Ezekiel 24
The Book of Ezekiel
܀ ܚܙܩܝܐܝܠ ܟܕ ܀
1 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܒܫܰܢ̱ܬܳܐ ܬܫܺܝܥܳܝܬܳܐ: ܒܰܥܣܰܪܬܳܐ ܒܝܰܪܚܳܐ ܕܥܶܣܪܳܐ ܠܡܺܐܡܰܪ.
2 ܒܰܪܢܳܫܳܐ: ܟܬܽܘܒ ܠܳܟ ܫܡܶܗ ܕܝܰܘܡܳܐ ܗܳܢܳܐ: ܕܣܳܡܶܟ ܡܰܠܟܳܐ ܕܒܳܒܶܠ ܠܽܐܘܪܺܫܠܶܡ ܒܶܗ ܒܝܰܘܡܳܐ ܗܳܢܳܐ.
3 ܘܰܐܡܬܶܠ ܡܰܬܠܳܐ ܥܰܠ ܒܰܝܬܳܐ ܡܡܰܪܡܪܳܢܳܐ: ܘܶܐܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܬܦܺܝ ܩܰܕܣܳܐ ܘܣܽܘܟ ܒܶܗ ܡܰܝ̈ܳܐ.
4 ܘܰܐܪܡܳܐ ܒܶܗ ܢܶܟܣ̈ܶܐ ܕܛܳܒܺܝܢ ܘܫܰܡܺܝܢܺܝܢ: ܟܰܬܦܳܐ ܕܰܫܡܺܝܛ ܓܰܪܡܳܗ̇ ܡܶܢ ܓܒܰܝ̈ܳܐ ܕܥܳܢ̈ܳܐ.
5 ܘܓܰܖ̈ܡܶܐ ܬܚܶܝܬ ܩܰܕܣܳܐ ܫܓܽܘܪ ܐܶܢܽܘܢ: ܘܰܐܘܩܶܕ ܐܶܢܽܘܢ ܬܚܽܘܬܰܘܗܝ.
6 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܳܘ ܡܕܺܝܢ̱ܬܳܐ ܕܰܕܡܳܐ ܕܩܰܕܣܳܐ ܬܦܶܐ ܒܳܗ̇: ܘܥܰܘܠܳܗ̇ ܠܳܐ ܢ̣ܦܰܩ ܡܶܢܗ̇: ܗܰܕܳܡ ܗܰܕܳܡ ܦܽܘܣܩܽܘܗ̇: ܘܦܶܣܳܐ ܠܳܐ ܢܶܦܶܠ ܥܠܶܝܗ̇.
7 ܡܶܛܽܠ ܕܰܕܡܳܗ̇ ܒܓܰܘܳܗ̇ ܗܘܳܐ: ܘܥܰܠ ܟܺܐܦܳܐ ܣܳܡܬܶܗ: ܘܠܳܐ ܐܶܫܰܕܬܶܗ ܒܰܐܪܥܳܐ ܕܠܳܐ ܢܶܬܟܰܣܶܐ ܥܠܰܘܗܝ ܥܰܦܪܳܐ.
8 ܕܬܶܣܰܩ ܚܶܡܬܳܐ ܠܦܽܘܪܥܳܢܽܘܬܳܐ: ܝܶܗܒܶ݀ܬ ܕܡܳܗ̇ ܥܰܠ ܟܺܐܦܳܐ ܫܰܥܺܝܥܬܳܐ ܕܠܳܐ ܢܶܬܟܰܣܶܐ.
9 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܳܘ ܡܕܺܝܢ̱ܬܳܐ ܕܰܕܡܳܐ: ܐܶܢܳܐ ܐܰܘܪܶܒ ܡܰܥܡܪܳܐ: ܘܰܐܣܓܶܐ ܩܰܝ̈ܣܶܐ.
10 ܘܶܐܫܒܽܘܩ ܢܽܘܪܳܐ: ܘܢܶܒܫܰܠ ܒܶܣܪܳܐ: ܘܰܐܪܬܰܚ ܪܰܬܚܳܐ ܘܓܰܖ̈ܡܶܐ ܢܺܐܩܕܽܘܢ.
11 ܘܰܐܩܺܝܡܺܝܘܗܝ ܪܰܬܚܳܐ ܥܰܠ ܓܽܘܡܖ̈ܶܐ: ܕܢܶܚܰܡ ܘܢܶܬܦܰܫܰܪ ܢܚܳܫܳܗ̇: ܘܬܶܬܡܣܶܐ ܒܓܰܘܳܗ̇ ܛܰܢܦܽܘܬܳܗ̇: ܘܢܶܫܠܰܡ ܦܽܘܪܥܳܢܳܗ̇.
12 ܐܰܝܟ ܬܺܐܢ̈ܶܐ ܟܖ̈ܺܝܗܳܬܳܐ: ܘܠܳܐ ܢܶܦܽܘܩ ܡܶܢܳܗ̇ ܣܽܘܓܳܐܐ ܕܥܰܘܠܳܗ̇: ܐܶܠܳܐ ܒܢܽܘܪܳܐ ܢܶܗܘܶܐ ܦܽܘܪܥܳܢܳܗ̇.
13 ܥܰܠ ܕܶܐܬܛܰܢܰܦܬܝ ܒܙܳܢܝܽܘܬܳܐ: ܘܥܰܠ ܕܕܰܟܺܝܬܶܟܝ ܘܠܳܐ ܐܶܬܕܰܟܺܝܬܝ ܡܶܢ ܛܰܢܦܽܘܬܶܟܝ: ܬܽܘܒ ܠܳܐ ܬܶܬܕܰܟܶܝܢ: ܥܕܰܡܳܐ ܕܰܐܢܺܝܚ ܒܶܟܝ ܚܶܡܬܝ.
14 ܐܶܢܳܐ ܡܳܪܝܳܐ ܐܶܡܪܶܬ: ܘܡܰܝܬܶܐ ܐ̱ܢܳܐ ܘܥܳܒܶܕ ܐ̱ܢܳܐ: ܘܠܳܐ ܐܶܪܰܚܶܦ: ܘܠܳܐ ܐܶܚܽܘܣ ܘܠܳܐ ܐܰܪܰܚܶܡ: ܘܰܐܝܟ ܐܽܘܖ̈ܚܳܬܶܟܝ ܘܰܐܝܟ ܨܶܢ̈ܥܳܬܶܟܝ ܐܶܕܽܘܢܶܟܝ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
15 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
16 ܒܰܪܢܳܫܳܐ: ܗܳܐ ܢܳܣܶܒ ܐ̱ܢܳܐ ܡܶܢܳܟ ܪܶܓܬܳܐ ܕܥܰܝ̈ܢܰܝܟ ܒܰܡܚܽܘܬܳܐ ܕܡܶܢܫܶܠܝ: ܘܠܳܐ ܬܰܪܩܶܕ ܘܠܳܐ ܬܶܒܟܶܐ: ܘܠܳܐ ܬܰܫܚܶܠ ܕܶܡܥܬܳܟ.
17 ܐܶܠܳܐ ܐܶܫܬܰܢܰܩ ܒܰܕܡܳܐ ܕܡܺܝ̈ܬܶܐ: ܘܒܶܝܬ ܒܳܟܶܐ ܠܳܐ ܬܶܥܒܶܕ: ܘܡܳܐܢܰܝ̈ܟ ܚܙܽܘܩ ܥܠܰܝܟ: ܘܰܡܣܳܢܰܝ̈ܟ ܣܺܝܡ ܒܖ̈ܶܓܠܰܝܟ: ܘܠܳܐ ܬܶܬܥܰܛܰܦ ܥܰܠ ܣܶܦ̈ܘܳܬܳܟ: ܘܠܰܚܡܳܐ ܕܰܒܢܰܝ̈ܢܳܫܳܐ ܠܳܐ ܬܶܐܟܽܘܠ.
18 ܘܶܐܡܪܶܬ ܒܨܰܦܪܳܐ ܠܥܰܡܳܐ: ܘܡܺܝܬܰܬ ܐܰܢ̱ܬܰܬܝ ܒܪܰܡܫܳܐ: ܘܰܠܨܰܦܪܶܗ ܕܝܰܘܡܳܐ ܐ̱ܚܪܺܢܳܐ ܐܶܪܢܳܐ: ܥܶܒܕܰܬ ܐܰܝܟ ܕܶܐܬܦܰܩܕܶܬ.
19 ܘܶܐܡܰܪܘ ܠܺܝ ܥܰܡܳܐ: ܠܳܐ ܡܚܰܘܶܐ ܐܰܢ̱ܬ ܠܰܢ ܡܳܢܰܘ ܗܳܢܳܐ ܕܥܳܒܶܕ ܐܰܢ̱ܬ.
20 ܘܶܐܡܪܶܬ ܠܗܽܘܢ: ܕܦܶܬܓܳܡܶܗ ܗ̱ܘ ܕܡܳܪܝܳܐ ܗܘܳܐ ܥܠܰܝ ܠܡܺܐܡܰܪ.
21 ܐܶܡܰܪ ܠܰܕܒܶܝܬ ܝܺܣܪܳܐܶܝܠ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܶܐ: ܗܳܐ ܡܛܰܘܶܫ ܐ̱ܢܳܐ ܡܰܩܕܫܝ ܫܽܘܒܚܳܐ ܕܥܽܘܫܢܟܽܘܢ: ܘܪܶܓܬܳܐ ܕܥܰܝܢܰܝ̈ܟܽܘܢ: ܘܚܽܘܣܳܝܳܐ ܕܢܰܦ̈ܫܳܬܟܽܘܢ: ܘܰܒܢܰܝ̈ܟܽܘܢ ܘܰܒ̈ܢܳܬܟܽܘܢ ܕܫܳܒܩܺܝܢ ܐܢ̱ܬܽܘܢ: ܒܚܰܪܒܳܐ ܢܶܦܠܽܘܢ.
22 ܘܬܶܥܒܕܽܘܢ ܐܰܝܟ ܕܥܶܒܕܶܬ: ܘܥܰܠ ܣܶܦ̈ܘܳܬܟܽܘܢ ܠܳܐ ܬܶܬܥܰܛܦܽܘܢ: ܘܠܰܚܡܳܐ ܕܰܒܢܰܝ̈ܢܳܫܳܐ ܠܳܐ ܬܶܐܟܠܽܘܢ.
23 ܘܣܰܥܪܟܽܘܢ ܠܳܐ ܢܶܣܬܰܦܰܪ: ܘܰܡܣܳܢܰܝ̈ܟܽܘܢ ܢܶܗܘܽܘܢ ܒܖ̈ܶܓܠܰܝܟܽܘܢ: ܘܠܳܐ ܬܶܒܟܽܘܢ ܘܠܳܐ ܬܰܪܩܕܽܘܢ: ܘܬܶܬܡܣܽܘܢ ܒܥܰܘܠܟܽܘܢ: ܘܬܶܬܒܰܝܐܽܘܢ ܐ̱ܢܳܫ ܥܰܠ ܐܰܚܽܘܗܝ.
24 ܘܢܶܗܘܶܐ ܠܟܽܘܢ ܚܰܙܩܺܝܐܶܝܠ ܐܳܬܳܐ: ܘܰܐܝܟ ܕܰܥܒܰܕ ܗܳܟܰܢܳܐ ܬܶܥܒܕܽܘܢ: ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܶܐ ܡܳܖ̈ܰܘܳܬܳܐ.
25 ܐܰܢ̱ܬ ܕܶܝܢ ܒܰܪܢܳܫܳܐ: ܒܝܰܘܡܳܐ ܕܢܳܣܶܒ ܐ̱ܢܳܐ ܡܶܢܗܽܘܢ ܥܽܘܫܢܳܐ ܕܚܰܕܽܘܬܳܐ ܕܫܽܘܒܚܗܽܘܢ: ܘܪܶܓܬܳܐ ܕܥܰܝܢܰܝ̈ܗܽܘܢ: ܘܚܽܘܣܳܝܳܐ ܕܢܰܦ̈ܫܳܬܗܽܘܢ: ܘܰܒܢܰܝ̈ܗܽܘܢ ܘܰܒ̈ܢܳܬܗܽܘܢ.
26 ܒܶܗ ܒܝܰܘܡܳܐ ܗܰܘ: ܢܺܐܬܶܐ ܠܘܳܬܳܟ ܡܶܬܦܰܨܝܳܢܳܐ: ܘܢܰܫܡܥܳܟ ܒܶܐܕܢܰܝ̈ܟ.
27 ܘܢܶܦܬܰܚ ܦܽܘܡܳܟ ܡܶܬܦܰܨܝܳܢܳܐ ܒܶܗ ܒܝܰܘܡܳܐ ܗܰܘ: ܘܰܬܡܰܠܶܠ ܘܬܽܘܒ ܠܳܐ ܬܶܚܪܰܫ: ܘܬܶܗܘܶܐ ܠܗܽܘܢ ܐܳܬܳܐ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ. ܥܰܠ ܒܢܰܝ̈ ܥܰܡܽܘܢ.