Isaiah 59
The Book of Isaiah
܀ ܐܫܥܝܐ ܢܛ ܀
1 ܗܳܐ ܠܳܐ ܙܥܽܘܪܝܳܐ ܐܺܝܕܶܗ ܕܡܳܪܝܳܐ ܠܡܶܦܪܰܩ ܘܠܳܐ ܝܰܩܺܝܪܳܐ ܐܶܕܢܶܗ ܠܡܶܫܡܰܥ.
2 ܐܶܠܳܐ ܚܰܘ̈ܒܰܝܟܽܘܢ ܗ̱ܘ̣ ܦܪܰܫܘ ܒܰܝܢܳܝܟܽܘܢ ܠܰܐܠܳܗܟܽܘܢ ܘܰܚܛܳܗܰܝ̈ܟܽܘܢ ܐܰܗܦܶܟܘ ܐܰܦܰܘ̈ܗܝ ܡܶܢܟܽܘܢ ܕܠܳܐ ܢܶܫܡܰܥ.
3 ܡܶܛܽܠ ܕܺܐܝܕܰܝ̈ܟܽܘܢ ܡܛܰܢ̈ܦܳܢ ܒܰܕܡܳܐ: ܘܨܶܒ̈ܥܳܬܟܽܘܢ ܒܥܰܘܠܳܐ ܘܣܶܦ̈ܘܳܬܟܽܘܢ ܡܡܰܠ̈ܠܳܢ ܫܽܘܩܪܳܐ. ܘܠܶܫܳܢܟܽܘܢ ܪܳܢܶܐ ܒܥܰܘܠܳܐ.
4 ܘܠܰܝܬ ܕܩܳܪܶܐ ܒܙܰܕܺܝܩܽܘܬܳܐ ܘܠܰܝܬ ܕܕܳܐܶܢ ܒܗܰܝܡܢܽܘܬܳܐ ܐܶܬܬܟܶܠܘ ܥܰܠ ܣܪܺܝܩܽܘܬܳܐ: ܘܡܰܠܶܠܘ ܪܺܝܩܳܢܽܘܬܳܐ ܒܛܶܢܘ ܥܶܬܳܐ: ܘܺܝܠܶܕ ܟܺܐܒ̈ܶܐ.
5 ܒ̈ܢܳܬܳܐ ܕܚܰܪܡܳܢܳܐ ܐܰܦܰܥܘ ܘܢܰܘܠܳܐ ܕܰܓܘܳܓܰܝ ܙܩܰܪܘ. ܕܳܐܟܶܠ ܡ̣ܶܢ ܒ̈ܢܳܬܗܽܘܢ: ܢܡܽܘܬ ܘܰܕܬܰܒܪܳܗ̇: ܡܶܫܟܰܚ ܫܰܥܛܳܐ.
6 ܢܰܘܠܗܽܘܢ ܠܳܐ ܢܶܗܘܶܐ ܠܰܠܒܽܘܫܳܐ. ܘܠܳܐ ܢܶܬܟܰܣܽܘܢ ܒܰܥܒܳܕܰܝ̈ܗܽܘܢ ܥܒܳܕܰܝ̈ܗܽܘܢ ܥܒܳܕ̈ܶܐ ܐܶܢܽܘܢ ܕܥܶܬܳܐ. ܘܰܥܒܳܕ̈ܶܐ ܕܥܰܘܠܳܐ ܒܺܐܝܕܰܝ̈ܗܽܘܢ.
7 ܖ̈ܶܓܠܰܝܗܽܘܢ ܖ̈ܳܗܛܳܢ ܠܒܺܝܫܬܳܐ. ܘܡܶܣܬܰܪܗܒܺܝܢ ܠܡܶܐܫܰܕ ܕܡܳܐ ܙܰܟܳܝܳܐ. ܬܰܖ̈ܥܝܳܬܗܽܘܢ ܬܰܖ̈ܥܝܳܬܳܐ ܐܶܢܶܝܢ ܕܥܶܬܳܐ. ܘܒܶܙܬܳܐ ܘܰܬܒܳܪܳܐ ܒܰܫܒܺܝ̈ܠܰܝܗܽܘܢ.
8 ܐܽܘܪܚܳܐ ܕܰܫܠܳܡܳܐ ܠܳܐ ܝܺܕܰܥܘ ܘܠܰܝܬ ܕܺܝܢܳܐ ܒܗܰܠ̈ܟܳܬܗܽܘܢ ܫܒܺܝ̈ܠܰܝܗܽܘܢ ܡܥܰܩܡܺܝܢ. ܘܟܽܠ ܕܰܡܗܰܠܶܟ ܒܗܽܘܢ: ܠܳܐ ܝܳܕܰܥ ܫܠܳܡܳܐ.
9 ܡܶܛܽܠ ܗܳܢܳܐ ܐܶܬܪܰܚܰܩ ܡܶܢܰܢ ܕܺܝܢܳܐ. ܘܙܰܕܺܝܩܽܘܬܳܐ ܠܳܐ ܬܶܕܪܟܰܢ ܣܰܟܺܝܢ ܠܢܽܘܗܪܳܐ: ܘܰܗܘܳܐ ܚܶܫܽܘܟܳܐ ܘܰܠܙܰܗܪܳܐ ܘܰܒܥܰܡܛܳܢܳܐ ܗܰܠܶܟܢ.
10 ܡܳܫܢ ܐܶܣܬܳܐ ܐܰܝܟ ܥܘܺܝܖ̈ܶܐ. ܘܡܳܫܢ ܐܰܝܟ ܗܳܢܽܘܢ ܕܠܰܝܬ ܠܗܽܘܢ ܥܰܝ̈ܢܶܐ ܐܶܬܬܰܩܰܠܢ ܒܛܰܗܪܳܐ ܐܰܝܟ ܕܰܒܪܰܡܫܳܐ. ܘܶܐܬܬܰܢܰܚܢ ܐܰܝܟ ܗܳܢܽܘܢ ܕܩܰܪܺܝܒܺܝܢ ܠܳܡܡܳܬ.
11 ܢܰܗܶܡܢ ܟܠܰܢ ܐܰܝܟ ܕܶܒܳܐ ܘܰܐܝܟ ܝܳܘ̈ܢܶܐ ܢܰܗܶܡܢ ܣܰܟܺܝܢ ܠܕܺܝܢܳܐ: ܘܠܰܝܬ ܘܰܠܦܽܘܪܩܳܢܳܐ: ܘܶܐܬܪܰܚܰܩ ܡܶܢܰܢ.
12 ܡܶܛܽܠ ܕܰܣܓܺܝ ܥܰܘܠܰܢ ܩܕܳܡܰܝܟ: ܘܰܚܛܳܗܰܝ̈ܢ ܣܰܗܕܽܘܢ ܡܶܛܽܠ ܕܥܰܘܠܰܢ ܥܰܡܰܢ ܗ̱ܘ. ܘܰܚܛܳܗܰܝ̈ܢ ܝܺܕܺܝܥܺܝܢ ܐܶܢܽܘܢ.
13 ܐܰܥܠܺܝܢ ܘܕܰܓܶܠܢ ܒܡܳܪܝܳܐ ܘܰܗܦܰܟܢ ܡ̣ܶܢ ܒܳܬܪܶܗ ܕܰܐܠܳܗܰܢ. ܡܰܠܶܠܢ ܛܠܽܘܡܝܳܐ ܘܰܡܪܰܕܢ. ܒܛܶܢܢ: ܘܰܪܢܰܝܢ ܡ̣ܶܢ ܠܶܒܰܢ ܡ̈ܶܠܶܐ ܕܫܽܘܩܪܳܐ.
14 ܐܰܗܦܶܟܢ ܕܺܝܢܳܐ ܠܒܶܣܬܪܶܗ: ܘܙܰܕܺܝܩܽܘܬܳܐ ܐܰܩܺܝܡܢ ܒܪܽܘܚܩܳܐ ܡܶܛܽܠ ܕܶܐܬܬܩܶܠ ܩܽܘܫܬܳܐ ܒܰܪܘܰܚܬܳܐ. ܘܡܰܟܣܳܢܽܘܬܳܐ ܠܳܐ ܡܶܫܟܚܳܐ ܠܡܶܐܬܳܐ.
15 ܘܰܗܘܳܐ ܩܽܘܫܬܳܐ ܒܟܶܣܝܳܐ. ܘܰܥܒܰܪ ܣܽܘܟܳܠܳܐ ܡ̣ܶܢ ܪܶܥܝܳܢܰܢ. ܘܰܚܙܳܐ ܡܳܪܝܳܐ ܕܠܰܝܬ ܕܺܝܢܳܐ: ܘܶܐܬܒܐܶܫ ܒܥܰܝܢܰܘ̈ܗܝ.
16 ܘܰܚܙܳܐ ܕܠܰܝܬ ܐ̱ܢܳܫ. ܘܶܐܬܕܰܡܰܪ ܕܠܰܝܬ ܕܰܡܥܰܕܰܪ. ܘܦܰܪܩܶܗ ܕܪܳܥܶܗ ܘܙܰܕܺܝܩܽܘܬܶܗ ܗܺܝ ܣܡܰܟܬܶܗ.
17 ܠܒܶܫ ܙܰܕܺܝܩܽܘܬܳܐ ܐܰܝܟ ܫܶܪܝܳܢܳܐ: ܘܣܰܢܘܰܪܬܳܐ ܕܦܽܘܪܩܳܢܳܐ ܒܪܺܫܶܗ. ܘܰܠܒܶܫ ܠܒܽܘܫܳܐ ܕܦܽܘܪܥܳܢܳܐ.
18 ܕܢܶܬܬܰܒܰܥ ܡ̣ܶܢ ܣܳܢܰܐܘ̈ܗܝ: ܘܢܶܦܪܽܘܥ ܠܰܒܥܶܠܕܒܳܒܰܘ̈ܗܝ ܘܰܠܓܳܙܖ̈ܳܬܳܐ ܢܶܦܪܽܘܥ ܦܽܘܪܥܳܢܳܐ.
19 ܢܶܕܚܠܽܘܢ ܡ̣ܶܢ ܡܰܥܪܒܳܐ ܠܰܫܡܶܗ ܕܡܳܪܝܳܐ. ܘܡ̣ܶܢ ܡܰܕܢܳܚܰܝ̈ ܫܶܡܫܳܐ ܠܺܐܝܩܳܪܶܗ. ܡܶܛܽܠ ܕܢܺܐܬܶܐ ܐܳܠܽܘܨܳܐ ܢܰܗܪܳܐ ܘܪܽܘܚܶܗ ܕܡܳܪܝܳܐ ܬܡܰܟܟܺܝܘܗܝ.
20 ܘܢܺܐܬܶܐ ܠܨܶܗܝܽܘܢ ܦܳܪܽܘܩܳܐ: ܘܰܐܝܠܶܝܢ ܕܡܰܦܢܶܝܢ ܥܰܘܠܳܐ ܡ̣ܶܢ ܝܰܥܩܽܘܒ: ܐܳܡܰܪ ܡܳܪܝܳܐ.
21 ܘܶܐܢܳܐ ܗܳܢܰܘ ܩܝܳܡܝ ܕܥܰܡܟܽܘܢ: ܐܳܡܰܪ ܡܳܪܝܳܐ: ܪܽܘܚܝ ܕܰܥܠܰܝܟ ܘܡܶܠܰܝ̈ ܕܣܳܡܶܬ ܒܦܽܘܡܳܟ: ܠܳܐ ܢܶܥܢ̈ܕܳܢ ܡ̣ܶܢ ܦܽܘܡܳܟ ܘܡ̣ܶܢ ܦܽܘܡܶܗ ܕܙܰܪܥܳܟ: ܘܡ̣ܶܢ ܦܽܘܡܳܐ ܕܙܰܪܥܳܐ ܕܙܰܪܥܳܟ: ܐܳܡܰܪ ܡܳܪܝܳܐ: ܡ̣ܶܢ ܗܳܫܳܐ ܘܰܥܕܰܡܳܐ ܠܥܳܠܰܡ.