Ezekiel 3
The Book of Ezekiel
܀ ܚܙܩܝܐܝܠ ܓ ܀
1 ܘܶܐܡܰܪ ܠܺܝ: ܒܰܪܢܳܫܳܐ: ܡܶܕܶܡ ܕܡܶܫܟܰܚ ܐܰܢ̱ܬ ܐܰܟܽܘܠ: ܐܰܟܽܘܠܳܝܗܝ ܠܟܶܪܟܳܐ ܗܳܢܳܐ: ܘܙܶܠ ܡܰܠܶܠ ܥܰܡ ܒܢܰܝ̈ ܝܺܣܪܳܐܶܝܠ.
2 ܘܦܶܬܚܶ݀ܬ ܦܽܘܡܝ ܘܰܐܘܟܠܰܢܝ ܟܶܪܟܳܐ ܗܰܘ.
3 ܘܶܐܡܰܪ ܠܺܝ: ܒܰܪܢܳܫܳܐ: ܡܠܺܝ ܟܰܪܣܳܟ ܘܰܡܥܰܝ̈ܟ ܡܶܢ ܟܶܪܟܳܐ ܗܳܢܳܐ ܕܝܳܗܶܒ ܐ̱ܢܳܐ ܠܳܟ: ܘܶܐܟܰܠܬܶܗ ܘܰܗܘܳܐ ܒܦܽܘܡܝ ܐܰܝܟ ܕܶܒܫܳܐ ܚܰܠܝܳܐ.
4 ܘܶܐܡܰܪ ܠܺܝ: ܒܰܪܢܳܫܳܐ: ܙܶܠ ܥܽܘܠ ܠܰܫܒܺܝܬܳܐ ܠܘܳܬ ܒܢܰܝ̈ ܝܺܣܪܳܐܶܝܠ: ܘܶܐܡܰܪ ܠܗܽܘܢ ܦܶܬܓܳܡܰܝ̈.
5 ܡܶܛܽܠ ܕܠܳܐ ܗ̱ܘܳܐ ܥܰܠ ܥܰܡܳܐ ܥܰܡܺܝܩ ܡܰܡܠܠܳܐ ܘܰܠܥܶܓ ܠܶܫܳܢܳܐ ܫܰܕܰܪܬܳܟ: ܥܰܠ ܕܒܶܝܬ ܝܺܣܪܳܐܶܝܠ.
6 ܘܳܐܦܠܳܐ ܥܰܠ ܥܰܡ̈ܡܶܐ ܣܰܓܺܝ̈ܐܶܐ ܕܠܳܐ ܫܳܡܰܥ ܐܰܢ̱ܬ ܡܰܡܠܠ̱ܗܽܘܢ: ܘܶܐܠܽܘ ܥܠܰܝܗܽܘܢ ܫܰܕܰܪܬܳܟ ܫܳܡܥܺܝܢ ܗܘܰܘ ܠܳܟ.
7 ܕܒܶܝܬ ܝܺܣܪܳܐܶܝܠ ܕܶܝܢ ܠܳܐ ܫܳܡܥܺܝܢ ܠܳܟ: ܡܶܛܽܠ ܕܠܳܐ ܨܳܒܶܝܢ ܠܡܶܫܡܥܰܢܝ ܕܟܽܠܶܗ ܓܶܝܪ ܒܶܝܬ ܝܺܣܪܳܐܶܝܠ: ܥܰܫܺܝܢ ܒܶܝܬ ܥܰܝܢܰܝ̈ܗܽܘܢ ܘܰܩܫܶܐ ܠܶܒܗܽܘܢ.
8 ܗܳܐ ܐܰܥܫܢܶ݀ܬ ܐܰܦܰܝ̈ܟ ܠܽܘܩܒܰܠ ܐܰܦܰܝ̈ܗܽܘܢ: ܘܒܶܝܬ ܥܰܝܢܰܝ̈ܟ ܐܰܫܪܶܬ ܠܽܘܩܒܰܠ ܒܶܝܬ ܥܰܝܢܰܝ̈ܗܽܘܢ.
9 ܐܰܝܟ ܫܳܡܺܝܪܳܐ ܕܥܰܫܺܝܢ ܡܶܢ ܛܰܪܳܢܳܐ ܥܶܒܕܶܬ ܒܶܝܬ ܥܰܝܢܰܝ̈ܟ: ܠܳܐ ܬܶܕܚܰܠ ܡܶܢܗܽܘܢ: ܘܠܳܐ ܬܙܽܘܥ ܡܶܢ ܩܕܳܡܝܗܽܘܢ: ܡܶܛܽܠ ܕܒܰܝܬܳܐ ܐܶܢܽܘܢ ܡܡܰܪܡܪܳܢܳܐ.
10 ܘܶܐܡܰܪ ܠܺܝ: ܒܰܪܢܳܫܳܐ: ܟܽܠ ܦܶܬܓܳܡܰܝ̈ ܕܳܐܡܰܪ ܐ̱ܢܳܐ ܠܳܟ ܩܰܒܶܠ ܒܠܶܒܳܟ ܘܰܫܡܰܥ ܒܶܐܕܢܰܝ̈ܟ.
11 ܘܙܶܠ ܥܽܘܠ ܠܰܫܒܺܝܬܳܐ ܠܘܳܬ ܒܢܰܝ̈ ܥܰܡܳܟ: ܘܡܰܠܶܠ ܥܰܡܗܽܘܢ ܘܶܐܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܟܒܰܪ ܢܶܫܡܥܽܘܢ ܘܰܢܙܽܘܥܽܘܢ.
12 ܘܰܫܩܰܠܬܰܢܝ ܪܽܘܚܳܐ: ܘܫܶܡܥܶ݀ܬ ܒܳܬܰܪܝ ܩܳܠܳܐ ܕܙܰܘܥܳܐ ܪܰܒܳܐ ܕܳܐܡܰܪ: ܒܪܺܝܟܽܘ ܐܺܝܩܳܪܶܗ ܕܡܳܪܝܳܐ ܡܶܢ ܐܰܬܪܶܗ. 13:ܘܩܳܠܳܐ ܕܓܶܦ̈ܶܐ ܕܚܰܝ̈ܘܳܬܳܐ ܕܛܳܪܦܺܝܢ ܚܰܕ ܠܚܰܕ: ܘܩܳܠܳܐ ܕܓܺܝ̈ܓܠܶܐ ܥܰܡܗܽܘܢ: ܘܩܳܠܳܐ ܕܙܰܘܥܳܐ ܪܰܒܳܐ.
14 ܘܰܫܩܰܠܬܰܢܝ ܪܽܘܚܳܐ ܘܰܐܘܒܶܠܬܰܢܝ: ܘܶܐܙܶܠ̱ܬ ܒܚܺܐܦܳܐ ܕܪܽܘܚܝ: ܘܺܐܝܕܶܗ ܕܡܳܪܝܳܐ ܥܶܫܢܰܬ ܥܠܰܝ.
15 ܘܥܶܠ̣ܶ݀ܬ ܠܰܫܒܺܝܬܳܐ ܠܬܶܠܳܐ ܟܺܝܒ ܕܝܳܬܶܒ ܥܰܠ ܢܗܰܪ ܟܒܰܪ: ܘܝܶܬܒܶ݀ܬ ܬܰܡܳܢ ܫܰܒܥܳܐ ܝܰܘܡܺܝ̈ܢ: ܟܰܕ ܬܰܡܺܝܗ ܐ̱ܢܳܐ ܒܰܝܢܳܬܗܽܘܢ.
16 ܘܡܶܢ ܒܳܬܰܪ ܫܰܒܥܳܐ ܝܰܘܡܺܝ̈ܢ: ܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
17 ܒܰܪܢܳܫܳܐ: ܕܰܘܩܳܐ ܝܰܗܒܬܳܟ ܠܰܕܒܶܝܬ ܝܺܣܪܳܐܶܝܠ: ܕܬܶܗܘܶܐ ܫܳܡܰܥ ܡܶܢ ܦܽܘܡܝ ܦܶܬܓܳܡ̈ܶܐ: ܘܰܬܙܰܗܰܪ ܐܶܢܽܘܢ ܡܶܢܝ.
18 ܡܳܐ ܕܳܐܡܰܪ ܐ̱ܢܳܐ ܠܚܰܛܳܝܳܐ ܕܰܡܡܳܬ ܬܡܽܘܬ: ܘܠܳܐ ܙܰܗܰܪܬܳܝܗܝ ܘܠܳܐ ܐܶܡ̣ܰܪܬ ܠܶܗ ܠܚܰܛܳܝܳܐ ܕܢܶܙܕܗܰܪ ܡܶܢ ܐܽܘܪܚܶܗ ܘܢܺܚܶܐ: ܗܰܘ ܚܰܛܳܝܳܐ ܒܥܰܘܠܶܗ ܢܡܽܘܬ: ܘܰܕܡܶܗ ܡܶܢ ܐܺܝܕܳܟ ܐܶܬܒܰܥ.
19 ܐܶܢ ܬܙܰܗܰܪ ܕܶܝܢ ܠܚܰܛܳܝܳܐ: ܘܠܳܐ ܢܶܗܦܽܘܟ ܡܶܢ ܚܛܺܝܬܶܗ ܘܡܶܢ ܐܽܘܪܚܶܗ ܒܺܝܫܬܳܐ: ܗܽܘ ܒܰܚܛܳܗܰܘ̈ܗܝ ܢܡܽܘܬ: ܘܰܐܢ̱ܬ ܢܰܦܫܳܟ ܬܦܰܨܶܐ.
20 ܘܟܰܕ ܙܰܕܺܝܩܳܐ ܢܶܗܦܽܘܟ ܡܶܢ ܙܰܕܺܝܩܽܘܬܶܗ ܘܢܶܥܒܶܕ ܥܰܘܠܳܐ: ܐܶܬܶܠ ܬܽܘܩܠܬܳܐ ܩܕܳܡܰܘܗܝ ܘܰܢܡܽܘܬ: ܥܰܠ ܕܠܳܐ ܙܰܗܰܪܬܳܝܗܝ ܒܰܚܛܳܗܰܘ̈ܗܝ ܢܡܽܘܬ: ܘܠܳܐ ܬܶܬܕܟܰܪ ܠܶܗ ܙܰܕܺܝܩܽܘܬܶܗ ܕܰܥܒܰܕ: ܘܰܕܡܶܗ ܡܶܢ ܐܺܝܕܰܝ̈ܟ ܐܶܬܒܰܥ.
21 ܐܶܢ ܕܶܝܢ ܬܙܰܗܪ ܠܙܰܕܺܝܩܳܐ: ܕܠܳܐ ܢܶܚܛܶܐ ܘܠܳܐ ܚ̣ܛܳܐ: ܙܰܕܺܝܩܳܐ ܢܺܚܶܐ ܕܶܐܙܕܗܰܪ: ܘܰܐܢ̱ܬ ܢܰܦܫܳܟ ܬܦܰܨܶܐ.
22 ܘܰܗܘܳܬ ܥܠܰܝ ܬܰܡܳܢ ܐܺܝܕܶܗ ܕܡܳܪܝܳܐ: ܘܶܐܡܰܪ ܠܺܝ: ܩܽܘܡ ܦܽܘܩ ܠܰܦܩܰܥܬܳܐ: ܘܬܰܡܳܢ ܐܶܡܰܠܶܠ ܥܰܡܳܟ. 23:ܘܩܳܡܶ݀ܬ ܢܶܦܩܶ݀ܬ ܠܰܦܩܰܥܬܳܐ: ܘܬܰܡܳܢ ܩܳܐܶܡ ܗ̱ܘܳܐ ܫܽܘܒܚܶܗ ܕܰܐܠܳܗܳܐ ܕܺܝܣܪܳܐܶܝܠ: ܐܰܝܟ ܫܽܘܒܚܳܐ ܕܰܚܙܺܝ݀ܬ ܥܰܠ ܢܗܰܪ ܟܒܰܪ: ܘܢܶܦܠܶ݀ܬ ܥܰܠ ܐܰܦܰܝ̈.
24 ܘܥܶܠܰܬ ܒܺܝ ܪܽܘܚܳܐ: ܘܰܐܩܺܝܡܬܰܢܝ ܥܰܠ ܖ̈ܶܓܠܰܝ: ܘܡܰܠܶܠ ܥܰܡܝ ܘܶܐܡܰܪ ܠܺܝ: ܥܽܘܠ ܐܶܬܚܰܒܫ ܒܒܰܝܬܳܟ.
25 ܘܰܐܢ̱ܬ ܒܰܪܢܳܫܳܐ: ܗܳܐ ܪܳܡܶܝܢ ܥܠܰܝܟ ܫܺܫ̈ܠܳܬܳܐ: ܘܳܐܣܪܺܝܢ ܠܳܟ ܒܗܶܝܢ: ܕܠܳܐ ܬܶܦܽܘܩ ܒܰܝܢܳܬܗܽܘܢ.
26 ܘܠܶܫܳܢܳܟ ܐܰܕܒܶܩ ܠܰܫܡܰܝ̈ ܚܶܟܳܟ: ܘܬܶܚܪܰܫ ܘܠܳܐ ܬܶܗܘܶܐ ܠܗܽܘܢ ܓܰܒܪܳܐ ܡܶܣܟܺܢܳܐ: ܡܶܛܽܠ ܕܒܰܝܬܳܐ ܐܶܢܽܘܢ ܡܡܰܪܡܪܳܢܳܐ.
27 ܘܡܳܐ ܕܰܡܡܰܠܶܠ ܐ̱ܢܳܐ ܥܰܡܳܟ: ܦܳܬܰܚ ܐ̱ܢܳܐ ܦܽܘܡܳܟ ܕܬܺܐܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܕܫܳܡܰܥ ܢܶܫܡܰܥ: ܘܰܕܙܳܐܰܥ: ܢܙܽܘܥ: ܡܶܛܽܠ ܕܒܰܝܬܳܐ ܐܶܢܽܘܢ ܡܡܰܪܡܪܳܢܳܐ.