Isaiah 17
The Book of Isaiah
܀ ܐܫܥܝܐ ܝܙ ܀
1 ܡܰܫܩܠܳܐ ܕܕܰܪܡܣܽܘܩ ܗܳܐ ܕܰܪܡܣܽܘܩ ܡܰܥܒܪܳܐ ܡ̣ܶܢ ܩܪܺܝܬܳܐ ܘܬܶܗܘܶܐ ܠܚܽܘܪܒܳܐ ܘܰܠܡܰܦܽܘܠܬܳܐ.
2 ܘܢܶܗܘ̈ܝܳܢ ܫܒܺܝ̈ܩܳܬܳܐ ܩܽܘܖ̈ܝܳܐ ܕܥܰܕܳܘܥܺܝܪ ܘܢܶܗܘ̈ܝܳܢ ܠܰܓܙܳܖ̈ܶܐ ܕܢܶܪܒܥܽܘܢ ܒܗܶܝܢ. ܘܠܳܐ ܢܶܗܘܶܐ ܠܗܽܘܢ ܡܰܗܪܳܢܳܐ.
3 ܘܢܶܬܒܰܛܰܠ ܥܽܘܫܢܳܐ ܡ̣ܶܢ ܐܰܦܪܶܝܡ: ܘܡܰܠܟܽܘܬܳܐ ܡ̣ܶܢ ܕܰܪܡܣܽܘܩ ܘܫܰܪܟܳܐ ܕܰܐܦܪܶܝܡ ܐܰܝܟ ܐܺܝܩܳܪܳܐ ܕܰܒܢܰܝ̈ ܝܺܣܪܳܐܶܝܠ ܢܶܗܘܽܘܢ: ܐܳܡܰܪ ܡܳܪܝܳܐ ܚܰܝܠܬܳܢܳܐ.
4 ܢܶܗܘܶܐ ܒܝܰܘܡܳܐ ܗܰܘ: ܢܶܬܡܰܣܟܰܢ ܐܺܝܩܳܪܶܗ ܕܝܰܥܩܽܘܒ ܘܫܽܘܡܢܳܐ ܕܒܶܣܪܶܗ ܢܶܬܪܙܶܐ.
5 ܘܢܶܗܘܶܐ ܐܰܝܟ ܗܰܘ ܕܟܳܢܶܫ ܚܨܳܕܳܐ ܕܩܳܝܶܡܬܳܐ: ܘܰܕܪܳܥܶܗ ܫܶܒ̈ܠܶܐ ܚܳܨܶܕ. ܘܢܶܗܘܶܐ ܐܰܝܟ ܗܰܘ ܕܰܡܠܰܩܶܛ ܫܶܒ̈ܠܶܐ ܒܥܽܘܡܩܳܐ ܕܰܪܦܳܐܺܝܡ.
6 ܘܢܶܫܬܚܰܪ ܒܶܗ ܒܳܘܥܳܪܳܐ ܐܰܝܟ ܙܰܝܬܳܐ ܕܰܚܒܺܝܛ: ܘܰܬܪܶܝܢ ܬܠܳܬܳܐ ܙܰܝ̈ܬܺܝܢ ܒܪܺܝܫ ܟܰܢܳܐ ܒܣܰܘܟܰܘ̈ܗܝ: ܘܰܐܪܒܥܳܐ ܘܚܰܡܫܳܐ: ܐܳܡܰܪ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ.
7 ܒܶܗ ܒܝܰܘܡܳܐ ܗܰܘ: ܢܶܬܬܟܶܠ ܐ̱ܢܳܫ ܥܰܠ ܥܳܒܽܘܕܶܗ. ܘܥܰܝܢܰܘ̈ܗܝ ܢܚܽܘܖ̈ܳܢ ܠܩܰܕܺܝܫܳܐ ܕܺܝܣܪܳܐܶܝܠ.
8 ܘܠܳܐ ܢܶܬܬܟܶܠ ܥܰܠ ܡܰܕܒܚ̈ܶܐ ܕܰܥܒܰܕܝ̈ ܐܺܝܕܰܘ̈ܗܝ ܕܰܥܒܳܕܝ̈ ܨܶܒ̈ܥܳܬܶܗ. ܘܠܳܐ ܢܚܽܘܪ ܒܰܦܬܰܟܖ̈ܶܐ ܘܰܒܕܶܚ̈ܠܳܬܳܐ.
9 ܒܝܰܘܡܳܐ ܗܰܘ: ܢܶܗܘ̈ܝܳܢ ܩܽܘܖ̈ܝܳܐ ܕܥܽܘܫܢܶܗ ܐܰܝܟ ܓܽܘܒܳܐ ܕܰܚܪܶܫ: ܘܕܰܐܡܺܝܪ ܕܶܐܫܬܒܶܩ ܡ̣ܶܢ ܩܕܳܡ ܒܢܰܝ̈ ܝܺܣܪܳܐܶܝܠ ܘܰܗܘܺܝܬܝ ܠܰܚܒܠܳܐ.
10 ܕܰܛܥܰܝܬܝ ܠܰܐܠܳܗܳܐ ܦܳܪܽܘܩܶܟܝ ܘܰܠܬܰܩܺܝܦܳܐ ܡܥܰܫܢܳܢܶܟܝ ܠܳܐ ܐܶܬܕܰܟܪܬܝ ܡܶܛܽܠ ܗܳܢܳܐ ܬܶܨܒܺܝܢ ܢܶܨܒܬܳܐ ܝܳܐܺܝܬܳܐ. ܒܫܰܒܽܘ̈ܩܶܐ ܢܽܘܟܖ̈ܳܝܶܐ ܬܶܙܪܥܺܝܢܳܗ̇.
11 ܒܝܰܘܡܳܐ ܕܬܶܨܒܺܝܢܳܗ̇: ܢܶܦܽܘܩ ܣܡܳܕܪܳܐ. ܘܰܒܨܰܦܪܳܐ ܙܰܪܥܶܟܝ ܬܰܦܪܥܺܝܢ: ܐܰܝܟ ܢܺܝܪܳܐ ܕܰܩܛܳܦܳܐ ܒܝܰܘܡܳܐ ܟܰܪܝܳܐ: ܘܰܐܝܟ ܟܺܐܒܳܐ ܕܐ̱ܢܳܫܳܐ.
12 ܘܳܝ ܠܚܰܝܠܳܐ ܕܥܰܡ̈ܡܶܐ ܣܰܓܺܝ̈ܐܶܐ: ܕܳܐܙܶܠ ܩܳܠܗܽܘܢ ܐܰܝܟ ܩܳܠܳܐ ܕܝܰܡ̈ܡܶܐ: ܘܰܪܓܽܘܫܝܳܐ ܕܶܐܡ̈ܘܳܬܳܐ.
13 ܐܰܝܟ ܩܳܠܳܐ ܕܡܰܝ̈ܳܐ ܣܰܓܺܝ̈ܐܶܐ: ܢܶܓ̣ܥܽܘܪ ܒܶܗ: ܘܢܶܥܪܽܘܩ ܠܪܽܘܚܩܳܐ. ܘܢܶܪܗܰܛ ܐܰܝܟ ܕܰܚܺܝܚܳܐ ܕܛܽܘܖ̈ܶܐ ܩܕܳܡ ܪܽܘܚܳܐ: ܘܰܐܝܟ ܓܶܠܳܐ ܩܕܳܡ ܥܰܠܥܳܠܳܐ.
14 ܒܙܰܒܢܳܐ ܕܪܰܡܫܳܐ ܘܗܳܐ ܚܽܘܛܳܦܳܐ ܥܰܕܠܳܐ ܗܳܘܶܐ ܨܰܦܪܳܐ: ܘܠܳܐ ܢܶܫܬܰܚܰܪ. ܗܳܕܳܐ ܗ̱ܝ ܦܳܠܓܽܘܬܳܐ ܕܕܳܝܽܘܫܰܢ: ܘܰܡܢܳܬܳܐ ܕܒܳܙܽܘܙܰܢ.