Isaiah 41
The Book of Isaiah
܀ ܐܫܥܝܐ ܡܐ ܀
1 ܫܬܽܘܩܺܝ̈ܢ ܓܳܙܖ̈ܳܬܳܐ. ܘܶܐܡ̈ܘܳܬܳܐ ܢܚܰܠ̈ܦܳܢ ܚܰܝܠܳܐ. ܢܶܩܖ̈ܒܳܢ: ܘܗܳܝܕܶܝܢ ܢܡܰܠ̈ܠܳܢ ܘܰܐܟܚܕܳܐ ܠܕܺܝܢܳܐ ܢܶܩܖ̈ܒܳܢ.
2 ܡܰܢܽܘ ܐܰܥܺܝܪ ܙܰܕܺܝܩܽܘܬܳܐ ܡ̣ܶܢ ܡܰܕܢܚܳܐ: ܘܰܩܪܳܗ̇ ܠܪܶܓܠܶܗ. ܢܶܫܬܰܠܡܽܘܢ ܩܕܳܡܰܘܗܝ ܥܰܡ̈ܡܶܐ ܘܡܰܠ̈ܟܶܐ ܢܶܬܘܪܽܘܢ ܢܶܬܶܠ ܐܰܝܟ ܥܰܦܪܳܐ ܚܰܪܒܶܗ: ܘܰܐܝܟ ܕܢܳܬܪܳܐ ܩܶܫܬܶܗ.
3 ܢܶܪܕܽܘܦ ܐܶܢܽܘܢ: ܘܢܶܥܒܶܕ ܫܠܳܡܳܐ. ܐܘܪܚܳܐ ܒܖ̈ܶܓܠܰܘܗܝ ܠܳܐ ܢܰܥܶܠ.
4 ܡܰܢܽܘ ܥܰܬܶܕ ܘܰܥܒܰܕ ܡܰܢ ܕܰܩܪܳܐ ܠܕܳܖ̈ܶܐ ܡ̣ܶܢ ܪܺܫܺܝܬܳܐ. ܐܶܢܳܐ ܐ̱ܢܳܐ ܡܳܪܝܳܐ ܩܰܕܡܳܝܳܐ ܘܰܐ̱ܚܪܳܝܳܐ: ܐܶܢܳܐ ܐ̱ܢܳܐ.
5 ܚܙܰܝܳܢ̈ܝ ܓܳܙܖ̈ܳܬܳܐ. ܘܰܕܚܶܠܘ ܣܰܘ̈ܦܶܝܗ̇ ܕܰܐܪܥܳܐ. ܕܚܶܠܘ ܘܰܩܪܶܒܘ ܘܶܐܬܰܘ.
6 ܘܰܓܒܰܪ ܠܚܰܒܪܶܗ ܡܥܰܕܪܺܝܢ ܘܠܰܐܚܰܘ̈ܗܝ ܐܳܡܰܪ ܐܶܬܚܰܝܰܠ.
7 ܘܠܰܒܶܒ ܢܰܓܳܪܳܐ ܠܩܰܝܢܳܝܳܐ ܕܳܐܪܶܫ ܒܩܽܘܪܢܳܣܳܐ: ܘܦܳܠܰܚ. ܘܳܐܡܰܪ ܥܰܠ ܕܶܒܩܳܐ ܕܫܰܦܺܝܪ ܗ̱ܘ̣. ܘܩܳܒܥܺܝܢ ܠܶܗ ܒܨܶܨ̈ܶܐ: ܕܠܳܐ ܢܶܬܬܙܺܝܥ.
8 ܗܳܫܳܐ ܝܺܣܪܳܐܶܝܠ ܥܰܒܕܝ: ܝܰܥܩܽܘܒ ܕܰܓܒܶܝܬܳܟ: ܙܰܪܥܶܗ ܕܰܐܒܪܳܗܳܡ ܪܳܚܡܝ ܕܚܰܝܶܠܬܳܟ.
9 ܡ̣ܶܢ ܣܰܘ̈ܦܶܝܗ̇ ܕܰܐܪܥܳܐ: ܘܡ̣ܶܢ ܕܰܘܩܶܝ̈ܗ̇ ܩܪܺܝܬܳܟ ܘܶܐܡܪܶܬ ܠܳܟ ܥܰܒܕܝ ܠܳܟ ܥܰܒܕܝ ܐܰܢ̱ܬ ܓܒܶܝܬܳܟ ܘܠܳܐ ܐܰܣܠܺܝܬܳܟ.
10 ܠܳܐ ܬܶܕܚܰܠ ܡܶܛܽܠ ܕܥܰܡܳܟ ܐ̱ܢܳܐ. ܘܠܳܐ ܬܶܬܪܗܶܒ ܡܶܛܽܠ ܕܶܐܢܳܐ ܐ̱ܢܳܐ ܐܰܠܳܗܳܟ. ܚܰܝܶܠܬܳܟ: ܐܳܦ ܥܰܕܰܪܬܳܟ ܐܳܦ ܣܰܡܶܟܬܳܟ ܒܝܰܡܺܝܢܝ ܙܰܕܺܝܩܬܳܐ.
11 ܢܶܒܗܬܽܘܢ ܘܢܰܚܦܪܽܘܢ ܐܰܝܠܶܝܢ ܕܣܳܩܪܺܝܢ ܠܳܟ: ܢܶܗܘܽܘܢ ܐܰܝܟ ܠܳܐ ܡܶܕܶܡ. ܘܢܺܐܒܕܽܘܢ ܓܰܒܖ̈ܶܐ ܕܢܳܨܶܝܢ ܥܰܡܳܟ.
12 ܬܶܒܥܶܐ ܐܶܢܽܘܢ: ܘܠܳܐ ܬܶܫܟܰܚ ܐܶܢܽܘܢ ܠܓܰܒܖ̈ܶܐ ܕܢܳܨܶܝܢ ܥܰܡܳܟ. ܢܶܗܘܽܘܢ ܐܰܝܟ ܕܠܳܐ ܐܺܝܬܰܝܗܽܘܢ: ܓܰܒܖ̈ܶܐ ܕܡܶܬܟܰܬܫܺܝܢ ܥܰܡܳܟ.
13 ܡܶܛܽܠ ܕܶܐܢܳܐ ܐ̱ܢܳܐ ܡܳܪܝܳܐ ܐܰܠܳܗܳܟ: ܡܚܰܝܠܳܢܳܐ ܕܝܰܡܺܝܢܳܟ: ܐܶܡܪܶܬ ܠܳܟ ܠܳܐ ܬܶܕܚܰܠ. ܐܶܢܳܐ ܐ̱ܢܐ ܥܳܕܽܘܪܳܟ.
14 ܠܳܐ ܬܶܕܚܠܺܝܢ ܬܰܘܠܥܶܗ ܕܝܰܥܩܽܘܒ: ܘܰܡܢܺܝܢܶܗ ܕܺܝܣܪܳܐܶܝܠ ܐܶܢܳܐ ܐ̱ܢܳܐ ܥܳܕܽܘܪܶܟܝ: ܐܳܡܰܪ ܡܳܪܝܳܐ. ܘܦܳܪܽܘܩܶܟܝ ܩܰܕܺܝܫܳܐ ܕܺܝܣܪܳܐܶܝܠ.
15 ܗܳܐ ܥܒܰܕܬܳܟ ܐܰܝܟ ܓܰܪܓܰܪܳܟ ܚܰܕܬܳܐ: ܕܫܳܚܶܩ ܘܡܰܕܶܩ ܬܕܽܘܫ ܛܽܘܖ̈ܶܐ: ܘܬܰܕܶܩ ܘܖ̈ܳܡܳܬܳܐ ܬܶܥܒܶܕ ܐܰܝܟ ܥܽܘܪܳܐ.
16 ܬܶܕܕܶܐ ܐܶܢܽܘܢ. ܘܪܽܘܚܳܐ ܬܶܫܩܽܘܠ ܐܶܢܽܘܢ ܘܥܰܠܥܳܠܳܐ ܬܒܰܕܰܪ ܐܶܢܽܘܢ. ܘܰܐܢ̱ܬ ܬܕܽܘܨ ܒܡܳܪܝܳܐ. ܘܰܒܩܰܕܺܝܫܳܐ ܕܺܝܣܪܳܐܶܝܠ ܬܶܫܬܰܒܰܚ.
17 ܡܶܣܟܺܢ̈ܶܐ ܘܒܳܝ̈ܫܶܐ ܒܳܥܶܝܢ ܡܰܝ̈ܳܐ ܘܠܰܝܬ ܘܠܶܫܳܢܗܽܘܢ ܒܨܶܗܝܳܐ ܝܺܒܶܫ ܐܶܢܳܐ ܡܳܪܝܳܐ ܐܶܥܢܶܐ ܐܶܢܽܘܢ ܐܰܠܳܗܶܗ ܕܺܝܣܪܳܐܶܝܠ: ܘܠܳܐ ܐܶܫܒܽܘܩ ܐܶܢܽܘܢ.
18 ܐܶܦܬܰܚ ܢܰܗܖ̈ܰܘܳܬܳܐ ܒܛܽܘܖ̈ܶܐ: ܘܰܒܓܰܘ ܦܰܩ̈ܥܳܬܳܐ ܡܰܒܽܘ̈ܥܶܐ: ܐܶܥܒܶܕ ܡܰܕܒܪܳܐ ܠܰܐܓ̈ܡܶܐ ܕܡܰܝ̈ܳܐ: ܘܰܐܪܥܳܐ ܨܗܺܝܬܳܐ ܠܡܰܒܽܘ̈ܥܶܐ ܕܡܰܝ̈ܳܐ.
19 ܐܶܬܶܠ ܒܡܰܕܒܪܳܐ ܐܰܖ̈ܙܶܐ ܘܶܐܫܟܳܖ̈ܥܶܐ: ܘܳܐܣܳܐ ܘܩܰܝܣܳܐ ܕܡܶܫܚܳܐ. ܐܶܣܺܝܡ ܒܰܦܩܰܥܬܳܐ ܫܰܖ̈ܘܰܝܢܶܐ ܗܕܺܝܖ̈ܶܐ ܐܰܟܚܕܳܐ.
20 ܕܢܶܚܙܽܘܢ ܘܢܶܕܥܽܘܢ ܘܢܶܬܒܰܝܢܽܘܢ. ܘܢܶܣܬܰܟܠܽܘܢ ܐܰܟܚܕܳܐ: ܕܺܐܝܕܶܗ ܕܡܳܪܝܳܐ ܥܶܒܕܰܬ ܗܳܕܶܐ: ܘܩܰܕܺܝܫܳܐ ܕܺܝܣܪܳܐܶܝܠ ܒܪܳܗ̇.
21 ܩܰܪܶܒܘ ܕܺܝܢܰܝ̈ܟܽܘܢ: ܐܳܡܰܪ ܡܳܪܝܳܐ. ܩܰܪܶܒܘ ܬܰܖ̈ܥܝܳܬܟܽܘܢ ܐܳܡܰܪ ܡܰܠܟܶܗ ܕܝܰܥܩܽܘܒ.
22 ܢܶܩܪܒܽܘܢ: ܘܰܢܚܳܘܢ ܐܰܝܠܶܝܢ ܕܰܥܬܺܝ̈ܕܳܢ ܩܰܕܡܳܝ̈ܳܬܳܐ ܡܳܢܳܐ ܐܶܢܶܝܢ: ܚܳܘܰܐܢܝ. ܘܰܢܣܺܝܡ ܒܠܶܒܰܢ: ܘܢܶܕܰܥ ܐ̱ܚܖ̈ܳܝܳܬܗܶܝܢ. ܐܰܘ ܕܳܐܬܝ̈ܳܢ ܐܰܫܡܥܽܘܢ.
23 ܚܳܘܰܐܢܝ ܐܳܬܘ̈ܳܬܳܐ ܕܰܥܬܺܝ̈ܕܳܢ ܘܢܶܕܰܥ ܕܰܐܠܳܗ̈ܶܐ ܐܰܢ̱ܬܽܘܢ ܐܳܦ ܡܰܛܐܒܺܝܢ ܐ̱ܢܬܽܘܢ ܐܳܦ ܡܰܒܐܫܺܝܢ ܐ̱ܢܬܽܘܢ ܘܢܶܫܬܰܥܶܐ: ܘܢܶܚܙܶܐ ܐܰܟܚܕܳܐ.
24 ܗܳܐ ܐܰܢ̱ܬܽܘܢ ܠܳܐ ܡܶܕܶܡ ܐܰܢ̱ܬܽܘܢ. ܘܰܥܒܳܕܰܝ̈ܟܽܘܢ ܡ̣ܶܢ ܚܰܪܒܳܐ. ܘܛܰܢܦܽܘܬܳܐ ܗ̱ܝ ܓܒܺܝܬܟܽܘܢ.
25 ܐܰܥܺܝܪܶܬ ܡ̣ܶܢ ܓܰܪܒܝܳܐ: ܕܢܺܐܬܶܐ ܡ̣ܶܢ ܡܰܕܢܳܚܰܝ̈ ܫܶܡܫܳܐ: ܘܢܶܩܪܶܐ ܒܫܶܡܝ. ܘܢܺܐܬܽܘܢ ܫܰܠܺܝ̈ܛܳܢܶܐ ܘܢܶܬܬܕܺܝܫܽܘܢ: ܐܰܝܟ ܛܺܝܢܳܐ ܕܕܳܐܶܫ ܦܰܚܳܪܳܐ.
26 ܡܰܢܽܘ ܕܰܢܚܳܘܶܐ ܡ̣ܶܢ ܪܺܝܫܺܝܬܳܐ: ܘܢܶܕܰܥ ܘܢܺܐܡܰܪ ܕܙܰܕܺܝܩ. ܠܰܝܬ ܕܰܡܚܳܘܶܐ ܐܳܦܠܳܐ ܕܡܰܫܡܰܥ: ܐܳܦܠܳܐ ܕܫܳܡܰܥ ܡܶܠܰܝ̈ܟܽܘܢ.
27 ܖ̈ܺܝܫܳܝܳܬܳܐ ܕܨܶܗܝܽܘܢ ܗܳܠܶܝܢ ܐܶܢܶܝܢ. ܘܠܽܐܘܪܺܫܠܶܡ ܡܣܰܒܪܳܢܳܐ ܐܶܬܶܠ.
28 ܚܳܪܶܬ ܘܠܰܝܬ ܐ̱ܢܳܫ ܕܡܶܬܪܰܥܶܐ ܥܰܠ ܗܳܠܶܝܢ: ܕܶܐܫܰܐܶܠ ܐܶܢܽܘܢ: ܘܢܶܬܠܽܘܢ ܠܺܝ ܦܶܬܓܳܡܳܐ.
29 ܗܳܐ ܟܽܠܗܽܘܢ ܠܳܐ ܡܶܕܶܡ ܐܶܢܽܘܢ: ܘܰܥܒܳܕܰܝ̈ܗܽܘܢ ܣܪܺܝܩܺܝܢ ܘܪܽܘܚܳܐ ܪܰܝܩܳܢܺܝܬܳܐ ܥܒܳܕܰܝ̈ܗܽܘܢ.