Isaiah 43
The Book of Isaiah
܀ ܐܫܥܝܐ ܡܓ ܀
1 ܗܳܫܳܐ ܗܳܟܰܢܳܐ ܐܳܡܰܪ ܡܳܪܝܳܐ: ܕܰܒܪܳܟ ܝܰܥܩܽܘܒ ܘܓܰܒܠܳܟ ܝܺܣܪܳܐܶܝܠ ܠܳܐ ܬܶܕܚܰܠ ܕܰܦܪܰܩܬܳܟ: ܘܰܩܪܺܝܬܳܟ ܒܰܫܡܳܟ: ܕܕܺܝܠܝ ܐܰܢ̱ܬ.
2 ܐܶܢ ܬܶܥܒܰܪ ܒܝܰܡܳܐ: ܥܰܡܳܟ ܐ̱ܢܳܐ ܘܢܰܗܖ̈ܰܘܳܬܳܐ ܠܳܐ ܢܶܓܪܦܽܘܢܳܟ. ܐܶܢ ܬܗܰܠܶܟ ܥܰܠ ܢܽܘܪܳܐ ܠܳܐ ܬܶܬܟܰܘܶܐ: ܘܫܰܠܗܶܒܺܝܬܳܐ ܠܳܐ ܬܰܘܩܕܳܟ.
3 ܡܶܛܽܠ ܕܶܐܢܳܐ ܐ̱ܢܳܐ ܡܳܪܝܳܐ ܐܰܠܳܗܳܟ: ܩܰܕܺܝܫܳܐ ܕܺܝܣܪܳܐܶܝܠ ܦܳܪܽܘܩܳܟ ܝܶܗܒܶܬ ܠܡܶܨܪܶܝܢ ܚܠܳܦܰܝܟ: ܘܰܠܟܽܘܫ ܘܠܰܫܒܳܐ ܥܰܠ ܐܰܦܰܝ̈ܟ.
4 ܡ̣ܶܢ ܕܝܰܩܺܝܪ ܐܰܢ̱ܬ ܒܥܰܝ̈ܢܰܝ ܐܶܫܬܰܒܰܚܬ: ܘܶܐܢܳܐ ܪܚܶܡܬܳܟ ܝܶܗܒܶܬ ܐ̱ܢܳܫܳܐ ܚܠܳܦܰܝܟ: ܘܶܐܡ̈ܘܳܬܳܐ ܚܠܳܦ ܢܰܦܫܳܟ.
5 ܠܳܐ ܬܶܕܚܰܠ ܡܶܛܽܠ ܕܥܰܡܳܟ ܐ̱ܢܳܐ ܡ̣ܶܢ ܡܰܕܢܚܳܐ ܐܰܝܬܐ ܙܰܪܥܳܟ. ܘܡ̣ܶܢ ܡܰܥܪܒܳܐ ܐܶܟܰܢܫܳܟ.
6 ܐܶܡܰܪ ܠܓܰܪܒܝܳܐ ܕܗܰܒܝ. ܘܰܠܬܰܝܡܢܳܐ ܕܠܳܐ ܬܶܟܠܺܝܢ ܐܰܝܬܶܐ ܒܢܰܝ̈ ܡ̣ܶܢ ܪܽܘܚܩܳܐ: ܘܰܒ̈ܢܳܬܝ ܡ̣ܶܢ ܣܰܘ̈ܦܶܝܗ̇ ܕܰܐܪܥܳܐ.
7 ܟܠ ܕܩܳܪܶܐ ܒܫܶܡܝ: ܠܺܐܝܩܳܪܝ ܒܪܺܝܬܶܗ ܘܰܓܒܰܠܬܶܗ ܘܰܥܒܰܕܬܶܗ.
8 ܐܰܦܶܩ ܥܰܡܳܐ ܥܘܺܝܪܳܐ: ܕܥܰܝ̈ܢܶܐ ܐܺܝܬ ܠܗܽܘܢ: ܘܶܐܕܢ̈ܶܐ ܐܺܝܬ ܠܗܽܘܢ ܘܚܰܪܫܺܝܢ.
9 ܟܽܠܗܽܘܢ ܥܰܡ̈ܡܶܐ ܢܶܬܟܰܢܫܽܘܢ ܐܰܟܚܕܳܐ. ܘܢܶܬܟܰܢ̈ܫܳܢ ܐܶܡ̈ܘܳܬܳܐ ܡܰܢܽܘ ܐܺܝܬ ܒܟܽܘܢ ܕܰܢܚܳܘܶܐ ܗܳܕܶܐ: ܘܩܰܕܡܳܝ̈ܳܬܳܐ ܢܰܫܡܰܥ ܢܰܝܬܽܘܢ ܣܳܗܕܰܝ̈ܗܽܘܢ ܘܢܶܙܕܰܕܩܽܘܢ: ܘܢܶܫܡܥܽܘܢ ܘܢܺܐܡܪܽܘܢ.
10 ܒܩܽܘܫܬܳܐ ܐܰܢ̱ܬܽܘܢ ܣܳܗ̈ܕܰܝ: ܐܳܡܰܪ ܡܳܪܝܳܐ: ܘܥܰܒ̈ܕܰܝ ܕܰܓܒܶܝܬ ܘܬܶܕܥܽܘܢ ܘܰܬܗܰܝܡܢܽܘܢ ܒܺܝ ܘܬܶܣܬܰܟܠܽܘܢ ܕܶܐܢܳܐ ܗ̱ܘ̣. ܘܰܩܕܳܡܝ ܠܳܐ ܐܶܬܒܪܺܝ ܐܰܠܳܗ ܘܒܳܬܰܪܝ ܠܳܐ ܢܶܗܘܶܐ.
11 ܐܶܢܳܐ ܐ̱ܢܳܐ ܡܳܪܝܳܐ: ܘܠܰܝܬ ܬܽܘܒ ܠܒܰܪ ܡܶܢܝ.
12 ܐܶܢܳܐ ܚܳܘܺܝܬ ܘܦܶܪܩܶܬ ܘܰܐܫܡܥܶܬ: ܘܠܰܝܬ ܒܟܽܘܢ ܢܽܘܟܪܳܝܳܐ: ܘܰܐܢ̱ܬܽܘܢ ܣܳܗ̈ܕܰܝ: ܐܳܡܰܪ ܡܳܪܝܳܐ. ܘܶܐܢܳܐ ܐܰܠܳܗܳܐ.
13 ܘܳܐܦ ܡ̣ܶܢ ܝܰܘܡܳܐ ܩܰܕܡܳܝܳܐ ܐܶܢܳܐ ܐ̱ܢܳܐ: ܘܠܰܝܬ ܕܡܶܬܦܰܨܶܐ ܡ̣ܶܢ ܐܺܝܕܰܝ̈. ܘܡܶܕܶܡ ܕܥܳܒܶܕ ܐ̱ܢܳܐ: ܡܰܢܽܘ ܡܰܗܦܶܟ.
14 ܗܳܟܰܢܳܐ ܐܳܡܰܪ ܡܳܪܝܳܐ ܦܳܪܽܘܩܟܽܘܢ ܩܰܕܺܝܫܳܐ ܕܺܝܣܪܳܐܶܝܠ. ܡܶܛܽܠܳܬܟܽܘܢ ܫܰܕܪܶܬ ܠܒܳܒܶܠ. ܘܰܐܝܬܺܝܬ ܠܟܽܠܗܽܘܢ ܥܳܖ̈ܽܘܩܶܐ: ܘܰܠܟܰܠܕܳܝ̈ܶܐ ܕܒܰܣܦܺܝ̈ܢܶܐ ܡܶܫܬܰܒܚܺܝܢ.
15 ܐܶܢܳܐ ܐ̱ܢܳܐ ܡܳܪܝܳܐ ܩܰܕܺܝܫܟܽܘܢ: ܕܰܒܪܺܝܬ ܠܺܝܣܪܳܐܶܝܠ ܡܰܠܟܟܽܘܢ.
16 ܗܳܟܰܢܳܐ ܐܳܡܰܪ ܡܳܪܝܳܐ: ܕܝܰܗܒ ܐܽܘܪܚܳܐ ܒܝܰܡܳܐ: ܘܰܫܒܺܝܠܳܐ ܒܡܰܝ̈ܳܐ ܣܰܓܺܝ̈ܐܶܐ.
17 ܕܡܰܦܶܩ ܡܰܖ̈ܟܒܬܳܐ ܖ̈ܰܟܫܳܐ ܘܚܰܝܠܳܐ ܥܰܫܺܝܢܳܐ. ܘܰܐܟܚܕܳܐ ܢܶܫܟܒܽܘܢ ܘܠܳܐ ܢܩܽܘܡܽܘܢ. ܘܢܶܕܥܟܽܘܢ ܐܰܝܟ ܫܪܳܓܳܐ ܕܰܡܛܰܦܛܶܦ.
18 ܠܳܐ ܬܶܬܕܰܟܪܽܘܢ ܩܰܕܡܳܝ̈ܳܬܳܐ: ܘܰܕܡ̣ܶܢ ܪܺܝܫܺܝܬܳܐ ܠܳܐ ܬܶܣܬܰܟܠܽܘܢ.
19 ܗܳܐ ܥܳܒܶܕ ܐ̱ܢܳܐ ܚܕܰܬܳܐ ܘܗܳܫܳܐ ܬܺܐܥܶܐ ܘܬܶܕܥܽܘܢܳܗ̇. ܘܶܐܥܒܶܕ ܐܽܘܪܚܳܐ ܒܡܰܕܒܪܳܐ: ܘܢܰܗܖ̈ܰܘܳܬܳܐ ܒܰܐܫܺܝܡܽܘܢ.
20 ܬܫܰܒܚܰܢܝ ܚܰܝܽܘܬܳܐ ܕܕܰܒܪܳܐ: ܝܳܪܽܘܖ̈ܶܐ ܘܰܒ̈ܢܳܬ ܢܰܥ̈ܡܶܐ: ܡܶܛܽܠ ܕܝܶܗܒܶܬ ܡܰܝ̈ܳܐ ܒܡܰܕܒܪܳܐ: ܘܢܰܗܖ̈ܰܘܳܬܳܐ ܒܰܐܫܺܝܡܽܘܢ: ܕܢܶܫܬܶܐ ܥܰܡܝ ܓܰܒܝܳܐ.
21 ܥܰܡܳܐ ܗܳܢܳܐ ܕܰܓܒܶܝܬ ܠܺܝ: ܢܶܫܬܽܘܢ.
22 ܠܳܐ ܗ̱ܘܳܐ ܠܺܝ ܩܪܰܝܬ ܝܰܥܩܽܘܒ: ܕܰܩܪܺܝܬܳܟ ܝܺܣܪܳܐܶܝܠ.
23 ܠܳܐ ܐܰܝܬܺܝܬ ܠܺܝ ܐܶܡܖ̈ܶܐ ܕܝܰܩܕܰܝ̈ܟ. ܘܰܒܕܶܒܚܰܝ̈ܟ ܠܳܐ ܝܰܩܰܪܬܳܢܝ ܠܳܐ ܫܰܥܒܶܕܬܳܟ ܒܩܽܘܪܒܳܢܳܐ: ܘܠܳܐ ܐܰܠܐܺܝܬܳܟ ܒܰܠܒܽܘܢ̱ܬܳܐ.
24 ܠܳܐ ܙܒܰܢܬ ܠܺܝ ܒܟܶܣܦܳܐ ܩܰܢܝܳܐ ܕܒܶܣܡܳܐ. ܘܰܒܬܰܪܒܳܐ ܕܕܶܒܚܰܝ̈ܟ ܠܳܐ ܐܰܪܘܺܝܬܳܢܝ ܐܶܠܳܐ ܫܰܥܒܰܕܬܳܢܝ ܒܰܚܛܳܗܰܝ̈ܟ: ܘܰܒܥܰܘܠܳܟ ܐܰܠܐܺܝܬܳܢܝ.
25 ܐܶܢܳܐ ܐ̱ܢܳܐ ܕܥܳܛܶܐ ܐ̱ܢܳܐ ܥܰܘܠܳܟ ܡܶܛܽܠܳܬܝ. ܘܰܚܛܳܗܰܝ̈ܟ ܠܳܐ ܐܶܬܕܟܰܪ.
26 ܐܶܬܕܰܟܪܰܝܢܝ: ܢܶܬܬܕܺܝܢ ܐܰܟܚܕܳܐ. ܐܶܡ̇ܪܶܬ ܕܬܶܙܕܰܕܰܩ.
27 ܐܰܒܽܘܟ ܩܰܕܡܳܝܳܐ ܚܛܳܐ ܫܰܠܺܝܛܳܢܰܝ̈ܟ ܐܰܥܠܺܝܘ ܒܺܝ.
28 ܛܰܘܶܫܘ ܪܰܘܖ̈ܒܢܰܝܟ ܩܽܘܕܫܳܐ. ܝܶܗܒܶܬ ܠܝܰܥܩܽܘܒ ܠܚܰܪܡܳܐ: ܘܠܺܝܣܪܳܐܶܝܠ ܠܚܶܣܕܳܐ.