Ezekiel 44
The Book of Ezekiel
܀ ܚܙܩܝܐܝܠ ܡܕ ܀
1 ܘܰܐܗܦܟܰܢܝ ܠܽܐܘܪܚܳܐ ܕܬܰܪܥܳܐ ܒܰܪܳܝܳܐ ܕܡܰܩܕܫܳܐ ܕܚܳܐܰܪ ܠܡܰܕܢܚܳܐ: ܘܰܚܙܺܝܬܶܗ ܕܰܐܚܺܝܕ.
2 ܘܶܐܡܰܪ ܠܺܝ ܡܳܪܝܳܐ: ܬܰܪܥܳܐ ܗܳܢܳܐ ܢܶܗܘܶܐ ܐܰܚܺܝܕ: ܘܠܳܐ ܢܶܬܦܬܰܚ: ܘܐ̱ܢܳܫ ܠܳܐ ܢܶܥܽܘܠ ܒܶܗ: ܡܶܛܽܠ ܕܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ ܥܳܐܶܠ ܒܶܗ: ܢܶܗܘܶܐ ܐܰܚܺܝܕ.
3 ܡܕܰܒܪܳܢܳܐ ܢܶܬܶܒ ܒܶܗ: ܘܢܶܐܟܽܘܠ ܠܰܚܡܳܐ ܩܕܳܡ ܡܳܪܝܳܐ: ܡܶܢ ܐܽܘܪܚܳܐ ܕܶܐܣܟܽܘܦܬܳܐ ܕܬܰܪܥܳܐ ܢܶܥܽܘܠ ܘܡܶܢܳܗ̇ ܢܶܦܽܘܩ.
4 ܘܰܐܥܠܰܢܝ ܠܽܐܘܪܚܳܐ ܕܬܰܪܥܳܐ ܓܰܪܒܝܳܝܳܐ ܕܰܩܕܳܡ ܒܰܝܬܳܐ: ܘܰܚܙܺܝ݀ܬ ܕܶܐܬܡܠܺܝ ܒܰܝܬܳܐ ܫܽܘܒܚܶܗ ܕܡܳܪܝܳܐ: ܘܢܶܦܠܶ݀ܬ ܥܰܠ ܐܰܦܝ̈.
5 ܘܶܐܡܰܪ ܠܺܝ ܡܳܪܝܳܐ: ܒܰܪܢܳܫܳܐ: ܣܺܝܡ ܒܠܶܒܳܟ ܘܰܚܙܺܝ ܒܥܰܝܢܰܝ̈ܟ: ܘܰܫܡܰܥ ܒܶܐܕܢܰܝ̈ܟ ܟܽܠ ܡܶܕܶܡ ܕܰܡܡܰܠܶܠ ܐ̱ܢܳܐ ܥܰܡܳܟ: ܘܟܽܠܗܽܘܢ ܢܳܡܽܘܣܰܘ̈ܗܝ ܕܒܰܝܬܳܐ: ܘܟܽܠܗܶܝܢ ܨܽܘܖ̈ܳܬܶܗ: ܘܣܺܝܡ ܠܒܳܠܳܟ ܡܰܥܠܳܢܰܘ̈ܗܝ ܕܒܰܝܬܳܐ: ܘܡܰܦܩܳܢܰܘ̈ܗܝ ܕܡܰܩܕܫܳܐ.
6 ܘܶܐܡܰܪ ܠܒܰܝܬܳܐ ܕܺܝܣܪܳܐܶܝܠ ܡܡܰܪܡܪܳܢܳܐ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܠܳܐ ܟܰܕܽܘ ܠܟܽܘܢ ܟܽܠܳܗ̇ ܛܰܢܦܽܘܬܟܽܘܢ ܕܒܶܝܬ ܝܺܣܪܳܐܶܝܠ.
7 ܐܶܠܳܐ ܐܳܦ ܡܰܝܬܶܝܢ ܐܰܢ̱ܬܽܘܢ ܡܶܢ ܒܢܰܝ̈ ܢܽܘܟܖ̈ܳܝܶܐ ܕܥܽܘܪܠܺܝܢ ܒܠܶܒܗܽܘܢ: ܘܥܽܘܪܠܺܝܢ ܒܒܶܣܪܗܽܘܢ: ܘܗܳܘܶܝܢ ܒܡܰܩܕܫܝ: ܘܰܡܛܰܢܦܺܝܢ ܒܰܝܬܝ: ܘܰܡܩܰܪܒܺܝܢ ܐܢ̱ܬܽܘܢ ܥܰܠ ܠܰܚܡܝ ܬܰܪܒܳܐ ܘܰܕܡܳܐ: ܘܰܡܒܰܛܠܺܝܢ ܐܢ̱ܬܽܘܢ ܩܝܳܡܝ ܒܟܽܠܳܗ̇ ܛܰܢܦܽܘܬܟܽܘܢ.
8 ܘܠܳܐ ܢܳܛܪܺܝܢ ܐܢ̱ܬܽܘܢ ܢܛܽܘܖ̈ܳܬܳܐ ܕܡܰܩܕܫܝ: ܐܶܠܳܐ ܥܒܰܕܬܽܘܢ ܢܳܛܖ̈ܰܝ ܡܰܛܰܪܬܳܐ ܕܡܰܩܕܫܝ ܢܳܛܽܘܖ̈ܰܝܟܽܘܢ ܕܺܝܠܟܽܘܢ.
9 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܟܽܠ ܒܰܪ ܢܽܘܟܖ̈ܳܝܶܐ ܕܥܪܽܘܠ ܒܠܶܒܶܗ ܘܥܽܘܪܠܳܐ ܒܒܶܣܪܶܗ: ܠܳܐ ܢܶܥܽܘܠ ܠܡܰܩܕܫܝ: ܘܠܳܐ ܒܰܪ ܢܽܘܟܖ̈ܳܝܶܐ ܕܺܐܝܬ ܒܰܝܢܳܬ ܒܢܰܝ̈ ܝܺܣܪܳܐܶܝܠ.
10 ܐܳܦܠܳܐ ܠܶܘܳܝ̈ܶܐ ܕܰܦܪܰܩܘ ܡܶܢܝ: ܟܰܕ ܛܥܰܘ ܒܢܰܝ̈ ܝܺܣܪܳܐܶܝܠ ܡܶܢܝ ܒܳܬܰܪ ܦܬܰܟܖ̈ܰܝܗܽܘܢ: ܘܩܰܒܶܠܘ ܥܰܘܠܗܽܘܢ.
11 ܘܰܗܘܰܘ ܒܡܰܩܕܫܝ: ܘܰܡܫܰܡܫܺܝܢ ܗܘܰܘ ܒܬܰܪܥܳܐ ܕܒܰܝܬܳܐ: ܗܶܢܽܘܢ ܢܶܟܣܽܘܢ ܝܰܩ̈ܕܶܐ ܫܰܠ̈ܡܶܐ ܘܕܶܒܚ̈ܶܐ ܕܥܰܡܳܐ: ܘܗܶܢܽܘܢ ܢܩܽܘܡܽܘܢ ܩܕܳܡܰܝܗܽܘܢ ܘܰܢܫܰܡܫܽܘܢ ܐܶܢܽܘܢ.
12 ܥܰܠ ܕܫܰܡܶܫܘ ܐܶܢܽܘܢ ܩܕܳܡ ܦܬܰܟܖ̈ܰܝܗܽܘܢ: ܘܰܗܘܰܘ ܠܬܽܘܩܰܠܬܳܐ ܕܥܰܘܠܳܐ ܠܰܒܢܰܝ̈ ܝܺܣܪܳܐܶܝܠ: ܡܶܛܽܠܗܳܢܳܐ ܐܰܪܺܝܡܶ݀ܬ ܐܺܝܕܝ ܥܠܰܝܗܽܘܢ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܘܩܰܒܶܠܘ ܥܰܘܠܗܽܘܢ.
13 ܘܠܳܐ ܢܶܩܪܒܽܘܢ ܩܕܳܡܰܝ ܠܰܡܫܰܡܳܫܽܘܬܰܢܝ: ܘܠܳܐ ܢܶܬܩܰܪܒܽܘܢ ܠܟܽܠܗܽܘܢ ܩܽܘ̈ܕܫܰܝ ܒܶܝܬ ܩܕܽܘܫ ܩܽܘܕܫ̈ܶܐ: ܘܰܢܩܰܒܠܽܘܢ ܟܽܠܳܗ̇ ܒܶܗܬܰܬܗܽܘܢ ܘܟܽܠܳܗ̇ ܛܰܢܦܽܘܬܗܽܘܢ ܕܰܥܒܰܕܘ.
14 ܘܶܐܥܒܶܕ ܐܶܢܽܘܢ ܢܳܛܖ̈ܰܝ ܡܰܛܰܪܬܳܐ ܕܒܰܝܬܳܐ: ܘܥܳܒܕܰܝ̈ ܥܒܳܕܳܐ ܕܟܽܠܡܶܕܶܡ ܕܗܰܘܳܐ ܒܶܗ.
15 ܘܟܳܗ̈ܢܶܐ ܘܠܶܘܳܝ̈ܶܐ ܒܢܰܝ̈ ܨܳܕܽܘܩ: ܕܰܢܛܰܪܘ ܡܰܛܰܪܬܳܐ ܕܡܰܩܕܫܝ: ܟܰܕ ܛܥܰܘ ܒܢܰܝ̈ ܝܺܣܪܳܐܶܝܠ ܡܶܢܝ: ܗܶܢܽܘܢ ܢܶܩܪܒܽܘܢ ܠܘܳܬܝ ܠܰܡܫܰܡܳܫܽܘܬܰܢܝ: ܘܗܶܢܽܘܢ ܢܩܽܘܡܽܘܢ ܩܕܳܡܰܝ: ܘܰܢܩܰܪܒܽܘܢ ܠܺܝ ܬܰܪܒܳܐ ܘܰܕܡܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
16 ܗܶܢܽܘܢ ܢܶܥܠܽܘܢ ܠܡܰܩܕܫܝ: ܘܗܶܢܽܘܢ ܢܶܩܪܒܽܘܢ ܠܦܳܬܽܘܪܝ: ܕܰܢܫܰܡܫܽܘܢܳܢܝ: ܘܢܶܛܪܽܘܢ ܢܛܽܘܖ̈ܳܬܝ.
17 ܘܡܳܐ ܕܥܳܐܠܺܝܢ ܒܬܰܪܥܳܐ ܕܕܳܪܬܳܐ ܓܰܘܳܝܬܳܐ: ܡܳܐܢ̈ܶܐ ܕܟܶܬܳܢܳܐ ܢܶܠܒܫܽܘܢ: ܘܰܕܥܰܡܪܳܐ ܠܳܐ ܢܶܠܒܫܽܘܢ: ܘܡܳܐ ܕܰܡܫܰܡܫܺܝܢ ܒܬܰܪܥܳܐ ܕܕܳܪܬܳܐ ܓܰܘܳܝܬܳܐ.
18 ܐܳܦ ܠܓܰܘ ܡܰܨܢ̈ܦܳܬܳܐ ܕܟܶܬܳܢܳܐ ܢܣܺܝܡܽܘܢ ܒܖ̈ܺܝܫܰܝܗܽܘܢ: ܘܦܰܖ̈ܙܽܘܡܶܐ ܕܟܶܬܳܢܳܐ ܢܶܐܣܪܽܘܢ ܒܚܰܨܰܝ̈ܗܽܘܢ.
19 ܘܡܳܐ ܕܢܳܦܩܺܝܢ ܠܕܳܪܬܳܐ ܒܰܪܳܝܬܳܐ ܠܘܳܬ ܥܰܡܳܐ: ܢܶܫܠܚܽܘܢ ܡܳܐܢܰܝ̈ܗܽܘܢ ܕܰܡܫܰܡܫܺܝܢ ܒܗܽܘܢ: ܘܢܶܫܒܩܽܘܢ ܐܶܢܽܘܢ ܒܰܐܟܣܶܕܖ̈ܶܐ ܕܩܽܘܕܫܳܐ: ܘܢܶܠܒܫܽܘܢ ܡܳܐܢ̈ܶܐ ܐ̱ܚܖ̈ܳܢܶܐ: ܕܠܳܐ ܢܩܰܕܫܽܘܢܶܗ ܠܥܰܡܳܐ ܒܡܳܐܢܰܝ̈ܗܽܘܢ.
20 ܖ̈ܺܝܫܰܝܗܽܘܢ ܠܳܐ ܢܶܓܪܥܽܘܢ: ܘܩܽܘ̈ܨܳܬܗܽܘܢ ܠܳܐ ܢܪܰܒܽܘܢ: ܐܶܠܳܐ ܡܣܰܦܳܪܽܘ ܢܣܰܦܪܽܘܢ ܖ̈ܺܝܫܰܝܗܽܘܢ.
21 ܘܚܰܡܪܳܐ ܠܳܐ ܢܶܫܬܽܘܢ ܟܳܗ̈ܢܶܐ ܡܳܐ ܕܥܳܐܠܺܝܢ ܠܕܳܪܬܳܐ ܓܰܘܳܝܬܳܐ.
22 ܘܰܐܪܡܰܠܬܳܐ ܘܰܫܒܺܝܩܬܳܐ ܠܳܐ ܢܶܣܒܽܘܢ ܠܗܽܘܢ ܢܶܫ̈ܶܐ: ܐܶܠܳܐ ܐܶܢ ܒܬܽܘܠܬܳܐ ܡܶܢ ܙܰܪܥܳܐ ܕܺܝܣܪܳܐܶܝܠ: ܐܰܘ ܐܰܪܡܰܠܬܳܐ ܕܡܰܪܡܠܳܐ ܡܶܢ ܟܳܗܢܳܐ ܢܶܣܒܽܘܢ.
23 ܘܢܰܠܦܽܘܢ ܠܥܰܡܝ ܒܶܝܬ ܩܽܘܕܫܳܐ ܠܚܽܘܠܳܐ: ܘܢܰܘܕܥܽܘܢܶܗ ܒܶܝܬ ܡܣܰܝܒܳܐ ܠܕܰܟܝܳܐ.
24 ܘܥܰܠ ܕܺܝ̈ܢܶܐ ܗܶܢܽܘܢ ܢܩܽܘܡܽܘܢ ܠܰܡܕܳܢ: ܘܰܒܕܺܝ̈ܢܰܝ ܢܕܽܘܢܽܘܢ: ܘܢܳܡܽܘܣܰܝ̈ ܘܦܽܘܩ̈ܕܳܢܰܝ ܢܶܛܪܽܘܢ: ܒܟܽܠܗܽܘܢ ܙܰܒܢ̈ܶܐ ܕܡܰܘ̈ܥܕܰܝ: ܘܫܰܒܰܝ̈ ܢܩܰܕܫܽܘܢ.
25 ܘܥܰܠ ܡܺܝܬܳܐ ܕܒܰܪܢܳܫܳܐ ܠܳܐ ܢܶܥܠܽܘܢ ܕܠܳܐ ܢܶܣܬܰܝܒܽܘܢ: ܐܶܠܳܐ ܐܶܢ ܒܰܐܒܽܘܗܝ ܐܰܘ ܒܶܐܡܶܗ: ܐܰܘ ܒܰܒܪܶܗ: ܐܰܘ ܒܒܰܪܬܶܗ: ܐܰܘ ܒܰܐܚܽܘܗܝ: ܐܰܘ ܒܚܳܬܶܗ ܒܬܽܘܠܬܳܐ ܕܠܳܐ ܗܘܳܬ ܠܓܰܒܪܳܐ ܢܶܣܬܰܝܒܽܘܢ.
26 ܘܡܶܢ ܒܳܬܰܪ ܕܡܶܣܬܰܝܰܒ: ܢܶܡܢܶܐ ܠܶܗ ܫܰܒܥܳܐ ܝܰܘܡܺܝ̈ܢ: ܘܗܳܝܕܶܝܢ ܢܶܬܕܰܟܶܐ.
27 ܘܰܒܝܰܘܡܳܐ ܕܥܳܐܶܠ ܠܡܰܩܕܫܳܐ ܠܕܳܪܬܳܐ ܓܰܘܳܝܬܳܐ ܠܰܡܫܰܡܳܫܽܘ ܒܩܽܘܕܫܳܐ: ܢܩܰܪܶܒ ܬܰܕܟܺܝܬܶܗ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
28 ܘܬܶܗܘܶܐ ܠܗܽܘܢ ܠܝܽܘܪܬܳܢܳܐ: ܐܶܢܳܐ ܐ̱ܢܳܐ ܝܽܘܪܬܳܢܗܽܘܢ: ܘܰܡܢܳܬܳܐ ܠܳܐ ܬܶܬܠܽܘܢ ܠܗܽܘܢ ܒܺܝܣܪܳܐܶܝܠ: ܐܶܢܳܐ ܐ̱ܢܳܐ ܡܢܳܬܗܽܘܢ.
29 ܣܡܺܝܕܳܐ ܘܬܰܕܟܺܝܬܳܐ ܕܰܚܛܳܗ̈ܶܐ ܗܶܢܽܘܢ ܢܶܐܟܠܽܘܢ: ܘܟܽܠ ܚܶܪܡܳܐ ܕܒܺܝܣܪܳܐܶܝܠ ܕܺܝܠܗܽܘܢ ܢܶܗܘܶܐ.
30 ܘܪܺܝܫ ܟܠ ܒܽܘܟܖ̈ܶܐ ܕܟܽܠܶܗ ܦܽܘܪܫܳܢܳܐ ܕܦܳܪܫܺܝܢ ܐܢ̱ܬܽܘܢ: ܕܟܳܗ̈ܢܶܐ ܢܶܗܘܶܐ. ܘܪܺܝܫ ܐܳܨܘ̈ܳܬܟܽܘܢ ܗܰܒܘ ܠܟܳܗ̈ܢܶܐ: ܕܬܶܗܘܶܐ ܒܽܘܪܟܬܳܐ ܒܒܳܬܰܝ̈ܟܽܘܢ.
31 ܘܟܽܠ ܕܰܡܫܰܢܰܩ ܘܰܬܒܺܝܪ ܡܶܢ ܦܳܪܰܚܬܳܐ ܘܡܶܢ ܚܰܝܽܘܬܳܐ: ܠܳܐ ܢܶܐܟܠܽܘܢ ܟܳܗ̈ܢܶܐ.