Isaiah 10
The Book of Isaiah
܀ ܐܫܥܝܐ ܝ ܀
1 ܘܳܝ ܠܰܕܒܳܕܩܺܝܢ ܒܕܳܩ̈ܶܐ ܕܥܶܬܳܐ: ܘܟܳܬܒܺܝܢ ܥܰܘܠܳܐ.
2 ܠܡܶܨܠܳܐ ܕܺܝܢܳܐ ܕܡܶܣܟܺܢ̈ܶܐ: ܘܰܠܡܶܒܰܙ ܕܺܝܢܳܐ ܕܒܳܝ̈ܫܶܐ ܕܥܰܡܝ. ܕܢܶܫܒܽܘܢ ܠܰܐܖ̈ܡܠܳܬܳܐ: ܘܢܶܒܙܽܘܢ ܠܝܰܬܡ̈ܶܐ.
3 ܡܳܢܳܐ ܬܶܥܒܕܽܘܢ ܠܝܰܘܡܳܐ ܕܦܽܘܪܥܳܢܳܐ: ܘܠܰܕܠܽܘܚܝܳܐ ܕܡ̣ܶܢ ܪܽܘܚܩܳܐ ܐܳܬܶܐ. ܠܘܳܬ ܡܰܢ ܬܶܥ̱ܪܩܽܘܢ ܕܬܶܬܥܰܕܪܽܘܢ ܘܰܠܘܳܬ ܡܰܢ ܬܶܫܒܩܽܘܢ ܐܺܝܩܳܪܟܽܘܢ.
4 ܕܠܳܐ ܬܶܒܪܟܽܘܢ ܬܚܶܝܬ ܐܰܣܺܝܖ̈ܶܐ: ܬܚܶܝܬ ܩܛܺܝ̈ܠܶܐ ܬܶܦܠܽܘܢ ܘܰܒܗܳܠܶܝܢ ܟܽܠܗܶܝܢ ܠܳܐ ܗܦܰܟ ܪܽܘܓܙܶܗ. ܘܬܽܘܒ ܐܺܝܕܶܗ ܪܳܡܳܐ.
5 ܘܳܝ ܠܐܳܬܽܘܪܳܝܳܐ: ܫܰܒܛܳܐ ܗ̱ܘ̣ ܕܪܽܘܓܙܝ: ܘܚܽܘܛܪܳܐ ܗ̱ܘ̣ ܒܺܐܝܕܗܽܘܢ ܕܰܡܚܽܘܬܝ: ܥܰܠ ܥܰܡܳܐ ܚܰܠܦܳܐ ܐܶܫܰܕܪܺܝܘܗܝ.
6 ܘܥܰܠ ܥܰܡܳܐ ܐܰܟܬܳܢܳܐ ܐܶܦܰܩܕܺܝܘܗܝ ܕܢܶܫܒܶܐ ܫܶܒܝܳܐ: ܘܢܶܒܽܘܙ ܒܶܙܬܳܐ: ܘܢܶܥܒܕܺܝܘܗܝ ܕܝܳܫܳܐ ܐܰܝܟ ܣܝܳܢܳܐ ܕܫܽܘܩ̈ܶܐ.
7 ܘܗܽܘ ܠܳܐ ܗ̱ܘܳܐ ܗܳܟܰܢܳܐ ܕܰܡܺܝ. ܘܰܒܠܶܒܶܗ ܠܳܐ ܗ̱ܘܳܐ ܗܳܟܰܢܳܐ ܐܶܬܚܰܫܰܒ. ܐܶܠܳܐ ܕܢܰܘܒܶܕ ܒܠܶܒܶܗ: ܘܰܢܣܺܝܦ ܥܰܡ̈ܡܶܐ ܣܰܓܺܝ̈ܐܶܐ.
8 ܡܶܛܽܠ ܕܶܐܡܰܪ: ܕܗܳܐ ܪܰܘܖ̈ܒܳܢܶܐ ܐܰܟܚܕܳܐ. ܡܰܠ̈ܟܶܐ ܐܶܢܽܘܢ.
9 ܗܳܐ ܐܰܝܟ ܟܰܪܟܡܽܘܫ ܒܰܠܝܽܘ: ܘܰܐܝܟ ܪܳܦܳܕ ܚܡܳܬ: ܘܰܐܝܟ ܕܰܪܡܣܽܘܩ ܫܳܡܪܺܝܢ.
10 ܘܰܐܝܟ ܕܶܐܫܟܚܰܬ ܐܺܝܕܝ ܠܡܰܠ̈ܟܘܳܬܳܐ ܕܰܦܬܰܟܖ̈ܶܐ ܘܕܰܓ̣ܠܺܝ̈ܦܶܐ: ܡ̣ܶܢ ܐܽܘܪܺܫܠܶܡ ܘܡ̣ܶܢ ܫܳܡܪܺܝܢ.
11 ܘܰܐܝܟ ܕܥܶܒܕܶܬ ܠܫܳܡܪܺܝܢ ܘܠܰܦܬܰܟܖ̈ܶܝܗ̇: ܗܳܟܰܢܳܐ ܐܶܥܒܶܕ ܠܽܐܘܪܺܫܠܶܡ ܘܠܰܦܬܰܟܖ̈ܶܝܗ̇.
12 ܘܢܶܗܘܶܐ ܡܳܐ ܕܫܰܡܠܺܝ ܡܳܪܝܳܐ ܟܽܠܗܽܘܢ ܥܒܳܕܰܘ̈ܗܝ ܒܛܽܘܪܳܐ ܕܨܶܗܝܽܘܢ: ܘܒܽܐܘܪܺܫܠܶܡ: ܐܶܦܩܽܘܕ ܥܰܠ ܦܶܐܖ̈ܰܘܗܝ ܕܠܶܒܳܐ ܪܰܒܳܐ ܕܡܰܠܟܳܐ ܕܳܐܬܽܘܪ: ܘܥܰܠ ܬܶܫܒܽܘܚܬܳܐ ܕܪܳܘܡܳܐ ܕܥܰܝܢܰܘ̈ܗܝ.
13 ܡܶܛܽܠ ܕܶܐܡܰܪ ܕܰܒܚܰܝܠܳܐ ܕܺܐܝܕܝ ܥܶܒܕܶܬ: ܘܰܒܚܶܟܡܰܬܝ ܡܶܛܽܠ ܕܣܰܟܽܘܠܬܳܢ ܐ̱ܢܳܐ. ܐܰܥܒܪܶܬ ܬܚܽܘܡܰܝ̈ܗܽܘܢ ܕܥܰܡ̈ܡܶܐ. ܘܢܶܟܣܰܝ̈ܗܽܘܢ ܒܶܙܶܬ. ܘܟܰܒܫܶܬ ܡܕܺܝ̈ܢܳܬܳܐ ܕܝܰܬܒ̈ܳܢ.
14 ܘܶܐܫܟܚܰܬ ܐܶܝܕܝ ܐܰܝܟ ܩܶܢܳܐ ܠܚܰܝܠܳܐ ܕܥܰܡ̈ܡܶܐ: ܘܰܐܝܟ ܕܟܳܢܫܺܝܢ ܒ̈ܢܳܬܳܐ ܕܰܫܒܺܝ̈ܩܳܢ: ܟܢܰܫܬܳܗ̇ ܠܟܽܠܳܗ̇ ܐܰܪܥܳܐ. ܘܠܳܐ ܗܘܳܐ ܕܰܡܪܺܝܡ ܓܶܦܳܐ: ܘܦܳܬܰܚ ܦܽܘܡܶܗ ܘܢܳܨܰܪ.
15 ܕܰܠܡܳܐ ܡܶܫܬܰܒܰܚ ܢܳܪܓܳܐ ܥܰܠ ܡܰܢ ܕܦܳܣܶܩ ܒܶܗ. ܐܰܘ ܡܶܬܬܪܺܝܡ ܡܰܣܳܪܳܐ ܥܰܠ ܡܰܢ ܕܢܳܣܰܪ ܒܶܗ. ܐܰܘ ܡܶܫܬܰܩܰܠ ܫܰܒܛܳܐ ܥܰܠ ܡܰܢ ܕܰܡܪܺܝܡ ܠܶܗ.
16 ܡܶܛܽܠ ܗܳܢܳܐ ܢܫܰܕܰܪ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ: ܐܰܒܕܳܢܳܐ ܥܰܠ ܫܰܡܺܝܢܳܘ̈ܗܝ ܚܠܳܦ ܐܺܝܩܳܪܶܗ ܢܺܐܩܰܕ ܝܰܩܕܳܢܶܗ ܐܰܝܟ ܝܰܩܕܳܢܳܐ ܕܢܽܘܪܳܐ.
17 ܘܢܶܗܘܶܐ ܢܽܘܗܪܶܗ ܕܺܝܣܪܳܐܶܝܠ ܠܢܽܘܪܳܐ: ܘܩܰܕܺܝܫܰܘ̈ܗܝ ܠܫܰܠܗܶܒܺܝܬܳܐ. ܘܬܰܘܩܶܕ ܘܬܶܐܟܽܘܠ ܝܰܥܪܶܗ ܘܟܽܘܒܰܘ̈ܗܝ ܒܝܰܘܡܳܐ ܚܰܕ.
18 ܘܫܽܘܒܚܳܐ ܕܥܳܒܶܗ ܘܰܕܟܰܪܡܠܶܗ: ܡ̣ܶܢ ܢܰܦܫܳܐ ܘܰܥܕܰܡܳܐ ܠܒܶܣܪܳܐ ܢܓܰܡܰܪ. ܘܢܶܗܘܶܐ ܐܰܝܟ ܕܠܳܐ ܗܘܳܐ.
19 ܘܫܰܪܟܳܐ ܕܩܰܝ̈ܣܶܐ ܕܥܳܒܶܗ: ܠܡܶܢܝܳܢܳܐ ܢܶܗܘܽܘܢ. ܘܛܰܠܝܳܐ ܢܶܟܬܽܘܒ ܐܶܢܽܘܢ.
20 ܘܢܶܗܘܶܐ ܒܝܰܘܡܳܐ ܗܰܘ: ܠܳܐ ܢܰܘܣܶܦ ܬܽܘܒ ܫܰܪܟܶܗ ܕܺܝܣܪܳܐܶܝܠ: ܘܰܐܝܠܶܝܢ ܕܡܶܬܦܰܨܶܝܢ ܡ̣ܶܢ ܕܒܶܝܬ ܝܰܥܩܽܘܒ ܠܡܶܬܬܟܳܠܽܘ ܥܰܠ ܡܰܢ ܕܰܢܟܶܐ ܐܶܢܽܘܢ. ܐܶܠܳܐ ܢܶܬܬܰܟܠܽܘܢ ܒܩܽܘܫܬܳܐ ܥܰܠ ܡܳܪܝܳܐ ܩܰܕܺܝܫܳܐ ܕܺܝܣܪܳܐܶܝܠ.
21 ܘܫܰܪܟܳܐ ܢܶܬܦܢܽܘܢ: ܫܰܪܟܶܗ ܕܝܰܥܩܽܘܒ ܠܘܳܬ ܐܶܝܠ ܓܰܢ̱ܒܳܪܳܐ.
22 ܘܶܐܢ ܢܶܗܘܶܐ ܥܰܡܳܟ ܝܺܣܪܳܐܶܝܠ: ܐܰܝܟ ܚܳܠܳܐ ܕܰܒܝܰܡܳܐ: ܫܰܪܟܳܐ ܢܶܬܦܢܽܘܢ ܡܶܢܗܽܘܢ ܟܪܰܡ ܘܰܦܣܰܩ̣: ܘܰܓܪܰܦ ܒܙܰܕܺܝܩܽܘܬܳܐ.
23 ܡܶܛܽܠ ܕܰܓܡܽܘܪܝܳܐ ܘܦܳܣܺܝ̈ܩܳܬܳܐ ܥܳܒܶܕ ܡܳܪܝܳܐ ܚܰܝܠܬܳܢܳܐ ܒܟܽܠܳܗ̇ ܐܰܪܥܳܐ.
24 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܠܳܐ ܬܶܕܚܰܠ ܕܥܳܡܰܪ ܒܨܶܗܝܽܘܢ: ܡ̣ܶܢ ܐܳܬܽܘܪܳܝܳܐ ܕܡܳܚܶܐ ܠܳܟ ܒܫܰܒܛܶܗ: ܘܚܽܘܛܪܶܗ ܡܪܺܝܡ ܥܠܰܝܟ ܒܽܐܘܪܚܳܐ ܕܡܶܨܪܶܝܢ.
25 ܡܶܛܽܠ ܕܥܰܕ ܩܰܠܺܝܠ ܙܥܽܘܪ: ܘܢܶܫܬܰܡܠܶܐ ܪܽܘܓܙܝ ܘܚܶܡܬܝ ܥܰܠ ܚܒܳܠܗܽܘܢ.
26 ܘܰܢܥܺܝܪ ܥܠܰܘܗ̱ܝ ܡܳܪܝܳܐ ܚܰܝܠܬܳܢܳܐ ܫܰܘܛܳܐ: ܐܰܝܟ ܡܚܽܘܬܳܐ ܕܡܶܕܝܰܢ ܕܰܒܛܽܘܪܳܐ ܕܚܽܘܪܺܝܒ: ܘܚܽܘܛܪܶܗ ܥܰܠ ܝܰܡܳܐ: ܘܰܫܩܳܠܶܗ ܒܽܐܘܪܚܳܐ ܕܡܶܨܪܶܝܢ.
27 ܘܢܶܗܘܶܐ ܒܝܰܘܡܳܐ ܗܰܘ: ܢܶܥܒܰܪ ܫܽܘܥܒܳܕܶܗ ܡ̣ܶܢ ܟܰܬܦܳܟ: ܘܢܺܝܪܶܗ ܡ̣ܶܢ ܨܰܘܪܳܟ ܘܢܶܬܚܰܒܰܠ ܢܺܝܪܳܐ ܡ̣ܶܢ ܩܕܳܡ ܡܽܘܫܚܳܐ.
28 ܐܶܬܳܐ ܠܰܥܢܳܬ: ܘܰܥܒܰܪ ܒܡܰܓܳܕܽܘ. ܘܰܒܡܰܟܡܰܣ ܣܳܡ ܡܳܐܢܰܘ̈ܗܝ.
29 ܥܒܰܪ ܠܡܰܥܒܪܳܐ ܕܰܓܒܰܥ ܠܒܶܝܬ ܒܝܳܬܰܢ: ܕܶܚܠܰܬ ܪܳܡܬܳܐ: ܘܓܶܒܥܰܬ ܫܳܐܳܘܠ ܥܶܪܩܰܬ.
30 ܨܗܰܠܝ ܒܩܳܠܶܟܝ ܒܰܪܬ ܓܶܠܝܰܡ. ܨܽܘܬܝ ܠܺܝܫ ܘܰܥܢܳܝ ܥܢܳܬܽܘܬ.
31 ܐܶܬܪܰܚܩܰܬ ܡܰܪܡܢܳܐ. ܘܝܳܬܒܰܝ ܓܽܘ̈ܒܺܝܢ ܥܫܶܢܘ.
32 ܥܕܰܟܝܠ ܝܰܘܡܳܐ ܒܢܳܒ ܩܳܐܶܡ. ܐܰܢܺܝܦ ܐܺܝܕܶܗ ܥܰܠ ܛܽܘܪܳܐ ܕܒܰܪܬ ܨܶܗܝܽܘܢ: ܘܥܰܠ ܖ̈ܳܡܳܬܳܐ ܕܽܐܘܪܺܫܠܶܡ.
33 ܗܳܐ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ: ܡܣܰܚܶܦ ܠܰܡܫܰܒ̈ܚܶܐ ܒܥܽܘܫܢܳܐ. ܘܰܕܪܳܡܺܝܢ ܒܩܰܘ̈ܡܳܬܳܐ ܢܶܬܡܰܟܟܽܘܢ: ܘܰܕܪܳܡܺܝܢ ܢܶܫܬܰܦܠܽܘܢ.
34 ܘܰܢܦܰܫܰܚ ܣܰܘ̈ܟܶܐ ܕܥܳܒܳܐ ܒܦܰܪܙܠܳܐ. ܘܠܶܒܢܳܢ ܒܫܽܘܒܚܶܗ ܢܶܦܶܠ.