Isaiah 66
The Book of Isaiah
܀ ܐܫܥܝܐ ܣܘ ܀
1 ܗܳܟܰܢܳܐ ܐܳܡܰܪ ܡܳܪܝܳܐ: ܫܡܰܝܳܐ ܟܽܘܪܣܰܝ: ܘܰܐܪܥܳܐ ܟܽܘܒܫܳܐ ܕܖ̈ܶܓܠܰܝ: ܐܰܝܢܳܘ ܒܰܝܬܳܐ ܕܒܳܢܶܝܢ ܐ̱ܢܬܽܘܢ ܠܺܝ: ܐܰܘ ܐܰܝܢܰܘ ܐܰܬܪܐ ܕܰܢܝܳܚܬܝ.
2 ܗܳܠܶܝܢ ܟܽܠܗܶܝܢ ܐܺܝܕܝ ܥܶܒܕܰܬ: ܘܕܺܝܠܝ ܐܶܢܶܝܢ ܗܳܠܶܝܢ ܟܽܠܗܶܝܢ ܐܳܡܰܪ ܡܳܪܝܳܐ. ܘܰܒܡܰܢ ܐܶܚܽܘܪ ܘܶܐܥܡܰܪ: ܐܶܠܳܐ ܒܢܺܝܚܳܐ ܘܰܒܡܰܟܺܝܟ ܪܽܘܚܳܐ ܕܙܳܐܰܥ ܡ̣ܶܢ ܡܶܠܰܬܝ.
3 ܕܢܳܟܶܣ ܬܰܘܪܳܐ ܐܰܝܟ ܗܰܘ ܕܩܳܛܶܠ ܓܰܒܪܳܐ: ܕܕܳܒܰܚ ܐܶܡܪܳܐ ܐܰܝܟ ܗܰܘ ܕܩܳܛܶܠ ܟܰܠܒܳܐ: ܕܰܡܩܰܪܶܒ ܣܡܺܝܕܳܐ ܐܰܝܟ ܕܡܳܐ ܕܰܚܙܺܝܪܳܐ: ܕܰܡܩܰܪܶܒ ܠܒܽܘܢܬܳܐ ܐܰܝܟ ܗܰܘ ܕܰܡܒܰܪܶܟ ܠܰܦܬܰܟܖ̈ܶܐ: ܐܳܦ ܗܶܢܽܘܢ ܐܶܬܪܰܥܺܝܘ ܒܽܐܘܖ̈ܚܳܬܗܽܘܢ: ܘܰܨܒܳܬ ܢܰܦܫܗܽܘܢ ܒܰܦܬܰܟܖ̈ܰܝܗܽܘܢ.
4 ܐܳܦ ܐܶܢܳܐ ܐܶܨܒܶܐ ܒܒܽܘܙܳܚܗܽܘܢ: ܘܶܐܦܪܽܘܥ ܐܶܢܽܘܢ ܥܒܳܕܰܝ̈ܗܽܘܢ: ܥܰܠ ܕܰܩܪܺܝܬ ܘܠܰܝܬ ܕܥܳܢܶܐ: ܘܡܰܠܠܶܬ ܘܠܳܐ ܫܡܰܥܘ: ܘܰܥܒܰܕܘ ܕܒܺܝܫ ܩܕܳܡܝ: ܘܰܓܒܰܘ ܡܶܕܶܡ ܕܠܳܐ ܨܒܺܝܬ.
5 ܫܡܰܥܘ ܦܶܬܓܳܡܶܗ ܕܡܳܪܝܳܐ ܐܰܝܠܶܝܢ ܕܙܳܝܥܺܝܢ ܡ̣ܶܢ ܡܶܠܬܶܗ. ܐܶܡܰܪܘ ܠܰܐܚܰܝ̈ܟܽܘܢ ܣܳܢܐܰܝ̈ܟܽܘܢ ܡܰܣܠܝܳܢܰܝ̈ܟܘܢ ܡܶܛܽܠ ܫܶܡܝ. ܢܶܫܬܰܒܰܚ ܡܳܪܝܳܐ ܘܢܶܚܕܶܐ ܒܚܰܕܽܘܬܟܽܘܢ: ܘܗܶܢܽܘܢ ܢܶܒܗܬܽܘܢ.
6 ܩܳܠܳܐ ܕܰܕܠܽܘܚܝܳܐ ܡ̣ܶܢ ܩܪܺܝܬܳܐ: ܘܩܳܠܳܐ ܡ̣ܶܢ ܗܰܝܟܠܳܐ: ܩܳܠܶܗ ܕܡܳܪܝܳܐ ܕܦܳܪܰܥ ܦܽܘܪܥܳܢܳܐ ܠܰܒܥܶܠܕܒܳܒܰܘ̈ܗܝ.
7 ܥܰܕܠܳܐ ܬܚܰܒܶܠ ܕܝܳܠܕܳܐ: ܘܥܰܕܠܳܐ ܢܶܡܛܽܘܢ ܚܶܒܠܶܝܗ̇ ܘܬܶܦܠܰܛ ܕܶܟܪܳܐ.
8 ܡܰܢ ܫܡܰܥ ܐܰܝܟ ܗܳܕܶܐ: ܘܡܰܢ ܚܙܳܐ ܐܰܝܟ ܗܳܠܶܝܢ: ܕܰܡܚܰܒܠܳܐ ܐܰܪܥܳܐ ܒܝܰܘܡܳܐ ܚܰܕ: ܘܡܶܬܺܝܠܶܕ ܥܰܡܳܐ ܒܫܳܥܬܳܐ ܚܕܳܐ: ܡܶܛܽܠ ܕܚܰܒܠܰܬ ܘܝܶܠܕܰܬ ܨܶܗܝܽܘܢ ܠܰܒܢܶܝ̈ܗ̇.
9 ܐܶܢܳܐ ܝܶܗܒܬ ܣܽܘܟܳܝܳܐ ܗܳܢܳܐ: ܘܠܳܐ ܡܰܘܠܶܕ ܐ̱ܢܳܐ ܐܳܡܰܪ ܡܳܪܝܳܐ ܕܰܠܡܳܐ ܠܳܐ ܗ̱ܘܳܐ ܐܶܢܳܐ ܡܰܘܠܶܕ ܐ̱ܢܳܐ ܘܟܳܠܶܐ ܐ̱ܢܳܐ ܐܳܡܰܪ ܐܰܠܳܗܶܟܝ.
10 ܚܕܰܘ ܒܽܐܘܪܺܫܠܶܡ ܘܕܽܘܨܘ ܒܳܗ̇ ܟܠ ܖ̈ܳܚܡܶܝܗ̇. ܐܶܬܒܰܣܰܡܘ ܥܰܡܳܗ̇ ܒܒܽܘܣܳܡܳܐ ܟܠ ܕܰܗܘܰܘ ܒܶܐܒܠܳܐ ܥܠܶܝܗ̇.
11 ܘܬܺܐܢܩܽܘܢ ܘܬܶܣܒܠܽܘܢ ܡ̣ܶܢ ܬܕܳܐ ܕܒܽܘܝܳܐܳܗ̇: ܘܬܺܐܢܩܽܘܢ ܘܬܶܬܦܰܢܩܽܘܢ ܡ̣ܶܢ ܥܽܘܫܢܳܐ ܕܺܐܝܩܳܪܳܗ̇.
12 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܕܗܳܐ ܪܳܡܶܐ ܐ̱ܢܳܐ ܥܠܶܝܗ̇ ܫܠܳܡܳܐ ܐܰܝܟ ܢܰܗܪܳܐ: ܘܰܐܝܟ ܢܰܚܠܳܐ ܕܓܳܪܶܦ. ܘܺܐܝܩܳܪܳܐ ܕܥܰܡ̈ܡܶܐ ܬܺܐܢܩܽܘܢ: ܘܥܰܠ ܦܶܖ̈ܝܳܘܳܬܳܐ ܬܶܫܬܰܩܠܽܘܢ: ܘܥܰܠ ܒܽܘܖ̈ܟܶܐ ܬܶܬܪܰܒܽܘܢ.
13 ܐܰܝܟ ܓܰܒܪܳܐ ܕܰܡܒܰܝܐܰܐ ܠܶܗ ܐܶܡܶܗ: ܗܳܟܰܢܳܐ ܐܶܢܳܐ ܐܶܒܰܝܰܐܟܽܘܢ: ܘܒܽܐܘܪܺܫܠܶܡ ܬܶܬܒܰܝܐܽܘܢ.
14 ܘܬܶܚܙܽܘܢ ܘܢܶܚܕܶܐ ܠܶܒܟܽܘܢ: ܘܓܰܖ̈ܡܰܝܟܽܘܢ ܐܰܝܟ ܬܰܕܐܳܐ ܢܶܪܘܙܽܘܢ. ܘܬܶܬܺܝܕܰܥ ܐܺܝܕܶܗ ܕܡܳܪܝܳܐ ܥܰܠ ܥܰܒܕܰܘ̈ܗܝ: ܘܬܰܘܒܶܕ ܠܰܒܥܶܠܕܒܳܒܰܘ̈ܗܝ.
15 ܡܶܛܽܠ ܕܗܳܐ ܡܳܪܝܳܐ ܒܢܽܘܪܳܐ ܐܳܬܶܐ: ܘܰܐܝܟ ܥܰܠܥܳܠܳܐ ܡܰܪܟܰܒܬܶܗ. ܕܢܶܗܦܽܘܟ ܒܚܶܡܬܳܐ ܕܪܽܘܓܙܶܗ. ܘܰܟܐܳܬܶܗ ܫܰܠܗܶܒܺܝܬܳܐ ܕܢܽܘܪܳܐ.
16 ܡܶܛܽܠ ܕܰܒܢܽܘܪܳܐ ܕܳܐܶܢ ܡܳܪܝܳܐ: ܘܒܳܚܰܪ ܒܳܗ̇ ܠܟܽܠ ܒܣܰܪ: ܘܢܶܣܓܽܘܢ ܩܛܺܝܠܰܘ̈ܗܝ ܕܡܳܪܝܳܐ.
17 ܕܡܶܬܩܰܕܫܺܝܢ ܘܡܶܬܕܰܟܶܝܢ ܒܓܰܢ̈ܶܐ: ܚܰܕ ܒܳܬܰܪ ܚܰܕ ܒܰܡܨܰܥܬܳܐ: ܘܐܳܟܠܺܝܢ ܒܶܣܪܳܐ ܕܰܚܙܺܝܪܳܐ: ܘܫܶܪܨܳܐ ܘܥܽܘܩܒܖ̈ܶܐ. ܐܰܟܚܕܳܐ ܢܣܽܘܦܽܘܢ ܐܳܡܰܪ ܡܳܪܝܳܐ.
18 ܘܶܐܢܳܐ ܝܳܕܰܥ ܐ̱ܢܳܐ ܥܒܳܕܰܝ̈ܗܽܘܢ ܘܬܰܖ̈ܥܝܳܬܗܽܘܢ: ܡܳܐ ܕܶܐܬܺܝܬ ܠܰܡܟܰܢܳܫܽܘ ܠܟܽܠܗܽܘܢ ܥܰܡ̈ܡܶܐ ܘܰܠܶܠܫܳܢ̈ܶܐ: ܘܢܺܐܬܽܘܢ ܘܢܶܚܙܽܘܢ ܐܺܝܩܳܪܝ.
19 ܘܶܐܣܺܝܡ ܒܗܽܘܢ ܐܳܬܳܐ: ܘܶܐܫܰܕܰܪ ܡܶܢܗܽܘܢ ܡܫܰܘܙ̈ܒܶܐ ܠܥܰܡ̈ܡܶܐ: ܠܬܰܪܫܺܝܫ: ܘܰܠܦܳܘܠ: ܘܰܠܠܳܘܕ: ܕܢܳܓܕܺܝܢ ܒܩܶܫܬܳܐ: ܘܰܠܬܽܘܒܶܝܠ: ܘܰܠܝܳܘܳܢ: ܘܰܠܓܳܙܖ̈ܳܬܳܐ ܖ̈ܰܚܺܝܩܳܬܳܐ: ܕܠܳܐ ܫܡܰܥܘ ܫܶܡܝ ܘܠܳܐ ܚܙܰܘ ܐܺܝܩܳܪܝ: ܘܰܢܚܰܘܢ ܐܺܝܩܳܪܝ ܒܥܰܡ̈ܡܶܐ.
20 ܘܢܰܝܬܽܘܢ ܠܟܽܠܗܽܘܢ ܐܰܚܰܝ̈ܟܘܢ ܡ̣ܶܢ ܟܽܠܗܽܘܢ ܥܰܡ̈ܡܶܐ ܩܽܘܪܒܳܢܳܐ ܠܡܳܪܝܳܐ: ܒܖ̈ܰܟܫܳܐ: ܘܰܒܡܰܖ̈ܟܒܳܬܳܐ: ܘܰܒܩܳܖ̈ܽܘܟܶܐ: ܠܛܽܘܪܳܐ ܕܩܽܘܕܫܝ: ܠܽܐܘܪܺܫܠܶܡ ܐܳܡܰܪ ܡܳܪܝܳܐ: ܐܰܝܟ ܕܡܰܝܬܶܝܢ ܒܢܰܝ̈ ܝܺܣܪܳܐܶܝܠ ܣܡܺܝܕܳܐ ܒܡܳܐܢ̈ܶܐ ܕܟܰܝ̈ܳܐ ܠܒܰܝܬܶܗ ܕܡܳܪܝܳܐ.
21 ܐܳܦ ܡܶܢܗܽܘܢ ܐܶܣܰܒ ܠܟܳܗ̈ܢܶܐ: ܘܰܠܠܶܘܳܝ̈ܶܐ: ܐܳܡܰܪ ܡܳܪܝܳܐ.
22 ܐܰܝܟ ܫܡܰܝ̈ܳܐ ܚܰܕ̈ܳܬܳܐ ܘܰܐܪܥܳܐ ܚܕܰܬܳܐ ܕܥܳܒܶܕ ܐ̱ܢܳܐ: ܕܩܳܝܡܺܝܢ ܩܕܳܡܝ ܐܳܡܰܪ ܡܳܪܝܳܐ: ܗܳܟܰܢܳܐ ܢܶܬܩܰܝܰܡ ܙܰܪܥܟܽܘܢ ܘܫܶܡܟܽܘܢ.
23 ܘܢܶܗܘܶܐ ܡ̣ܶܢ ܙܒܰܢ ܝܺܪܰܚ ܒܺܝܪܰܚ: ܘܡ̣ܶܢ ܙܒܰܢ ܫܰܒܳܐ ܠܫܰܒܳܐ: ܢܺܐܬܽܘܢ ܟܠ ܒܣܰܪ ܠܡܶܣܓܰܕ ܩܕܳܡܝ ܐܳܡܰܪ ܡܳܪܝܳܐ.
24 ܘܢܶܦܩܽܘܢ ܘܢܶܚܙܽܘܢ ܫܠܰܕܰܝ̈ܗܽܘܢ ܕܓܰܒܖ̈ܶܐ ܕܰܐܥܠܺܝܘ ܒܺܝ: ܕܠܳܐ ܡܳܝܬܳܐ ܬܰܘܠܰܥܗܽܘܢ: ܘܢܽܘܪܗܽܘܢ ܠܳܐ ܕܳܥܟܳܐ: ܘܢܶܗܘܽܘܢ ܕܽܘܡܳܪܳܐ ܠܟܽܠ ܒܣܰܪ.