Isaiah 21
The Book of Isaiah
܀ ܐܫܥܝܐ ܟܐ ܀
1 ܡܰܫܩܠܳܐ ܕܡܰܕܒܪܳܐ ܕܝܰܡܳܐ. ܐܰܝܟ ܥܰܠܥܳܠܳܐ ܡ̣ܶܢ ܬܰܝܡܢܳܐ ܬܶܪܗܰܛ ܡ̣ܶܢ ܡܰܕܒܪܳܐ: ܘܬܺܐܬܶܐ ܡ̣ܶܢ ܐܰܪܥܳܐ ܪܰܚܺܝܩܬܳܐ.
2 ܚܶܙܘܳܐ ܩܰܫܝܳܐ ܐܶܬܚܙܺܝ ܠܰܢ. ܛܳܠܽܘܡܳܐ ܛܳܠܶܡ: ܘܒܳܙܽܘܙܳܐ ܒܳܐܶܙ ܣܰܩܝ ܥܺܝܠܳܡ ܘܛܽܘܖ̈ܰܝ ܡܳܕܰܝ: ܘܟܽܠܗܶܝܢ ܬܶܢ̈ܚܳܬܳܗ̇ ܒܰܛܠܶܬ.
3 ܡܶܛܽܠ ܗܳܢܳܐ ܐܶܬܡܠܺܝ ܚܰܨܝ ܙܳܘܥܬܳܐ ܘܰܐܚܕܽܘܢܝ ܨܰܘܖ̈ܳܢܶܐ ܐܰܝܟ ܨܰܘܖ̈ܳܢܶܐ ܕܝܳܠܶܕܬܳܐ. ܙܳܥܶܬ ܕܠܳܐ ܐܶܫܡܰܥ. ܘܶܐܬܕܰܠܚܶܬ ܕܠܳܐ ܐܶܚܙܶܐ.
4 ܛܥܳܐ ܠܶܒܝ: ܘܨܰܘܖ̈ܳܢܶܐ ܐܰܙܺܝܥܽܘܢܝ ܘܫܽܘܦܖ̈ܶܐ ܕܨܶܒܝܳܢܝ ܣܳܡܘ ܠܺܝ ܠܣܽܘܪܳܕܳܐ.
5 ܛܰܝܶܒܘ ܦܳܬܽܘܖ̈ܶܐ: ܕܽܘܩܘ ܕܰܘ̈ܩܶܐ. ܐܰܟܽܘܠܘ ܘܶܐܫܬܰܘ. ܩܽܘܡܘ ܪܰܘܖ̈ܒܳܢܶܐ: ܡܫܽܘܚܘ ܣܰܟܖ̈ܶܐ.
6 ܡܶܛܽܠ ܕܗܳܟܰܢܳܐ ܐܶܡܰܪ ܠܺܝ ܡܳܪܝܳܐ: ܙܶܠ ܐܰܩܺܝܡ ܕܰܘܩܳܐ: ܕܡܶܕܶܡ ܕܚܳܙܶܐ: ܢܚܰܘܶܐ.
7 ܘܰܚܙܳܐ ܪܟܽܘܒܳܐ ܕܰܬܪܶܝܢ ܦܰܖ̈ܳܫܺܝܢ: ܕܰܪܟܺܝܒ ܚܡܳܪܳܐ: ܘܕܰܪܟܺܝܒ ܓܰܡܠܳܐ: ܘܨܳܬ ܫܶܡܥܳܐ ܣܰܓܺܝܐܳܐ.
8 ܘܰܩܪܳܐ ܕܰܘܩܳܐ ܒܶܐܕܢܰܝ̈: ܘܶܐܡܰܪ: ܐܶܢܳܐ ܡܳܪܝܳܐ ܩܳܐܶܡ ܐ̱ܢܳܐ ܐܰܡܺܝܢܳܐܺܝܬ ܒܺܐܝܡܳܡܳܐ: ܘܥܰܠ ܡܰܛܰܪܬܝ ܩܳܐܶܡ ܐ̱ܢܳܐ ܟܽܠܗܽܘܢ ܠܰܝ̈ܠܰܘ̈ܳܬܳܐ.
9 ܘܗܐ ܐܶܬܳܐ ܓܰܒܪܳܐ ܡ̣ܶܢ ܖ̈ܳܟܒܶܐ ܕܦܰܖ̈ܳܫܶܐ: ܘܰܥ̣ܢܳܐ ܘܶܐܡܰܪ: ܢܶܦܠܰܬ: ܢܶܦܠܰܬ: ܒܳܒܶܠ. ܘܟܽܠܗܽܘܢ ܐܰܠܳܗ̈ܶܝܗ̇ ܓܠܺܝ̈ܦܶܐ ܐܶܬܬܰܒܰܪܘ ܒܰܐܪܥܳܐ: ܡ̣ܶܢ ܚܨܳܕ ܘܡ̣ܶܢ ܒܠܰܝ ܐܶܕܰܪ.
10 ܡܶܕܶܡ ܕܫܶܡܥܶܬ ܡ̣ܶܢ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ: ܚܳܘܺܝܬܟܽܘܢ.
11 ܡܰܫܩܠܳܐ ܕܕܽܘܡܳܐ. ܠܺܝ ܩܪܳܐ ܡ̣ܶܢ ܣܳܥܺܝܪ ܢܳܛܽܘܪܳܐ ܕܰܒܠܺܠܝܳܐ.
12 ܐܶܡܰܪ ܢܳܛܽܘܪܳܐ: ܐܶܬܳܐ ܨܰܦܪܳܐ ܐܳܦ ܠܺܠܝܳܐ. ܐܶܢ ܒܳܥܶܝܢ ܐܰܢ̱ܬܽܘܢ ܒܥܰܘ: ܬܽܘܒ ܐܳܬܶܝܢ ܐܰܢ̱ܬܽܘܢ.
13 ܡܰܫܩܠܳܐ ܕܥܰܪܰܒܳܝܳܐ ܒܪܰܡܫܳܐ ܒܥܳܒܳܐ ܬܒܽܘܬܽܘܢ: ܒܰܫܒܺܝܠܳܐ ܕܕܽܘܪܢܺܝܡ.
14 ܠܽܐܘܪܰܥ ܨܗܰܝ̈ܳܐ ܐܰܝܬܰܘ ܡܰܝ̈ܳܐ: ܥܳܡܽܘܖ̈ܶܐ ܕܰܐܪܥܳܐ ܕܬܰܝܡܢܳܐ. ܒܠܰܚܡܟܽܘܢ ܐܰܪܽܘܥܘ ܠܰܡܒܰܕܖ̈ܶܐ.
15 ܡܶܛܽܠ ܕܡ̣ܶܢ ܩܕܳܡ ܣܰܦܣܺܪܳܐ ܐܶܬܒܰܕܰܪܘ: ܘܡ̣ܶܢ ܩܕܳܡ ܚܰܪܒܳܐ ܕܰܠܛܺܝܫܳܐ: ܘܡ̣ܶܢ ܩܕܳܡ ܩܶܫܬܳܐ ܕܡܰܠܝܳܐ: ܘܡ̣ܶܢ ܩܕܳܡ ܥܽܘܫܢܳܐ ܕܰܩܪܳܒܳܐ.
16 ܡܶܛܽܠ ܕܗܳܟܰܢܳܐ ܐܶܡܰܪ ܠܺܝ ܡܳܪܝܳܐ: ܒܡܶܫܠܰܡ ܫܰܢ̱ܬܳܐ ܐܰܝܟ ܫܢܰܝ̈ܳܐ ܕܰܐܓܺܝܪܳܐ: ܢܣܽܘܦ ܟܽܠܶܗ ܐܺܝܩܳܪܳܐ ܕܩܶܕܳܪ.
17 ܘܫܰܪܟܳܐ ܕܡܶܢܝܳܢܳܐ ܕܩܰܫ̈ܳܬܳܐ: ܓܰܒܖ̈ܶܐ ܕܰܒܢܰܝ̈ ܩܶܕܳܪ ܢܶܙܥܪܽܘܢ: ܡܶܛܽܠ ܕܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ ܡܰܠܶܠ.