Isaiah 15
The Book of Isaiah
܀ ܐܫܥܝܐ ܝܗ ܀
1 ܡܰܫܩܠܳܐ ܕܡܽܘܐܳܒ ܒܠܺܠܝܳܐ ܐܶܬܒܰܙܙܰܬ ܩܪܺܝܬܳܐ ܕܡܽܘܐܳܒ ܘܰܬܡܰܗܽܘ ܒܠܺܠܝܳܐ ܐܶܬܒܙܶܙܘ ܫܽܘܖ̈ܶܝܗ̇ ܕܡܽܘܐܳܒ: ܘܰܬܘܰܪܘ.
2 ܣܠܶܩܘ ܠܒܰܝܬܳܐ ܕܪܺܝܒܽܘܢ: ܥܰܠ ܥܳܠܰܘ̈ܳܬܳܐ ܠܡܶܒܟܳܐ: ܥܰܠ ܢܳܒܽܘ ܘܥܰܠ ܡܶܐܕܒܳܐ. ܡܽܘܐܳܒ ܡܰܝܠܶܠ: ܘܰܒܟܽܠ ܖ̈ܺܝܫܳܘܗܝ ܩܽܘ̈ܕܚܳܬܳܐ: ܘܟܽܠ ܕܩܰܢ ܓܙܺܝܙ.
3 ܒܫܽܘܩܰܘ̈ܗܝ ܐܶܬܟܢܶܫܘ ܣܰܩ̈ܶܐ. ܘܥܰܠ ܐܶܓܳܖ̈ܶܐ ܘܰܒܫܽܘ̈ܩܶܐ: ܟܽܠ ܐ̱ܢܳܫ ܡܰܝܠܶܠ: ܘܢܳܚܶܬ ܒܰܒܟܳܬܳܐ.
4 ܬܰܝܠܶܠ ܚܶܫܒܽܘܢ ܘܰܐܠܥܳܠܳܐ: ܘܰܥܕܰܡܳܐ ܠܝܳܨܽܘܬ ܢܶܫܬܡܰܥ ܩܳܠܗܶܝܢ ܡܶܛܽܠ ܗܳܢܳܐ ܡܰܚܣܢܰܘ̈ܗܝ ܕܡܽܘܐܳܒ ܢܶܩܥܽܘܢ: ܘܢܰܦܫܶܗ ܬܶܩܥܶܐ ܠܶܗ.
5 ܘܠܶܒܝ ܥܰܠ ܡܽܘܐܳܒ: ܢܶܝܠܶܠ ܒܪܽܘܚܶܗ ܥܕܰܡܳܐ ܠܨܳܥܳܪ ܥܶܓܠܬܳܐ ܬܽܘܠܬܳܐ. ܡܶܛܽܠ ܕܰܒܡܰܣܰܩܬܳܐ ܕܠܽܘܚܝܰܬ ܟܰܕ ܒܳܟܶܝܢ: ܢܶܣܩܽܘܢ ܒܳܗ̇. ܘܒܽܐܘܪܚܳܐ ܕܚܽܘܪܢܺܝܡ ܓܥܳܬܳܐ ܕܰܬܒܳܪܳܐ ܢܶܥܒܕܽܘܢ.
6 ܡܶܛܽܠ ܕܡܰܝ̈ܳܐ ܕܢܰܡܪܺܝܡ ܢܓܽܘܙܽܘܢ. ܡܶܛܽܠ ܕܺܝܒܶܫ ܥܡܺܝܪܳܐ: ܘܰܚܡܳܐ ܬܰܕܐܳܐ: ܘܝܽܘܪܳܩܳܐ ܠܳܐ ܗܘܳܐ.
7 ܡܶܛܽܠ ܗܳܢܳܐ ܡܶܕܶܡ ܕܶܐܫܬܚܰܪ ܥܒܰܪ. ܘܣܽܘܥܪܳܢܗܽܘܢ ܥܰܠ ܢܰܚܠܳܐ ܕܥܰܖ̈ܒܺܝܢ ܢܶܫܩܠܘܢ.
8 ܡܶܛܽܠ ܕܚܶܕܪܰܬ ܝܺܠܰܠܬܳܐ ܠܰܬܚܽܘܡܳܐ ܕܡܽܘܐܳܒ: ܘܰܥܕܰܡܳܐ ܠܓܶܠܥܳܡ ܝܺܠܰܠܬܶܗ: ܘܰܠܒܺܪܳܐ ܕܳܐܠܺܝܡ ܝܺܠܰܠܬܶܗ.
9 ܡܶܛܽܠ ܕܡܰܝ̈ܳܐ ܕܪܺܝܒܽܘܢ ܐܶܬܡܠܺܝܘ ܕܡܳܐ: ܡܶܛܽܠ ܕܶܐܣܺܝܡ ܥܰܠ ܪܺܝܒܽܘܢ ܬܰܘܣܰܦܬܳܐ. ܘܶܐܪܢܶܐ ܥܰܠ ܐܰܝܠܶܝܢ ܕܡܶܬܦܰܨܶܝܢ ܡ̣ܶܢ ܡܽܘܐܳܒ.