܰܪܘ ܘܕܰܡܰܥ̈ܝ ܐܰܦܰܝ̈ܗܽܘܢ.
36 ܬܰܓܳܖ̈ܶܐ ܕܥܰܡ̈ܡܶܐ ܐܰܫܪܶܩܘ ܥܠܰܝܟܝ: ܠܰܐܒܕܳܢܳܐ ܗܘܰܝܬܝ ܘܠܰܝܬ ܐܰܢ̱ܬܝ ܠܥܳܠܰܡ.