Isaiah 34
The Book of Isaiah
܀ ܐܫܥܝܐ ܠܕ ܀
1 ܐܰܬܪܳܐ ܕܕܺܝܢܳܐ. ܩܪܽܘܒܘ ܥܰܡ̈ܡܶܐ ܠܡܶܫܡܰܥ: ܘܨܽܘܬܶܝܢ ܐܶܡ̈ܘܳܬܳܐ. ܬܶܫܡܰܥ ܐܰܪܥܳܐ ܒܰܡܠܳܐܳܗ̇: ܘܟܽܠܗܽܘܢ ܥܳܡܽܘܖ̈ܶܝܗ̇.
2 ܡܶܛܽܠ ܕܪܽܘܓܙܶܗ ܕܡܳܪܝܳܐ ܥܰܠ ܟܽܠܗܽܘܢ ܥܰܡ̈ܡܶܐ. ܘܚܶܡܬܶܗ ܥܰܠ ܟܽܠܶܗ ܚܰܝܠܗܽܘܢ ܕܢܶܚܪܽܘܒ ܐܶܢܽܘܢ: ܘܢܰܫܠܶܡ ܐܶܢܽܘܢ ܠܩܶܛܠܳܐ.
3 ܘܢܶܫܬܕܽܘܢ ܩܛܺܝܠܰܝ̈ܗܽܘܢ. ܘܢܶܡܚܶܐ ܪܺܝܚܳܐ ܕܰܫܠܰܕܰܝ̈ܗܽܘܢ. ܘܢܶܬܡܣܽܘܢ ܛܽܘܖ̈ܶܐ ܡ̣ܶܢ ܕܶܡܗܽܘܢ.
4 ܘܢܶܬܡܣܽܘܢ ܟܠ ܚܰܝ̈ܠܰܘܳܬܳܐ ܕܰܫܡܰܝܳܐ. ܘܢܶܬܟܰܪܟܽܘܢ ܫܡܰܝܳܐ ܐܰܝܟ ܡܓܰܠܬܳܐ. ܘܟܽܠܶܗ ܚܰܝܠܗܽܘܢ ܢܶܬܰܪ: ܐܰܝܟ ܛܰܪܦܳܐ ܕܢܳܬܰܪ ܡ̣ܶܢ ܓܦܶܬܳܐ: ܘܰܐܝܟ ܦܰܩܽܘܥܳܐ ܡ̣ܶܢ ܬܺܬܳܐ.
5 ܡܶܛܽܠ ܕܬܶܬܪܘܶܐ ܚܰܪܒܝ ܒܰܫܡܰܝܳܐ. ܗܳܐ ܥܰܠ ܐܰܕܽܘܡܳܝ̈ܶܐ ܬܶܚܽܘܬ: ܥܰܠ ܥܰܡܳܐ ܕܶܐܬܚܰܝܰܒ ܒܕܺܝܢܳܐ.
6 ܚܰܪܒܶܗ ܕܡܳܪܝܳܐ ܡܰܠܝܳܐ ܕܡܳܐ. ܐܶܬܕܰܗܢܰܬ ܡ̣ܶܢ ܕܡܳܐ ܘܡ̣ܶܢ ܬܰܪܒܳܐ ܕܰܡܦܰܛ̈ܡܶܐ: ܘܕܰܓ̣ܕܰܝ̈ܳܐ: ܘܬܰܪܒܳܐ ܕܟܽܘܠ̈ܝܳܬܳܐ ܕܕܶܟܖ̈ܶܐ. ܡܶܛܽܠ ܕܕܶܒܚܬܳܐ ܠܡܳܪܝܳܐ ܒܒܽܘܨܳܪ: ܘܩܶܛܠܳܐ ܪܰܒܳܐ ܒܰܐܪܥܳܐ ܕܰܐܕܽܘܡ.
7 ܘܢܶܦܠܽܘܢ ܖ̈ܰܝܡܶܐ ܥܰܡܗܽܘܢ: ܘܬܰܘܖ̈ܶܐ ܥܰܡ ܐܰܖ̈ܘܳܢܶܐ. ܘܬܶܬܪܘܶܐ ܐܰܪܥܳܐ ܡ̣ܶܢ ܕܶܡܗܽܘܢ. ܘܥܰܦܪܳܐ ܡ̣ܶܢ ܬܰܪܒܗܽܘܢ ܢܶܕܗܰܢ.
8 ܡܶܛܽܠ ܕܝܰܘܡܳܐ ܕܰܬܒܰܥܬܳܐ ܠܡܳܪܝܳܐ: ܘܫܰܢ̱ܬܳܐ ܕܦܽܘܪܥܳܢܳܐ ܠܕܰܝܳܢܳܐ ܕܨܶܗܝܽܘܢ.
9 ܘܢܶܬܗܰܦܟܽܘܢ ܢܰܚ̈ܠܶܝܗ̇ ܠܙܶܦܬܳܐ: ܘܥܰܦܪܳܗ̇ ܠܟܶܒܪܺܝܬܳܐ ܘܬܶܗܘܶܐ ܐܰܪܥܳܗ̇ ܙܶܦܬܳܐ ܕܝܳܩܕܳܐ.
10 ܘܠܳܐ ܬܶܕܥܰܟ ܠܺܠܝܳܐ ܘܺܐܝܡܳܡܳܐ ܘܰܠܥܳܠܰܡ ܢܶܣܰܩ ܬܶܢܳܢܳܗ̇ ܘܬܶܚܪܰܒ ܠܕܳܪܕܳܖ̈ܺܝܢ. ܘܰܠܥܳܠܰܡ ܥܰܠܡܺܝܢ ܐ̱ܢܳܫ ܠܳܐ ܢܶܥܒܰܪ ܒܳܗ̇.
11 ܕܢܺܐܪܬܽܘܢܳܗ̇ ܩܳܩ̈ܶܐ ܘܩܽܘ̈ܦܕܶܐ. ܘܩܰܦܽܘ̈ܦܶܐ ܘܢܰܥ̈ܒܶܐ ܢܶܫܪܽܘܢ ܒܳܗ̇.
12 ܘܢܶܬܡܬܰܚ ܥܠܶܝܗ̇ ܚܽܘܛܳܐ ܕܚܰܪܒܳܐ ܘܠܳܐ ܬܶܗܘܶܐ ܬܰܡܳܢ ܚܰܕܽܘܬܳܐ. ܐܳܦܠܳܐ ܢܶܩܪܽܘܢ ܬܰܡܳܢ ܡܰܠܟܽܘܬܳܐ. ܘܟܽܠܗܽܘܢ ܪܰܘܖ̈ܒܳܢܶܝܗ̇ ܢܶܗܘܽܘܢ ܠܰܐܒܕܳܢܳܐ.
13 ܘܢܺܐܥܽܘܢ ܟܽܘ̈ܒܶܐ ܒܣܳܚܖ̈ܳܬܳܗ̇: ܘܩܽܘܖ̈ܛܒܶܐ ܘܕܰܕܖ̈ܶܐ ܒܥܽܘܫܢܳܗ̇. ܘܬܶܗܘܶܐ ܕܰܝܪܳܐ ܕܝܳܪܽܘܖ̈ܶܐ: ܘܒܶܝܬ ܪܶܥܝܳܐ ܠܰܒ̈ܢܳܬ ܢܰܥ̈ܡܶܐ.
14 ܘܢܶܐܪܥܽܘܢ ܒܳܗ̇ ܖ̈ܽܘܚܶܐ ܒܦܶܓܥ̈ܶܐ. ܘܫܺܐܕܳܐ ܠܚܰܒܪܶܗ ܢܶܩܪܶܐ. ܬܰܡܳܢ ܐܶܬܬܢܺܝܚܰܬ ܐܶܠܺܝܬܳܐ. ܘܶܐܫܟܚܰܬ ܠܳܗ̇ ܢܝܳܚܳܐ.
15 ܘܬܰܡܳܢ ܐܰܩܢܰܬ ܩܽܘܦܕܳܐ: ܘܶܐܬܢܰܦܨܰܬ ܘܚܶܠܕܰܬ ܘܒܶܙܥܰܬ ܒܛܶܠܳܠܳܗ̇. ܘܬܰܡܳܢ ܐܶܬܟܰܢܰܫ ܕܰܝ̈ܬܶܐ ܚܕܳܐ ܠܘܳܬ ܚܕܳܐ.
16 ܒܥܰܘ ܒܰܟܬܳܒܶܗ ܕܡܳܪܝܳܐ ܘܰܩܪܰܘ. ܕܰܚܕܳܐ ܡܶܢܗܶܝܢ ܠܳܐ ܛܥܳܬ. ܘܰܚܕܳܐ ܠܰܚܕܳܐ ܠܳܐ ܒܥܰܝ̈. ܐܶܠܳܐ ܗܽܘ ܦܩܰܕ ܒܦܽܘܡܶܗ. ܘܪܽܘܚܶܗ ܟܰܢܫܰܬ ܐܶܢܶܝܢ.
17 ܘܗܽܘ ܐܰܪܡܺܝ ܠܗܶܝܢ ܦܶܨ̈ܶܐ. ܘܺܐܝܕܶܗ ܦܰܠܓܰܬ ܠܗܶܝܢ ܡܽܘܫ̈ܚܳܬܳܐ: ܕܰܥܕܰܡܳܐ ܠܥܳܠܰܡ ܢܺܐܖ̈ܬܳܢܳܗ̇: ܘܰܠܕܳܪܕܳܖ̈ܺܝܢ ܢܶܫܖ̈ܝܳܢ ܒܳܗ̇.