Isaiah 22
The Book of Isaiah
܀ ܐܫܥܝܐ ܟܒ ܀
1 ܡܰܫܩܠܳܐ ܕܢܰܚܠܳܐ ܕܚܰܙܝܽܘܢ. ܡܳܢܳܐ ܐܺܝܬ ܠܶܟܝ ܗܳܪܟܳܐ: ܕܰܣܠܶܩܬܝ ܒܳܠܶܟܝ ܠܐܶܓܳܪܳܐ.
2 ܕܠܽܘܚܝܳܐ ܐܶܬܡܠܺܝܬܝ ܩܪܺܝܬܳܐ ܩܳܠܳܐ ܐܶܬܡܠܺܝܬܝ ܩܪܺܝܬܳܐ ܥܰܫܺܝܢܬܳܐ ܩܛܺܝܠܰܝ̈ܟܝ ܠܳܐ ܗܘܰܘ ܩܛܺܝ̈ܠܶܐ ܕܣܰܝܦܳܐ: ܐܳܦܠܳܐ ܡܺܝ̈ܬܶܐ ܕܰܩܪܳܒܳܐ.
3 ܟܽܠܗܽܘܢ ܫܰܠܺܝܛܳܢܰܝ̈ܟܝ ܢܳܕܘ ܐܰܟܚܕܳܐ ܡ̣ܶܢ ܩܶܫܬܳܐ ܐܶܬܳܐܣܰܪܘ. ܕܶܐܫܬܚܰܪܘ ܒܶܟܝ: ܐܰܟܚܕܳܐ ܐܶܬܳܐܣܰܪܘ: ܘܰܠܪܽܘܚܩܳܐ ܥܪܰܩܘ.
4 ܡܶܛܽܠ ܗܳܢܳܐ ܐܶܡ̇ܪܶܬ: ܫܽܘܒܩܽܘܢܝ ܐܶܬܡܰܪܡܰܪ ܒܰܒܟܳܬܳܐ ܘܠܳܐ ܬܶܐܠܨܽܘܢ ܠܰܡܒܰܝܳܐܽܘܬܰܢܝ ܥܰܠ ܬܒܳܪܳܗ̇ ܕܒܰܪܬ ܥܰܡܝ.
5 ܡܶܛܽܠ ܕܝܰܘܡܳܐ ܕܰܕܠܽܘܚܝܳܐ ܘܕܰܕܝܳܫܳܐ ܘܕܰܒܟܳܬܳܐ: ܠܡܳܪܝܳܐ ܐܰܠܳܗܳܐ ܚܰܝܠܬܳܢܳܐ ܒܢܰܚܠܳܐ ܕܚܶܙܝܽܘܢ. ܒܨܳܐ ܫܽܘܖ̈ܶܐ: ܘܰܓܥܳܐ ܥܰܠ ܛܽܘܖ̈ܶܐ.
6 ܘܥܺܝܠܳܡ ܫܩܰܠ ܩܛܺܪܩܳܐ: ܒܖ̈ܳܟܒܶܐ ܕܐ̱ܢܳܫܳܐ ܦܰܖ̈ܳܫܶܐ. ܘܫܽܘܪܳܐ ܓܠܳܐ ܣܰܟܖ̈ܶܐ.
7 ܘܢܶܗܘܽܘܢ ܓܒܰܝ̈ܳܐ ܕܥܽܘܡܩܰܝ̈ܟܝ ܡܠܶܝܢ ܡܰܖ̈ܟܒܳܬܳܐ. ܘܦܰܖ̈ܳܫܶܐ ܢܶܣܬܰܕܪܽܘܢ ܥܰܠ ܬܰܖ̈ܥܶܐ.
8 ܘܺܝܗܽܘܕܳܐ ܢܶܓܠܶܐ ܣܶܕܖ̈ܶܐ. ܘܬܶܚܙܶܐ ܒܝܰܘܡܳܐ ܗܰܘ ܙܰܝܢܳܐ ܕܒܶܝܬ ܥܳܒܳܐ.
9 ܘܬܽܘܖ̈ܥܳܬܳܐ ܕܰܩܪܺܝܬܶܗ ܕܕܰܘܺܝܕ ܚܙܰܝܬܽܘܢ ܕܰܣܓܺܝ̈ ܘܰܟܢܰܫܬܽܘܢ ܡܰܝ̈ܳܐ ܕܝܰܡܬܳܐ ܬܰܚܬܳܝܬܳܐ.
10 ܘܰܡܠܰܝܬܽܘܢ ܒ̈ܳܬܶܐ ܕܽܐܘܪܺܫܠܶܡ. ܘܰܥܩܰܪܬܽܘܢ ܒ̈ܳܬܶܐ: ܕܬܰܥܫܢܽܘܢ ܫܽܘܪܳܐ.
11 ܘܩܳܒܝܳܬܳܐ ܥ̣ܒܰܕܬܽܘܢ ܒܶܝܬ ܫܽܘܪܳܐ ܠܡܰܝ̈ܳܐ ܕܝܰܡܬܳܐ ܥܰܬܺܝܩܬܳܐ. ܘܠܳܐ ܚܳܪܬܽܘܢ ܠܥܳܒܽܘܕܳܗ̇ ܘܰܠܓܳܒܽܘܠܳܗ̇ ܡ̣ܶܢ ܪܽܘܚܩܳܐ ܠܳܐ ܚܙܰܝܬܽܘܢ.
12 ܘܰܩܪܳܐ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ ܒܝܰܘܡܳܐ ܗܰܘ: ܠܰܒܟܳܬܳܐ ܘܰܠܡܰܖ̈ܩܕܳܬܳܐ ܘܰܠܩܽܘ̈ܕܝܳܬܳܐ: ܘܠܰܟܒܳܢܳܐ ܕܣܰܩ̈ܶܐ.
13 ܘܗܳܐ ܒܽܘܣܳܡܳܐ ܘܚܰܕܽܘܬܳܐ: ܢܶܟܣܬܳܐ ܕܬܰܘܖ̈ܶܐ: ܘܢܶܟܣܬܳܐ ܕܥܳܢ̈ܳܐ: ܘܡܶܐܟܽܘܠܬܳܐ ܕܒܶܣܪܳܐ: ܘܡܰܫܬܝܳܐ ܕܚܰܡܪܳܐ. ܢܶܐܟܽܘܠ ܘܢܶܫܬܶܐ: ܡܶܛܽܠ ܕܰܡܚܳܪ ܢܡܽܘܬ.
14 ܓܰܠܝܳܐ ܗ̱ܝ ܒܶܐܕܢܰܝ̈ ܡܳܪܝܳܐ ܚܰܝܠܬܳܢܳܐ: ܘܶܐܡܰܪ: ܠܳܐ ܬܶܣܒܽܘܢ ܠܟܽܘܢ ܚܛܺܝܬܳܐ ܗܳܕܶܐ ܥܕܰܡܳܐ ܕܰܬܡܽܘܬܽܘܢ: ܐܳܡܰܪ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ.
15 ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ: ܙܶܠ ܠܘܳܬ ܣܰܘܟܳܢ ܗܳܢܳܐ: ܠܘܳܬ ܫܰܒܢܳܐ ܪܰܒܒܰܝܬܳܐ: ܘܶܐܡܰܪ ܠܶܗ.
16 ܡܳܢܳܐ ܥܳܒܕ ܐܰܢ̱ܬ ܗܳܪܟܳܐ: ܘܡܳܢܳܐ ܐܺܝܬ ܠܳܟ ܗܳܪܟܳܐ. ܕܰܢܩܰܪܬ ܠܳܟ ܗܳܪܟܳܐ ܩܰܒܪܳܐ. ܢܳܩܰܪ ܒܪܰܘܡܳܐ ܩܰܒܪܶܗ: ܘܪܳܫܶܡ ܒܟܺܐܦܳܐ ܡܰܫܪܝܶܗ.
17 ܗܳܐ ܡܳܪܝܳܐ ܡܶܫܕܶܐ ܫܳܕܶܐ ܠܳܟ ܓܰܒܪܳܐ: ܘܡܶܛܥܳܐ ܛܳܥܶܐ ܠܳܟ.
18 ܢܶܐܠܨܳܟ ܒܽܐܘܠܨܳܢܳܐ ܐܰܝܟ ܐܽܘܠܨܳܢܳܐ ܕܶܐܣܦܺܝܪܳܐ: ܒܰܐܪܥܳܐ: ܪܘܰܚܬܳܐ ܕܺܐܝ̈ܕܰܝܳܐ ܬܰܡܳܢ ܬܡܽܘܬ: ܘܬܰܡܳܢ ܡܰܪܟܰܒܬܳܐ ܕܺܐܝܩܳܪܳܟ: ܨܰܥܪܳܐ ܕܒܶܝܬ ܡܳܪܳܟ.
19 ܘܶܐܗܰܓܡܳܟ ܡ̣ܶܢ ܐܺܝܩܳܪܳܟ: ܘܶܐܣܰܚܦܳܟ ܡ̣ܶܢ ܩܝܳܡܳܟ.
20 ܘܢܶܗܘܶܐ ܒܝܰܘܡܳܐ ܗܰܘ: ܐܳܡܰܪ ܡܳܪܝܳܐ: ܐܶܩܪܶܐ ܠܥܰܒܕܝ ܐܶܠܝܰܩܺܝܡ ܒܰܪ ܚܶܠܰܩܝܳܐ.
21 ܘܰܐܠܒܶܫܺܝܘܗܝ ܟܽܘܬܺܝܢܳܟ. ܘܰܒܗܶܡܝܳܢܳܟ ܐܶܚܰܙܩܺܝܘܗܝ. ܘܫܽܘܠܛܳܢܳܟ ܐܶܬܶܠ ܒܺܐܝܕܰܘ̈ܗܝ ܘܢܶܗܘܶܐ ܐܰܒܳܐ ܠܥܳܡܽܘܖ̈ܶܐ ܕܽܐܘܪܺܫܠܶܡ: ܘܰܠܓܰܒܖ̈ܶܐ ܕܒܶܝܬ ܝܺܗܽܘܕܳܐ.
22 ܘܰܢܣܺܝܡ ܩܠܺܝܕܳܐ ܕܒܶܝܬ ܕܰܘܺܝܕ ܥܰܠ ܟܰܬܦܶܗ. ܘܢܶܦܬܰܚ: ܘܠܰܝܬ ܕܢܶܐܚܽܘܕ. ܘܢܶܐܚܽܘܕ ܘܠܰܝܬ ܕܢܶܦܬܰܚ.
23 ܘܶܐܩܫܶܝܘܗܝ ܣܶܟܬܳܐ ܒܰܐܬܪܳܐ ܡܗܰܝܡܢܳܐ. ܘܢܶܗܘܶܐ ܟܽܘܪܣܝܳܐ ܕܺܐܝܩܳܪܳܐ ܠܒܶܝܬ ܐܰܒܽܘܗܝ.
24 ܘܢܶܬܠܽܘܢ ܥܠܰܘܗ̱ܝ ܟܠܶܗ ܐܺܝܩܳܪܳܐ ܕܒܶܝܬ ܐܰܒܽܘܗܝ: ܡܝܰܩܪܳܐ ܘܰܡܫܰܒܚܳܐ: ܘܟܽܠ ܡܳܐܢܳܐ ܙܥܽܘܪܳܐ: ܡ̣ܶܢ ܡܳܐܢܳܐ ܕܰܙܡܳܪܳܐ: ܘܰܥܕܰܡܳܐ ܠܡܳܐܢܳܐ ܕܟܶܢܳܪܳܐ.
25 ܒܝܰܘܡܳܐ ܗܰܘ: ܐܳܡܰܪ ܡܳܪܝܳܐ ܚܰܝܠܬܳܢܳܐ: ܬܶܬܥܩܰܪ ܣܶܟܬܳܐ ܕܰܢܩܺܝܫܳܐ ܒܰܐܬܪܳܐ ܡܗܰܝܡܢܳܐ. ܘܬܶܣܬܚܶܦ ܘܬܶܦܶܠ. ܘܢܺܐܒܰܕ ܫܩܳܠܳܐ ܕܣܺܝܡ ܥܠܶܝܗ̇: ܡܶܛܽܠ ܕܡܳܪܝܳܐ ܡܰܠܶܠ.