Isaiah 5
The Book of Isaiah
܀ ܐܫܥܝܐ ܗ ܀
1 ܐܶܫܰܒܰܚ ܠܚܰܒܺܝܒܝ: ܬܶܫܒܽܘܚܬܳܐ ܕܚܰܒܺܝܒܝ ܠܟܰܪܡܶܗ. ܟܰܪܡܳܐ ܗ̱ܘܳܐ ܠܚܰܒܺܝܒܝ: ܒܩܰܪܢܳܐ ܕܰܐܬܪܳܐ ܫܰܡܺܝܢܳܐ.
2 ܘܦܰܠܚܶܗ: ܘܰܐܚܕ̇ܪܶܗ ܣܝܳܓܳܐ. ܘܰܢܨܰܒ ܒܶܗ ܫܰܒܽܘ̈ܩܶܐ: ܘܰܒܢܳܐ ܡܰܓܕܠܳܐ ܒܓܰܘܶܗ. ܘܳܐܦ ܡܰܥܨܰܪܬܳܐ ܥܒܰܕ ܒܶܗ. ܘܣܰܟܺܝ ܕܢܶܥܒܶܕ ܥܶܢ̈ܒܶܐ. ܘܰܥܒܰܕ ܚܰܖ̈ܽܘܒܶܐ.
3 ܗܳܫܳܐ ܓܰܒܖ̈ܶܐ ܕܺܝܗܽܘܕܳܐ: ܘܥܳܡܽܘܖ̈ܶܝܗ̇ ܕܽܐܘܪܺܫܠܶܡ: ܕܽܘܢܘ ܒܰܝ̈ܢܰܝ ܠܟܰܪܡܝ.
4 ܡܳܢܳܐ ܬܽܘܒ ܘܳܠܶܐ ܗ̱ܘܳܐ ܠܡܶܥܒܰܕ ܠܟܰܪܡܝ: ܘܠܳܐ ܥܶܒܕܶܬ ܠܶܗ. ܕܣܰܟܺܝܬ݁ ܕܢܶܥܒܶܕ ܥܶܢ̈ܒܶܐ: ܘܰܥ̣ܒܰܕ ܚܰܖ̈ܽܘܒܶܐ.
5 ܗܳܫܳܐ ܐܶܚܰܘܶܝܟܽܘܢ ܡܶܕܶܡ ܕܥܳܒܶܕ ܐ̱ܢܳܐ ܠܶܗ ܠܟܰܪܡܝ: ܥܳܩܰܪ ܐ̱ܢܳܐ ܡܰܓܕܠܶܗ: ܘܢܶܗܘܶܐ ܠܒܶܙܬܳܐ. ܘܬܳܪܰܥ ܐ̱ܢܳܐ ܣܝܳܓܶܗ: ܘܢܶܗܘܶܐ ܠܰܕܝܳܫܳܐ.
6 ܘܶܐܥܒܕܺܝܘܗܝ ܕܢܶܚܪܰܒ ܘܠܳܐ ܢܶܟܣܰܚ. ܘܠܳܐ ܢܶܬܦܠܰܚ ܘܢܺܐܥܽܘܢ ܒܶܗ ܟܽܘܒܶܐ ܘܝܰܥܪܳܐ. ܘܶܐܦܩܽܘܕ ܠܰܥܢܳܢ̈ܶܐ ܕܠܳܐ ܢܰܚ̈ܬܳܢ ܥܠܰܘܗ̱ܝ ܡܶܛܪܳܐ.
7 ܡܶܛܽܠ ܕܟܰܪܡܶܗ ܕܡܳܪܝܳܐ ܚܰܝܠܬܳܢܳܐ: ܒܰܝܬܳܐ ܗ̱ܘ̣ ܕܒܶܝܬ ܝܺܣܪܳܝܶܠ: ܘܓܰܒܖ̈ܶܐ ܕܡ̣ܶܢ ܝܺܗܽܘܕܳܐ: ܢܶܨܒܬܳܐ ܚܕܰܬܳܐ ܘܚܰܒܺܝܒܬܳܐ ܣܰܟܺܝܬ݁ ܠܕܺܝܢܳܐ: ܘܰܗܘܳܐ ܚܛܽܘܦܝܳܐ. ܘܰܠܙܰܕܺܝܩܽܘܬܳܐ: ܘܗܳܐ ܝܺܠܰܠܬܳܐ.
8 ܘܳܝ ܠܕܰܡܩܰܪܒܺܝܢ ܒܰܝܬܳܐ ܠܒܰܝܬܳܐ: ܘܚܰܩܠܐ ܒܚܰܩܠܳܐ ܚܳܠܛܺܝܢ. ܕܬܶܐܚܕܽܘܢ ܐܰܬܪܳܐ: ܘܬܶܬ݁ܒܽܘܢ ܒܰܠܚܽܘܕܰܝܟܽܘܢ ܒܓܰܘܳܗ̇ ܕܰܐܪܥܳܐ.
9 ܒܶܐܕܢܰܝ̈ ܡܳܪܝܳܐ ܚܰܝܠܬܳܢܳܐ ܐܶܫܬ݁ܡܰܥ. ܒ̈ܳܬܶܐ ܣܰܓ݁ܺܝ̈ܐܶܐ ܠܚܽܘܪܒܳܐ ܢܶܗܘܽܘܢ: ܡ̣ܶܢ ܒܠܰܝ ܕܝܳܬܶܒ.
10 ܡܶܛܽܠ ܕܰܥܣܰܪ ܐܶܫܟܳܖ̈ܶܐ ܕܟܰܪܡܳܐ ܢܶܥ̈ܒܕܳܢ ܚܕܳܐ ܚܳܒܺܝܬܳܐ: ܘܙܰܪܥܳܐ ܕܟܽܘܪ ܢܶܥܒܶܕ ܣܐܳܐ.
11 ܘܳܝ ܠܕܰܡܩܰܕܡܺܝܢ ܒܨܰܦܪܳܐ: ܘܪܳܗܛܺܝܢ ܠܫܰܟܪܳܐ. ܘܡܰܘܚܪܺܝܢ ܒܪܰܡܫܳܐ: ܘܚܰܡܪܳܐ ܡܰܘܩܶܕ ܠܗܽܘܢ.
12 ܒܟܶܢܳܖ̈ܶܐ: ܘܰܒܩܺܝܬܳܖ̈ܶܐ: ܘܒܰܦ̈ܠܰܓܶܐ: ܘܒܰܖ̈ܒܺܝܥܶܐ: ܚܰܡܪܳܐ ܫܳܬܶܝܢ. ܘܒܰܥܒܳܕܰܘ̈ܗܝ ܕܰܐܠܳܗܳܐ ܠܳܐ ܡܶܣܬܰܟܠܺܝܢ. ܘܒܰܥܒܳܕ ܐܺܝܕܰܘ̈ܗܝ ܠܳܐ ܚܳܝܪܺܝܢ.
13 ܡܶܛܽܠ ܗܳܢܳܐ ܐܶܫܬ݁ܒܺܝ ܥܰܡܝ ܡ̣ܶܢ ܒܠܰܝ ܝܺܕܰܥܬܳܐ. ܡܺܝܬܰܝ̈ܗܽܘܢ ܡ̣ܶܢ ܟܰܦܢܳܐ. ܘܰܥ̣ܫܶܢܘ ܡ̣ܶܢ ܨܶܗܝܳܐ.
14 ܡܶܛܽܠ ܗܳܢܳܐ ܐܰܦܬ݁ܝܰܬ ܫܝܽܘܠ ܢܰܦܫܳܗ̇. ܘܦܶܥܪܰܬ ܦܽܘܡܳܗ̇ ܕܠܳܐ ܣܳܟ: ܘܢܶܚܬܽܘܢ ܠܳܗ̇ ܡܫܰܒܚ̈ܶܐ ܘܰܡܝܰܩܖ̈ܶܐ ܘܥܰܫܺܝܢ̈ܶܐ.
15 ܘܢܶܬܡܰܟܰܟ ܐ̱ܢܳܫܳܐ: ܘܢܶܫܬܰܦܰܠ ܓܰܒܪܳܐ ܘܥܰܝ̈ܢܶܐ ܖ̈ܳܡܳܬܳܐ ܢܶܬܡܰܟ̈ܟܳܢ.
16 ܘܢܶܬ݁ܬ݁ܪܺܝܡ ܡܳܪܝܳܐ ܚܰܝܠܬܳܢܳܐ ܒܕܺܝܢܳܐ ܘܰܐܠܳܗܳܐ ܩܰܕ݁ܺܝܫܳܐ ܢܶܬܩܰܕܰܫ ܒܙܰܕܺܝܩܽܘܬܳܐ.
17 ܘܢܶܪܥܽܘܢ ܐܶܡܖ̈ܶܐ ܒܙܶܕܩܗܽܘܢ. ܘܚܰܖ̈ܒܳܬܳܐ ܕܶܐܬܒܢܺܝ: ܥܳܡܽܘܖ̈ܶܐ ܢܶܐܟܠܽܘܢ ܐܶܢܶܝܢ.
18 ܘܳܝ ܠܰܕܡܰܘܪܟܺܝܢ ܚܛܳܗܰܝ̈ܗܽܘܢ ܐܰܝܟ ܚܰܒܠܳܐ ܐܰܪܺܝܟܳܐ. ܘܰܐܝܟ ܥܪܰܩܬܳܐ ܕܥܶܓܠܬܳܐ ܚܛܺܝܬܗܽܘܢ.
19 ܘܳܐܡܪܺܝܢ: ܒܰܥܓܰܠ ܢܣܰܪܗܶܒ ܡܳܪܝܳܐ ܥܒܳܕܰܘ̈ܗܝ ܕܢܶܚܙܶܐ ܐܶܢܽܘܢ. ܘܬܶܩܪܽܘܒ ܘܬܺܐܬܶܐ ܬܰܪܥܺܝܬܶܗ ܕܩܰܕ݁ܺܝܫܳܐ ܕܺܝܣܪܳܐܶܝܠ ܘܢܶܕܥܺܝܗ̇.
20 ܘܳܝ ܠܰܕܩܳܪܶܝܢ ܠܒܺܝܫܳܐ ܛܳܒܳܐ: ܘܰܠܛܳܒܳܐ ܒܺܝܫܳܐ. ܘܣܳܝܡܺܝܢ ܢܰܗܺܝܪܳܐ ܠܚܶܫܽܘܟܳܐ: ܘܚܶܫܽܘܟܳܐ ܠܢܰܗܺܝܪܳܐ. ܘܣܳܝܡܺܝܢ ܡܰܪܺܝܪܳܐ ܚܰܠܝܳܐ: ܘܚܰܠܝܳܐ ܡܰܪܺܝܪܳܐ.
21 ܘܳܝ ܠܰܕܚܰܟܺܝܡܺܝܢ ܒܥܰܝܢܰܝ̈ ܢܰܦܫܗܽܘܢ: ܘܠܽܘܩܒܰܠ ܐܰܦܰܝ̈ܗܽܘܢ ܣܰܟܽܘܠܬܳܢܺܝܢ.
22 ܘܳܝ ܠܰܕܓܰܢ̱ܒܳܪܺܝܢ ܠܡܶܫܬܳܐ ܚܰܡܪܳܐ: ܘܰܠܓܰܒܖ̈ܶܐ ܚܰܝܠܬܳܢ̈ܶܐ ܕܡܳܙܓܺܝܢ ܫܰܟܪܳܐ.
23 ܘܰܡܙܰܟܶܝܢ ܠܚܰܝܳܒܳܐ ܡܶܛܽܠ ܫܽܘܚܕܶܗ ܘܙܳܟܽܘܬܶܗ ܕܙܰܟܳܝܳܐ ܡܰܥܒܪܺܝܢ ܡܶܢܗܽܘܢ.
24 ܡܶܛܽܠ ܗܳܢܳܐ ܐܰܝܟ ܕܡܶܬܐܰܟܠܳܐ ܚܰܒܬܳܐ. ܒܠܶܫܳܢܳܐ ܕܢܽܘܪܳܐ ܕܳܐܚܕܳܐ: ܡ̣ܶܢ ܫܰܠܗܶܒܺܝܬܳܐ ܕܡܶܫܬܰܒܩܳܐ ܢܶܬܳܐܟܠܽܘܢ. ܘܥܶܩܳܪܗܽܘܢ ܐܰܝܟ ܚܶܠܳܐ ܢܶܗܘܶܐ. ܘܦܶܪܥܗܽܘܢ ܐܰܝܟ ܥܽܘܪܳܐ ܢܶܣܰܩ. ܥܰܠ ܕܰܐܣܠܺܝܘ ܢܳܡܽܘܣܶܗ ܕܡܳܪܝܳܐ ܚܰܝܠܬܳܢܳܐ: ܘܰܠܡܺܐܡܪܶܗ ܕܩܰܕ݁ܺܝܫܳܐ ܕܺܝܣܪܳܐܶܝܠ ܐܰܪܓܶܙܘ.
25 ܡܶܛܽܠ ܗܳܢܳܐ ܐܶܬܚܰܡܰܬ ܪܽܘܓܙܶܗ ܕܡܳܪܝܳܐ ܥܰܠ ܥܰܡܶܗ. ܘܰܐܪܺܝܡ ܐܺܝܕܶܗ ܥܠܰܝܗܽܘܢ: ܘܰܡܚܳܐ ܐܶܢܽܘܢ. ܘܙܳܥܘ ܛܽܘܖ̈ܶܐ ܘܰܗܘܰܝ̈ ܫܠܰܕܰܝ̈ܗܽܘܢ ܐܰܝܟ ܣܝܳܢܳܐ ܒܓܰܘ ܫܽܘ̈ܩܶܐ ܘܰܒܳܗܳܠܶܝܢ ܟܽܠܗܶܝܢ ܠܳܐ ܗܦܰܟ ܪܽܘܓܙܶܗ: ܘܬܽܘܒ ܐܺܝܕܶܗ ܪܳܡܳܐ.
26 ܘܰܢܪܺܝܡ ܐܳܬܳܐ ܠܥܰܡ̈ܡܶܐ ܡ̣ܶܢ ܪܽܘܚܩܳܐ: ܘܢܰܫܪܶܩ ܠܗܽܘܢ ܡ̣ܶܢ ܣܰܘ̈ܦܶܝܗ̇ ܕܰܐܪܥܳܐ. ܘܒܰܥܓܰܠ ܘܩܰܠܺܝܠܳܐܺܝܬ ܢܺܐܬܽܘܢ.
27 ܠܳܐ ܢܶܬ݁ܛܰܪܦܽܘܢ: ܘܠܳܐ ܢܶܬ݁ܬܰܩܠܽܘܢ. ܘܠܳܐ ܢܢܽܘܡܽܘܢ ܘܠܳܐ ܢܶܕܡܟܽܘܢ. ܘܠܳܐ ܢܶܫܪܽܘܢ ܐܳܣܰܪ ܚܰܨܰܝ̈ܗܽܘܢ: ܘܠܳܐ ܢܶܬܦܰܣ̈ܩܳܢ ܥܰܖ̈ܩܶܐ ܕܰܡܣܳܢܰܝ̈ܗܽܘܢ.
28 ܓܶܐܖ̈ܰܝܗܽܘܢ ܫܢܺܝܢܺܝܢ: ܘܩܶܫ̈ܬܳܬܗܽܘܢ ܡܰܠ̈ܝܳܢ. ܘܦܰܖ̈ܣܳܬܳܐ ܕܖ̈ܰܟܫܗܽܘܢ ܐܰܝܟ ܛܰܖ̈ܳܢܶܐ ܢܶܬܚܰܫ̈ܒܳܢ: ܘܓܝܓ̣ܠܰܝ̈ܗܽܘܢ ܐܰܝܟ ܥܰܠܥܳܠܳܐ.
29 ܘܢܶܗܡܰܬܗܽܘܢ ܐܰܝܟ ܐܰܪܝܳܐ ܕܢܳܗܶܡ: ܘܰܐܝܟ ܓܽܘܪܝܳܐ ܕܰܐܪܝܳܐ ܕܢܳܗܶܡ ܘܳܐܚܶܕ ܬܒܳܪܳܐ. ܘܡܰܥܕܶܐ ܘܠܰܝܬ݁ ܕܰܡܦܰܨܶܐ.
30 ܘܢܶܢܗܰܡ ܥܠܰܝܗܽܘܢ ܒܝܰܘܡܳܐ ܗܰܘ: ܐܰܝܟ ܢܶܗܡܬܶܗ ܕܝܰܡܳܐ. ܘܰܢܚܽܘܪܽܘܢ ܒܰܐܪܥܳܐ: ܘܢܶܗܘܶܐ ܚܶܫܽܘܟܳܐ ܐܘܠܨܳܢܳܐ. ܘܢܽܘܗܪܳܐ ܢܶܚܫܰܟ ܒܥܰܡܛܳܢܗܽܘܢ.