Isaiah 3
The Book of Isaiah
܀ ܐܫܥܝܐ ܓ ܀
1 ܡܶܛܽܠ ܕܗܳܐ ܡܳܪܶܐ ܡܳܖ̈ܰܘܳܬܳܐ: ܡܰܥܒܰܪ ܡܶܢ ܐܽܘܪܺܫܠܶܡ: ܘܡ̣ܶܢ ܝܺܗܽܘܕܳܐ: ܣܳܡܽܘܟܳܐ ܘܣܳܡܽܘܟܬܳܐ: ܟܽܠ ܕܣܳܡܶܟ ܒܠܰܚܡܳܐ: ܘܟܽܠ ܕܣܳܡܶܟ ܒܡܰܝ̈ܳܐ.
2 ܘܓܰܢ̱ܒܳܪܳܐ ܘܓܰܒܪܳܐ ܩܪܰܒܬܳܢܳܐ: ܘܕܰܝܳܢܳܐ ܘܰܢܒܺܝܳܐ ܘܩܳܨܽܘܳܡܳܐ ܘܩܰܫܺܝܫܳܐ.
3 ܘܪܺܝܫ ܚܰܡܫܺܝܢ: ܘܰܗܕܺܝܪ ܐܰܦ̈ܶܐ: ܘܡܳܠܽܘܟܳܐ ܘܚܰܟܺܝܡ ܢܰܓܳܖ̈ܶܐ: ܘܰܕܡܶܬܒܰܝܰܢ ܒܡܶܠܟܳܐ.
4 ܘܰܐܩܺܝܡ ܥܠܰܝ̈ܡܶܐ ܪܰܘܖ̈ܒܳܢܰܝܗܽܘܢ: ܘܰܡܒܰܙܚܳܢ̈ܶܐ ܢܶܫܬܰܠܛܽܘܢ ܒܗܽܘܢ.
5 ܘܢܶܦܶܠ ܥܰܡܳܐ ܓܒܰܪ ܒܰܓܒܰܪ: ܓܰܒܪܳܐ ܒܚܰܒܪܶܗ. ܘܢܶܬܓܰܪܽܘܢ ܥܠܰܝ̈ܡܶܐ ܥܰܠ ܣܳܒ̈ܶܐ: ܘܰܡܨܰܥܖ̈ܶܐ ܥܰܠ ܡܝܰܩܖ̈ܶܐ.
6 ܡܶܛܽܠ ܕܢܶܐܚܽܘܕ ܓܰܒܪܳܐ ܓܒܰܪ ܠܰܐܚܽܘܗܝ ܡ̣ܶܢ ܒܶܝܬ ܐܰܒܽܘܗܝ: ܘܢܺܐܡܰܪ ܠܶܗ: ܢܰܚ̈ܬ݁ܶܐ ܐܺܝܬ ܠܳܟ. ܗܘܺܝ ܠܰܢ ܫܰܠܺܝܛܳܐ. ܘܬܽܘܩܠܬܳܐ ܗܳܕܶܐ ܬܚܶܝܬ ܐܺܝܕܳܟ.
7 ܘܢܶܥܢܶܐ ܒܝܰܘܡܳܐ ܗܰܘ: ܘܢܺܐܡܰܪ: ܠܳܐ ܗܳܘܶܐ ܐ̱ܢܳܐ ܪܺܝܫܳܐ. ܕܰܒܒܰܝܬ݁ܝ ܠܰܝܬ݁ ܠܰܚܡܳܐ: ܘܳܐܦܠܳܐ ܬܰܟܣܺܝܬܳܐ. ܠܳܐ ܬܶܥܒܕܽܘܢܳܢܝ ܫܰܠܺܝ̈ܛܳܐ ܥܰܠ ܥܰܡܳܐ.
8 ܡܶܛܽܠ ܕܶܐܬ݁ܬܰܩܠܰܬ ܐܽܘܪܺܫܠܶܡ: ܘܺܝܗܽܘܕܳܐ ܢܦܰܠ. ܡܶܛܽܠ ܕܠܶܫܳܢܗܽܘܢ ܘܰܥܒܳܕ ܐܺܝܕܰܝ̈ܗܽܘܢ ܡܰܪܡܰܪܘ ܩܕܳܡ ܡܳܪܝܳܐ: ܘܠܰܥܢܳܢܳܐ ܕܺܐܝܩܳܪܶܗ.
9 ܡܰܣܰܒ ܒܰܐܦܰܝ̈ܗܽܘܢ ܣܳܗܶܕ ܒܗܽܘܢ. ܘܰܚܛܳܗܰܝ̈ܗܽܘܢ ܐܰܝܟ ܣܕܽܘܡ ܚܰܘܺܝܘ: ܘܠܳܐ ܐܶܬ݁ܬ݁ܟܶܣܘ ܘܳܝ ܠܢܰܦܫܗܽܘܢ: ܕܰܐܪܡܺܝܘ ܠܗܽܘܢ ܚܽܘ̈ܒܠܶܐ ܒܺܝ̈ܫܶܐ.
10 ܐܶܡܰܪܘ ܠܙܰܕܺܝܩܳܐ ܛܳܒ: ܡܶܛܽܠ ܗܳܢܳܐ ܦܺܐܖ̈ܰܝ ܥܒܳܕܰܝ̈ܗܽܘܢ ܢܶܐܟܠܽܘܢ.
11 ܘܳܝ ܠܪܰܫܺܝܥܳܐ ܒܺܝܫܳܐ: ܡܶܛܽܠ ܕܰܥܒܳܕ ܐܺܝܕܰܘ̈ܗܝ ܡܶܬܦܪܰܥ.
12 ܫܰܠܺܝ̈ܛܰܘܗܝ ܕܥܰܡܝ ܡܒܰܥܪܺܝܢ ܠܶܗ. ܘܢܶܫ̈ܶܐ ܐܶܫܬܰܠܰܛ ܒܶܗ ܥܰܡܝ ܡܰܛܐܒܳܢܰܝ̈ܟ ܐܰܛܥܝܽܘܟ. ܐܘܪܚܳܐ ܕܰܫܒܺܝ̈ܠܰܝܟ ܕܰܠܰܚܘ.
13 ܩܳܐܶܡ ܠܰܡܕܳܢ ܡܳܪܝܳܐ: ܘܩܳܐܶܡ ܠܰܡܕܳܢ ܠܥܰܡܶܗ.
14 ܡܳܪܝܳܐ ܒܕܺܝܢܳܐ ܢܶܥܽܘܠ: ܘܥܰܡ ܣܳܒ̈ܶܐ ܕܥܰܡܶܗ: ܘܥܰܡ ܪܰܘܖ̈ܒܳܢܰܘܗܝ. ܐܰܢ̱ܬ݁ܽܘܢ ܐܰܘܩܶܕܬ݁ܽܘܢ ܟܰܪܡܳܐ. ܘܰܚܛܽܘܦܝܳܐ ܕܡܶܣ̈ܟܺܢܶܐ ܒܒܳܬܰܝ̈ܟܽܘܢ.
15 ܠܡܳܢܳܐ ܢܟܰܝܬ݁ܽܘܢ ܠܥܰܡܝ: ܘܰܐܦ̈ܶܐ ܕܡܶܣܟܺܢ̈ܶܐ ܐܰܒܗܶܬ݁ܬ݁ܽܘܢ: ܐܳܡܰܪ ܡܳܪܝܳܐ ܚܰܝܠܬܳܢܳܐ.
16 ܥܰܠ ܕܶܐܬ݁ܬ݁ܪܺܝܡ ܒ̈ܢܳܬ ܨܶܗܝܽܘܢ: ܘܗܰܠܶܟ ܒܨܰܘܪܳܐ ܪܳܡܳܐ. ܘܰܒܪܶܡܙܳܐ ܕܥܰܝ̈ܢܶܐ ܡܗܰܠ̈ܟܳܢ ܗ̱ܘܰܝ̈. ܘܰܡܛܰܖ̈ܦܳܢ ܒܖ̈ܶܓܠܰܝܗܶܝܢ: ܘܡܰܖ̈ܓܙܳܢ ܠܡܳܪܝܳܐ.
17 ܢܡܰܟܶܟ ܡܳܪܝܳܐ ܖ̈ܺܝܫܳܝܳܬܳܐ ܕܰܒ̈ܢܳܬ ܨܶܗܝܽܘܢ. ܘܡܳܪܝܳܐ ܐܶܣܟܺܝܡܰܝ̈ܗܶܝܢ ܢܦܰܪܣܶܐ.
18 ܒܝܰܘܡܳܐ ܗܰܘ: ܢܰܥܒܰܪ ܡܳܪܝܳܐ ܫܽܘܒܚܳܐ ܕܢܰܚܬܰܝ̈ܗܶܝܢ. ܘܰܕܨܶܒܬ݁ܗܶܝܢ: ܘܕܰܓܕܽܘܠܰܝ̈ܗܶܝܢ.
19 ܘܶܐܣܦܺܝܖ̈ܶܐ ܕܣܰܥܖ̈ܰܝܗܶܝܢ: ܘܒܶܠܽܘܖ̈ܰܝܗܶܝܢ: ܘܨܶܕܥܰܝ̈ܗܶܝܢ.
20 ܘܨܶܒܬܳܐ ܕܰܐܦܰܝ̈ܗܶܝܢ: ܘܰܩܕܳܫܰܝ̈ܗܶܝܢ: ܘܥܶܩܰܝ̈ܗܶܝܢ.
21 ܘܰܐܩ̈ܠܳܢܝܗܶܝܢ: ܘܩܽܘܠܒܰܝ̈ܗܶܝܢ: ܘܫܺܐܖ̈ܰܝܗܶܝܢ.
22 ܘܟܽܘܬ݁ܺܝܢ̈ܝܳܬܗܶܝܢ: ܘܰܡܫܰܠܡܳܢ̈ܝܳܬܗܶܝܢ: ܘܒܽܘܨܗܶܝܢ: ܘܰܐܖ̈ܓܘܳܢܰܝܗܶܝܢ.
23 ܘܢܰܚܬܰܝ̈ܗܶܝܢ: ܘܬܶܟ̈ܠܝܳܬܗܶܝܢ: ܘܰܙܚܽܘܖ̈ܝܳܬܗܶܝܢ: ܘܨܶܡܕܳܐ ܟܽܠܶܗ ܕܨܶܒܬ݁ܗܶܝܢ.
24 ܘܢܶܗܘܶܐ ܚܶܠܳܐ ܚܠܳܦ ܪܺܝܚܗܶܝܢ ܒܰܣܺܝܡܳܐ. ܘܰܚܠܳܦ ܐܰܣܳܪ ܚܰܨܰܝ̈ܗܶܝܢ ܡܺܝܙܖ̈ܳܢܶܐ ܢܺܐܣܖ̈ܳܢ. ܘܰܚܠܳܦ ܒܶܠܽܘܖ̈ܶܐ: ܩܽܘ̈ܕܚܳܬܳܐ. ܘܰܚܠܳܦ ܬܶܟܠ̈ܝܳܬܗܶܝܢ: ܣܰܩ̈ܶܐ ܢܶܬܟܰܣ̈ܝܳܢ. ܡܶܛܽܠ ܕܢܶܬܚܰܒܰܠ ܫܽܘܦܪܗܶܝܢ.
25 ܘܥܰܫܺܝܢܰܝ̈ܟܝ ܒܚܰܪܒܳܐ ܢܶܦܠܽܘܢ: ܘܓܰܢ̱ܒܳܖ̈ܰܝܟܝ ܒܰܩܪܳܒܳܐ.
26 ܘܢܺܐܠܽܘܢ: ܘܢܶܬ݁ܒܽܘܢ ܒܶܐܒܠܳܐ ܬܰܖ̈ܥܶܝܗ̇. ܘܙܳܟܽܘܬܳܗ̇ ܒܰܐܪܥܳܐ ܬܶܦܶܠ.