Isaiah 7
The Book of Isaiah
܀ ܐܫܥܝܐ ܙ ܀
1 ܘܰܗܘܳܐ ܒܝܰܘ̈ܡܳܬܶܗ ܕܳܐܚܳܙ: ܒܰܪ ܝܽܘܬܳܡ: ܒܰܪ ܥܽܘܙܺܝܳܐ ܡܰܠܟܳܐ ܕܺܝܗܽܘܕܳܐ: ܣܠܶܩ ܪܳܨܳܢ ܡܰܠܟܳܐ ܕܳܐܪܳܡ: ܘܰܦܩܰܚ ܒܰܪ ܪܽܘܡܰܠܝܳܐ ܡܰܠܟܳܐ ܕܺܝܣܪܳܐܶܝܠ ܠܽܐܘܪܺܫܠܶܡ: ܠܡܶܬܟܰܬܳܫܽܘ ܥܰܡܳܗ̇: ܘܠܳܐ ܐܶܫܟܰܚܘ ܕܢܶܬܟܰܬܫܽܘܢ ܥܠܶܝܗ̇.
2 ܘܶܐܬܶܐܡܰܪ ܠܰܕܒܶܝܬ ܕܰܘܺܝܕ: ܕܶܐܫܬܘܺܝ ܐܳܪܳܡ ܥܰܡ ܐܰܦܪܶܝܡ. ܘܙܳܥ ܠܶܒܶܗ ܘܠܶܒܳܐ ܕܥܰܡܶܗ: ܐܰܝܟ ܕܙܳܝܥܺܝܢ ܐܺܝ̈ܠܳܢܶܐ ܕܥܳܒܳܐ ܡܶܢ ܩܕܳܡ ܪܽܘܚܳܐ.
3 ܘܶܐܡܰܪ ܡܳܪܝܳܐ ܠܶܐܫܰܥܝܳܐ: ܦܽܘܩ ܠܽܐܘܪܥܶܗ ܕܳܐܚܳܙ: ܐܰܢ̱ܬ ܘܫܰܪܢܳܫܽܘܒ ܒܪܳܟ: ܥܰܠ ܓܶܢ̱ܒ ܝܰܡܬܳܐ ܥܶܠܳܝܬܳܐ ܕܒܽܐܘܪܚܳܐ ܕܚܰܩܠܶܗ ܕܩܰܨܪܳܐ.
4 ܘܶܐܡܰܪ ܠܶܗ: ܐܶܙܕܰܗܪ ܘܰܫܠܺܝ: ܘܠܳܐ ܬܶܕܚܰܠ. ܘܠܶܒܳܟ ܠܳܐ ܢܶܬܘܰܪ ܡ̣ܶܢ ܗܳܠܶܝܢ ܬܪܶܝܢ ܕܽܘܢ̈ܒܳܬܳܐ: ܐܽܘ̈ܕܶܐ ܡܚܰܖ̈ܟܶܐ: ܡ̣ܶܢ ܚܶܡܬܳܐ ܕܪܽܘܓܙܶܗ ܕܪܳܨܳܢ ܘܰܕܒܰܪ ܪܽܘܡܰܠܝܳܐ.
5 ܚܠܳܦ ܕܶܐܬܡܰܠܰܟܘ ܥܠܰܝܟ ܒܺܝܫܬܳܐ: ܐܳܪܳܡ: ܘܰܐܦܪܶܝܡ: ܘܒܰܪ ܪܽܘܡܰܠܝܳܐ.
6 ܘܶܐܡܰܪܘ ܢܶܣܰܩ ܠܺܝܗܽܘܕܳܐ ܘܢܶܥܩܪܺܝܗ̇: ܘܢܶܬܪܥܺܝܗ̇ ܘܢܰܡܠܶܟ ܒܳܗ̇ ܡܰܠܟܳܐ ܠܒܰܪ ܛܒܳܐܶܝܠ.
7 ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ: ܠܳܐ ܬܩܽܘܡ ܘܠܳܐ ܬܶܗܘܶܐ.
8 ܡܶܛܽܠ ܕܪܳܫܳܐ ܕܳܐܪܳܡ ܕܰܪܡܣܽܘܩ: ܘܪܺܝܫܳܐ ܕܕܰܪܡܣܽܘܩ ܪܳܨܳܢ: ܘܒܳܬܰܪ ܫܬܺܝܢ ܘܚܰܡܶܫ ܫܢܺܝ̈ܢ: ܢܶܬܰܪ ܐܰܦܪܶܝܡ ܡ̣ܶܢ ܥܰܡܳܐ.
9 ܘܪܺܝܫܳܐ ܕܰܐܦܪܶܝܡ ܫܳܡܪܺܝܢ: ܘܪܺܝܫܳܐ ܕܫܳܡܪܺܝܢ ܒܰܪ ܪܽܘܡܰܠܝܳܐ. ܘܶܐܢ ܠܳܐ ܬܗܰܝܡܢܽܘܢ: ܐܳܦ ܠܳܐ ܬܶܣܬܰܟܠܽܘܢ.
10 ܘܰܐܘܣܶܦ ܬܽܘܒ ܡܳܪܝܳܐ ܠܡܺܐܡܰܪ ܠܐܳܚܳܙ.
11 ܫܐܰܠ ܠܳܟ ܐܳܬܳܐ ܡ̣ܶܢ ܡܳܪܝܳܐ ܐܰܠܳܗܳܟ: ܥܰܡܶܩ: ܫܐܰܠ: ܐܰܘ ܐܰܪܺܝܡ ܠܥܶܠ.
12 ܘܶܐܡܰܪ ܐܳܚܳܙ ܠܳܐ ܐܶܫܐܰܠ: ܘܠܳܐ ܐܶܢܰܣܶܐ ܠܡܳܪܝܳܐ ܐܰܠܳܗܝ.
13 ܘܶܐܡܰܪ ܫܡܰܥܘ ܒܰܝܬܶܗ ܕܕܰܘܺܝܕ: ܙܥܽܘܪܝܳܐ ܗ̱ܝ ܠܟܽܘܢ ܕܡܰܠܐܶܝܢ ܐ̱ܢܬܽܘܢ ܠܓܰܒܪܳܐ: ܐܶܠܳܐ ܕܬܰܠܐܽܘܢ ܐܳܦ ܠܰܐܠܳܗܝ.
14 ܡܶܛܽܠ ܗܳܢܳܐ ܢܶܬܶܠ ܠܟܽܘܢ ܡܳܪܝܳܐ ܐܰܠܳܗܳܐ ܐܳܬܳܐ: ܗܳܐ ܒܬܽܘܠܬܳܐ ܒܳܛܢܳܐ ܘܝܳܠܕܳܐ ܒܪܳܐ: ܘܢܶܬܩܪܶܐ: ܫܡܶܗ ܥܰܡܰܢܽܘܐܶܝܠ.
15 ܚܶܐܘܬܳܐ ܘܕܶܒܫܳܐ ܢܶܐܟܽܘܠ: ܕܢܶܕܰܥ ܠܡܰܣܠܳܝܽܘ ܒܺܝܫܬܳܐ: ܘܰܠܡܶܓܒܳܐ ܛܳܒܬܳܐ.
16 ܡܶܛܽܠ ܕܥܰܕܠܳܐ ܢܶܕܰܥ ܛܰܠܝܳܐ ܠܡܰܣܠܳܝܽܘ ܒܺܝܫܬܳܐ: ܘܰܠܡܶܓܒܳܐ ܛܳܒܬܳܐ: ܬܶܫܬܒܶܩ ܐܰܪܥܳܐ ܕܰܡܥܳܩ ܐܰܢ̱ܬ ܒܳܗ̇ ܡ̣ܶܢ ܩܕܳܡ ܬܪܶܝܢ ܡܰܠܟܶܝ̈ܗ̇.
17 ܡܳܪܝܳܐ ܢܰܝܬܶܐ ܥܠܰܝܟ: ܘܥܰܠ ܥܰܡܳܟ: ܘܥܰܠ ܒܶܝܬ ܐܰܒܽܘܟ: ܝܰܘ̈ܡܳܬܳܐ ܕܠܳܐ ܐܶܬܰܘ ܡ̣ܶܢ ܝܰܘܡܳܐ ܕܰܐܥܒܰܪ ܠܰܐܦܪܶܝܡ ܡ̣ܶܢ ܝܺܗܽܘܕܳܐ ܡܰܠܟܳܐ ܕܳܐܬܽܘܪ.
18 ܘܢܶܗܘܶܐ ܒܝܰܘܡܳܐ ܗܰܘ: ܢܰܫܪܶܩ ܡܳܪܝܳܐ ܠܕܰܒܳܒ̈ܶܐ: ܕܒܰܫܦܽܘܠܰܝ̈ ܢܰܗܖ̈ܰܘܳܬܳܐ ܕܡܶܨܪܶܝܢ: ܘܰܠܕܶܒܽܘܖ̈ܝܳܬܳܐ ܕܒܰܐܪܥܳܐ ܕܳܐܬܽܘܪ.
19 ܘܢܺܐܬܽܘܢ ܘܢܶܬܬܢܺܝܚܽܘܢ ܟܽܠܗܽܘܢ ܒܢܰܚܠܳܐ ܕܝܳܬܽܘܬ: ܘܰܒܦܰܥܖ̈ܶܐ ܕܟܺܐܦܳܐ: ܘܰܒܟܽܠܗܽܘܢ ܚܠܺܝ̈ܠܶܐ.
20 ܒܝܰܘܡܳܐ ܗܰܘ: ܢܶܓܪܽܘܥ ܡܳܪܝܳܐ ܒܰܡܕܰܟܝܳܐ ܪܳܘܝܳܐ: ܒܥܶܒܖ̈ܰܘܗܝ ܕܢܰܗܪܳܐ ܠܡܰܠܟܳܐ ܕܳܐܬܽܘܪ: ܡ̣ܶܢ ܪܺܝܫܶܗ ܘܰܠܣܰܥܪܳܐ ܕܖ̈ܶܓ̣ܠܰܘܗܝ. ܐܳܦ ܕܰܩܢܶܗ ܢܶܫܩܽܘܠ.
21 ܘܢܶܗܘܶܐ ܒܝܰܘܡܳܐ ܗܰܘ: ܢܰܚܶܐ ܓܰܒܪܳܐ ܥܶܓܠܬܳܐ ܕܬܰܘܖ̈ܶܐ: ܘܬܰܪܬܶܝܢ ܥܳܢ̈ܳܐ.
22 ܘܢܶܗܘܶܐ ܡ̣ܶܢ ܣܽܘܓܳܐܐ ܕܥܳܒ̈ܕܳܢ ܚܰܠܒܳܐ: ܢܶܐܟܽܘܠ ܚܺܐܘܬܳܐ: ܡܶܛܽܠ ܕܕܶܒܫܳܐ ܘܚܶܐܘܬܳܐ ܢܶܐܟܽܘܠ ܡܰܢ ܕܡܶܫܬܰܚܰܪ ܒܓܰܘܳܗ̇ ܕܰܐܪܥܳܐ.
23 ܘܢܶܗܘܶܐ ܒܝܰܘܡܳܐ ܗܰܘ ܟܽܠ ܐܰܬܰܪ ܕܺܐܝܬ ܒܶܗ ܐܳܠܶܦ ܓܽܘܦܢܺܝ̈ܢ ܒܐܳܠܶܦ ܕܰܟܣܶܦ: ܠܝܰܥܪܳܐ ܘܰܠܟܽܘ̈ܒܶܐ ܢܶܗܘܶܐ.
24 ܘܰܒܓܶܐܖ̈ܶܐ ܘܰܒܩܶܫ̈ܬܳܬܳܐ ܢܶܥܠܽܘܢ ܠܬܰܡܳܢ. ܡܶܛܽܠ ܕܝܰܥܪܳܐ ܘܟܽܘ̈ܒܶܐ ܬܶܬܡܠܶܐ ܟܽܠܳܗ̇ ܐܰܪܥܳܐ.
25 ܘܟܽܠܗܽܘܢ ܛܽܘܖ̈ܶܐ ܕܕܰܒܪܳܐ ܗ̱ܘܳܬ ܒܗܽܘܢ ܦܰܕܳܢܳܐ. ܢܶܬܕܰܒܪܽܘܢ: ܘܠܳܐ ܬܶܥܽܘܠ ܠܬܰܡܳܢ ܕܶܚܠܬܳܐ ܕܝܰܥܪܳܐ ܘܰܕܟܽܘ̈ܒܶܐ. ܘܢܶܗܘܶܐ ܒܶܝܬ ܪܶܥܝܳܐ ܠܬܰܘܖ̈ܶܐ: ܘܒܶܝܬ ܕܝܳܫܳܐ ܠܥܳܢ̈ܳܐ.