Isaiah 35
The Book of Isaiah
܀ ܐܫܥܝܐ ܠܗ ܀
1 ܢܶܚܕܶܐ ܡܰܕܒܪܳܐ ܨܶܗܝܳܐ. ܘܰܬܕܽܘܨ ܦܩܰܥܬܳܐ: ܘܬܰܦܪܰܥ ܐܰܝܟ ܚܰܡܨܰܠܳܝܬܳܐ.
2 ܘܰܬܕܽܘܨ ܐܰܝܟ ܕܰܝܨܳܐ. ܘܰܒܫܽܘܒܚܳܐ ܐܺܝܩܳܪܳܐ ܕܠܶܒܢܳܢ ܢܶܬܺܝܗܶܒ ܠܳܗ̇. ܘܗܶܕܪܶܗ ܕܟܰܪܡܠܳܐ ܘܰܕܫܰܪܘܳܢܳܐ. ܗܶܢܽܘܢ ܢܶܚܙܽܘܢ ܐܺܝܩܳܪܶܗ ܕܡܳܪܝܳܐ: ܘܗܶܕܪܽܗ ܕܰܐܠܳܗܰܢ.
3 ܙܽܘܗܳܪܳܐ ܘܠܽܘܒܳܒܳܐ ܕܰܡܚܺܝ̈ܠܶܐ ܕܳܐܬܶܐ ܦܳܪܽܘܩܳܐ ܘܦܳܪܶܩ ܠܗܽܘܢ. ܐܶܬܚܰܝܰܠܶܝ̈ܢ ܐܺܝ̈ܕܰܝܳܐ ܕܡܰܖ̈ܦܝܳܢ. ܘܒܽܘܖ̈ܟܳܐ ܕܖ̈ܳܥܠܳܢ ܐܶܫܬܰܪܰܖ̈ܶܝܢ.
4 ܐܶܡܰܪܘ ܠܰܙܥܽܘܖ̈ܰܝ ܠܶܒܳܐ: ܐܶܬܚܰܝܰܠܘ ܘܠܳܐ ܬܶܕܚܠܽܘܢ ܗܳܐ ܐܰܠܳܗܟܽܘܢ ܬܳܒܽܘܥܳܐ ܐܳܬܶܐ. ܐܰܠܳܗܳܐ ܦܳܪܽܘܩܳܐ ܐܳܬܶܐ: ܘܦܳܪܶܩ ܠܟܽܘܢ.
5 ܗܳܝܕܶܝܢ ܢܶܬܦܰܬܚ̈ܳܢ ܥܰܝܢܰܝ̈ܗܽܘܢ ܕܰܥܘܺܝܖ̈ܶܐ. ܘܶܐܕܢܰܝ̈ܗܽܘܢ ܕܚܰܖ̈ܫܶܐ ܢܶܬܦܰܬܚ̈ܳܢ.
6 ܗܳܝܕܶܝܢ ܢܩܰܝܶܙ ܚܓܺܝܖ̈ܶܐ ܐܰܝܟ ܐܰܝܠܳܐ. ܘܢܶܬܦܫܶܛ ܠܶܫܳܢܶܗ ܕܦܺܐܩܳܐ. ܡܶܛܽܠ ܕܶܐܬܬܪܰܥܘ ܡܰܝ̈ܳܐ ܒܡܰܕܒܪܳܐ: ܘܢܰܚ̈ܠܶܐ ܒܰܦܩܰܥܬܳܐ.
7 ܢܶܗܘܽܘܢ ܐܰܓ̈ܡܶܐ ܒܰܐܬܪܳܐ ܚܽܘܪܒܳܐ: ܘܡܰܒܽܘܥܳܐ ܕܡܰܝ̈ܳܐ ܒܶܝܬ ܨܰܗ̈ܘܳܢܶܐ. ܢܺܐܥܶܐ ܥܡܺܝܪܳܐ ܘܩܰܢܝܳܐ ܘܰܐܪܒܢܳܐ ܒܕܰܝܪܳܐ ܕܝܳܪܽܘܖ̈ܶܐ.
8 ܘܢܶܗܘܶܐ ܬܰܡܳܢ ܫܒܺܝܠܳܐ: ܐܘܪܚܳܐ ܩܰܕܺܝܫܬܳܐ ܢܶܬܩܪܶܐ: ܘܠܳܐ ܬܶܥܒܰܪ ܒܶܗ ܛܰܢܦܽܘܬܳܐ. ܘܠܳܐ ܬܶܗܘܶܐ ܒܶܗ ܐܽܘܪܚܳܐ. ܘܣܰܟ̈ܠܐ ܠܳܐ ܢܶܛܥܽܘܢ ܬܰܡܳܢ.
9 ܘܠܳܐ ܢܶܗܘܶܐ ܬܰܡܳܢ ܐܰܪܝܳܐ. ܘܚܰܝ̈ܘܳܬܳܐ ܒܺܝ̈ܫܳܬܳܐ ܠܳܐ ܢܶܣ̈ܩܳܢ: ܘܠܳܐ ܢܶܫܬܰܟ̈ܚܳܢ ܬܰܡܳܢ.
10 ܘܢܺܐܙܽܠܘܢ ܦܖ̈ܺܝܩܶܐ: ܦܖ̈ܺܝܩܰܘܗܝ ܕܡܳܪܝܳܐ. ܘܢܶܬܦܢܽܘܢ ܘܢܶܥܠܽܘܢ ܠܨܶܗܝܽܘܢ ܒܫܽܘܒܚܳܐ. ܘܰܠܥܳܠܡܺܝܢ ܬܶܗܘܶܐ ܚܰܕܽܘܬܳܐ ܥܰܠ ܖ̈ܺܝܫܰܝܗܽܘܢ. ܒܽܘܣܳܡܳܐ ܘܚܰܕܽܘܬܳܐ ܢܰܕܪܟܽܘܢ. ܘܢܶܥܪܩܽܘܢ ܕܽܘ̈ܘܳܢܶܐ ܘܬܶܢ̈ܚܳܬܳܐ.