Isaiah 33
The Book of Isaiah
܀ ܐܫܥܝܐ ܠܓ ܀
1 ܘܳܝ ܠܰܕܒܳܐܶܙ ܐܰܢ̱ܬܽܘܢ ܠܳܐ ܬܶܒܙܽܘܢ. ܘܕܰܓܳܠܳܐ ܠܳܐ ܢܕܰܓܶܠ ܒܟܽܘܢ. ܡܳܐ ܕܰܨܒܰܝܬܽܘܢ ܠܡܶܒܰܙ: ܬܶܬܒܰܙܽܘܢ. ܘܡܳܐ ܕܰܨܒܰܝܬܽܘܢ ܠܰܡܕܰܓܠܽܘ: ܢܶܬܕܰܠܰܓ ܒܟܽܘܢ.
2 ܡܳܪܝܳܐ: ܪܰܚܶܡ ܥܠܰܝܢ: ܡܶܛܽܠ ܕܰܥܠܰܝܟܽܘ ܣܰܒܪܰܢ. ܗܘܺܝ ܥܳܕܽܘܪܰܢ ܒܨܰܦܪܳܐ: ܘܦܳܪܽܘܩܰܢ ܒܙܰܒܢܳܐ ܕܽܐܘܠܨܳܢܳܐ.
3 ܡ̣ܶܢ ܩܳܠ ܕܶܚܠܬܳܟ ܢܳܕܘ ܥܰܡ̈ܡܶܐ ܘܡ̣ܶܢ ܪܳܡܽܘܬܳܟ ܐܶܬܒܰܕܰܪܘ ܥܰܡ̈ܡܶܐ.
4 ܡܶܟܺܝܠ ܬܶܬܟܢܶܫ ܒܶܙܬܟܽܘܢ ܐܰܝܟ ܟܢܽܘܫܝܳܐ ܕܙܳܚܠܳܐ: ܘܰܐܝܟ ܟܢܽܘܫܝܳܐ ܕܩܰܡܨܳܐ ܕܰܟܢܺܝܫ.
5 ܐܶܬܬܪܺܝܡ ܡܳܪܝܳܐ ܕܥܳܡܰܪ ܒܰܡܖ̈ܰܘܡܶܐ. ܘܰܡܠܳܗ̇ ܠܨܶܗܝܽܘܢ ܕܺܝܢܳܐ ܘܙܰܕܺܝܩܽܘܬܳܐ.
6 ܘܢܶܗܘܶܐ ܙܰܒܢܳܟ ܗܰܝܡܳܢܽܘܬܳܐ: ܘܦܽܘܪܩܳܢܳܟ ܒܣܶܬܳܪܳܐ. ܚܶܟܡܬܳܐ ܘܺܝܕܰܥܬܳܐ: ܕܶܚܠܬܳܐ ܕܡܳܪܝܳܐ ܗܺܝ ܗ̱ܝ ܓܰܙܶܗ.
7 ܐܶܢ ܢܶܬܚܙܶܐ ܠܗܽܘܢ: ܢܰܝܠܠܽܘܢ ܩܰܫܝܳܐܺܝܬ. ܘܡܰܠܰܐܟ̈ܶܐ ܕܰܫܠܳܡܳܐ ܢܶܒܟܽܘܢ ܡܰܪܺܝܪܳܐܺܝܬ.
8 ܨܕܰܘ ܫܒܺܝ̈ܠܶܐ: ܘܰܒܛܶܠܘ ܥܳܒܖ̈ܰܝ ܐܽܘܪܚܳܐ. ܘܰܒܛܶܠ ܩܝܳܡܳܐ. ܘܩܽܘܖ̈ܝܳܐ ܐܶܣܬܠܺܝ ܘܐ̱ܢܳܫܳܐ ܠܳܐ ܐܶܬܚܫܶܒܘ.
9 ܐܰܠܰܬ ܘܝܶܬܒܰܬ ܒܶܐܒܠܳܐ ܐܰܪܥܳܐ. ܘܰܐܚܦܰܪ ܠܶܒܢܳܢ ܘܰܒܗܶܬ. ܘܰܗܘܳܐ ܫܰܪܘܳܢܳܐ ܐܰܝܟ ܦܩܰܥܬܳܐ. ܚܶܪܒܰܬ ܒܰܝܫܳܢ ܘܟܰܪܡܠܳܐ.
10 ܡܶܟܺܝܠ ܐܶܩܽܘܡ ܐܳܡܰܪ ܡܳܪܝܳܐ: ܡܶܟܺܝܠ ܐܶܬܬܪܺܝܡ: ܘܡܶܟܺܝܠ ܐܶܫܬܰܩܰܠ.
11 ܘܬܶܒܛܢܽܘܢ ܟܽܘ̈ܒܶܐ: ܘܬܺܐܠܕܽܘܢ ܩܶܫܬܳܐ ܒܪܽܘܚܟܽܘܢ. ܢܽܘܪܳܐ ܬܶܐܟܽܘܠܟܽܘܢ.
12 ܘܢܶܗܘܽܘܢ ܥܰܡ̈ܡܶܐ ܡܰܘܩܕܺܝܢ ܐܰܝܟ ܟܶܠܫܳܐ. ܘܰܐܝܟ ܟܽܘ̈ܒܶܐ ܕܰܟܢܺܝܫܺܝܢ ܒܢܽܘܪܳܐ ܢܺܐܩܕܽܘܢ.
13 ܫܡܰܥܘ ܖ̈ܰܚܺܝܩܶܐ ܡܶܕܶܡ ܕܥܶܒܕܶܬ ܘܕܰܥܘ ܩܰܖ̈ܺܝܒܶܐ ܓܰܢ̱ܒܳܪܽܘܬܝ.
14 ܐܶܬܪܗܶܒܘ ܚܰܛܳܝ̈ܶܐ ܒܨܶܗܝܽܘܢ. ܘܰܪܬܺܝܬܳܐ ܢܦܰܠ ܒܚܰܢ̈ܦܶܐ. ܡܰܢܘ ܢܶܥܡܰܪ ܠܰܢ ܥܰܡ ܢܽܘܪܳܐ ܐܳܟܶܠܬܳܐ. ܘܡܰܢܽܘ ܢܶܥܡܰܪ ܠܰܢ ܥܰܡ ܡܰܘܩܕܰܬ ܥܳܠ̈ܡܶܐ.
15 ܕܰܡܗܰܠܶܟ ܒܙܰܕܺܝܩܽܘܬܳܐ: ܘܰܡܡܰܠܶܠ ܬܪܺܝܨܽܘܬܳܐ: ܘܣܳܢܶܐ ܢܶܟܠܳܐ ܘܰܛܠܽܘܡܝܳܐ: ܘܢܳܦܶܨ ܐܺܝܕܶܗ ܡ̣ܶܢ ܕܰܠܡܶܣܰܒ ܫܽܘܚܕܳܐ: ܘܰܡܣܰܟܰܪ ܐܶܕܢܰܘ̈ܗܝ ܕܠܳܐ ܢܶܫܡܰܥ: ܘܰܡܥܰܡܶܨ ܥܰܝܢܰܘ̈ܗܝ ܕܠܳܐ ܢܶܚܙܶܐ ܒܺܝܫܬܳܐ.
16 ܗܳܢܳܐ ܒܰܡܪܰܘܡܳܐ ܢܶܥܡܰܪ. ܘܰܒܥܽܘܫܢܳܐ ܕܰܫܩܺܝܦܳܐ ܡܰܫܪܝܶܗ. ܠܰܚܡܶܗ ܝܺܗܺܝܒ: ܘܡܰܘ̈ܗܝ ܡܗܰܝܡܢܺܝܢ.
17 ܠܡܰܠܟܳܐ ܒܫܽܘܦܪܶܗ ܢܶܚ̈ܙܝܳܢ ܥܰܝܢܰܝ̈ܟ: ܒܰܐܖ̈ܥܳܬܳܐ ܖ̈ܰܚܺܝܩܳܬܳܐ. ܘܠܶܒܳܟ ܢܶܬܝܰܠܰܦ ܕܶܚܠܬܳܐ.
18 ܐܰܝܟܳܐ ܗ̱ܘ̣ ܣܳܦܪܳܐ ܐܰܝܟܳܐ ܗ̱ܘ̣ ܬܳܩܽܘܠܳܐ ܐܰܝܟܰܘ ܕܡܳܢܳܐ ܡܰܓ̈ܕܠܶܐ ܠܥܰܡܳܐ ܥܰܫܺܝܢܳܐ.
19 ܠܳܐ ܢܚܽܘܪ ܠܥܰܡܳܐ ܕܰܥܛܶܠ ܫܶܡܥܶܗ: ܘܰܠܥܶܓ ܠܶܫܳܢܶܗ: ܘܠܳܐ ܡܶܣܬܰܟܰܠ.
20 ܚܙܺܝ ܠܨܶܗܝܽܘܢ ܩܪܺܝܬܳܐ ܕܥܰܕܥܺܕܰܝ̈ܢ. ܘܥܰܝܢܰܝ̈ܟ ܢܚܽܘܖ̈ܳܢ ܒܽܐܘܪܺܫܠܶܡ ܕܰܝܪܳܐ ܥܰܬܺܝܪܬܳܐ. ܡܰܫܟܢܳܐ ܕܠܳܐ ܙܳܐܰܥ: ܘܠܳܐ ܡܶܬܥܰܩܖ̈ܳܢ ܣܶܟܰܘ̈ܗܝ ܠܥܳܠܡܺܝܢ: ܘܟܽܠܗܽܘܢ ܛܽܘܢܒܰܘ̈ܗܝ ܠܳܐ ܡܶܬܦܰܣܩܺܝܢ.
21 ܡܶܛܽܠ ܕܡܳܪܝܳܐ ܫܡܳܐ ܗ̱ܘ̣ ܠܰܢ ܡܫܰܒܚܳܐ ܘܗܽܘ ܢܶܗܘܶܐ ܠܰܢ ܐܰܬܪܳܐ ܢܰܗܺܝܪܳܐ: ܘܢܰܗܺܝܪܽܘܬܳܐ ܘܰܪܘܰܚܬܳܐ ܕܺܐܝ̈ܕܰܝܳܐ. ܕܠܳܐ ܬܰܡܠܶܟ ܡܳܪܽܘܬܳܐ ܕܫܰܠܺܝܛܳܐ ܘܥܰܫܺܝܢܳܐ ܕܢܶܫܬܟܰܚ: ܠܳܐ ܢܶܥܒܰܪ ܒܳܗ̇.
22 ܡܶܛܽܠ ܕܡܳܪܝܳܐ ܗ̱ܘ̣ ܕܰܝܳܢܳܐ ܘܡܳܪܝܳܐ ܗ̱ܘ̣ ܡܒܰܕܩܳܢܳܐ. ܘܡܳܪܝܳܐ ܗ̱ܘ̣ ܡܰܠܟܰܢ: ܘܗܽܘܝܽܘ ܦܳܪܽܘܩܰܢ.
23 ܐܶܫܬܪܺܝܘ ܚܰܒܠܰܝ̈ܟܝ ܕܠܳܐ ܐܶܫܬܰܪܰܪܘ ܘܶܐܬܪܟܶܢܘ ܥܰܡܽܘܕܰܝ̈ܟܝ ܕܠܳܐ ܦܫܰܛܘ ܐܳܬܳܐ: ܥܕܰܡܳܐ ܕܦܰܠܶܓܘ ܒܶܙܬܳܐ: ܘܣܽܘܓܳܐܐ ܕܰܚܓܺܝܖ̈ܶܐ ܫܒܰܘ ܫܒܺܝܬܳܐ.
24 ܘܠܳܐ ܢܺܐܡܰܪ ܥܳܡܽܘܪܳܐ ܕܰܟܪܺܝܗ ܐ̱ܢܳܐ ܥܰܡܳܐ ܕܝܳܬܶܒ ܒܳܗ̇: ܩܰܒܶܠ ܚܛܳܗܳܐ.