Isaiah 37
The Book of Isaiah
܀ ܐܫܥܝܐ ܠܙ ܀
1 ܘܰܗܘܳܐ ܕܟܰܕ ܫܡܰܥ ܚܶܙܰܩܝܳܐ ܡܰܠܟܳܐ: ܨܰܪܺܝ ܢܰܚܬܰܘ̈ܗܝ: ܘܶܐܬܟܰܣܺܝ ܣܰܩܳܐ. ܘܥܰܠ ܠܒܰܝܬܶܗ ܕܡܳܪܝܳܐ.
2 ܘܫܰܕܰܪ ܠܶܐܠܺܝܳܩܺܝܡ ܪܰܒܒܰܝܬܳܐ: ܘܰܠܫܰܒܢܳܐ ܣܳܦܪܳܐ: ܘܰܠܣܳܒ̈ܶܐ ܕܟܳܗ̈ܢܶܐ ܟܰܕ ܡܟܰܣܶܝܢ ܣܰܩ̈ܶܐ: ܠܘܳܬ ܐܶܫܰܥܝܳܐ ܢܒܺܝܳܐ ܒܰܪ ܐܰܡܽܘܨ.
3 ܘܶܐܡܰܪܘ ܠܶܗ: ܗܳܟܰܢܳܐ ܐܳܡܰܪ ܚܶܙܰܩܝܳܐ: ܝܰܘܡܳܐ ܗ̱ܘ̣ ܕܽܐܘܠܨܳܢܳܐ: ܘܰܕܡܰܟܣܳܢܽܘܬܳܐ: ܘܰܕܪܽܘܓܙܳܐ: ܝܳܘܡܳܢܳܐ. ܡܶܛܽܠ ܕܡܰܛܺܝܘ ܚܶܒ̈ܠܶܐ ܕܰܒܢܰܝ̈ܳܐ. ܘܠܰܝܬ ܚܰܝܠܳܐ ܒܝܳܠܶܕܬܳܐ.
4 ܟܒܰܪ ܢܶܫܡܰܥ ܡܳܪܝܳܐ ܐܰܠܳܗܳܟ ܡܶܠܰܘ̈ܗܝ ܕܪܰܒ ܫܳܩ̈ܶܐ. ܘܫܰܕܪܶܗ ܡܳܪܶܗ ܡܰܠܟܳܐ ܐܳܬܽܘܪܳܝܳܐ: ܕܰܢܚܰܣܶܕ ܠܰܐܠܳܗܳܐ ܚܰܝܳܐ. ܘܢܰܟܣܺܝܘܗܝ ܒܡ̈ܶܠܶܐ ܕܰܫܡܰܥ ܡܳܪܝܳܐ ܐܰܠܳܗܳܟ. ܘܬܶܒܥܶܐ ܘܰܬܨܰܠܶܐ ܥܰܠ ܫܰܪܟܳܐ ܕܶܐܫܬܚܰܪܘ.
5 ܘܶܐܬܰܘ ܥܰܒܕܰܘ̈ܗܝ ܕܚܶܙܰܩܝܳܐ ܡܰܠܟܳܐ ܠܘܳܬ ܐܶܫܰܥܝܳܐ.
6 ܘܶܐܡܰܪ ܠܗܽܘܢ ܐܶܫܰܥܝܳܐ: ܗܳܟܰܢܳܐ ܐܶܡܰܪܘ ܠܡܳܪܟܽܘܢ: ܗܳܟܰܢܳܐ ܐܳܡܰܪ ܡܳܪܝܳܐ: ܠܳܐ ܬܶܕܚܰܠ ܡ̣ܶܢ ܡ̈ܶܠܶܐ ܕܰܫܡܰܥܬ: ܕܓܰܕܶܦܘ ܩܕܳܡܰܝ ܐܺܝܙܓܰܕܰܘ̈ܗܝ ܕܡܰܠܟܳܐ ܕܳܐܬܽܘܪ.
7 ܗܳܐ ܝܳܗܶܒ ܐ̱ܢܳܐ ܥܠܰܘܗ̱ܝ ܪܽܘܚܳܐ ܘܢܶܫܡܰܥ ܛܶܒܳܐ: ܘܢܶܗܦܽܘܟ ܠܰܐܪܥܶܗ. ܘܰܐܪܡܶܝܘܗܝ ܒܚܰܪܒܳܐ ܒܰܐܪܥܶܗ.
8 ܘܰܗܦܰܟ ܪܰܒ ܫܳܩ̈ܶܐ. ܘܶܐܫܟܰܚ ܠܡܰܠܟܳܐ ܕܳܐܬܽܘܪ ܟܰܕ ܡܶܬܟܰܬܰܫ ܥܰܠ ܠܶܒܢܳܐ: ܟܰܕ ܫܡܰܥ ܕܰܫܩܰܠ ܡ̣ܶܢ ܠܟܺܝܫ.
9 ܘܰܫܡܰܥ ܥܰܠ ܬܰܪܗܰܦ ܡܰܠܟܳܐ ܕܟܽܘܫ: ܕܰܢܦܰܩ ܠܡܶܬܟܰܬܳܫܽܘ ܥܰܡܶܗ. ܘܰܫܡܰܥ ܘܫܰܕܰܪ ܐܺܝܙ̈ܓܰܕܶܐ ܠܘܳܬ ܚܶܙܰܩܝܳܐ.
10 ܗܳܟܰܢܳܐ ܐܶܡܰܪܘ ܠܚܶܙܰܩܝܳܐ ܡܰܠܟܳܐ ܕܺܝܗܽܘܕܳܐ ܠܡܶܐܡܰܪ: ܠܳܐ ܢܰܛܥܝܶܟ ܐܰܠܳܗܳܟ: ܕܰܬܟܺܝܠ ܐܰܢ̱ܬ ܥܠܰܘܗ̱ܝ. ܘܳܐܡܰܪ ܐܰܢ̱ܬ ܕܠܳܐ ܡܶܫܬܰܠܡܳܐ ܐܽܘܪܺܫܠܶܡ ܒܺܐܝܕܰܘ̈ܗܝ ܕܡܰܠܟܳܐ ܕܳܐܬܽܘܪ.
11 ܗܳܐ ܐܰܢ̱ܬ ܫܡܰܥܬ ܠܟܽܠ ܕܰܥܒܰܕܘ ܡܰܠ̈ܟܶܐ ܕܳܐܬܽܘܪ ܠܟܽܠܗܶܝܢ ܐܰܖ̈ܥܳܬܳܐ ܠܡܰܚܪܳܒܽܘ ܐܶܢܶܝܢ. ܘܰܐܢ̱ܬ ܡܶܬܦܰܨܶܐ ܐܰܢ̱ܬ.
12 ܕܰܠܡܳܐ ܦܰܨܺܝܘ ܐܰܠܳܗܰܝ̈ܗܽܘܢ ܕܥܰܡ̈ܡܶܐ ܕܰܚܪܰܒܘ ܐܰܒܳܗܰܝ̈: ܠܓܳܘܙܳܢ ܘܰܠܚܳܪܳܢ ܘܰܠܪܳܨܳܦ: ܘܠܰܒܢܰܝ̈ ܥܰܕܳܢ ܘܕܰܒܕܳܠܳܣܰܪ.
13 ܐܰܝܟܰܘ ܡܰܠܟܳܐ ܕܰܚܡܳܬ: ܘܡܰܠܟܳܐ ܕܰܪܦܳܕ: ܘܡܰܠܟܳܐ ܕܰܩܪܺܝܬܳܐ ܣܦܰܪܘܺܝܡ: ܘܰܕܢܳܥ: ܘܰܕܥܳܩܳܐ.
14 ܘܩܰܒܠ ܚܶܙܰܩܝܳܐ ܐܶܓܖ̈ܳܬܳܐ ܡ̣ܶܢ ܐܺܝܕܳܐ ܕܺܐܝܙ̈ܓܰܕܶܐ ܘܰܩܪܳܐ ܐܶܢܶܝܢ ܘܰܣܠܶܩ ܠܒܰܝܬܶܗ ܕܡܳܪܝܳܐ. ܘܰܦܪܰܣ ܐܶܢܶܝܢ. ܚܶܙܰܩܝܳܐ ܩܕܳܡ ܡܳܪܝܳܐ.
15 ܨܰܠܺܝ ܚܶܙܰܩܝܳܐ ܩܕܳܡ ܡܳܪܝܳܐ: ܘܶܐܡܰܪ.
16 ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ ܝܳܬܶܒ ܥܰܠ ܟܖ̈ܽܘܒܶܐ. ܐܰܢ̱ܬ ܗ̱ܘ̣ ܐܰܠܳܗܳܐ ܒܰܠܚܽܘܕܰܝܟ ܥܰܠ ܟܽܠܗܶܝܢ ܡܰܠܟ̈ܘܳܬܳܐ ܕܰܐܪܥܳܐ. ܐܰܢ̱ܬ ܥܒܰܕܬ ܫܡܰܝܳܐ ܘܰܐܪܥܳܐ.
17 ܨܠܺܝ ܡܳܪܝܳܐ ܐܶܕܢܳܟ ܘܰܫܡܰܥ ܦܬܰܚ ܡܳܪܝܳܐ ܥܰܝܢܰܝ̈ܟ ܘܰܚܙܺܝ ܘܰܫܡܰܥ ܡܶܠܰܘ̈ܗܝ ܕܣܰܢܚܶܪܺܝܒ: ܕܰܫܠܰܚ ܠܰܡܚܰܣܳܕܽܘ ܠܰܐܠܳܗܳܐ ܚܰܝܳܐ.
18 ܫܰܪܺܝܪܳܐܺܝܬ ܡܳܪܝܳܐ: ܚܪܰܒܘ ܡܰܠ̈ܟܶܐ ܕܳܐܬܽܘܪ ܠܟܽܠܗܶܝܢ ܐܰܖ̈ܥܳܬܳܐ.
19 ܘܰܐܪܥܗܽܘܢ ܘܰܐܠܳܗܰܝ̈ܗܽܘܢ ܐܰܘܩܶܕܘ ܒܢܽܘܪܳܐ ܡܶܛܽܠ ܕܠܳܐ ܗܘܰܘ ܐܰܠܗ̈ܶܐ. ܐܶܠܳܐ ܥܒܳܕ ܐܺܝ̈ܕܰܝܳܐ ܕܐ̱ܢܳܫ̈ܳܐ: ܕܩܰܝܣܳܐ: ܘܰܕܟܶܣܦܳܐ: ܘܰܕܟܺܐܦܳܐ. ܘܰܐܘܒܶܕܘ ܐܶܢܽܘܢ.
20 ܘܗܳܫܳܐ ܡܳܪܝܳܐ ܐܰܠܳܗܰܢ: ܦܪܽܘܩܰܝܢ ܡ̣ܶܢ ܐܺܝܕܰܘ̈ܗܝ: ܕܢܶܕܥ̈ܳܢ ܟܽܠܗܶܝܢ ܡܰܠܟ̈ܘܳܬܳܐ ܕܰܐܪܥܳܐ: ܕܰܐܢ̱ܬܽܘ ܐܰܠܳܗܳܐ ܒܰܠܚܽܘܕܰܝܟ.
21 ܘܶܐܫܬܠܰܚ ܐܶܫܰܥܝܳܐ ܒܰܪ ܐܰܡܽܘܨ ܠܘܳܬ ܚܶܙܰܩܝܳܐ: ܘܶܐܡܰܪ ܠܶܗ: ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܟܽܠ ܕܨܰܠܺܝܬ ܩܕܳܡܝ ܥܰܠ ܣܰܢܚܶܪܺܝܒ ܡܰܠܟܳܐ ܕܳܐܬܽܘܪ: ܫܶܡܥܶܬ.
22 ܗܳܢܳܐ ܦܶܬܓܳܡܳܐ ܕܶܐܡܰܪ ܥܠܰܘܗ̱ܝ ܡܳܪܝܳܐ. ܫܳܝܛܳܐ ܠܳܟ: ܘܰܡܡܰܝܩܳܐ ܒܳܟ ܒܬܽܘܠܬܳܐ ܒܰܪܬ ܨܶܗܝܽܘܢ ܘܰܡܢܺܝܕܳܐ ܪܺܝܫܳܗ̇ ܒܳܬܪܳܟ ܒܰܪܬ ܐܽܘܪܺܫܠܶܡ.
23 ܠܡܰܢ ܚܰܣܶܕܬ ܘܓܰܕܶܦܬ. ܘܥܰܠ ܡܰܢ ܐܰܪܺܝܡܬ ܩܳܠܳܟ ܐܰܪܺܝܡܬ ܥܰܝܢܰܝ̈ܟ ܠܰܡܪܰܘܡܳܐ ܥܰܠ ܩܰܕܺܝܫܳܐ ܕܺܝܣܪܳܐܶܝܠ.
24 ܘܒܺܐܝܕܳܐ ܕܺܐܝܙܓܰܕܰܝ̈ܟ ܚܰܣܶܕܬ ܠܡܳܪܝܳܐ: ܘܶܐܡܰܪܬ: ܕܰܒܣܽܘܓܳܐܐ ܕܡܰܖ̈ܟܒܳܬܝ: ܐܶܢܳܐ ܐܶܣܰܩ ܠܪܰܘܡܳܐ ܕܛܽܘܖ̈ܶܐ: ܘܠܰܫܦܽܘܠܰܘ̈ܗܝ ܕܠܶܒܢܳܢ. ܘܶܐܦܣܽܘܩ ܩܰܘ̈ܡܳܬܳܐ ܕܰܐܖ̈ܙܰܘܗܝ: ܘܰܓ̣ܒܰܝ̈ܳܐ ܕܫܰܖ̈ܘܰܝܢܰܘܗܝ ܘܶܐܥܽܘܠ ܠܪܰܘܡܳܐ ܕܣܳܟܶܗ ܕܥܳܒܳܐ ܕܟܰܪܡܠܳܐ.
25 ܐܶܢܳܐ ܐܶܚܦܽܘܪ ܘܶܐܫܬܶܐ ܡܰܝ̈ܳܐ: ܘܰܐܘܒܶܫ ܒܦܰܖ̈ܣܳܬܳܐ ܕܖ̈ܰܟܫܰܝ: ܟܽܠܗܽܘܢ ܢܰܗܖ̈ܰܘܳܬܳܐ ܥܰܫܺܝܢ̈ܶܐ.
26 ܠܳܐ ܫܡܰܥܬ ܕܡ̣ܶܢ ܪܽܘܚܩܳܐ ܠܳܗ̇ ܥܶܒܕܶܬ ܘܡ̣ܶܢ ܝܰܘ̈ܡܳܬܳܐ ܩܰܕܡܳܝ̈ܶܐ ܠܳܗ̇ ܥܰܬܕܶܬ. ܘܗܳܫܳܐ ܐܰܝܬܺܝܬܳܗ̇ ܕܬܶܗܘܶܐ ܠܚܽܘܪܒܳܐ: ܘܰܠܨܰܕܝܳܐ: ܐܰܝܟ ܡܕܺܝ̈ܢܳܬܳܐ ܥܰܫܺܝ̈ܢܳܬܳܐ.
27 ܕܥܳܡܽܘܖ̈ܰܝܗܶܝܢ ܐܰܪܦܺܝܘ ܒܗܶܝܢ ܐܺܝ̈ܕܰܝܳܐ. ܘܶܐܬܬܰܒܰܪܘ ܘܰܒܗܶܬܘ ܘܰܗܘܰܘ ܐܰܝܟ ܥܶܣܒܳܐ ܕܚܰܩܠܳܐ: ܘܰܐܝܟ ܝܽܘܪܳܩܳܐ ܕܬܰܕܐܳܐ: ܘܰܐܝܟ ܫܶܒܠܳܐ ܕܶܐܓܳܪܳܐ: ܘܰܐܝܟ ܒܽܘܚܫܺܝܢܳܐ ܩܕܳܡ ܩܳܝܳܡܬܳܐ.
28 ܡܰܘܬܒܳܟ ܘܡܰܥܠܳܟ ܘܡܰܦܩܳܟ ܝܳܕܰܥ ܐ̱ܢܳܐ: ܘܕܰܐܡܪܰܚܬ ܩܕܳܡܝ.
29 ܥܰܠ ܕܰܐܡܪܰܚܬ ܩܕܳܡܝ: ܘܓܽܘܕܳܦܳܟ ܣܠܶܩ ܒܶܐܕܢܰܝ̈: ܐܰܪܡܶܐ ܩܠܳܕܳܐ ܒܰܢܚܺܝܪܳܟ: ܘܰܒܥܳܡܳܐ ܒܣܶܦ̈ܘܳܬܳܟ ܘܰܐܗܦܟܳܟ ܒܽܐܘܪܚܳܐ ܕܶܐܬܰܝ̣ܬ ܒܳܗ̇.
30 ܘܗܳܕܶܐ ܠܳܟ ܐܳܬܳܐ: ܐܳܟܶܠ ܐܰܢ̱ܬ ܫܰܢ̱ܬܳܐ ܗܳܕܶܐ ܟܳܬܳܐ. ܘܫܰܢ̱ܬܳܐ ܕܬܰܪܬܶܝܢ ܟܳܬ ܟܳܬܳܐ. ܘܫܰܢ̱ܬܳܐ ܬܠܺܝܬܳܝܬܳܐ ܙܳܪܥܺܝܢ ܐܢ̱ܬܽܘܢ ܘܚܳܨܕܺܝܢ ܐܢ̱ܬܽܘܢ: ܘܢܳܨܒܺܝܢ ܐܢ̱ܬܽܘܢ ܟܰܖ̈ܡܶܐ: ܘܐܳܟܠܺܝܢ ܐܢ̱ܬܽܘܢ ܦܺܐܖ̈ܰܝܗܽܘܢ.
31 ܘܢܶܬܗܰܦܟܽܘܢ ܫܰܪܟܳܐ ܕܒܶܝܬ ܝܺܗܽܘܕܳܐ ܕܶܐܫܬܰܚܰܪܘ: ܐܰܝܟ ܥܶܩܳܪܳܐ ܕܰܪܡܶܐ ܠܬܰܚܬ: ܘܥܳܒܶܕ ܦܺܐܖ̈ܶܐ ܠܥܶܠ.
32 ܡܶܛܽܠ ܕܡ̣ܶܢ ܐܽܘܪܺܫܠܶܡ ܢܳܦܶܩ ܫܰܪܟܳܢܳܐ. ܘܢܶܫܬܰܘܙܰܒ ܡ̣ܶܢ ܛܽܘܪܳܐ ܕܨܶܗܝܽܘܢ. ܛܢܳܢܶܗ ܕܡܳܪܝܳܐ ܚܰܝܠܬܳܢܳܐ ܥܳܒܶܕ ܗܳܕܶܐ.
33 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ ܥܰܠ ܡܰܠܟܳܐ ܕܳܐܬܽܘܪ: ܠܳܐ ܢܶܥܽܘܠ ܠܰܩܪܺܝܬܳܐ ܗܳܕܶܐ. ܘܠܳܐ ܢܶܫܕܶܐ ܬܰܡܳܢ ܓܶܐܪܶܐ. ܘܠܳܐ ܢܶܐܪܥܶܝܗ̇ ܒܣܰܟܖ̈ܶܐ. ܘܠܳܐ ܢܰܟܡܶܢ ܥܠܶܝܗ̇ ܟܡܶܐܢ̈ܶܐ.
34 ܐܶܠܳܐ ܒܽܐܘܪܚܳܐ ܕܶܐܬܳܐ ܒܳܗ̇: ܢܶܗܦܽܘܟ ܘܠܰܩܪܺܝܬܳܐ ܗܳܕܶܐ ܠܳܐ ܢܶܥܽܘܠ: ܐܳܡܰܪ ܡܳܪܝܳܐ.
35 ܘܰܐܓܶܢ ܥܰܠ ܩܪܺܝܬܳܐ ܗܳܕܶܐ ܘܶܐܦܪܩܺܝܗ̇: ܡܶܛܽܠܳܬܝ ܘܡܶܛܽܠ ܕܰܘܺܝܕ ܥܰܒܕܝ.
36 ܘܰܢܦܰܩ ܡܰܠܰܐܟܶܗ ܕܡܳܪܝܳܐ. ܘܰܩܛܰܠ ܒܡܰܫܪܺܝܬܶܗ ܕܳܐܬܽܘܪܳܝܳܐ. ܡܳܐܐ ܘܰܬܡܳܢܺܝܢ ܘܚܰܡܫܳܐ ܐܰܠܦܺܝ̈ܢ. ܘܩܰܕܶܡܘ ܒܨܰܦܪܳܐ: ܘܗܳܐ ܟܽܠܗܽܘܢ ܫ̈ܠܰܕܶܐ ܡܺܝ̈ܬܳܬܳܐ.
37 ܘܰܫܩܰܠ ܣܰܢܚܶܪܺܝܒ: ܘܰܗܦܰܟ ܐܶܙܰܠ ܝܺܬܶܒ ܒܢܺܝܢܘܶܐ.
38 ܘܟܰܕ ܣܳܓܶܕ ܗ̱ܘܳܐ ܒܶܝܬ ܢܳܣܪܳܟ ܐܰܠܳܗܶܗ: ܐܰܕܪܰܡܠܶܟ ܘܫܳܪܳܐܨܰܐܪ ܒܢܰܘ̈ܗܝ ܩܰܛܠܽܘܗܝ ܒܚܰܪܒܳܐ. ܘܗܶܢܽܘܢ ܥܪܰܩܘ ܠܰܐܪܥܳܐ ܕܩܰܖ̈ܕܘܳܝܶܐ. ܘܰܐܡܠܶܟ ܣܰܪܚܰܕܽܘܡ ܒܪܶܗ ܒܳܬܪܶܗ.