Isaiah 47
The Book of Isaiah
܀ ܐܫܥܝܐ ܡܙ ܀
1 ܚܽܘܬܝ ܘܬܶܒܝ ܥܰܠ ܥܰܦܪܳܐ ܒܬܽܘܠܬܳܐ ܒܰܪܬ ܒܳܒܶܠ. ܬܶܒܝ ܥܰܠ ܐܰܪܥܳܐ ܒܰܪܬ ܟܰܠܕܳܝ̈ܶܐ. ܠܰܝܬ ܟܽܘܪܣܝܳܐ. ܡܶܛܽܠ ܕܠܳܐ ܢܰܘܣܦܽܘܢ ܬܽܘܒ ܠܡܶܩܪܶܝܟܝ ܡܥܰܕܰܢܬܳܐ ܘܰܡܦܰܢܰܩܬܳܐ.
2 ܣܰܒܝ ܪܰܚܝܳܐ: ܛܚܰܢܝ ܩܰܡܚܳܐ ܓܠܳܝ ܬܰܚܦܺܝܬܶܟܝ ܓܽܘܙܝ ܚܶܘܳܖ̈ܳܬܶܟܝ ܓܠܳܝ ܫܳܩܰܝ̈ܟܝ ܥܒܰܪܝ ܢܰܗܖ̈ܰܘܳܬܳܐ.
3 ܢܶܬܓܠܶܐ ܦܽܘܪܣܳܝܶܟܝ: ܘܢܶܬܚܙܶܐ ܚܶܣܕܰܟܝ ܐܶܣܰܒ ܡܶܢܶܟܝ ܬܒܰܥܬܳܐ. ܘܠܳܐ ܐܰܦܓܰܥ ܒܶܟܝ ܐ̱ܢܳܫ.
4 ܦܳܪܽܘܩܰܢ ܡܳܪܝܳܐ ܚܰܝܠܬܳܢܳܐ ܫܡܶܗ: ܩܰܕܺܝܫܳܐ ܕܺܝܣܪܳܐܶܝܠ.
5 ܬܶܒܝ ܒܰܬܘܳܪܳܐ. ܥܽܘܠܝ ܒܚܶܫܽܘܟܳܐ ܒܰܪܬ ܟܰܠܕܳܝ̈ܶܐ. ܡܶܛܽܠ ܕܠܳܐ ܢܰܘܣܦܽܘܢ ܬܽܘܒ ܠܡܶܩܪܶܝܟܝ ܓܰܢ̱ܒܳܪܰܬ ܡܰܠ̈ܟܘܳܬܳܐ.
6 ܪܶܓܙܶܬ ܥܰܠ ܥܰܡܝ: ܕܛܰܘܶܫܘ ܝܳܪܬܽܘܬܝ ܘܰܐܫܠܡܶܬ ܐܶܢܽܘܢ ܒܺܐܝܕܰܝ̈ܟܝ ܘܠܳܐ ܥܒܰܕܬܝ ܥܠܰܝܗܽܘܢ ܖ̈ܰܚܡܶܐ. ܘܥܰܠ ܣܳܒ̈ܶܐ ܐܰܥܫܶܢܬܝ ܢܺܝܪܶܟܝ ܛܳܒ.
7 ܘܶܐܡܰܪܬܝ ܕܰܠܥܳܠܰܡ ܐܶܗܘܶܐ ܓܰܢ̱ܒܳܪܬܳܐ. ܘܠܳܐ ܣܳܡܬܝ ܒܠܶܒܶܟܝ ܗܳܠܶܝܢ. ܘܠܳܐ ܐܶܬܕܟܰܪܬܝ ܚܰܪܬܳܐ.
8 ܗܳܫܳܐ ܫܡܰܥܝ ܗܳܠܶܝܢ ܡܥܰܕܢܬܳܐ: ܕܝܳܬܒܳܐ ܒܫܶܠܝܳܐ: ܘܳܐܡܪܳܐ ܒܠܶܒܳܗ̇: ܐܶܢܳܐ ܐ̱ܢܳܐ ܘܠܰܝܬ ܬܽܘܒ. ܠܳܐ ܐܶܬܶܒ ܐܰܪܡܰܠܬܳܐ: ܘܠܳܐ ܐܶܕܰܥ ܬܟܳܠܳܐ.
9 ܢܺܐܬܝ̈ܳܢ ܥܠܰܝܟܝ ܗܳܠܶܝܢ ܬܰܖ̈ܬܰܝܗܶܝܢ ܡܰܚ̈ܘܳܬܳܐ ܒܝܰܘܡܳܐ ܚܰܕ. ܬܟܳܠܳܐ ܘܰܐܪܡܠܽܘܬܳܐ ܡ̣ܶܢ ܫܶܠܝܳܐ ܢܺܐܬܝ̈ܳܢ ܥܠܰܝܟܝ: ܒܣܽܘܓܳܐܐ ܕܚܰܖ̈ܳܫܰܝܟܝ: ܘܰܒܣܽܘܓܳܐܐ ܕܰܡܓܽܘܫܰܝ̈ܟܝ.
10 ܕܶܐܬܬܟܶܠܬܝ ܥܰܠ ܒܺܝܫܽܘܬܶܟܝ ܘܶܐܡܰܪܬܝ ܕܠܰܝܬ ܕܚܳܙ̇ܶܐ ܠܺܝ. ܚܶܟܡܬܶܟܝ ܘܺܝܕܰܥܬܶܟܝ. ܗܺܝ ܐܰܛܥܝܰܬܶܟܝ ܘܶܐܡܰܪܬܝ ܒܠܶܒܶܟܝ ܕܶܐܢܳܐ ܐ̱ܢܳܐ ܘܠܰܝܬ ܬܽܘܒ.
11 ܬܺܐܬܶܐ ܥܠܰܝܟܝ ܒܺܝܫܬܳܐ ܒܫܰܦܪܳܐ: ܘܠܳܐ ܬܶܕܥܺܝܢ ܘܬܶܦܶܠ ܥܠܰܝܟܝ ܬܳܘܶܗܬܳܐ: ܘܠܳܐ ܬܶܫܟܚܺܝܢ ܠܡܰܥܒܳܪܽܘܬܳܗ̇ ܘܢܺܐܬܶܐ ܥܠܰܝܟܝ ܡ̣ܶܢ ܫܶܠܝܳܐ ܕܠܽܘܚܝܳܐ ܘܠܳܐ ܬܶܕܥܺܝܢ.
12 ܩܽܘܡܝ ܢܺܐ ܒܰܡܓܽܘܫܰܝ̈ܟܝ: ܘܰܒܚܰܖ̈ܳܫܰܝܟܝ ܣܰܓܝ̈ܐܶܐ ܕܰܠܐܰܝܬܝ ܒܗܽܘܢ ܡ̣ܶܢ ܛܰܠܝܽܘܬܶܟܝ. ܛܳܟ ܬܶܫܟܚܺܝܢ ܬܰܘܬܪܺܝܢ: ܛܳܟ ܬܶܬܥܰܫܢܺܝܢ.
13 ܠܐܰܝܬܝ ܒܣܽܘܓܳܐܐ ܕܡܰܚܫ̈ܒܳܬܶܟܝ. ܢܩܽܘܡܽܘܢ ܢܶܦܪܩܽܘܢܶܟܝ ܟܰܠܕܳܝ̈ܶܐ ܕܚܳܝܪܺܝܢ ܒܰܫܡܰܝܳܐ ܘܰܒܟܰܘܟ̈ܒܶܐ: ܘܡܰܘܕܥܺܝܢ ܠܶܟܝ ܒܝܰܪܚܳܐ ܡܶܕܶܡ ܕܳܐܬܶܐ ܥܠܰܝܟܝ.
14 ܗܳܐ ܗܘܰܘ ܐܰܝܟ ܓ̈ܶܠܶܐ ܕܰܐܘܩܕܰܬ ܐܶܢܽܘܢ ܢܽܘܪܳܐ. ܘܠܳܐ ܢܦܰܨܽܘܢ ܢܰܦܫܗܽܘܢ ܡ̣ܶܢ ܐܺܝܕܳܐ ܕܫܰܠܗܶܒܺܝܬܳܐ. ܠܰܝܬ ܓܽܘܡܖ̈ܶܐ ܠܢܽܘܪܗܽܘܢ: ܐܳܦܠܳܐ ܙܰܗܪܳܐ ܠܡܶܬܰܒ ܠܩܽܘܒܠܶܗ.
15 ܗܳܟܰܢܳܐ ܗܘܰܘ ܠܶܟܝ ܬܰܓܳܖ̈ܰܝܟܝ ܕܰܠܐܰܝܬܝ ܒܗܽܘܢ ܡ̣ܶܢ ܛܰܠܝܽܘܬܶܟܝ ܘܐ̱ܢܳܫ ܠܣܶܛܪܶܗ ܛܥܰܘ: ܘܠܰܝܬ ܕܦܳܪܶܩ ܠܶܟܝ.