Isaiah 64
The Book of Isaiah
܀ ܐܫܥܝܐ ܣܕ ܀
1 ܠܳܐ ܦܬܰܚܬ ܫܡܰܝܳܐ ܘܰܢܚܶܬܬ ܘܡܢ ܩܕܳܡܰܝܟ ܕܳܠܘ ܛܽܘܖ̈ܶܐ. ܘܶܐܬܦܰܫܰܪܘ ܐܰܝܟ ܕܡܶܬܦܰܫܪܳܐ ܫܥܽܘܬܳܐ ܡ̣ܶܢ ܩܕܳܡ ܢܽܘܪܳܐ.
2 ܘܬܰܘܩܶܕ ܢܽܘܪܳܐ ܠܰܒܥܶܠܕܒܳܒܰܝ̈ܟ. ܘܢܶܬܺܝܕܰܥ ܫܡܳܟ ܠܰܒܥܶܠܕܒܳܒܰܝ̈ܟ. ܘܢܶܬܕܰܠܚܽܘܢ ܥܰܡ̈ܡܶܐ ܡ̣ܶܢ ܩܕܳܡܰܝܟ.
3 ܟܰܕ ܥܒܰܕܬ ܕܚܺܝ̈ܠܳܬܳܐ ܕܠܳܐ ܣܰܟܺܝܢ ܠܳܟ: ܢܚܶܬܬ: ܘܡ̣ܶܢ ܩܕܳܡܰܝܟ ܕܳܠܘ ܛܽܘܖ̈ܶܐ.
4 ܡ̣ܶܢ ܥܳܠܰܡ ܠܳܐ ܨܳܬܘ ܘܠܳܐ ܫܡܰܥܘ ܘܥܺܝܢ ܠܳܐ ܚܙܳܬ ܐܰܠܳܗ ܠܒܰܪ ܡܶܢܳܟ. ܕܥܳܒܶܕ ܐܰܢ̱ܬ ܠܰܐܝܠܶܝܢ ܕܰܡܣܰܟܝܢ ܠܳܟ.
5 ܘܦܳܓܰܥ ܐܰܢ̱ܬ ܒܒܽܘܣܳܡܳܐ ܒܰܐܝܠܶܝܢ ܕܥܳܒܕܺܝܢ ܙܰܕܺܝܩܽܘܬܳܐ ܒܽܐܘܖ̈ܚܳܬܳܟ ܢܶܬܕܰܟܪܽܘܢܳܟ. ܗܳܐ ܐܰܢ̱ܬ ܪܓܶܙܬ ܘܰܚܛܰܝܢ ܒܗܶܝܢ. ܒܥܳܠܰܡ ܢܶܬܦܪܶܩ.
6 ܕܰܗܘܰܝܢ ܐܰܝܟ ܛܰܡܰܐܐ ܟܽܠܰܢ. ܘܰܐܝܟ ܐܽܘܪܩܰܥܬܳܐ ܕܟܶܦܣܳܢܺܝܬܳܐ ܟܽܠܳܗ̇ ܙܰܕܺܝܩܽܘܬܰܢ. ܢܬܰܪܢ ܐܰܝܟ ܛܰܖ̈ܦܶܐ ܟܽܠܰܢ. ܘܰܐܝܟ ܥܰܠܥܳܠܳܐ ܫܰܩܠܽܘܢ ܚܛܳܗܰܝ̈ܢ.
7 ܘܠܰܝܬ ܕܩܳܪܶܐ ܒܰܫܡܳܟ: ܘܰܕܥܳܗܶܕ ܠܰܡܚܰܡܣܳܢܽܘ ܒܳܟ. ܡܶܛܽܠ ܕܰܐܗܦܶܟܬ ܐܰܦܰܝ̈ܟ ܡܶܢܰܢ: ܘܰܐܫܠܶܡ̣ܬܳܢ ܒܝܰܕ ܚܛܳܗܰܝ̈ܢ.
8 ܗܳܫܳܐ ܡܳܪܝܳܐ ܐܰܒܽܘܢ ܐܰܢ̱ܬ ܚܢܰܢ ܛܺܝܢܳܐ: ܘܰܐܢ̱ܬ ܓܳܒܽܘܠܰܢ ܘܰܥܒܳܕ ܐܺܝܕܰܝ̈ܟ ܚܢܰܢ ܟܽܠܰܢ.
9 ܠܳܐ ܬܶܪܓܰܙ ܡܳܪܝܳܐ ܛܳܒ ܠܥܳܠܰܡ. ܘܠܳܐ ܬܶܬܕܟܰܪ ܠܥܳܠܰܡ ܚܛܳܗܰܝ̈ܢ ܚܙܺܝ ܕܥܰܡܳܟ ܚܢܰܢ ܟܽܠܰܢ.
10 ܩܽܘܖ̈ܝܳܐ ܕܩܽܘܕܫܳܟ ܗܘܰܝ̈ ܡܰܕܒܪܳܐ. ܘܨܶܗܝܽܘܢ ܗܘܳܬ ܡܰܕܒܪܳܐ: ܐܘܪܺܫܠܶܡ ܚܰܪܒܬܳܐ.
11 ܒܶܝܬ ܩܽܘܕܫܰܢ ܘܬܶܫܒܽܘܚܬܰܢ: ܕܫܰܒܚܽܘܟ ܐܰܒܗܰܝ̈ܢ: ܗܘܳܐ ܠܝܰܩܕܳܢܳܐ ܕܢܽܘܪܳܐ. ܘܟܽܠܳܗ̇ ܪܶܓܬܰܢ ܗܘܳܬ ܠܚܽܘܪܒܳܐ.
12 ܥܰܠ ܗܳܠܶܝܢ ܚܰܡܣܶܢܬ ܡܳܪܝܳܐ. ܘܰܫܬܶܩܬ ܘܡܰܟܰܟܬܳܢ ܛܳܒ.