Isaiah 6
The Book of Isaiah
܀ ܐܫܥܝܐ ܘ ܀
1 ܒܫܰܢ̱ܬܳܐ ܕܡܺܝܬ ܥܽܘܙܺܝܳܐ ܡܰܠܟܳܐ: ܚܙܺܝܬ ܠܡܳܪܝܳܐ ܝܳܬ݁ܶܒ ܥܰܠ ܟܽܘܪܣܝܳܐ ܪܳܡܳܐ. ܘܫܶܩܠܳܐ ܕܰܫܦܽܘܠܰܘ̈ܗܝ ܡܠܶܐ ܗܰܝܟܠܶܗ.
2 ܘܰܣܖ̈ܳܦܺܝܢ ܩܳܝܡܺܝܢ ܠܥܶܠ ܡܶܢܶܗ: ܫܬܳܐ ܫܬܳܐ ܓܶܦܺܝ̈ܢ ܠܚܰܕ ܡܶܢܗܽܘܢ. ܒܰܬܪܶܝܢ ܡܟܰܣܶܝܢ ܦܰܪܨܽܘܦܶܗ: ܘܒܰܬܪܶܝܢ ܡܟܰܣܶܝܢ ܖ̈ܶܓܠܰܘܗܝ: ܘܒܰܬܪܶܝܢ ܦܳܪܚܺܝܢ.
3 ܘܩܳܪܶܝܢ ܗܳܢܳܐ ܠܗܳܢܳܐ: ܘܳܐܡܪܺܝܢ: ܩܰܕܺܝܫ: ܩܰܕܺܝܫ: ܩܰܕܺܝܫ: ܡܳܪܝܳܐ ܚܰܝܠܬܳܢܳܐ: ܕܡܰܠܝܳܐ ܟܽܠܳܗ̇ ܐܰܪܥܳܐ ܬܶܫ̈ܒܚܳܬܶܗ.
4 ܘܙܳܥ ܐܶܣܟ̈ܦܳܬܳܐ ܕܬܰܖ̈ܥܶܐ ܡ̣ܶܢ ܩܳܠܳܐ ܕܩܳܪܶܐ: ܘܒܰܝܬܳܐ ܐܶܬܡܠܺܝ ܬܶܢܳܢܳܐ.
5 ܘܶܐܡ̇ܪܶܬ ܘܳܝ ܠܺܝ ܕܬܰܘܺܝܪ ܐ̱ܢܳܐ: ܡܶܛܽܠ ܕܓܰܒܪܳܐ ܐ̱ܢܳܐ ܛܡܰܐ ܣܶܦ̈ܘܳܬܳܐ: ܘܒܰܝܢܳܬ ܥܰܡܳܐ ܕܛܰܡ̈ܳܐܰܢ ܣܶܦ̈ܘܳܬܶܗ ܥܳܡܰܪ ܐ̱ܢܳܐ. ܘܰܠܡܰܠܟܳܐ ܡܳܪܝܳܐ ܚܰܝܠܬܳܢܳܐ ܚܙܰܝ̈ ܥܰܝ̈ܢܰܝ.
6 ܘܰܦܪܰܚ ܠܘܳܬܝ ܚܰܕ ܡ̣ܶܢ ܣܖ̈ܳܦܺܝܢ: ܘܒܺܐܝܕܶܗ ܓܡܽܘܪܬܳܐ ܫܩܰܠ ܡ̣ܶܢ ܡܰܕܒܚܳܐ: ܒܟܰܠܒܬܳܐ.
7 ܘܩܰܪܶܒ ܠܦܽܘܡܝ: ܘܶܐܡܰܪ ܠܺܝ: ܗܳܐ ܩܶܪܒܰܬ ܗܳܕܶܐ ܠܣܶܦ̈ܘܳܬܳܟ: ܕܢܶܥܒܰܪ ܥܰܘܠܳܟ: ܘܰܚܛܳܗܰܝ̈ܟ ܢܶܫܬܰܒܩܽܘܢ.
8 ܘܫܶܡܥܶܬ ܩܳܠܶܗ ܕܡܳܪܝܳܐ ܕܳܐܡܰܪ: ܠܡܰܢ ܐܶܫܰܕܰܪ: ܘܡܰܢ ܢܺܐܙܰܠ. ܘܶܐܡ̇ܪܶܬ ܗܳܐ ܐܶܢܳܐ ܫܰܕܰܪܰܝܢܝ.
9 ܘܶܐܡܰܪ ܠܺܝ: ܙܶܠ ܐܶܡܰܪ ܠܥܰܡܳܐ ܗܳܢܳܐ: ܫܡܰܥܘ ܡܶܫܡܰܥ: ܘܠܳܐ ܬܶܣܬܰ̇ܟܠܽܘܢ ܘܰܚܙܰܘ ܡܶܚܙܳܐ: ܘܠܳܐ ܬܶܕܥܽܘܢ.
10 ܐܶܬܥܰܒܺܝ ܠܶܗ ܓܶܝܪ ܠܶܒܶܗ ܕܥܰܡܳܐ ܗܳܢܳܐ: ܘܶܐܕܢܰܘ̈ܗܝ ܐܰܘܩܰܪ: ܘܥܰܝܢܰܘ̈ܗܝ ܫܳܥ. ܕܠܳܐ ܢܶܚܙܶܐ ܒܥܰܝܢܰܘ̈ܗܝ: ܘܢܶܫܡܰܥ ܒܶܐܕܢܰܘ̈ܗܝ: ܘܢܶܣܬܰܟܰܠ ܒܠܶܒܶܗ: ܘܰܢܬܽܘܒ ܘܢܶܫܬܒܶܩ ܠܶܗ.
11 ܘܶܐܡܪܶܬ ܥܕܰܡܳܐ ܠܐܶܡܰܬܝ ܡܳܪܝܳܐ: ܘܶܐܡܰܪ ܥܕܰܡܳܐ ܕܢܶܚܖ̈ܒܳܢ ܩܽܘܖ̈ܝܳܐ ܡ̣ܶܢ ܒܠܰܝ ܕܝܳܬ݁ܶܒ: ܘܒ̈ܳܬ݁ܶܐ ܡ̣ܶܢ ܒܠܰܝ ܐ̱ܢܳܫܳܐ: ܘܰܐܪܥܳܐ ܬܶܚܪܰܒ ܘܬܶܨܕܶܐ.
12 ܘܢܶܕܚܽܘܩ ܡܳܪܝܳܐ ܠܐ̱ܢܳܫܳܐ: ܘܬܶܣܓܶܐ ܫܒܺܝܩܽܘܬܳܐ ܒܓܰܘܳܗ̇ ܕܰܐܪܥܳܐ.
13 ܘܰܕܦܳܝܫܺܝܢ ܒܳܗ̇ ܚܰܕ ܡ̣ܶܢ ܥܶܣܪܳܐ: ܘܰܬ݁ܬܽܘܒ: ܘܬܶܗܘܶܐ ܠܝܰܩܕܳܢܳܐ: ܐܰܝܟ ܒܶܛܡ̱ܬܳܐ ܘܰܐܝܟ ܒܰܠܽܘܛܳܐ ܕܰܢܦܰܠ ܡ̣ܶܢ ܩܥܳܪܬ݁ܶܗ. ܘܙܰܪܥܳܐ ܗ̱ܘ̣ ܩܰܕ݁ܺܝܫܳܐ ܢܶܨܒܬܶܗ.