Isaiah 45
The Book of Isaiah
܀ ܐܫܥܝܐ ܡܗ ܀
1 ܗܳܟܰܢܳܐ ܐܳܡܰܪ ܡܳܪܝܳܐ ܠܰܡܫܺܝܚܶܗ: ܠܟܽܘܪܶܫ ܕܶܐܚܕܶܬ ܒܝܰܡܺܝܢܶܗ. ܢܶܫܬܰܥܒܕܽܘܢ ܩܕܳܡܰܘܗܝ ܥܰܡ̈ܡܶܐ. ܘܚܰܨܳܐ ܕܡܰܠ̈ܟܶܐ ܐܶܫܰܪܶܐ ܠܡܶܦܬܰܚ ܩܕܳܡܰܘܗܝ ܬܰܖ̈ܥܶܐ: ܘܬܰܖ̈ܥܶܐ ܠܳܐ ܢܶܬܬܰܚܕܽܘܢ.
2 ܐܶܢܳܐ ܩܕܳܡܰܝܟ ܐܶܙܰܠ. ܘܥܰܪܡܳܐ ܐܶܫܰܦܶܐ. ܬܰܖ̈ܥܶܐ ܕܰܢܚܳܫܳܐ ܐܶܬܰܒܰܪ. ܘܡܽܘܟ̈ܠܶܐ ܕܦܰܪܙܠܳܐ ܐܶܓܰܕܶܡ.
3 ܘܶܐܬܶܠ ܠܳܟ ܣܺܝ̈ܡܳܬܳܐ ܕܰܒܚܶܫܽܘܟܳܐ: ܘܰܛܡܺܝܖ̈ܳܬܳܐ ܡܣܰܬܖ̈ܳܬܳܐ. ܕܬܶܕܰܥ ܕܶܐܢܳܐ ܐ̱ܢܳܐ ܡܳܪܝܳܐ ܕܰܩܪܺܝܬܳܟ ܒܰܫܡܳܟ: ܐܰܠܳܗܶܗ ܕܺܝܣܪܳܐܶܝܠ.
4 ܡܶܛܽܠ ܥܰܒܕܰܝ ܝܰܥܩܽܘܒ: ܘܺܝܣܪܳܐܶܝܠ ܓܰܒܝ: ܩܪܺܝܬܳܟ ܒܰܫܡܳܟ ܘܟܰܢܺܝܬܳܟ: ܘܠܳܐ ܝܺܕܰܥܬܳܢܝ.
5 ܐܶܢܳܐ ܐ̱ܢܳܐ ܡܳܪܝܳܐ: ܘܠܰܝܬ ܬܽܘܒ ܠܒܰܪ ܡܶܢܝ: ܘܠܰܝܬ ܐܰܠܳܗ. ܐܰܥܫܶܢܬܳܟ: ܘܠܳܐ ܝܺܕܰܥܬܳܢܝ.
6 ܕܢܶܕܥܽܘܢ ܡ̣ܶܢ ܡܰܕܢܳܚܰܝ̈ ܫܶܡܫܳܐ. ܘܡ̣ܶܢ ܡܰܥܖ̈ܳܒܰܘܗܝ: ܕܠܰܝܬ ܠܒܰܪ ܡܶܢܝ. ܐܶܢܳܐ ܐ̱ܢܳܐ ܡܳܪܝܳܐ ܘܠܰܝܬ ܬܽܘܒ.
7 ܕܰܓܒܰܠ ܢܽܘܗܪܳܐ: ܘܰܒܪܳܐ ܚܶܫܽܘܟܳܐ. ܥܒܰܕ ܫܠܳܡܳܐ: ܘܰܒܪܳܐ ܒܺܝܫܬܳܐ ܐܶܢܳܐ ܐ̱ܢܳܐ ܡܳܪܝܳܐ ܕܥܶܒܕܶܬ ܗܳܠܶܝܢ ܟܽܠܗܶܝܢ.
8 ܐܶܬܒܰܣܰܡܘ ܫܡܰܝܳܐ ܡ̣ܶܢ ܠܥܶܠ ܘܰܥܢܳܢ̈ܶܐ ܢܶܖ̈ܣܳܢ ܙܰܕܺܝܩܽܘܬܳܐ. ܬܶܬܦܬܰܚ ܐܰܪܥܳܐ: ܘܢܶܣܓܶܐ ܦܽܘܪܩܳܢܳܐ. ܘܙܰܕܺܝܩܽܘܬܳܐ ܬܶܫܘܰܚ ܐܰܟܚܕܳܐ. ܐܶܢܳܐ ܐ̱ܢܳܐ ܡܳܪܝܳܐ ܕܰܒܪܺܝܬ ܗܳܠܶܝܢ.
9 ܘܳܝ ܠܰܕܕܳܐܶܢ ܥܰܡ ܓܳܒܽܘܠܶܗ: ܚܶܨܦܳܐ ܡ̣ܶܢ ܚܶܨܦܶܝ̈ܗ̇ ܕܰܐܪܥܳܐ ܕܰܠܡܳܐ ܐܳܡܰܪ ܛܺܝܢܳܐ ܠܦܰܚܳܪܳܐ ܡܳܢܳܐ ܥܳܒܶܕ ܐܰܢ̱ܬ. ܘܠܳܐ ܗܘܺܝܬ ܥܒܳܕܳܐ ܕܺܐܝܕܰܝ̈ܟ.
10 ܘܳܝ ܠܰܕܐܳܡܰܪ ܠܰܐܒܳܐ: ܡܳܢܳܐ ܡܰܘܠܶܕ ܐܰܢ̱ܬ ܘܠܰܐܢ̱ܬܬܳܐ: ܕܡܳܢܳܐ ܒܳܛܢܰܬܝ.
11 ܗܳܟܰܢܳܐ ܐܳܡܰܪ ܡܳܪܝܳܐ ܩܰܕܺܝܫܳܐ ܕܺܝܣܪܳܐܶܝܠ ܘܓܳܒܽܘܠܶܗ. ܡܳܪܝܳܐ ܚܰܝܠܬܳܢܳܐ ܫܡܶܗ. ܫܰܐܠܽܘܢܝ ܐܳܬܘ̈ܳܬܳܐ ܥܰܠ ܒܢܰܝ̈. ܘܥܰܠ ܥܒܳܕ ܐܺܝܕܰܝ̈ ܦܽܘܩܕܽܘܢܝ.
12 ܐܶܢܳܐ ܥܶܒܕܶܬ ܐܰܪܥܳܐ: ܘܒܰܪܢܳܫܳܐ ܥܠܶܝܗ̇ ܐܶܢܳܐ ܒܺܐܝܕܰܝ̈ ܡܶܬܚܶܬ ܫܡܰܝܳܐ. ܘܦܶܩܕܶܬ ܠܟܽܠܶܗ ܚܰܝܠܗܽܘܢ.
13 ܐܶܢܳܐ ܐܰܥܺܝܪܬܶܗ ܒܙܰܕܺܝܩܽܘܬܳܐ ܘܟܽܠܗܶܝܢ ܐܽܘܖ̈ܚܳܬܶܗ ܐܶܫܰܦܶܐ. ܗܽܘ ܢܶܒܢܶܐ ܩܪܺܝܬܝ ܘܰܫܒܺܝܬܝ ܢܫܰܕܰܪ ܠܳܐ ܒܰܕܡܰܝ̈ܳܐ: ܘܠܳܐ ܒܫܽܘܚܕܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ.
14 ܗܳܟܰܢܳܐ ܐܳܡܰܪ ܡܳܪܝܳܐ: ܠܐܶܘܬܳܗ̇ ܕܡܶܨܪܶܝܢ: ܬܰܓܳܖ̈ܶܐ ܕܟܽܘܫ ܘܕܰܫܒܳܐ. ܓܰܒܖ̈ܶܐ ܕܰܡܫܽܘܚܬܳܐ ܥܠܰܝܟܝ ܢܶܥܒܪܽܘܢ. ܘܕܺܝܠܶܟܝ ܢܶܗܘܽܘܢ: ܘܒܬܰܪܶܟܝ ܢܺܐܙܽܠ̄ܘܢ. ܘܰܒܫܺܫ̈ܠܳܬܳܐ ܢܶܥܒܪܽܘܢ. ܘܠܶܟܝ ܢܶܣܓܕܽܘܢ. ܘܒܶܟܝ ܢܨܰܠܽܘܢ ܕܒܶܟܝ ܗ̱ܘ̣ ܐܰܠܳܗܳܐ: ܘܠܰܝܬ ܬܽܘܒ ܐܰܠܳܗ ܐ̱ܚܪܺܝܢ.
15 ܫܰܪܪܝܪܳܐܺܝܬ ܐܰܢ̱ܬ ܗ̱ܘ̣ ܡܣܰܬܪܳܐ: ܐܰܠܳܗܶܗ ܕܺܝܣܪܳܐܶܝܠ ܘܦܳܪܽܘܩܶܗ.
16 ܒܗܶܬܘ ܘܰܐܚܦܰܪܘ ܟܽܠܗܽܘܢ ܐܰܟܚܕܳܐ. ܕܰܡܗܰܠܟܺܝܢ ܒܚܶܦܪܳܐ: ܘܓܳܠܦܺܝܢ ܦܬܰܟܖ̈ܶܐ.
17 ܦܽܘܪܩܳܢܶܗ ܕܺܝܣܪܳܐܶܝܠ ܒܡܳܪܝܳܐ ܗ̱ܘ̣ ܦܳܪܽܘܩܳܐ ܕܥܳܠ̈ܡܶܐ ܠܳܐ ܬܶܒܗܬܽܘܢ: ܘܠܳܐ ܬܰܚܦܪܽܘܢ ܠܥܳܠܰܡ ܥܳܠܡܺܝܢ.
18 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ ܕܰܒܪܳܐ ܫܡܰܝܳܐ: ܘܗܽܘܝܽܘ ܐܰܠܳܗܳܐ ܕܰܓܒܰܠ ܐܰܪܥܳܐ: ܘܥܰܒܕܳܗ̇ ܘܗܽܘܝܽܘ ܬܰܩܢܳܗ̇. ܠܳܐ ܗ̱ܘܳܐ ܣܪܺܝܩܳܐܺܝܬ ܒܪܳܗ̇ ܐܶܠܳܐ ܕܬܶܬܶܒ ܒܳܗ̇ ܒܪܺܝܬܶܗ. ܐܶܢܳܐ ܐ̱ܢܳܐ ܡܳܪܝܳܐ ܘܠܰܝܬ ܬܽܘܒ.
19 ܠܳܐ ܗ̱ܘܳܐ ܒܛܽܘܫܝܳܐ ܡܰܠܠܶܬ ܒܰܐܬܪܳܐ ܕܰܐܪܥܳܐ ܚܶܫܽܘܟܬܳܐ: ܘܠܳܐ ܐܶܡܪܶܬ ܠܙܰܪܥܳܐ ܕܝܰܥܩܽܘܒ ܕܰܣܪܺܝܩܳܐܺܝܬ ܒܥܳܐܽܘܢܝ ܕܶܐܢܳܐ ܐ̱ܢܳܐ ܡܳܪܝܳܐ ܕܰܡܡܰܠܶܠ ܐ̱ܢܳܐ ܙܰܕܺܝܩܽܘܬܳܐ: ܘܰܡܚܳܘܶܐ ܐ̱ܢܳܐ ܬܪܺܝܨܽܘܬܳܐ.
20 ܐܶܬܟܰܢܰܫܘ: ܘܬܰܘ: ܘܶܐܬܩܰܪܰܒܘ ܐܰܟܚܕܳܐ: ܐܰܝܠܶܝܢ ܕܡܶܬܦܰܨܶܝܢ ܡ̣ܶܢ ܥܰܡ̈ܡܶܐ. ܘܠܳܐ ܝܺܕܰܥܘ ܕܰܫܩܰܠܘ ܩܰܝܣܳܐ ܓܠܺܝܦܳܐ ܘܨܰܠܺܝܘ ܠܰܐܠܳܗܳܐ ܕܠܳܐ ܦܳܪܶܩ.
21 ܚܰܘܰܘ ܘܰܩܪܽܘܒܘ: ܘܶܐܬܡܰܠܰܟܘ ܐܰܟܚܕܳܐ. ܡܰܢܽܘ ܐܰܫܡܰܥ ܗܳܕܶܐ ܡ̣ܶܢ ܩܕܺܝܡ. ܘܡ̣ܶܢ ܪܺܝܫܺܝܬܳܐ ܐܶܢܳܐ ܐ̱ܢܳܐ ܡܳܪܝܳܐ. ܘܠܰܝܬ ܬܽܘܒ ܐܰܠܳܗ ܠܒܰܪ ܡܶܢܝ. ܐܰܠܳܗܳܐ ܙܰܕܺܝܩܳܐ ܘܦܳܪܽܘܩܳܐ: ܘܠܰܝܬ ܠܒܰܪ ܡܶܢܝ.
22 ܐܶܬܩܰܪܰܒܘ ܠܘܳܬܝ ܟܽܠܟܽܘܢ ܥܶܒܖ̈ܶܝܗ̇ ܕܰܐܪܥܳܐ: ܕܬܶܬܦܰܪܩܽܘܢ ܡܶܛܽܠ ܕܶܐܢܳܐ ܐ̱ܢܳܐ ܡܳܪܝܳܐ: ܘܠܰܝܬ ܬܽܘܒ.
23 ܒܺܝ ܝܺܡܺܝܬ: ܘܢܶܦܩܰܬ ܡ̣ܶܢ ܦܽܘܡܝ ܡܶܠܬܳܐ ܕܙܰܕܺܝܩܽܘܬܳܐ: ܘܠܳܐ ܬܶܗܦܽܘܟ ܕܠܺܝ ܬܶܟܽܘܦ ܟܽܠ ܒܪܽܘܟ ܘܒܺܝ ܢܺܐܡܶܐ ܟܽܠ ܠܶܫܳܢ.
24 ܘܢܺܐܡܪܽܘܢ ܒܡܳܪܝܳܐ ܗ̱ܝ ܙܰܕܺܝܩܽܘܬܳܐ. ܘܥܰܫܺܝ̈ܢܶܐ ܠܘܳܬܶܗ ܢܺܐܙܽܠ̱ܘܢ. ܘܢܶܒܗܬܽܘܢ ܟܽܠ ܕܣܳܩܪܺܝܢ ܠܳܟ.
25 ܒܺܝ ܢܶܫܬܰܒܰܚ ܘܢܶܙܕܰܕܰܩ ܟܽܠܶܗ ܙܰܪܥܶܗ ܕܺܝܣܪܳܐܶܝܠ.