Isaiah 28
The Book of Isaiah
܀ ܐܫܥܝܐ ܟܚ ܀
1 ܘܳܝ ܠܰܟܠܺܝܠܳܐ ܓܰܐܝܳܐ ܕܪܳܘܝܳܐ ܐܰܦܪܶܝܡ: ܘܠܰܓܕܳܠܳܐ ܡܨܰܥܪܳܐ ܚܰܝܠܳܐ ܕܫܽܘܒܚܶܗ ܕܰܒܪܺܝܫ ܢܰܚܠܳܐ ܕܫܰܡܺܝ̈ܢܶܐ: ܕܬܰܘܺܝܪܺܝܢ ܒܚܰܡܪܳܐ.
2 ܗܳܐ ܚܰܝܠܳܐ ܘܥܽܘܫܢܳܐ ܕܡܳܪܝܳܐ: ܐܰܝܟ ܙܳܪܺܝܦܬܳܐ ܕܒܰܪܕܳܐ: ܘܰܐܝܟ ܥܰܠܥܳܠܳܐ ܕܰܬܒܳܪܳܐ: ܘܰܐܝܟ ܙܳܪܺܝܦܬܳܐ ܕܡܰܝ̈ܳܐ ܣܰܓܺܝ̈ܐܶܐ ܕܓܳܪܦܺܝܢ.
3 ܐܰܢܺܝܚ ܠܰܐܪܥܳܐ ܒܺܐܝܕܳܟ. ܘܰܒܪܶܓܠܳܐ ܢܶܬܬܕܺܝܫ ܟܠܺܝܠܳܐ ܓܰܐܝܳܐ ܕܪܳܘܝܳܐ ܐܰܦܪܶܝܡ.
4 ܢܶܗܘܶܐ ܓܕܳܠܳܐ ܡܨܰܥܪܳܐ: ܚܰܝܠܳܐ ܕܫܽܘܒܚܶܗ ܕܰܒܪܺܝܫ ܢܰܚܠܳܐ ܕܫܰܡܺܝ̈ܢܶܐ: ܐܰܝܟ ܒܰܟܰܪܬܳܐ ܕܰܩܕܳܡ ܩܰܝܛܳܐ: ܕܡܳܐ ܕܰܚܙܳܘ ܡܰܢ ܕܚܳܙܶܐ ܠܳܗ̇: ܥܰܕ ܗܺܝ ܒܺܐܝܕܶܗ: ܒܳܠܰܥ ܠܳܗ̇.
5 ܒܝܰܘܡܳܐ ܗܰܘ: ܢܶܗܘܶܐ ܡܳܪܝܳܐ ܚܰܝܠܬܳܢܳܐ ܠܰܟܠܺܝܠܳܐ ܕܚܰܝܠܳܐ: ܘܠܰܓܕܳܠܳܐ ܡܫܰܒܚܳܐ ܠܫܰܪܟܳܐ ܕܥܰܡܶܗ.
6 ܠܪܽܘܚܳܐ ܕܕܺܝܢܳܐ: ܠܡܰܢ ܕܝܳܬܶܒ ܥܰܠ ܕܺܝܢܳܐ ܘܓܰܢ̱ܒܳܪܽܘܬܳܐ: ܕܡܰܗܦܟܺܝܢ ܩܪܳܒܳܐ ܡ̣ܶܢ ܬܰܪܥܳܐ.
7 ܐܳܦ ܗܳܠܶܝܢ ܒܚܰܡܪܳܐ ܛܥܰܘ: ܘܰܒܫܰܟܪܳܐ ܛܥܰܘ. ܟܳܗ̈ܢܶܐ ܘܰܢܒܺܝ̈ܶܐ ܛܥܰܘ ܒܫܰܟܪܳܐ. ܐܶܬܒܠܰܥܘ ܡ̣ܶܢ ܚܰܡܪܳܐ. ܙܳܥܘ ܡ̣ܶܢ ܫܰܟܪܳܐ. ܛܥܰܘ ܒܪܰܘܳܝܽܘܬܳܐ ܐܶܟܰܠܘ ܐܳܣܽܘܛܳܐܺܝܬ.
8 ܡܶܛܽܠ ܕܟܽܠܗܽܘܢ ܦܳܬܽܘܖ̈ܶܐ ܐܶܬܡܠܺܝܘ ܬܝܽܘܒܳܐ ܘܬܶܒܬܳܐ ܡ̣ܶܢ ܒܠܰܝ ܐܰܬܪܳܐ.
9 ܠܡܰܢ ܢܰܠܶܦ ܝܺܕܰܥܬܳܐ ܘܰܠܡܰܢ ܢܣܰܟܶܠ ܫܶܡܥܳܐ: ܠܕܰܚܣܺܝܠܺܝܢ ܡ̣ܶܢ ܚܰܠܒܳܐ: ܘܰܢܓܺܝܕܺܝܢ ܡ̣ܶܢ ܬܕܰܝ̈ܳܐ.
10 ܡܶܛܽܠ ܬܶܒܬܳܐ ܥܰܠ ܬܶܒܬܳܐ: ܘܬܶܒܬܳܐ ܥܰܠ ܬܶܒܬܳܐ. ܘܰܬܝܽܘܒܳܐ ܥܰܠ ܬܝܽܘܒܳܐ: ܘܰܬܝܽܘܒܳܐ ܥܰܠ ܬܝܽܘܒܳܐ. ܩܰܠܺܝܠ ܠܬܰܡܳܢ: ܘܩܰܠܺܝܠ ܠܬܰܡܳܢ.
11 ܡܶܛܽܠ ܕܰܒܡܰܡܠܠܳܐ ܥܰܛܠܳܐ ܘܰܒܠܶܫܳܢܳܐ ܐ̱ܚܪܺܢܳܐ ܐܶܡܰܠܶܠ ܥܰܡܶܗ ܥܰܡ ܥܰܡܳܐ ܗܳܢܳܐ.
12 ܕܶܐܡܪܶܬ ܠܗܽܘܢ: ܗܳܕܳܐ ܗ̱ܝ ܢܝܳܚܬܝ: ܐܰܢܺܝܚܘ ܠܰܡܛܰܖ̈ܦܳܐ ܘܗܳܢܰܘ ܫܶܠܝܳܐ ܘܠܳܐ ܨܒܰܘ ܠܡܶܫܡܰܥ.
13 ܘܰܗܘܳܬ ܠܗܽܘܢ ܡܶܠܬܶܗ ܕܡܳܪܝܳܐ: ܬܶܒܬܳܐ ܥܰܠ ܬܶܒܬܳܐ: ܘܬܶܒܬܳܐ ܥܰܠ ܬܶܒܬܳܐ: ܘܰܬܝܽܘܒܐ ܥܰܠ ܬܝܽܘܒܳܐ: ܘܰܬܝܽܘܒܳܐ ܥܰܠ ܬܝܽܘܒܳܐ: ܩܰܠܺܝܠ ܠܬܰܡܳܢ: ܘܩܰܠܺܝܠ ܠܬܰܡܳܢ ܕܢܶܗܦܟܽܘܢ ܘܢܶܣܬܰܚܦܽܘܢ ܠܒܶܣܬܰܪܗܽܘܢ: ܘܢܶܬܬܰܒܪܽܘܢ ܘܢܶܬܬܨܺܝܕܽܘܢ ܘܢܶܬܬܰܚܕܽܘܢ.
14 ܡܶܛܽܠ ܗܳܢܳܐ ܫܡܰܥܘ ܦܶܬܓܳܡܶܗ ܕܡܳܪܝܳܐ ܓܰܒܖ̈ܶܐ ܡܡܰܝܩܳܢ̈ܶܐ: ܫܰܠܺܝܛܰܘ̈ܗܝ ܕܥܰܡܳܐ ܗܳܢܳܐ ܕܒܽܐܘܪܺܫܠܶܡ.
15 ܡܶܛܽܠ ܕܶܐܡܰܪܬܽܘܢ ܕܰܐܩܺܝܡܢ ܩܝܳܡܳܐ ܥܰܡ ܡܰܘܬܳܐ: ܘܥܰܡ ܫܝܽܘܠ ܥܒܰܕܢ ܚܶܙܘܳܐ. ܫܰܘܛܳܐ ܕܰܓܪܽܘܦܝܳܐ ܟܰܕ ܢܶܥܒܰܪ: ܠܳܐ ܢܺܐܬܶܐ ܥܠܰܝܢ. ܡܶܛܽܠ ܕܣܳܡܢ ܒܕܰܓܳܠܽܘܬܳܐ ܬܽܘܟܠܳܢܰܢ: ܘܰܒܫܽܘܩܪܳܐ ܐܶܣܬܰܬܰܪܢ.
16 ܡܶܛܽܠ ܗܳܢܳܐ ܐܳܡܰܪ ܡܳܪܝܳܐ ܐܰܠܳܗܳܐ: ܗܳܐ ܐܶܢܳܐ ܡܰܬܩܶܢ ܐ̱ܢܳܐ ܒܨܶܗܝܽܘܢ ܟܺܐܦܳܐ: ܟܺܐܦܳܐ ܒܚܺܝܪܬܳܐ ܒܙܳܘܺܝܬܳܐ ܝܰܩܺܝܪܬܳܐ: ܪܺܝܫ ܐܶܣܬܳܐ ܕܫܶܬܶܐܣܬܳܐ. ܕܰܡܗܰܝܡܶܢ ܠܳܐ ܢܶܕܚܰܠ.
17 ܘܶܐܣܺܝܡ ܕܺܝܢܳܐ ܠܰܡܫܽܘܚܬܳܐ: ܘܙܰܕܺܝܩܽܘܬܳܐ ܠܡܰܬܩܳܠܳܐ. ܘܢܶܚܒܽܘܛ ܒܰܪܕܳܐ ܠܣܰܒܪܳܐ ܕܰܓܳܠܳܐ: ܘܰܠܣܶܬܳܪܳܐ ܡܰܝ̈ܳܐ ܢܶܓܪܦܽܘܢ.
18 ܘܢܶܬܟܰܦܰܪ ܩܝܳܡܟܽܘܢ ܕܥܰܡ ܡܰܘܬܳܐ. ܘܚܶܙܘܟܽܘܢ ܕܥܰܡ ܫܝܽܘܠ ܠܳܐ ܢܩܽܘܡ. ܫܰܘܛܳܐ ܓܳܪܽܘܦܳܐ ܟܰܕ ܢܶܥܒܰܪ: ܬܶܗܘܢ ܠܶܗ ܠܰܕܝܳܫܳܐ.
19 ܘܰܒܙܰܒܢܳܐ ܕܥܳܒܰܪ ܢܶܕܒܰܪܟܽܘܢ. ܡܶܛܽܠ ܕܰܒܨܰܦܪܳܐ ܒܨܰܦܪܳܐ ܢܶܥܒܰܪ ܒܺܐܝܡܳܡܳܐ ܘܰܒܠܺܠܝܳܐ ܗܳܘܝܳܐ ܙܳܘܥܬܳܐ. ܒܰܠܚܽܘܕ ܐܶܣܬܰܟܰܠ ܫܳܡܽܘܥܳܐ.
20 ܡܶܛܽܠ ܕܟܰܪܺܝ ܡܳܐܢܳܐ ܠܡܶܣܬܪܶܗ. ܘܡܶܫܬܺܝܬܳܐ ܩܶܛܢܰܬ: ܘܠܳܐ ܡܡܰܠܝܳܐ.
21 ܡܶܛܽܠ ܕܰܒܛܽܘܪܳܐ ܒܬܽܘܪܰܥܬܳܐ ܢܩܽܘܡ ܡܳܪܝܳܐ: ܐܰܝܟ ܥܽܘܡܩܳܐ ܕܓܶܒܥܽܘܢ ܢܶܪܓܰܙ ܠܡܶܥܒܰܕ ܥܒܳܕܰܘ̈ܗܝ: ܢܽܘܟܖ̈ܳܝܺܝܢ ܥܒܳܕܰܘ̈ܗܝ. ܘܰܠܡܶܥܒܰܕ ܥܒܺܝ̈ܕܳܬܶܗ: ܢܽܘܟܖ̈ܳܝܳܢ ܥܒܺܝ̈ܕܳܬܶܗ.
22 ܘܗܳܫܳܐ ܠܳܐ ܬܡܰܝܩܽܘܢ: ܕܠܳܐ ܢܶܥܫ̈ܢܳܢ ܡܰܖ̈ܕܘܳܬܟܽܘܢ ܡܶܛܽܠ ܕܰܓܡܽܘܪܝܳܐ ܘܦܳܣܺܝ̈ܩܳܬܳܐ ܫܶܡܥܶܬ ܡ̣ܶܢ ܡܳܪܝܳܐ ܚܰܝܠܬܳܢܳܐ: ܥܰܠ ܟܠܳܗ̇ ܐܰܪܥܳܐ.
23 ܨܽܘܬܘ ܘܰܫܡܰܥܘ ܩܳܠܝ: ܨܽܘܬܘ ܘܰܫܡܰܥܘ ܡܶܐܡܰܪܝ.
24 ܕܰܠܡܳܐ ܝܰܘܡܳܐ ܟܽܠܶܗ ܕܳܒܰܪ ܐܰܟܳܪܳܐ ܠܡܶܙܪܰܥ: ܘܙܳܩܶܦ ܘܫܳܦܶܢ ܐܰܪܥܶܗ.
25 ܠܳܐ ܗ̱ܘܳܐ ܡܳܐ ܕܰܐܫܘܺܝ ܐܰܦܶܝ̈ܗ̇: ܒܰܕܰܪ ܫܰܒܽܘܒܢܳܐ: ܘܟܰܡܽܘܢܳܐ ܙܳܪܰܥ. ܘܪܳܡܶܐ ܚܶܛ̈ܶܐ ܘܰܣܥܳܖ̈ܶܐ ܘܟܽܘ̈ܢܳܬܳܐ ܒܰܬܚܽܘܡܶܝ̈ܗ̇.
26 ܢܶܪܕܶܝܘܗܝ ܒܕܺܝܢܳܐ ܕܰܐܠܳܗܳܐ ܘܰܢܫܰܒܚܺܝܘܗܝ.
27 ܡܶܛܽܠ ܕܠܳܐ ܗ̱ܘܳܐ ܒܰܕܪܳܫܳܐ ܡܶܬܕܰܪܰܟ ܫܰܒܽܘܒܢܳܐ. ܘܳܐܦܠܳܐ ܡܶܬܟܪܶܟ ܓܰܪܓܪܳܐ ܥܰܠ ܟܰܡܽܘܢܳܐ. ܡܶܛܽܠ ܕܰܒܚܽܘܛܪܳܐ ܡܶܬܚܰܒܰܛ ܫܰܒܽܘܒܢܳܐ: ܘܟܰܡܽܘܢܳܐ ܒܙܶܩܬܳܐ.
28 ܥܒܽܘܪܳܐ ܡܶܬܕܰܪܰܟ ܡܶܛܽܠܬܰܢ. ܡܶܛܽܠ ܕܠܳܐ ܗ̱ܘܳܐ ܠܙܳܟܽܘ ܡܰܕܪܳܟܽܘ ܐܰܕܪܶܟܢܳܝܗܝ ܘܰܒܣܽܘܓܳܐܐ ܕܓܺܝ̈ܓܠܶܐ ܕܓܰܪܓܖ̈ܽܘܗܝ: ܘܰܒܦܰܖ̈ܣܰܘܗܝ ܢܕܰܩܽܘܢܶܗ.
29 ܘܳܐܦ ܗܳܕܶܐ ܩܕܳܡ ܡܳܪܝܳܐ ܚܰܝܠܬܳܢܳܐ ܢܶܦܩܰܬ ܕܽܘܡܳܪܳܐ ܕܬܰܪܥܺܝܬܳܐ ܐܰܘܪܶܒ ܬܰܪܒܺܝܬܳܐ.