Isaiah 40
The Book of Isaiah
܀ ܐܫܥܝܐ ܡ ܀
1 ܒܰܝܰܐܗܝ ܒܰܝܰܐܗܝ ܠܥܰܡܝ: ܐܳܡܰܪ ܐܰܠܳܗܟܽܘܢ.
2 ܡܠܰܘ ܒܠܶܒܳܗ̇ ܕܽܐܘܪܺܫܠܶܡ: ܘܰܩܪܰܘ ܠܳܗ̇. ܡܶܛܽܠ ܕܶܐܬܡܰܠܝܰܬ ܚܰܝܠܳܐ: ܘܰܨܒܳܬ ܒܰܚܛܺܝܬܳܐ. ܘܩܰܒܠܰܬ ܡ̣ܶܢ ܐܺܝܕܶܗ ܕܡܳܪܝܳܐ ܐܰܥܦܳܐ ܕܟܽܠܗܽܘܢ ܚܛܳܗܶܝ̈ܗ̇.
3 ܩܳܠܳܐ ܕܩܳܪܶܐ ܒܡܰܕܒܪܳܐ: ܦܰܢܰܘ ܐܽܘܪܚܳܐ ܠܡܳܪܝܳܐ: ܘܰܬܪܽܘܨܘ ܒܰܦܩܰܥܬܳܐ ܫܒܺܝ̈ܠܶܐ ܠܰܐܠܳܗܰܢ.
4 ܟܽܠܗܽܘܢ ܢܰܚ̈ܠܶܐ ܢܶܬܡܰܠܽܘܢ ܘܟܽܠܗܽܘܢ ܛܽܘܖ̈ܶܐ ܘܖ̈ܳܡܳܬܳܐ ܢܶܬܡܰܟܟܽܘܢ. ܘܢܶܗܘܶܐ ܥܰܪܡܳܐ ܠܫܰܦܝܳܐ: ܘܰܐܬܪܳܐ ܥܰܣܩܳܐ ܠܰܦܩܰܥܬܳܐ.
5 ܘܢܶܬܓܠܶܐ ܐܺܝܩܳܪܶܗ ܕܡܳܪܝܳܐ. ܘܢܶܚܙܽܘܢܶܗ ܐܰܟܚܕܳܐ ܟܽܠ ܒܣܰܪ. ܡܶܛܽܠ ܕܦܽܘܡܶܗ ܕܡܳܪܝܳܐ ܡܰܠܶܠ.
6 ܩܳܠܳܐ ܕܳܐܡܰܪ ܩܪܺܝ ܘܶܐܡܰܪ ܡܳܢܳܐ ܐܶܩܪܶܐ. ܟܽܠ ܒܣܰܪ ܥܡܺܝܪܳܐ: ܘܟܽܠܳܗ̇ ܝܳܐܝܽܘܬܶܗ ܐܰܝܟ ܥܽܘܦܝܳܐ ܕܚܰܩܠܳܐ.
7 ܝܺܒܶܫ ܥܡܺܝܪܳܐ: ܘܰܚܡܳܐ ܥܽܘܦܝܳܐ ܡܶܛܽܠ ܕܪܽܘܚܗ ܕܡܳܪܝܳܐ ܢܶܫܒܰܬ ܒܶܗ. ܗܳܟܰܢܳܐ ܗ̱ܘ̣ ܥܡܺܝܪܶܗ ܕܥܰܡܳܐ ܗܳܢܳܐ.
8 ܝܳܒܶܫ ܥܡܺܝܪܳܐ: ܘܚܳܡܶܐ ܥܽܘܦܝܳܐ ܘܡܶܠܬܶܗ ܕܰܐܠܳܗܰܢ ܩܰܝܳܡܳܐ ܠܥܳܠܡܺܝܢ.
9 ܥܰܠ ܛܽܘܖ̈ܶܐ ܖ̈ܳܡܶܐ ܣܰܩܝ ܠܶܟܝ ܨܶܗܝܽܘܢ ܡܣܰܒܰܪܬܳܐ ܐܰܪܺܝܡܝ ܩܳܠܶܟܝ ܒܚܰܝܠܳܐ: ܐܽܘܪܺܫܠܶܡ ܡܣܰܒܰܪܬܳܐ ܐܰܪܺܝܡܝ: ܘܠܳܐ ܬܶܕܚܠܺܝܢ ܐܶܡܰܪܝ ܠܩܽܘܖ̈ܝܳܐ ܕܺܝܗܽܘܕܳܐ: ܗܳܐ ܐܰܠܳܗܟܶܝܢ.
10 ܗܳܐ ܡܳܪܝܳܐ ܐܰܠܳܗܳܐ ܐܳܬܶܐ ܒܥܽܘܫܢܳܐ: ܘܰܕܪܳܥܶܗ ܒܚܰܝܠܳܐ. ܗܳܐ ܐܰܓܪܶܗ ܥܰܡܶܗ: ܘܰܥܒܳܕܶܗ ܩܕܳܡܰܘܗܝ.
11 ܐܰܝܟ ܪܳܥܝܳܐ ܕܪܳܥܶܐ ܠܰܓܙܳܪܶܗ: ܘܒܰܕܪܳܥܶܗ ܡܟܰܢܶܫ ܐܶܡܖ̈ܶܐ. ܘܰܒܚܰܢܶܗ ܫܳܩܶܠ ܠܗܽܘܢ. ܘܠܰܕܡܰܝ̈ܢܩܳܢ ܡܬܰܪܣܶܐ.
12 ܡܰܢܘ ܐܰܟܺܝܠ ܡܰܝ̈ܳܐ ܒܫܽܘܥܠܶܗ: ܘܰܫܡܰܝܳܐ ܡܫܰܚ ܒܙܰܪܬܶܗ. ܘܰܐܟܺܝܠ ܒܰܙܘܳܪܶܗ ܥܰܦܪܳܗ̇ ܕܰܐܪܥܳܐ. ܘܰܬܩܰܠ ܛܽܘܖ̈ܶܐ ܒܡܰܬܩܳܠܳܐ: ܘܖ̈ܳܡܳܬܳܐ ܒܡܰܣܰܐܬܳܐ.
13 ܡܰܢܽܘ ܬܰܩܶܢ ܪܽܘܚܶܗ ܕܡܳܪܝܳܐ ܐܰܘ ܡܰܢܽܘ ܗܘܳܐ ܠܶܗ ܡܳܠܶܟ ܡܶܠܟܳܐ.
14 ܒܡܰܢܽܘ ܐܶܬܡܰܠܰܟ: ܘܰܐܠܦܶܗ ܘܣܰܟܠܶܗ ܐܽܘܪܚܳܐ ܕܕܺܝܢܳܐ ܘܰܐܠܦܶܗ ܝܺܕܰܥܬܳܐ. ܐܘܪܚܳܐ ܕܣܽܘܟܳܠܳܐ ܚܰܘܝܶܗ.
15 ܗܳܐ ܥܰܡ̈ܡܶܐ ܐܰܝܟ ܢܽܘܛܦܬܳܐ ܡ̣ܶܢ ܩܰܕܣܳܐ: ܘܰܐܝܟ ܢܶܙܠܳܐ ܕܡܰܣܰܐܬܳܐ. ܘܓܳܙܖ̈ܳܬܳܐ ܐܰܝܟ ܕܰܚܺܝܚܳܐ ܢܶܫ̈ܕܝܳܢ.
16 ܘܠܶܒܢܳܢ ܠܳܐ ܚܫܺܝܒ ܠܶܗ ܠܝܰܩܕܳܢܳܐ. ܘܚܰܝܘܬܶܗ ܠܳܐ ܚܫܺܝܒܳܐ ܠܶܗ ܠܳܥܠܳܬܳܐ.
17 ܘܟܽܠܗܽܘܢ ܥܰܡ̈ܡܶܐ ܐܰܝܟ ܠܳܐ ܡܶܕܶܡ ܚܫܺܝܒܺܝܢ ܠܶܗ. ܠܰܐܒܕܳܢܳܐ ܘܰܠܚܰܪܒܳܐ ܚܫܺܝܒܺܝܢ ܠܶܗ.
18 ܠܡܰܢ ܕܰܡܺܝܬܽܘܢܳܝܗܝ ܠܰܐܠܳܗܳܐ. ܘܠܰܐܝܕܳܐ ܕܡܽܘܬ ܕܰܡܺܝܬܽܘܢܳܝܗܝ.
19 ܨܰܠܡܳܐ ܗ̱ܘ̣ ܕܰܥܒܰܕ ܢܰܓܳܪܳܐ ܘܩܰܝܢܳܝܳܐ ܒܕܰܗܒܳܐ ܩܰܪܡܶܗ. ܘܣܺܐܡܳܐ ܨܪܺܝܦܳܐ ܩܒܰܥ ܒܶܗ.
20 ܦܪܰܫ ܗܽܘ ܩܰܝܣܳܐ ܕܠܳܐ ܡܰܒܠܰܛ ܘܰܓܒܳܐ ܢܰܓܳܪܳܐ. ܘܰܒܚܶܡܬܶܗ ܓܰܠܦܶܗ ܘܡܰܬܩܶܢ ܨܰܠܡܳܐ ܕܠܳܐ ܙܳܐܰܥ.
21 ܠܳܐ ܫܡܰܥܬܽܘܢ: ܘܠܳܐ ܝܺܕܰܥ̣ܬܽܘܢ ܘܠܳܐ ܐܶܬܶܐܡܰܪ ܠܟܽܘܢ ܡ̣ܶܢ ܪܺܫܺܝܬܳܐ. ܘܠܳܐ ܐܶܣܬܰܟܰܠܬܽܘܢ: ܫܶܬܶܐܣܶܝ̈ܗ̇ ܕܰܐܪܥܳܐ.
22 ܘܰܠܡܰܢ ܕܝܳܬܶܒ ܥܰܠ ܚܽܘܓܬܳܗ̇ ܕܰܐܪܥܳܐ: ܘܥܳܡܽܘܖ̈ܶܝܗ̇ ܐܰܝܟ ܩܰܡܨܳܐ ܕܰܡܬܰܚ ܫܡܰܝܳܐ ܐܰܝܟ ܟܶܦܬܳܐ. ܘܰܡܬܰܚ ܐܶܢܽܘܢ ܐܰܝܟ ܡܰܫܟܢܳܐ ܠܝܰܬܒܳܐ.
23 ܕܰܥ̣ܒܰܕ ܫܰܠܺܝܛܳܢ̈ܶܐ ܠܳܐ ܡܶܕܶܡ: ܘܕܰܝܳܢ̈ܶܐ ܕܰܐܪܥܳܐ ܐܰܝܟ ܕܠܰܝܬ ܐܶܢܽܘܢ.
24 ܠܳܐ ܢܶܨܒܽܘܢ: ܘܠܳܐ ܢܶܙܪܥܽܘܢ. ܘܠܳܐ ܢܰܪܡܽܘܢ ܥܶܩܳܪܳܐ ܒܰܐܪܥܳܐ. ܢܶܦܽܘܚ ܒܗܽܘܢ ܘܢܺܐܒܫܽܘܢ. ܘܥܰܠܥܳܠܳܐ ܬܶܫܩܽܘܠ ܐܶܢܽܘܢ ܐܰܝܟ ܕܰܠܚܰܒܬܳܐ.
25 ܠܡܰܢ ܕܰܡܺܝܬܽܘܢܳܢܝ ܕܦܳܚܶܡ ܐ̱ܢܳܐ ܠܶܗ: ܐܳܡܰܪ ܩܰܕܺܝܫܳܐ.
26 ܐܰܪܺܝܡܘ ܥܰܝܢܰܝ̈ܟܽܘܢ ܠܰܡܪܰܘܡܳܐ. ܘܰܚܙܳܘ ܡܰܢܽܘ ܒܪܳܐ ܗܳܠܶܝܢ. ܕܡܰܦܶܩ ܒܡܶܢܝܳܢܳܐ ܚܰܝ̈ܠܰܘܳܬܗܽܘܢ: ܘܰܠܟܽܠܗܽܘܢ ܩܪܳܐ ܫܡܳܗ̈ܶܐ ܒܣܽܘܓܳܐܐ ܕܺܐܝܩܳܪܶܗ: ܘܰܒܥܽܘܫܢܳܐ ܕܚܰܝܠܶܗ ܐ̱ܢܳܫ ܠܳܐ ܛܳܥܶܐ.
27 ܠܡܳܢܳܐ ܡܡܰܠܶܠ ܐܰܢ̱ܬ ܝܰܥܩܽܘܒ: ܘܳܐܡܰܪ ܐܰܢ̱ܬ ܝܺܣܪܳܐܶܝܠ. ܕܰܡܛܰܫ̈ܝܳܢ ܐܽܘܖ̈ܚܳܬܝ ܡ̣ܶܢ ܡܳܪܝܳܐ: ܘܡܰܥܒܰܪ ܕܺܝܢܝ ܡ̣ܶܢ ܐܰܠܳܗܝ.
28 ܠܳܐ ܝܺܕܰܥܬ: ܘܠܳܐ ܫܶܡܰܥܬ: ܕܰܐܠܳܗܳܐ ܠܥܳܠܰܡ ܡܳܪܝܳܐ ܗ̱ܘ̣ ܕܰܒܪܳܐ ܣܰܘ̈ܦܶܝܗ̇ ܕܰܐܪܥܳܐ. ܠܳܐ ܡܶܬܛܰܪܰܦ: ܘܠܳܐ ܠܳܐܶܐ: ܘܠܰܝܬ ܒܽܘܕܳܩܳܐ ܠܣܽܘܟܳܠܶܗ.
29 ܝܳܗܶܒ ܚܰܝܠܳܐ ܠܰܡܛܰܖ̈ܦܶܐ ܘܰܠܡܰܟܐܒܰܝ̈ ܟܺܐܒܳܐ ܡܰܣܓܶܐ ܥܽܘܫܢܳܐ.
30 ܢܶܬܛܰܪܦܽܘܢ ܥܠܰܝ̈ܡܶܐ ܘܢܶܠܐܽܘܢ ܘܓܰܕܽܘ̈ܕܶܐ ܡܶܬܬܰܩܳܠܽܘ ܢܶܬܰܩܠܽܘܢ.
31 ܘܰܐܝܠܶܝܢ ܕܰܡܣܰܒܪܺܝܢ ܒܡܳܪܝܳܐ: ܢܚܰܠܦܽܘܢ ܚܰܝܠܗܽܘܢ. ܘܢܰܘܥܽܘܢ ܓܶܦ̈ܶܐ ܐܰܝܟ ܕܝܳܘܢܳܐ. ܘܢܶܪܗܛܽܘܢ: ܘܠܳܐ ܢܶܠܐܽܘܢ ܘܰܢܗܰܠܟܽܘܢ: ܘܠܳܐ ܢܶܬܛܰܪܦܽܘܢ.