Ezekiel 13
The Book of Ezekiel
܀ ܚܙܩܝܐܝܠ ܝܓ ܀
1 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܐܶܬܢܰܒܳܐ ܥܰܠ ܢܒܺܝ̈ܶܐ ܕܺܝܣܪܳܐܶܝܠ ܕܡܶܬܢܰܒܶܝܢ ܠܗܽܘܢ: ܘܶܐܡܰܪ ܠܰܐܝܠܶܝܢ ܕܡܶܬܢܰܒܶܝܢ ܡܶܢ ܠܶܒܗܽܘܢ: ܫܡܰܥܘ ܦܶܬܓܳܡܶܗ ܕܡܳܪܶܐ ܡܳܖ̈ܰܘܳܬܳܐ.
3 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܘܳܝ ܠܰܢܒܺܝ̈ܶܐ ܫܳܛܰܝ̈ܳܐ: ܕܳܐܙܺܠܝܢ ܒܳܬܰܪ ܪܽܘܚܗܽܘܢ ܕܠܳܐ ܚ̣ܙܰܘ ܚܶܙܘܳܐ.
4 ܐܰܝܟ ܬܰܥ̈ܠܶܐ ܒܚܰܖ̈ܒܳܬܳܐ ܗܘܰܘ ܢܒܺܝܰܝ̈ܟ ܝܺܣܪܳܐܶܝܠ.
5 ܠܳܐ ܣܠܶܩܬܽܘܢ ܒܬܽܘܪܥܬܳܐ: ܐܳܦ ܠܳܐ ܣܳܓܬܽܘܢ ܣܝܳܓܳܐ ܥܰܠ ܕܒܶܝܬ ܝܺܣܪܳܐܶܝܠ: ܠܰܡܩܳܡ ܒܰܩܪܳܒܳܐ ܒܝܰܘܡܶܗ ܕܡܳܪܝܳܐ.
6 ܕܳܐܡܪܺܝܢ ܗܳܟܰܢܳܐ ܐܳܡܰܪ ܡܳܪܝܳܐ: ܘܡܳܪܝܳܐ ܠܳܐ ܫܰܕܰܪ ܐܶܢܽܘܢ: ܘܫܰܪܺܝܘ ܠܰܡܩܳܡܽܘ ܡܶܠܬܳܐ ܕܰܓܳܠܬܳܐ.
7 ܚܶܙܘܳܐ ܣܪܺܝܩܳܐ ܚܙܰܝܬܽܘܢ: ܘܩܶܨܡܳܐ ܕܰܓܳܠܳܐ ܐܶܡܰܪܬܽܘܢ: ܘܳܐܡܪܺܝܢ ܐܢ̱ܬܽܘܢ ܐܶܡܰܪ ܡܳܪܝܳܐ: ܘܶܐ̱ܢܳܐ ܠܳܐ ܐܶܡܪܶܬ.
8 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܰܚܙܰܝܬܽܘܢ ܣܪܺܝܩܽܘܬܳܐ ܘܡܰܠܶܠܬܽܘܢ ܕܰܓܳܠܽܘܬܳܐ: ܗܳܐ ܐܶܢܳܐ ܥܠܰܝܟܽܘܢ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
9 ܘܬܶܗܘܶܐ ܐܺܝܕܝ ܥܰܠ ܢܒܺܝ̈ܶܐ ܕܚܳܙܶܝܢ ܣܪܺܝܩܽܘܬܳܐ ܘܩܳܨܡܺܝܢ ܕܰܓܳܠܽܘܬܳܐ: ܒܓܰܘ ܥܰܡܝ ܠܳܐ ܢܶܗܘܽܘܢ: ܘܒܰܟܬܳܒܳܐ ܕܒܶܝܬ ܝܺܣܪܳܐܶܝܠ ܠܳܐ ܢܶܬܟܰܬܒܽܘܢ: ܘܠܰܐܪܥܳܐ ܕܺܝܣܪܳܐܶܝܠ ܠܳܐ ܢܶܥܠܽܘܢ: ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܶܐ ܡܳܖ̈ܰܘܳܬܳܐ.
10 ܥܰܠ ܕܰܐܛܥܺܝܘ ܠܥܰܡܝ: ܘܶܐܡܰܪܘ ܫܠܳܡܳܐ ܘܠܰܝܬ ܫܠܳܡܳܐ: ܘܗܽܘ ܒܳܢܶܐ ܗ̱ܘܳܐ ܐܶܣܬܳܐ ܘܗܶܢܽܘܢ ܛܳܪܶܝܢ ܗܘܰܘ ܠܳܗ̇ ܕܬܶܦܶܠ.
11 ܐܶܡܰܪ ܠܗܳܢܽܘܢ ܕܛܳܪܶܝܢ ܠܳܗ̇ ܕܬܶܦܶܠ: ܗܳܐ ܐܶܢܳܐ ܝܳܗܶܒ ܐ̱ܢܳܐ ܡܶܛܪܳܐ ܕܓܳܪܶܦ: ܘܟܺܐܦ̈ܶܐ ܕܕܰܚܪܳܐ ܢܶܦ̈ܠܳܢ: ܘܪܽܘܚܳܐ ܕܥܰܠܥܳܠܳܐ.
12 ܘܬܶܬܪܰܥ ܘܬܶܦܶܠ ܐܶܣܬܳܐ: ܘܢܶܬܐܡܰܪ ܠܟܽܘܢ: ܐܰܝܟܰܘ ܛܪܳܝܳܐ ܕܰܛܪܰܝܬܽܘܢ.
13 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܰܫܶܒ ܪܽܘܚܳܐ ܕܥܰܠܥܳܠܳܐ ܒܚܶܡܬܝ: ܘܡܶܛܪܳܐ ܕܓܳܪܶܦ ܢܶܗܘܶܐ ܒܪܽܘܓܙܝ: ܘܟܺܐܦ̈ܶܐ ܕܕܰܚܪܳܐ ܒܚܶܡܬܝ ܢܰܘ̈ܒܕܳܢ.
14 ܘܶܐܣܚܦܺܝܗ̇ ܠܶܐܣܬܳܐ ܕܰܛܪܰܝܬܽܘܢ ܘܬܶܦܶܠ: ܘܰܐܪܡܶܝܗ̇ ܒܰܐܪܥܳܐ ܘܢܶܬܓܰܠ̈ܝܳܢ ܫܶܬܶܐܣܶܝ̈ܗ̇: ܘܬܶܦܠܽܘܢ ܘܬܶܣܬܰܚܦܽܘܢ ܒܓܰܘܳܗ̇: ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.
15 ܘܶܐܫܰܡܠܶܐ ܪܽܘܓܙܝ ܒܶܐܣܬܳܐ: ܘܒܰܐܝܠܶܝܢ ܕܛܳܪܶܝܢ ܗܘܰܘ ܠܳܗ̇ ܟܰܕ ܬܶܦܶܠ. ܘܢܶܬܐܡܰܪ ܠܟܽܘܢ ܐܰܝܟܳܐ ܗ̱ܝ ܐܶܣܬܳܐ: ܘܰܐܝܟܳܐ ܐܶܢܽܘܢ ܗܳܢܽܘܢ ܕܛܳܪܶܝܢ ܗܘܰܘ ܠܳܗ̇.
16 ܗܳܠܶܝܢ ܐܶܢܽܘܢ ܢܒܺܝ̈ܶܐ ܕܺܝܣܪܳܐܶܝܠ ܕܡܶܬܢܰܒܶܝܢ ܥܰܠ ܐܽܘܪܺܫܠܶܡ: ܘܚܳܙܶܝܢ ܠܳܗ̇ ܚܶܙ̈ܘܶܐ ܕܰܫܠܳܡܳܐ: ܘܠܰܝܬ ܫܠܳܡܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
17 ܘܰܐܢ̱ܬ ܒܰܪܢܳܫܳܐ: ܣܺܝܡ ܐܰܦܰܝ̈ܟ ܥܰܠ ܒ̈ܢܳܬ ܥܰܡܳܟ ܕܡܶܬܢܰܒ̈ܝܳܢ ܡܶܢ ܠܶܒܗܶܝܢ: ܐܶܬܢܰܒܳܐ ܥܠܰܝܗܶܝܢ ܘܶܐܡܰܪ ܠܗܶܝܢ.
18 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܘܳܝ ܠܰܕܚܳܝ̈ܛܳܢ ܒܣܳܕܘ̈ܳܬܳܐ ܠܝܰܨܺܝ̈ܠܶܐ ܕܺܐܝ̈ܕܰܝܳܐ: ܘܥܳܒ̈ܕܳܢ ܬܰܟܣ̈ܝܳܬܳܐ ܠܟܽܠ ܪܺܝܫ ܘܰܠܟܽܠ ܩܰܘܡܳܐ: ܠܰܡܨܳܕ ܢܰܦ̈ܫܳܬܳܐ. ܢܰܦ̈ܫܳܬܶܗ ܕܥܰܡܝ ܨܳܝ̈ܕܳܢ ܐܢ̱ܬܶܝܢ: ܘܢܰܦ̈ܫܳܬܟܶܝܢ ܕܺܝܠܟܶܝܢ ܡܰܚ̈ܝܳܢ ܐܰܢ̱ܬܶܝܢ.
19 ܘܛܰܘܶܫ̈ܬܶܢܳܝܗܝ ܠܥܰܡܝ ܒܚܽܘܦܢ̈ܶܐ ܕܰܣܥܳܖ̈ܶܐ: ܘܒܰܩܨܳܝ̈ܶܐ ܕܠܰܚܡܳܐ: ܠܡܶܩܛܰܠ ܢܰܦ̈ܫܳܬܳܐ ܐܰܝܠܶܝܢ ܕܠܳܐ ܚܰܝܳܒ̈ܳܢ ܗ̱ܘܰܝ̈ ܠܰܡܡܳܬ ܘܰܠܡܰܚܳܝܽܘ ܢܰܦ̈ܫܳܬܳܐ ܕܰܐܝܠܶܝܢ ܕܠܳܐ ܚܰܝܳܒ̈ܳܢ ܗ̱ܘܰܝ̈ ܠܡܶܚܳܐ: ܘܟܰܕܶܒ̈ܬܶܝܢ ܠܥܰܡܳܐ ܕܰܫܡܰܥ ܟܰܕܳܒܽܘܬܳܐ.
20 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܐܶܢܳܐ ܥܰܠ ܒܶܣܳܕܘ̈ܳܬܟܶܝܢ ܕܨܳܝ̈ܕܳܢ ܐܰܢ̱ܬܶܝܢ ܒܗܽܘܢ ܢܰܦ̈ܫܳܬܳܐ: ܘܶܐܨܪܶܐ ܐܶܢܽܘܢ ܡܶܢ ܕܖ̈ܳܥܰܝܟܶܝܢ: ܘܶܐܫܪܶܐ ܢܰܦ̈ܫܳܬܳܐ ܐܰܝܠܶܝܢ ܕܨܳܝ̈ܕܳܢ ܐܰܢ̱ܬܶܝܢ: ܘܰܐܦܪܰܚ ܐܶܢܶܝܢ.
21 ܘܶܐܨܪܶܐ ܡܳܐܢܰܝ̈ܟܶܝܢ: ܘܶܐܦܰܨܶܐ ܠܥܰܡܝ ܡܶܢ ܐܺܝܕܰܝ̈ܟܶܝܢ: ܘܬܽܘܒ ܠܳܐ ܢܶܫܬܰܠܡܽܘܢ ܒܰܡܨܺܝܕܬܳܐ ܒܺܐܝܕܰܝ̈ܟܶܝܢ: ܘܬܶܕܥ̈ܳܢ ܕܶܐܢܳܐ ܐ̱ܢܳܐ ܡܳܪܝܳܐ.
22 ܥܰܠ ܕܰܡܚܰܝ̈ܬܶܝܢ ܠܶܒܶܗ ܕܙܰܕܺܝܩܳܐ ܒܕܰܓܳܠܽܘܬܳܐ: ܘܶܐ̱ܢܳܐ ܠܳܐ ܐܰܟܐܶܒܬܶܗ: ܘܚܰܡܣܶܢܬܶܝ̈ܢ ܐܺܝ̈ܕܰܝܳܐ ܕܥܰܘ̈ܳܠܳܐ: ܕܠܳܐ ܢܶܗܦܟܽܘܢ ܡܶܢ ܐܽܘܖ̈ܚܳܬܗܽܘܢ ܒܺܝ̈ܫܳܬܳܐ ܘܢܺܚܽܘܢ.
23 ܡܶܟܺܝܠ ܣܪܺܝܩܽܘܬܳܐ ܠܳܐ ܬܶܚ̈ܙܝܳܢ: ܘܬܽܘܒ ܩܶܨܡܳܐ ܠܳܐ ܬܶܩܨ̈ܡܶܢ: ܘܶܐܦܰܨܶܐ ܠܥܰܡܝ ܡܶܢ ܐܺܝܕܰܝ̈ܟܶܝܢ: ܘܬܶܕܥ̈ܳܢ ܕܶܐܢܳܐ ܐ̱ܢܳܐ ܡܳܪܝܳܐ.