Isaiah 2
The Book of Isaiah
܀ ܐܫܥܝܐ ܒ ܀
1 ܦܶܬܓܳܡܳܐ ܕܰܚܙܳܐ ܐܶܫܰܥܝܳܐ ܒܰܪ ܐܰܡܽܘܨ: ܥܰܠ ܝܺܗܽܘܕܳܐ: ܘܥܰܠ ܐܽܘܪܺܫܠܶܡ.
2 ܢܶܗܘܶܐ ܒܝܰܘ̈ܡܳܬܳܐ ܐ̱ܚܖ̈ܳܝܶܐ: ܛܽܘܪ ܒܰܝܬܶܗ ܕܡܳܪܝܳܐ. ܡܰܬܩܰܢ ܒܪܺܝܫ ܛܽܘܖ̈ܶܐ: ܘܪܳܡ ܡ̣ܶܢ ܖ̈ܳܡܳܬܳܐ. ܘܰܢܣܰܟܽܘܢ ܠܶܗ ܟܽܠܗܽܘܢ ܥܰܡ̈ܡܶܐ.
3 ܘܢܺܐܙܽܠ̱ܘܢ ܥܰܡ̈ܡܶܐ ܣܰܓܺܝ̈ܐܶܐ: ܘܢܺܐܡܪܽܘܢ: ܬܰܘ ܢܶܣܰܩ ܠܛܽܘܪܶܗ ܕܡܳܪܝܳܐ: ܘܰܠܒܶܝܬ ܐܰܠܳܗܶܗ ܕܝܰܥܩܽܘܒ. ܘܢܰܠܦܰܢ ܡ̣ܶܢ ܐܽܘܖ̈ܚܳܬܶܗ. ܘܰܢܗܰܠܶܟ ܒܰܫܒܺܝܠܰܘ̈ܗܝ. ܡܶܛܽܠ ܕܡ̣ܶܢ ܨܶܗܝܽܘܢ ܢܳܦܶܩ ܢܳܡܽܘܣܳܐ: ܘܦܶܬܓܳܡܶܗ ܕܡܳܪܝܳܐ ܡ̣ܶܢ ܐܽܘܪܺܫܠܶܡ.
4 ܘܰܢܕܽܘܢ ܒܶܝܬ ܥܰܡ̈ܡܶܐ. ܘܢܰܟܶܣ ܠܥܰܡ̈ܡܶܐ ܣܰܓܺܝ̈ܐܶܐ ܕܰܒܪܽܘܚܩܳܐ. ܘܢܶܪܥܽܘܢ ܣܰܦܣܺܖ̈ܰܝܗܽܘܢ ܠܣܶܟܰܝ̈ ܦܰܕܳܢ̈ܶܐ: ܘܖ̈ܽܘܡܚܰܝܗܽܘܢ ܠܡܰܓ̈ܠܶܐ. ܘܠܳܐ ܢܶܫܩܽܘܠ ܥܰܡܳܐ ܥܰܠ ܥܰܡܳܐ ܣܰܝܦܳܐ. ܘܬܽܘܒ ܠܳܐ ܢܺܐܠܦܽܘܢ ܩܪܳܒܳܐ.
5 ܕܒܶܝܬ ܝܰܥܩܽܘܒ: ܬܰܘ ܢܺܐܙܰܠ ܒܢܽܘܗܪܶܗ ܕܡܳܪܝܳܐ.
6 ܡܶܛܽܠ ܕܰܫܒܰܩܬܳܝܗܝ ܠܥܰܡܳܟ ܕܒܶܝܬ ܝܰܥܩܽܘܒ. ܡܶܛܽܠ ܕܶܐܬܡܠܺܝܘ ܐܰܝܟ ܕܡ̣ܶܢ ܩܕܺܝܡ. ܘܰܡܢܰܚܫܺܝܢ ܐܰܝܟ ܦܠܶܫܬܳܝ̈ܶܐ. ܘܣܽܘܓܳܐܐ ܕܰܒܢܰܝ̈ܳܐ ܢܾܽܘܟܖ̈ܳܝܶܐ ܪܰܒܺܝܘ.
7 ܘܶܐܬܡܰܠܝܰܬ ܐܰܪܥܗܽܘܢ ܣܺܐܡܳܐ ܘܕܰܗܒܳܐ ܘܠܰܝܬ ܣܳܟܳܐ ܠܓܰܙܰܝ̈ܗܽܘܢ ܘܶܐܬܡܰܠܝܰܬ ܐܰܪ̱ܥܗܽܘܢ ܖ̈ܰܟܫܳܐ: ܘܠܰܝܬ ܣܳܟܳܐ ܠܡܰܖ̈ܟܒܳܬܗܽܘܢ.
8 ܘܶܐܬܡܰܠܝܬ ܐܰܪܥܗܽܘܢ ܦܬܰܟܖ̈ܶܐ. ܠܰܥܒܳܕ ܐܺܝܕܰܝ̈ܗܽܘܢ ܣܳܓܕܺܝܢ: ܠܕܰܥ̣ܒܰܕ ܨܶܒ̈ܥܳܬܗܽܘܢ.
9 ܘܶܐܬܡܰܟܰܟ ܐ̱ܢܳܫܳܐ: ܘܶܐܫܬܰܦܰܠ ܓܰܒܪܳܐ ܘܠܳܐ ܬܶܫܒܽܘܩ ܠܗܽܘܢ.
10 ܥܽܘܠܘ ܒܛܰܖ̈ܳܢܶܐ: ܘܶܐܬܛܰܡ̱ܪܘ ܒܥܰܦܪܳܐ: ܡ̣ܶܢ ܩܕܳܡ ܕܶܚܠܬܶܗ ܕܡܳܪܝܳܐ: ܘܡ̣ܶܢ ܗܶܕܪܳܐ ܕܥܽܘܫܢܶܗ.
11 ܥܰܝ̈ܢܶܐ ܖ̈ܳܡܳܬܳܐ ܕܐ̱ܢܳܫܳܐ ܢܡܰܟܶܟ. ܘܢܶܬܡܰܟܰܟ ܪܰܘܡܳܐ ܕܓܰܒܪܳܐ. ܘܢܶܥܫܰܢ ܡܳܪܝܳܐ ܒܰܠܚܽܘܕܰܘܗܝ ܒܝܰܘܡܳܐ ܗܰܘ.
12 ܡܶܛܽܠ ܕܝܰܘܡܶܗ ܕܡܳܪܝܳܐ: ܥܰܠ ܟܽܠ ܕܡܶܬܓܰܐܶܐ ܘܡܶܬܬܪܺܝܡ: ܘܥܰܠ ܟܽܠ ܕܡܶܫܬܰܩܰܠ ܕܢܶܬܡܰܟܰܟ.
13 ܘܥܰܠ ܟܽܠܗܽܘܢ ܐܰܖ̈ܙܶܐ ܕܠܶܒܢܳܢ ܕܪܳܡܺܝܢ ܘܰܡܫܰܩܠܺܝܢ: ܘܥܰܠ ܟܽܠܗܽܘܢ ܒܰܠܽܘ̈ܛܶܐ ܕܒܰܝܫܳܢ.
14 ܘܥܰܠ ܟܽܠܗܽܘܢ ܛܽܘܖ̈ܶܐ ܕܪܳܡܺܝܢ: ܘܥܰܠ ܟܽܠ ܖ̈ܳܡܳܬܳܐ ܕܖ̈ܳܡܳܢ.
15 ܘܥܰܠ ܟܽܠ ܡܰܓ̈ܕܠܶܐ ܕܪܳܡܺܝܢ: ܘܥܰܠ ܟܽܠ ܫܽܘܖ̈ܶܐ ܕܥܰܫܺܝܢܺܝܢ.
16 ܘܥܰܠ ܟܽܠܗܶܝܢ ܐܶܠܦ̈ܶܐ ܕܬܰܪܫܺܝܫ: ܘܥܰܠ ܟܽܠܗܽܘܢ ܕܰܘ̈ܩܶܐ ܕܪܶܓܬܳܐ.
17 ܘܢܶܬܡܰܟܰܟ ܪܰܘܡܳܐ ܕܐ̱ܢܳܫܳܐ: ܘܢܶܫܬܰܦܰܠ ܪܰܘܡܳܐ ܕܓܰܒܪܳܐ ܘܢܶܥܫܰܢ ܡܳܪܝܳܐ ܒܰܠܚܽܘܕܰܘܗ̱ܝ ܒܝܰܘܡܳܐ ܗܰܘ.
18 ܘܰܦܬܰܟܖ̈ܶܐ ܓܡܺܝܪܳܐܺܝܬ ܢܶܥܒܪܽܘܢ.
19 ܘܢܶܥܠܽܘܢ ܒܰܡܥܰܖ̈ܶܐ ܕܟܺܐܦܳܐ: ܘܰܒܚܽܘܠܳܢ̈ܶܐ ܕܥܰܦܪܳܐ ܡ̣ܶܢ ܩܕܳܡ ܕܶܚܠܬܶܗ ܕܡܳܪܝܳܐ: ܘܡ̣ܶܢ ܗܶܕܪܳܐ ܕܥܽܘܫܢܶܗ: ܡܳܐ ܕܩܳܐܶܡ ܠܰܡܟܰܒܳܫܽܘ ܠܰܐܪܥܳܐ.
20 ܒܶܗ ܒܝܰܘܡܳܐ ܗܰܘ: ܢܶܫܕܽܘܢ ܐ̱ܢܳܫܳܐ ܦܬܰܟܖ̈ܶܐ ܕܕܰܗܒܐ ܘܰܕܣܺܐܡܳܐ: ܕܰܥ̣ܒܰܕܘ ܠܗܽܘܢ ܠܡܶܣܓܰܕ ܠܰܣܪܺܝܩܽܘܬܳܐ: ܘܠܰܦܖ̈ܰܚܕܽܘܕܶܐ.
21 ܠܡܶܥܰܠ ܒܰܡܥܰܖ̈ܶܐ ܕܛܰܪܳܢܳܐ: ܘܒܰܫܩܺܝ̈ܦܶܐ ܕܟܺܐܦܳܐ ܡ̣ܶܢ ܩܕܳܡ ܕܶܚܠܬܶܗ ܕܡܳܪܝܳܐ: ܘܡ̣ܶܢ ܗܶܕܪܳܐ ܕܥܽܘܫܢܶܗ: ܡܳܐ ܕܩܳܐܶܡ ܠܰܡܟܰܒܳܫܽܘ ܠܰܐܪܥܳܐ.
22 ܫܠܰܘ ܠܟܽܘܢ ܡ̣ܶܢ ܐ̱ܢܳܫܳܐ ܕܰܢܫܰܡܬܳܐ ܒܰܢܚܺܝܖ̈ܰܘܗܝ: ܡܶܛܽܠ ܕܰܐܝܟ ܡܳܢܳܐ ܚܫܺܝܒ.