Isaiah 48
The Book of Isaiah
܀ ܐܫܥܝܐ ܡܚ ܀
1 ܫܡܰܥܘ ܗܳܠܶܝܢ ܕܒܶܝܬ ܝܰܥܩܽܘܒ: ܕܡܶܬܩܪܶܝܢ ܒܰܫܡܶܗ ܕܺܝܣܪܳܐܶܝܠ: ܘܡ̣ܶܢ ܡܰܝ̈ܳܐ ܕܺܝܗܽܘܕܳܐ ܢܦܰܩܘ: ܕܝܳܡܶܝܢ ܒܰܫܡܶܗ ܕܡܳܪܝܳܐ: ܘܒܰܐܠܳܗܳܐ ܕܺܝܣܪܳܐܶܝܠ ܡܰܕܟܪܺܝܢ: ܠܳܐ ܒܩܽܘܫܬܳܐ ܘܠܳܐ ܒܙܰܕܺܝܩܽܘܬܳܐ.
2 ܡܶܛܽܠ ܕܡ̣ܶܢ ܩܪܺܝܬܳܐ ܕܩܽܘܕܫܳܐ ܐܶܬܩܪܺܝܘ: ܘܥܰܠ ܐܰܠܳܗܳܐ ܕܺܝܣܪܳܐܶܝܠ ܐܶܣܬܡܶܟܘ: ܡܳܪܝܳܐ ܚܰܝܠܬܳܢܳܐ ܫܡܶܗ.
3 ܩܰܕܡܳܝ̈ܳܬܳܐ ܕܡ̣ܶܢ ܪܺܝܫܺܝܬܳܐ ܚܰܘܺܝܬ. ܘܡ̣ܶܢ ܦܽܘܡܝ ܢܦܰܩ: ܘܰܐܫܡܥܶܬ ܐܶܢܶܝܢ ܠܟܽܘܢ. ܘܡ̣ܶܢ ܫܶܠܝܳܐ ܥܳܒܶܕ ܐ̱ܢܳܐ ܘܐܳܬܝ̈ܳܢ.
4 ܝܳܕܰܥ ܕܰܩܫܶܐ ܐܰܢ̱ܬ ܘܰܩܕܳܠܳܟ ܓܝܳܕܳܐ ܗ̱ܘ̣ ܕܦܰܪܙܠܳܐ. ܘܒܶܝܬ ܥܰܝܢܰܝ̈ܟ ܢܚܳܫܳܐ.
5 ܘܚܳܘܺܝܬܳܟ ܡ̣ܶܢ ܩܕܺܝܡ. ܘܥܰܕܠܳܐ ܬܺܐܬܶܐ ܐܰܫܡܰܥܬܳܟ ܕܠܳܐ ܬܺܐܡܰܪ ܦܬܰܟܖ̈ܰܝ ܥܒܰܕܘ: ܘܰܓܠܺܝܦܰܝ̈ ܘܰܢܣܺܝܟܰܝ̈ ܦܰܪܩܽܘܢܝ.
6 ܫܶܡܥܶܬ ܘܰܚܙܺܝܬ ܟܽܠܗܶܝܢ ܘܰܐܢ̱ܬܽܘܢ ܠܳܐ ܬܚܰܘܢ. ܐܰܫܡܰܥܬܳܟ ܚܰܕ̈ܬܳܬܳܐ ܕܡ̣ܶܢ ܗܳܫܳܐ ܢܛܺܝܖ̈ܳܢ: ܘܠܳܐ ܝܺܕܰܥܬ.
7 ܘܡܶܟܺܝܠ ܡܶܬܒܰܖ̈ܝܳܢ ܘܠܳܐ ܡ̣ܶܢ ܩܕܺܝܡ. ܘܡ̣ܶܢ ܩܕܳܡ ܝܰܘܡܳܐ ܠܳܐ ܫܡܰܥܬ ܐܶܢܶܝܢ: ܕܠܳܐ ܬܺܐܡܰܪ ܕܝܳܕܰܥ ܐ̱ܢܳܐ ܠܗܶܝܢ.
8 ܠܳܐ ܫܡܰܥܬ ܐܳܦܠܳܐ ܝܳܕܰܥ ܐܰܢ̱ܬ ܠܗܶܝܢ. ܘܡ̣ܶܢ ܩܕܺܝܡ ܠܳܐ ܐܶܬܦܬܰܚ ܐܶܕܢܰܝ̈ܟ ܝܳܕܰܥ ܐ̱ܢܳܐ ܕܰܡܕܰܓܳܠܽܘ ܡܕܰܓܶܠ ܐܰܢ̱ܬ. ܘܥܰܘܳܠܳܐ ܡ̣ܶܢ ܟܰܪܣܳܐ ܐܶܬܩܪܺܝܬ.
9 ܡܶܛܽܠ ܫܶܡܝ ܐܰܘܪܶܟ ܪܽܘܓܙܝ ܘܬܶܫܒܽܘܚܬܝ ܐܶܛܰܪ ܠܳܟ: ܘܠܳܐ ܐܰܘܒܕܳܟ.
10 ܗܳܐ ܨܪܰܦܬܳܟ ܘܠܳܐ ܒܟܶܣܦܳܐ. ܘܰܒܚܰܪܬܳܟ ܒܟܽܘܪܳܐ ܕܡܶܣܟܺܢܽܘܬܳܐ.
11 ܡܶܛܽܠܳܬܝ ܐܶܥܒܶܕ ܕܠܳܐ ܐܶܬܛܰܘܰܫ ܘܺܐܝܩܳܪܝ ܠܰܐܚܪܺܝܢ ܠܳܐ ܐܶܬܶܠ.
12 ܫܡܰܥܰܝܢܝ ܝܰܥܩܽܘܒ ܘܺܝܣܪܳܐܶܝܠ ܕܰܩܪܺܝܬ. ܐܶܢܳܐ ܐ̱ܢܳܐ ܩܰܕܡܳܝܳܐ: ܘܶܐܢܳܐ ܐ̱ܢܳܐ ܐ̱ܚܪܳܝܳܐ.
13 ܘܺܐܝܕܝ ܐܰܬܩܢܰܬ ܫܶܬܶܐܣܶܝ̈ܗ̇ ܕܰܐܪܥܳܐ. ܘܝܰܡܺܝܢܝ ܛܶܦܚܰܬ ܫܡܰܝܳܐ. ܩܳܪܶܐ ܐ̱ܢܳܐ ܠܗܽܘܢ: ܘܩܳܝܡܺܝܢ ܐܰܟܚܕܳܐ.
14 ܐܶܬܟܰܢܰܫܘ ܟܽܠܟܽܘܢ ܘܰܫܡܰܥܘ ܡܰܢܽܘ ܐܺܝܬ ܒܟܽܘܢ ܕܰܡܚܳܘܶܐ ܗܳܠܶܝܢ. ܡܳܪܝܳܐ ܪܳܚܶܡ ܕܢܶܥܒܶܕ ܨܶܒܝܳܢܶܗ ܒܒܳܒܶܠ: ܘܰܒܙܰܪܥܳܐ ܕܟܰܠܕܳܝ̈ܶܐ.
15 ܐܶܢܳܐ ܡܰܠܠܶܬ ܘܳܐܦ ܩܪܺܝܬ ܘܰܐܝܬܺܝܬܳܗ̇ ܘܰܐܨܠܚܶܬ ܐܽܘܪܚܶܗ.
16 ܩܪܽܘܒܘ ܠܘܳܬܝ ܘܰܫܡܰܥܘ ܗܳܕܶܐ. ܕܡ̣ܶܢ ܪܺܝܫܺܝܬܳܐ ܒܛܽܘܫܝܳܐ ܠܳܐ ܡܰܠܠܶܬ ܘܡ̣ܶܢ ܙܰܒܢܳܐ ܕܰܗܘܳܬ ܬܰܡܳܢ ܐ̱ܢܳܐ. ܘܗܳܫܳܐ ܡܳܪܝܳܐ ܐܰܠܳܗܳܐ ܫܰܕܪܰܢܝ ܘܪܽܘܚܶܗ.
17 ܗܳܟܰܢܳܐ ܐܳܡܰܪ ܡܳܪܝܳܐ ܦܳܪܽܘܩܳܟ ܩܰܕܺܝܫܳܐ ܕܺܝܣܪܳܐܶܝܠ ܐܶܢܳܐ ܡܳܪܝܳܐ ܐܰܠܳܗܳܟ ܡܰܠܶܦ ܐ̱ܢܳܐ ܠܳܟ ܕܠܳܐ ܬܰܥܠܶܐ ܘܰܡܚܳܘܶܐ ܐ̱ܢܳܐ ܠܳܟ ܐܽܘܪܚܳܐ ܕܬܺܐܙܰܠ ܒܳܗ̇.
18 ܠܘܰܝ ܕܶܝܢ ܨܳܐܶܬ ܐܰܢ̱ܬ ܦܽܘܩܕܳܢܰܝ̈. ܘܗܳܘܶܐ ܫܠܳܡܳܟ ܐܰܝܟ ܢܰܗܪܳܐ: ܘܙܰܕܺܝܩܽܘܬܳܟ ܐܰܝܟ ܓ̈ܰܠܠܶܐ ܕܝܰܡܳܐ.
19 ܘܗܳܘܶܐ ܙܰܪܥܳܟ ܐܰܝܟ ܚܳܠܳܐ: ܘܝܰܠܕܳܐ ܕܰܡܥܰܝ̈ܟ ܐܰܝܟ ܚܨܳܨܰܘ̈ܗܝ ܘܠܳܐ ܢܣܽܘܦ ܘܠܳܐ ܢܺܐܒܰܕ ܫܡܶܗ ܡ̣ܶܢ ܩܕܳܡܝ.
20 ܦܽܘܩܘ ܡ̣ܶܢ ܒܳܒܶܠ: ܥܪܽܘܩܘ ܡ̣ܶܢ ܟܰܠܕܳܝ̈ܶܐ ܒܩܳܠܳܐ ܕܬܶܫܒܽܘܚܬܳܐ ܚܰܘܰܘ ܗܳܕܶܐ. ܘܰܐܫܡܥܽܘܗ̇ ܘܰܐܦܩܽܘܗ̇ ܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ. ܘܶܐܡܰܪܘ: ܦܪܰܩ ܡܪܝܳܐ ܠܝܰܥܩܽܘܒ ܥܰܒܕܶܗ.
21 ܒܚܰܖ̈ܒܳܬܳܐ ܗܰܠܶܟ ܐܶܢܽܘܢ. ܘܡܰܝ̈ܳܐ ܡ̣ܶܢ ܛܰܪܳܢܳܐ ܐܰܪܕܺܝ ܠܗܽܘܢ ܒܰܙܰܥ ܟܺܐܦܳܐ ܘܰܪܕܰܘ ܡܰܝ̈ܳܐ.
22 ܠܰܝܬ ܫܠܳܡܳܐ ܠܖ̈ܰܫܺܝܥܶܐ: ܐܳܡܰܪ ܡܳܪܝܳܐ.