Isaiah 51
The Book of Isaiah
܀ ܐܫܥܝܐ ܢܐ ܀
1 ܫܽܘܡܥܽܘܢܝ ܕܪܳܗܛܺܝܢ ܒܙܰܕܺܝܩܽܘܬܳܐ: ܘܒܳܥܶܝܢ ܠܡܳܪܝܳܐ. ܚܽܘܪܘ ܠܛܽܘܪܳܐ ܕܶܐܬܓܙܰܪܬܽܘܢ ܡܶܢܶܗ: ܘܰܠܓܽܘܒܳܐ ܕܶܐܬܢܰܩܰܪܬܽܘܢ ܡܶܢܶܗ.
2 ܚܽܘܪܘ ܠܰܐܒܪܳܗܳܡ ܐܰܒܘܟܽܘܢ: ܘܰܠܣܰܪܳܐ ܕܰܒܛܶܢܬܟܽܘܢ ܕܚܰܕ ܗ̱ܘܳܐ: ܘܰܩܪܺܝܬܶܗ: ܘܒܰܪܶܟܬܶܗ: ܘܰܐܣܺܓܝܬܶܗ.
3 ܡܶܛܽܠ ܕܰܒܢܳܐ ܡܳܪܝܳܐ ܠܨܶܗܝܽܘܢ: ܘܰܡܒܰܢܶܐ ܠܟܽܠܗܶܝܢ ܚܰܖ̈ܒܳܬܳܗ̇. ܘܥܳܒܶܕ ܡܰܕܒܪܳܗ̇ ܐܰܝܟ ܥܕܶܢ: ܘܰܦܩܰܥܬܳܗ̇ ܐܰܝܟ ܦܰܪܕܰܝܣܶܗ ܕܡܳܪܝܳܐ. ܕܝܳܨܳܐ ܘܚܰܕܽܘܬܳܐ ܢܶܫܬܡܰܥ ܒܓܰܘܳܗ̇: ܬܰܘܕܺܝܬܳܐ ܘܩܳܠܳܐ ܕܰܙܡܳܪܳܐ.
4 ܫܽܘܡܥܽܘܢܝ ܥܰܡ̈ܡܶܐ: ܘܨܽܘܬܰܝܢܳܢ̈ܝ ܐܶܡ̈ܘܳܬܳܐ. ܡܶܛܽܠ ܕܢܳܡܽܘܣܳܐ ܡ̣ܶܢ ܩܕܳܡܝ ܢܳܦܶܩ ܘܕܺܝܢܝ ܢܽܘܗܪܳܐ ܗ̱ܘ̣ ܠܥܰܡ̈ܡܶܐ.
5 ܩܶܪܒܰܬ ܙܰܕܺܝܩܽܘܬܝ: ܘܰܢܦܰܩ ܦܽܘܪܩܳܢܝ. ܘܒܰܕܪܳܥܝ ܥܰܡ̈ܡܶܐ ܢܶܬܬܕܺܝܢܽܘܢ. ܠܺܝ ܢܣܰܟ̈ܝܳܢ ܓܳܙܖ̈ܳܬܳܐ. ܘܠܰܕܪܳܥܝ ܢܣܰܒܖ̈ܳܢ.
6 ܐܰܪܺܝܡܘ ܥܰܝܢܰܝ̈ܟܽܘܢ ܠܰܫܡܰܝܳܐ: ܘܚܽܘܪܘ ܐܳܦ ܠܬܰܚܬ ܒܰܐܪܥܳܐ. ܡܶܛܽܠ ܕܰܫܡܰܝܳܐ ܐܰܝܟ ܬܶܢܳܢܳܐ ܢܶܥܒܪܽܘܢ: ܘܰܐܪܥܳܐ ܐܰܝܟ ܠܒܽܘܫܳܐ ܬܶܒܠܶܐ. ܘܥܳܡܽܘܖ̈ܶܝܗ̇ ܐܰܟܘܳܬܳܗ̇ ܢܶܗܘܽܘܢ. ܘܦܽܘܪܩܳܢܝ ܠܥܳܠܰܡ ܢܶܗܘܶܐ: ܘܙܰܕܺܝܩܽܘܬܝ ܠܳܐ ܬܶܥܒܰܪ.
7 ܫܽܘܡܥܽܘܢܝ ܝܳܕܥܰܝ̈ ܙܰܕܺܝܩܽܘܬܳܐ: ܥܰܡܳܐ ܕܢܳܡܽܘܣܝ ܒܠܶܒܗܽܘܢ. ܠܳܐ ܬܶܕܚܠܽܘܢ ܡ̣ܶܢ ܚܶܣܕܳܐ ܕܐ̱ܢܳܫܳܐ. ܘܡ̣ܶܢ ܓܽܘܕܳܦܗܽܘܢ ܠܳܐ ܬܽܙܘܥܽܘܢ.
8 ܡܶܛܽܠ ܕܰܐܝܟ ܕܰܠܥܰܡܪܳܐ ܘܰܐܝܟ ܕܠܰܠܒܘܫܳܐ ܢܶܐܟܽܘܠ ܐܶܢܽܘܢ ܣܳܣܳܐ. ܘܙܰܕܺܝܩܽܘܬܝ ܠܥܳܠܰܡ ܬܶܗܘܶܐ. ܘܦܽܘܪܩܳܢܝ ܠܕܳܪܕܳܖ̈ܺܝܢ.
9 ܐܶܬܬܥܺܝܪܝ: ܐܶܬܬܥܺܝܪܝ: ܘܰܠܒܰܫܝ ܥܽܘܫܢܳܐ ܕܰܕܪܳܥܶܗ ܕܡܳܪܝܳܐ. ܐܶܬܬܥܺܝܪܝ ܐܰܝܟ ܕܰܒܝܰܘ̈ܡܳܬܳܐ ܩܰܕܡܳܝ̈ܶܐ: ܘܰܐܝܟ ܕܳܖ̈ܶܐ ܕܡ̣ܶܢ ܥܳܠܡܺܝܢ. ܐܰܢ̱ܬܝ ܐܰܢ̱ܬܝ ܕܰܦܣܰܩܬܝ ܦܣܳܩܳܐ ܪܰܒܳܐ: ܘܰܩܛܰܠܬܝ ܠܬܰܢܺܝܢܳܐ.
10 ܐܰܢ̱ܬܝ ܗ̄ܝ ܕܰܐܚܪܶܒܬܝ ܝܰܡܳܐ: ܘܡܰܝ̈ܳܐ ܕܰܬܗܽܘܡܳܐ ܪܰܒܳܐ. ܘܰܒܥܽܘܡܩܳܐ ܕܡܰܝ̈ܳܐ ܥܒܰܕܬܝ ܐܽܘܪܚܳܐ. ܕܢܶܥܒܪܽܘܢ ܦܖ̈ܺܝܩܶܐ ܦܖ̈ܺܝܩܰܘܗܝ ܕܡܳܪܝܳܐ.
11 ܘܢܶܗܦܟܽܘܢ ܘܢܶܥܠܽܘܢ ܠܨܶܗܝܽܘܢ ܒܫܽܘܒܚܳܐ. ܘܰܠܥܳܠܡܺܝܢ ܬܶܗܘܶܐ ܚܰܕܽܘܬܳܐ ܥܰܠ ܖ̈ܺܝܫܰܝܗܽܘܢ. ܒܽܘܣܳܡܳܐ ܘܚܰܕܽܘܬܳܐ ܢܰܕܪܟܽܘܢ. ܘܢܶܥܪܩܽܘܢ ܕܽܘܘܳܢܳܐ ܘܬܶܢ̈ܚܳܬܳܐ.
12 ܐܶܢܳܐ ܐ̱ܢܳܐ ܡܒܰܝܳܐܢܟܽܘܢ ܐܳܡܰܪ ܡܳܪܝܳܐ. ܡܰܢ ܐܰܢ̱ܬܝ ܕܰܕܚܶܠܬܝ ܡ̣ܶܢ ܐ̱ܢܳܫܳܐ ܕܡܳܐܶܬ: ܘܡ̣ܶܢ ܒܰܪܢܳܫܳܐ ܕܰܐܝܟ ܥܳܡܺܝܪܳܐ ܝܳܒܶܫ.
13 ܘܰܛܥܰܝܬܝ ܠܡܳܪܝܳܐ ܕܥܰܒܕܰܟܝ. ܕܰܡܬܰܚ ܫܡܰܝܳܐ: ܘܰܐܬܩܶܢ ܫܶܬܶܐܣܶܝ̈ܗ̇ ܕܰܐܪܥܳܐ. ܘܰܕܚܶܠܬܝ ܐܰܡܺܝܢܳܐܺܝܬ ܟܽܠܝܽܘܡ ܡ̣ܶܢ ܩܕܳܐ ܚܶܡܬܶܗ ܕܳܐܠܽܘܨܳܐ: ܕܰܡܛܰܝܰܒ ܗ̱ܘܳܐ ܠܰܡܚܰܒܳܠܽܘ ܐܰܝܟܳܐ ܗ̱ܝ ܚܶܡܬܶܗ ܕܳܐܠܽܘܨܳܐ.
14 ܕܰܡܣܰܪܗܶܒ ܗ̱ܘܳܐ ܥܰܫܺܝܢ̈ܶܐ ܠܰܡܚܰܒܳܠܽܘ ܠܳܐ ܢܡܽܘܬܽܘܢ ܠܰܚܒܳܠܳܐ. ܘܠܳܐ ܢܶܚܣܰܪ ܠܰܚܡܶܗ.
15 ܐܶܢܳܐ ܐ̱ܢܳܐ ܡܳܪܝܳܐ ܐܰܠܳܗܶܟܝ ܕܟܳܐܶܐ ܒܝܰܡܳܐ ܘܫܳܠܶܝܢ ܓܰܠܠܰܘ̈ܗܝ ܡܳܪܝܳܐ ܚܰܝܠܬܳܢܳܐ ܫܡܶܗ.
16 ܕܣܳܡܶܬ ܡܶܠܰܝ̈ ܒܦܽܘܡܶܟܝ. ܘܰܒܛܶܠܳܠܳܐ ܕܺܐܝܕܝ ܟܰܣܺܝܬܶܟܝ ܒܗܳܝ ܕܡܶܬܚܶܬ ܫܡܰܝܳܐ: ܘܰܐܬܩܢܶܬ ܫܶܬܶܐܣܶܝ̈ܗ̇ ܕܰܐܪܥܳܐ: ܘܶܐܡܪܶܬ ܠܨܶܗܝܽܘܢ ܕܥܰܡܝ ܐܰܢ̱ܬܝ.
17 ܐܶܬܬܥܺܝܪܝ: ܐܶܬܬܥܺܝܪܝ: ܘܩܽܘܡܝ ܐܽܘܪܺܫܠܶܡ ܕܶܐܫܬܺܝܬܝ ܡ̣ܶܢ ܐܺܝܕܶܗ ܕܡܳܪܝܳܐ ܟܳܣܳܐ ܕܪܽܘܓܙܶܗ ܘܶܐܫܬܺܝܬܝ ܘܰܐܡܨܺܝܬܝ ܟܳܣܳܐ ܕܪܶܥܠܳܐ.
18 ܘܠܰܝܬ ܕܰܡܒܰܝܰܐ ܠܳܗ̇ ܡ̣ܶܢ ܟܽܠܗܽܘܢ ܒܢܰܝ̈ܳܐ ܕܝܶܠܕܰܬ. ܘܠܰܝܬ ܕܳܐܚܶܕ ܒܺܐܝܕܳܗ̇ ܘܰܡܩܺܝܡ ܠܳܗ̇: ܡ̣ܶܢ ܟܽܠܗܽܘܢ ܒܢܰܝ̈ܳܐ ܕܪܰܒܝܰܬ.
19 ܬܰܪܬܶܝܢ ܐܶܢܶܝܢ ܡܰܛ̈ܝܶܟܝ ܠܡܰܢ ܬܶܟܪܶܐ ܥܠܰܟܝ ܒܶܙܬܳܐ ܘܰܬܒܳܪܳܐ: ܘܟܰܦܢܳܐ ܘܚܰܪܒܳܐ ܡܰܢ ܢܒܰܝܐܶܟܝ.
20 ܒܢܰܝ̈ܟܝ ܬܰܘܺܝܪܺܝܢ: ܘܕܳܡܟܺܝܢ ܒܪܺܝܫ ܟܽܠܗܽܘܢ ܫܽܘ̈ܩܶܐ: ܐܰܝܟ ܣܶܠܩܳܐ ܕܰܟܡܺܝܕ. ܘܰܡܠܶܝܢ ܪܽܘܓܙܶܗ ܕܡܳܪܝܳܐ: ܘܰܟܐܳܬܶܗ ܕܰܐܠܳܗܶܟܝ.
21 ܡܶܛܽܠ ܗܳܢܳܐ ܫܡܰܥܝ ܗܳܠܶܝܢ ܡܡܰܟܰܟܬܳܐ: ܕܪܰܘܝܳܐ ܠܳܐ ܡ̣ܶܢ ܚܰܡܪܳܐ.
22 ܗܳܟܰܢܳܐ ܐܳܡܰܪ ܡܳܪܶܟܝ ܡܳܪܝܳܐ: ܘܰܐܠܳܗܶܟܝ ܢܕܽܘܢ ܠܥܰܡܶܗ. ܗܳܐ ܢܶܣܒܶܬ ܡ̣ܶܢ ܐܺܝܕܰܝ̈ܟܝ ܟܳܣܳܐ ܕܰܪܥܳܠܳܐ. ܘܟܳܣܳܐ ܕܪܽܘܓܙܝ ܠܳܐ ܬܰܘܣܦܺܝܢ ܬܽܘܒ ܠܡܶܫܬܝܶܗ.
23 ܘܶܐܣܺܝܡܺܝܘܗܝ ܒܝܰܕ ܡܡܰܟܟܳܢܰܝ̈ܟܝ ܕܶܐܡܰܪܘ ܠܢܰܦܫܶܟܝ ܐܶܬܡܰܟܰܟܝ: ܘܢܶܥܒܰܪ. ܘܰܥܒܰܕܬܝ ܠܥܰܡܶܟܝ ܐܰܝܟ ܐܰܪܥܳܐ: ܘܰܐܝܟ ܫܽܘܩܳܐ ܠܰܕܥܳܒܪܺܝܢ.