Isaiah 24
The Book of Isaiah
܀ ܐܫܥܝܐ ܟܕ ܀
1 ܗܳܐ ܡܳܪܝܳܐ ܡܚܰܒܶܠ ܐܰܪܥܳܐ: ܘܰܡܬܰܪܰܥ ܠܳܗ̇. ܘܣܳܚܶܦ ܐܰܦܶܝ̈ܗ̇: ܘܰܡܒܰܕܰܪ ܥܳܡܽܘܖ̈ܶܝܗ̇.
2 ܘܢܶܗܘܶܐ ܥܰܡܳܐ ܐܰܝܟ ܟܳܗܢܳܐ: ܘܥܰܒܕܳܐ ܐܰܝܟ ܡܳܪܶܗ: ܘܰܐܡܬܳܐ ܐܰܝܟ ܡܳܪܬܳܗ̇: ܩܰܢܳܝܳܐ ܐܰܝܟ ܡܙܰܒܢܳܢܳܐ: ܘܝܳܙܽܘܦܳܐ ܐܰܝܟ ܡܰܘܙܦܳܢܳܐ: ܐܰܝܟ ܡܳܪܶܐ ܚܳܘܒܬܶܗ ܕܚܰܝܳܒ ܠܶܗ.
3 ܡܶܬܚܰܒܳܠܽܘ ܬܶܬܚܰܒܰܠ ܐܰܪܥܳܐ: ܘܡܶܬܒܙܳܙܽܘ ܬܶܬܒܙܶܙ. ܡܶܛܽܠ ܕܡܳܪܝܳܐ ܡܰܠܶܠ̣ ܦܶܬܓܳܡܳܐ ܗܳܢܳܐ.
4 ܐܰܠܰܬ ܘܝܶܬܒܰܬ ܒܶܐܒܠܳܐ ܐܰܪܥܳܐ. ܐܰܠܰܬ ܘܝܶܬܒܰܬ: ܘܶܐܬܰܐܒܠܰܬ ܬܺܒܶܝܠ. ܐܶܠܳܐ ܪܰܘܡܳܗ̇ ܕܰܐܪܥܳܐ.
5 ܘܰܐܪܥܳܐ ܐܶܬܕܰܡܝܰܬ ܠܥܳܡܽܘܖ̈ܶܝܗ̇. ܡܶܛܽܠ ܕܰܥܒܰܪܘ ܢܳܡܽܘܣܳܐ: ܘܚܰܠܶܦܘ ܦܽܘܩܕܳܢܳܐ: ܘܒܰܛܶܠܘ ܩܝܳܡܳܐ ܕܥܳܠܰܡ.
6 ܡܶܛܽܠ ܗܳܠܶܝܢ ܬܶܬܶܒ ܒܶܐܒܠܳܐ ܐܰܪܥܳܐ. ܘܢܶܬܚܰܝܒܽܘܢ ܟܽܠܗܽܘܢ ܥܳܡܽܘܖ̈ܶܝܗ̇ ܡܶܛܽܠ ܗܳܢܳܐ ܢܶܬܚܰܪܒܽܘܢ ܟܽܠܗܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ: ܘܢܶܫܬܰܚܪܽܘܢ ܐ̱ܢܳܫܳܐ ܩܰܠܺܝܠ.
7 ܝܺܬܶܒ ܒܶܐܒܠܳܐ ܥܳܒܽܘܪܳܐ. ܘܰܐܠܰܝ̈ ܓܽܘܦ̈ܢܶܐ ܘܶܐܬܬܰܢܰܚܘ ܟܠ ܚܳܕܝܰܝ̈ ܠܶܒܳܐ.
8 ܒܶܛܠܰܬ ܚܰܕܽܘܬܳܐ ܘܰܦ̈ܠܰܓܶܐ. ܘܰܫܠܺܝ ܩܳܠܳܐ ܕܰܕܝܳܨܳܐ. ܒܶܛܠܰܬ ܚܰܕܽܘܬܳܐ ܘܟܶܢܳܖ̈ܶܐ.
9 ܒܰܙܡܳܪܳܐ ܠܳܐ ܢܶܫܬܽܘܢ ܚܰܡܪܳܐ. ܢܶܡܰܪ ܫܰܟܪܳܐ ܠܫܳܬܝܰܘ̈ܗܝ.
10 ܐܶܬܒܰܙܙܰܬ ܩܪܺܝܬܳܐ: ܘܶܐܬܬܚܶܕܘ ܟܠ ܒܶܝܬ ܡܰܕܳܢ̈ܶܐ.
11 ܝܺܠܰܠܬܳܐ ܥܰܠ ܚܰܡܪܳܐ ܒܫܽܘܩܳܐ. ܒܶܛܠܰܬ ܟܠܳܗ̇ ܚܰܕܽܘܬܳܐ. ܘܰܥܒܰܪ ܕܝܳܨܳܗ̇ ܕܰܐܪܥܳܐ.
12 ܘܶܐܫܬܚܰܪ ܒܰܩܪܺܝܬܳܐ ܚܒܳܠܳܐ ܘܕܽܘܘܳܢܳܐ ܢܦܰܣܶܩ ܬܰܖ̈ܥܶܝܗ̇.
13 ܗܳܟܰܢܳܐ ܢܶܗܘܶܐ ܒܓܰܘܳܗ̇ ܕܰܐܪܥܳܐ ܒܰܝܢܳܬ ܥܰܡ̈ܡܶܐ: ܐܰܝܟ ܚܒܳܛܳܐ ܕܙܰܝܬܳܐ: ܘܰܐܝܟ ܒܽܘܥܳܪܳܐ ܡܳܐ ܕܰܓܡܰܪ ܩܛܳܦܳܐ.
14 ܗܶܢܽܘܢ ܢܪܺܝܡܽܘܢ ܩܳܠܗܽܘܢ ܘܰܢܫܰܒܚܽܘܢ ܒܓܰܐܝܽܘܬܶܗ ܕܡܳܪܝܳܐ. ܘܢܶܨܗܠܽܘܢ ܡ̣ܶܢ ܝܰܡܳܐ.
15 ܡܶܛܽܠ ܗܳܢܳܐ ܒܬܶܫܒܽܘܚܬܳܐ ܫܰܒܰܚܘ ܠܡܳܪܝܳܐ: ܘܰܒܓܰܙܖ̈ܳܬܳܐ ܕܝܰܡܳܐ ܫܡܶܗ ܕܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ.
16 ܡ̣ܶܢ ܟܶܢ̈ܦܶܝܗ̇ ܕܰܐܪܥܳܐ ܙܡܺܝܖ̈ܳܬܳܐ ܫ̣ܡܰܥܢ: ܚܰܝܠܳܐ ܕܙܰܕܺܝܩܳܐ ܕܳܐܡܰܪ: ܐ̱ܪܳܙ ܠܺܝ: ܐ̱ܪܳܙ ܠܺܝ: ܐܽܘܝ ܠܺܝ: ܥܳܘܳܠܳܐ ܐܰܥܠܺܝܘ: ܥܳܘܳܠܳܐ ܥܰܘܠܳܐ ܐܰܥܠܺܝܘ.
17 ܕܶܚܠܬܳܐ ܘܓܽܘܡܳܨܳܐ: ܘܦܰܚܳܐ ܥܠܰܝܟ: ܥܰܡܽܘܪܳܐ ܕܰܐܪܥܳܐ.
18 ܘܡܰܢ ܕܢܶܥܪܽܘܩ ܡ̣ܶܢ ܩܳܠܳܐ ܕܕܶܚܠܬܳܐ: ܢܶܦܶܠ ܒܓܽܘܡܳܨܳܐ. ܘܡܰܢ ܕܢܶܣܰܩ ܡ̣ܶܢ ܓܰܘ ܓܽܘܡܳܨܳܐ: ܢܶܬܬܚܶܕ ܒܦܰܚܳܐ. ܡܶܛܽܠ ܕܡܰܣܘ̈ܟܶܐ ܡ̣ܶܢ ܡܪܰܘܡܳܐ ܐܶܬܦܬܰܚܘ: ܘܙܳܥ ܫܶܬܶܐܣܶܝ̈ܗ̇ ܕܰܐܪܥܳܐ.
19 ܡܙܳܥ ܬܙܽܘܥ ܐܰܪܥܳܐ: ܘܰܡܕܳܠ ܬܕܽܘܠ ܐܰܪܥܳܐ: ܘܰܡܡܳܛ ܬܡܽܘܛ ܐܰܪܥܳܐ.
20 ܘܰܡܙܳܥ ܬܙܽܘܥ ܐܰܪܥܳܐ ܐܰܝܟ ܪܰܘܝܳܐ ܘܰܬܢܽܘܕ ܐܰܝܟ ܥܰܪܙܳܠܳܐ. ܘܢܶܥܫܰܢ ܥܠܶܝܗ̇ ܥܳܘܠܳܗ̇: ܘܬܶܦܶܠ ܘܠܳܐ ܬܰܘܣܶܦ ܠܰܡܩܳܡ.
21 ܒܶܗ ܒܝܰܘܡܳܐ ܗܰܘ: ܢܶܦܩܽܘܕ ܡܳܪܝܳܐ ܥܰܠ ܚܰܝ̈ܠܶܐ ܕܪܰܘܡܳܐ ܒܪܰܘܡܳܐ: ܘܥܰܠ ܡܰܠ̈ܟܶܐ ܕܰܐܪܥܳܐ ܒܰܐܪܥܳܐ.
22 ܘܢܶܟܢܫܽܘܢ ܟܢܽܘܫܝܳܐ ܥܰܠ ܐܰܣܺܝܪ ܓܽܘܒܳܐ. ܘܢܶܬܚܰܫܒܽܘܢ ܥܰܠ ܚܒܺܝܫܳܐ. ܘܰܠܣܽܘܓܳܐܐ ܕܝܰܘ̈ܡܳܬܳܐ ܢܶܬܦܰܪܩܽܘܢ.
23 ܘܢܶܚܦܽܘܪ ܣܰܗܪܳܐ: ܘܢܶܒܗܰܬ ܫܶܡܫܳܐ. ܡܶܛܽܠ ܕܰܐܡܠܶܟ ܡܳܪܝܳܐ ܚܰܝܠܬܳܢܳܐ: ܒܛܽܘܪܳܐ ܕܨܶܗܝܽܘܢ: ܘܒܽܐܘܪܺܫܠܶܡ ܘܰܩܕܳܡ ܩܰܕܺܝܫܰܘ̈ܗܝ ܢܶܫܬܰܒܰܚ.