Isaiah 30
The Book of Isaiah
܀ ܐܫܥܝܐ ܠ ܀
1 ܘܳܝ ܠܰܒܢܰܝܳܐ ܡܳܖ̈ܽܘܕܶܐ: ܐܳܡܰܪ ܡܳܪܝܳܐ: ܕܰܥܒܰܕܘ ܬܰܪܥܺܝܬܳܐ ܘܠܳܐ ܡܶܢܝ. ܘܢܰܩܺܝܘ ܢܽܘܩܳܝ̈ܶܐ: ܕܠܳܐ ܡ̣ܶܢ ܪܽܘܚܝ. ܕܢܰܘܣܦܽܘܢ ܚܛܳܗ̈ܶܐ ܥܰܠ ܚܛܳܗ̈ܶܐ.
2 ܕܶܐܙܰܠܘ ܠܡܶܚܰܬ ܠܡܶܨܪܶܝܢ: ܘܡ̣ܶܢ ܦܽܘܡܝ ܠܳܐ ܫܐܶܠܘ ܕܢܶܬܥܰܫܢܽܘܢ ܒܥܽܘܫܢܶܗ ܕܦܶܪܥܽܘܢ. ܘܢܶܣܬܰܬܪܽܘܢ ܒܛܶܠܳܠܳܗ̇ ܕܡܶܨܪܶܝܢ.
3 ܢܶܗܘܶܐ ܠܟܽܘܢ ܥܽܘܫܢܶܗ ܕܦܶܪܥܽܘܢ ܠܒܶܗܬܬܳܐ: ܘܣܶܬܳܪܳܐ ܕܛܶܠܳܠܳܗ̇ ܕܡܶܨܪܶܝܢ ܠܬܰܚܦܺܝܬܳܐ.
4 ܡܶܛܽܠ ܕܗܽܘ ܒܨܳܥܳܢ: ܘܪܰܘܖ̈ܒܳܢܰܘܗܝ ܘܡܰܠܰܐܟܰܘ̈ܗܝ ܚܰܠܦ̈ܶܐ ܢܶܠܐܽܘܢ.
5 ܠܘܳܬ ܥܰܡܳܐ ܕܠܳܐ ܡܰܘܬܰܪ ܠܗܽܘܢ: ܠܳܐ ܠܥܽܘܕܪܳܢܳܐ ܘܠܳܐ ܠܗܶܢܝܳܢܳܐ: ܐܶܠܳܐ ܠܒܶܗܬܬܳܐ ܘܰܠܚܶܣܕܳܐ.
6 ܡܰܫܩܠܳܐ ܕܰܒܥܺܝܪܳܐ ܕܬܰܝܡܢܳܐ ܒܰܐܪܥܳܐ ܐܰܠܺܝܨܬܳܐ ܘܰܡܥܳܩܬܳܐ. ܐܰܪܝܳܐ ܘܓܽܘܪܝܳܐ ܕܰܐܪܝܳܐ: ܘܡܶܢܗܽܘܢ ܐܶܣܦܶܣ ܘܚܰܪܡܳܢܳܐ ܕܦܳܪܰܚ. ܢܶܫܩܠܽܘܢ ܥܰܠ ܚܰܨܳܐ ܕܥܺܝ̈ܠܶܐ ܥܽܘܬܪܗܽܘܢ: ܘܥܰܠ ܓܰܒܳܐ ܕܓܰܡ̈ܠܶܐ ܓܰܙܰܝ̈ܗܽܘܢ: ܠܘܳܬ ܥܰܡܳܐ ܕܠܳܐ ܡܰܗܢܶܐ ܠܗܽܘܢ.
7 ܘܡܶܨܖ̈ܳܝܶܐ ܒܰܣܪܺܝܩܽܘܬܳܐ ܘܰܒܕܰܓܳܠܽܘܬܳܐ ܡܥܰܕܪܺܝܢ ܡܶܛܽܠ ܗܳܢܳܐ ܩܪܺܝܬ ܠܗܽܘܢ: ܕܰܣܪܺܝܩ ܗ̱ܘ̣ ܬܽܘܟܠܳܢܗܽܘܢ ܗܳܢܳܐ.
8 ܡܶܟܺܝܠ ܬܳܐ ܟܬܽܘܒ ܥܰܠ ܠܽܘ̈ܚܶܐ ܗܳܠܶܝܢ: ܘܥܰܠ ܟܬܳܒܳܐ ܕܰܩܝܳܡܗܽܘܢ: ܕܢܶܗܘܶܐ ܠܝܰܘܡܳܐ ܐ̱ܚܪܳܝܳܐ ܠܣܳܗܕܽܘܬܳܐ ܠܥܳܠܰܡ ܥܳܠܡܺܝܢ.
9 ܡܶܛܽܠ ܕܥܰܡܳܐ ܗ̱ܘ̣ ܡܡܰܪܡܪܳܢܳܐ: ܒܢܰܝ̈ܳܐ ܐܶܢܽܘܢ ܕܰܓ̈ܳܠܶܐ: ܒܢܰܝ̈ܳܐ ܕܠܳܐ ܨܒܰܘ ܠܡܶܫܡܰܥ ܢܳܡܽܘܣܶܗ ܕܡܳܪܝܳܐ.
10 ܕܶܐܡܰܪܘ ܠܚܰܙܳܝ̈ܶܐ ܕܠܳܐ ܬܶܚܙܽܘܢ: ܘܠܰܢܒܺܝ̈ܶܐ ܕܠܳܐ ܬܶܬܢܰܒܽܘܢ ܠܰܢ ܡܰܟܣܳܢܽܘܬܳܐ ܡܰܠܶܠܘ ܠܰܢ ܦܳܠܓܽܘܬܳܐ: ܘܰܚܙܳܘ ܠܰܢ ܟܰܕܳܒܽܘܬܳܐ.
11 ܘܰܐܣܛܰܐܽܘܢ ܡ̣ܶܢ ܐܽܘܪܚܳܐ. ܘܰܐܗܦܟܽܘܢ ܡ̣ܶܢ ܫܒܺܝ̈ܠܶܐ. ܘܒܰܛܶܠܘ ܡܶܢܰܢ ܠܩܰܕܺܝܫܳܐ ܕܺܝܣܪܳܐܶܝܠ.
12 ܡܶܛܽܠ ܗܳܢܳܐ: ܗܳܟܰܢܳܐ ܐܳܡܰܪ ܡܳܪܝܳܐ ܩܰܕܺܝܫܳܐ ܕܺܝܣܪܳܐܶܝܠ: ܥܰܠ ܕܰܐܣܠܺܝܬܽܘܢ ܡܶܠܬܳܐ ܗܳܕܶܐ: ܘܶܐܬܬܟܶܠܬܽܘܢ ܒܰܛܠܽܘܡܝܳܐ: ܘܰܪܛܰܢܬܽܘܢ ܘܶܐܬܬܟܶܠܬܽܘܢ ܥܠܰܘܗ̱ܝ.
13 ܡܶܛܽܠ ܗܳܢܳܐ ܬܶܗܘܶܐ ܠܟܽܘܢ ܚܛܺܝܬܳܐ ܗܳܕܶܐ ܐܰܝܟ ܬܽܘܪܥܬܳܐ ܕܢܶܦܠܰܬ: ܘܰܐܝܟ ܫܽܘܪܳܐ ܪܳܡܳܐ ܕܡ̣ܶܢ ܫܶܠܝܳܐ ܗܘܳܐ ܬܒܳܪܶܗ.
14 ܘܰܬܒܪܶܗ ܐܰܝܟ ܬܒܳܪܳܐ ܕܡܳܐܢܳܐ ܕܦܰܚܳܪܳܐ ܕܰܬܒܺܝܪ ܕܠܳܐ ܚܰܘܣܳܢ. ܕܠܳܐ ܡܶܫܬܰܟܰܚ ܒܬܶܒܖ̈ܰܘܗܝ ܚܶܨܦܳܐ ܠܡܶܣܰܒ ܒܶܗ ܢܽܘܪܳܐ ܡ̣ܶܢ ܝܰܩܕܳܢܳܐ: ܘܳܐܦܠܳܐ ܠܡܶܓ̣ܪܰܦ ܒܶܗ ܡܰܝ̈ܳܐ ܡ̣ܶܢ ܓܽܘܒܳܐ.
15 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ ܩܰܕܺܝܫܳܐ ܕܺܝܣܪܳܐܶܝܠ: ܡܳܐ ܕܬܳܒܬܽܘܢ ܘܶܐܬܬܰܢܰܚܬܽܘܢ: ܬܶܬܦܰܪܩܽܘܢ. ܘܰܒܫܶܠܝܳܐ ܘܰܒܣܰܒܪܳܐ ܬܶܗܘܶܐ ܓܰܢ̱ܒܳܪܽܘܬܟܽܘܢ ܘܠܳܐ ܐܶܬܛܦܺܝܣܬܽܘܢ.
16 ܘܶܐܡܰܪܬܽܘܢ ܠܳܐ ܗܳܟܰܢܳܐ: ܥܰܠ ܖ̈ܰܟܫܳܐ ܢܶܪܟܰܒ. ܘܥܰܠ ܩܰܠܺܝܠܳܐ ܢܶܥܪܽܘܩ. ܡܶܛܽܠ ܗܳܢܳܐ ܬܶܥܪܩܽܘܢ: ܘܢܶܗܘܽܘܢ ܩܰܠܺܝܠܺܝܢ ܖ̈ܳܕܽܘܦܰܝܟܽܘܢ.
17 ܐܰܠܶܦ ܡ̣ܶܢ ܟܐܳܬܳܐ ܕܚܰܕ: ܘܡ̣ܶܢ ܟܐܳܬܳܐ ܕܚܰܡܫܳܐ ܬܶܥܪܩܽܘܢ: ܥܕܰܡܳܐ ܕܬܶܫܬܰܚܪܽܘܢ ܐܰܝܟ ܥܪܳܪܳܐ ܥܰܠ ܪܺܝܫ ܛܽܘܪܳܐ: ܘܰܐܝܟ ܐܳܬܳܐ ܥܰܠ ܪܳܡܬܳܐ.
18 ܡܶܛܽܠ ܕܰܢܫܰܪܶܐ ܡܳܪܝܳܐ ܠܰܡܪܰܚܳܡܘ ܥܠܰܝܟܽܘܢ. ܘܢܶܬܬܪܺܝܡ ܠܰܡܪܰܚܳܦܘ ܥܠܰܝܟܽܘܢ ܡܶܛܽܠ ܕܰܐܠܳܗܳܐ ܗ̱ܘ̣ ܕܰܝܳܢܳܐ ܡܳܪܝܳܐ. ܘܛܽܘܒܰܝܗܽܘܢ ܠܟܽܠ ܕܰܡܣܰܟܶܝܢ ܠܶܗ.
19 ܡܶܛܽܠ ܕܥܰܡܳܐ ܒܨܶܗܝܽܘܢ ܝܳܬܶܒ: ܘܒܽܐܘܪܺܫܠܶܡ ܡܶܒܟܶܐ ܠܳܐ ܬܶܒܟܽܘܢ ܡܪܰܚܳܡܽܘ ܢܪܰܚܶܡ ܥܰܠ ܩܳܠܳܐ ܕܰܓ̣ܥܳܬܟܽܘܢ: ܘܡܳܐ ܕܰܫܡܰܥ ܢܶܥܢܶܝܟܽܘܢ.
20 ܘܢܶܬܶܠ ܠܟܽܘܢ ܡܳܪܝܳܐ ܠܰܚܡܳܐ ܒܽܐܘܠܨܳܢܳܐ: ܘܡܰܝ̈ܳܐ ܒܽܐܘܠܨܳܢܳܐ. ܘܠܳܐ ܢܟܰܢܶܫ ܬܽܘܒ ܠܡܰܛܥܝܳܢܰܝ̈ܟܽܘܢ ܘܢܶܚܙ̈ܝܳܢ ܥܰܝܢܰܝ̈ܟܽܘܢ ܒܡܰܛܥܝܳܢܰܝ̈ܟܽܘܢ.
21 ܘܶܐܕܢܰܝ̈ܟܽܘܢ ܢܶܫܡ̈ܥܳܢ ܡܶܠܬܳܐ ܡ̣ܶܢ ܒܶܣܬܰܪܟܽܘܢ. ܕܳܐܡܪܳܐ: ܗܳܕܳܐ ܗ̱ܝ ܐܽܘܪܚܳܐ: ܙܶܠܘ ܒܳܗ̇. ܘܠܳܐ ܬܶܣܛܽܘܢ ܠܝܰܡܺܝܢܳܐ ܘܰܠܣܶܡܳܠܳܐ.
22 ܘܰܬܛܰܘܫܽܘܢ ܣܺܐܡܳܐ ܕܰܩܪܺܝܡ ܠܰܦܬܰܟܖ̈ܰܝܟܽܘܢ: ܘܦܶܕܬܳܐ ܕܢܶܣܟܬܳܐ ܕܕܰܗܒܗܽܘܢ. ܘܬܶܕܪܽܘܢ ܐܶܢܽܘܢ ܐܰܝܟ ܡܰܝ̈ܳܐ ܕܟܶܦܣܳܢܺܝܬܳܐ. ܘܰܐܝܟ ܢܦܳܬܳܐ ܬܰܦܩܽܘܢ ܐܶܢܽܘܢ.
23 ܘܢܶܬܺܝܗܶܒ ܡܶܛܪܳܐ ܠܙܰܪܥܟܽܘܢ: ܕܬܶܙܪܥܽܘܢ ܒܰܐܪܥܳܐ: ܘܰܥܒܽܘܪܳܐ ܕܙܰܪܥܳܐ ܕܰܐܪܥܳܐ. ܢܶܗܘܶܐ ܕܰܗܺܝܢ ܘܫܰܡܺܝܢ: ܪܶܥܝܳܐ ܕܰܒܥܺܝܪܟܽܘܢ ܒܝܰܘܡܳܐ ܗܰܘ ܒܰܐܬܪܳܐ ܫܰܡܺܝܢܳܐ.
24 ܘܒܰܩܖ̈ܶܐ ܘܰܐܖ̈ܘܳܢܶܐ ܕܦܳܠܚܺܝܢ ܒܰܐܪܥܳܐ: ܒܠܺܝܠܳܐ ܚܰܡܺܝܡܳܐ ܢܶܐܟܠܽܘܢ: ܕܰܡܣܰܠܰܩ ܒܪܰܦܫܳܐ ܘܰܒܡܰܕܪܝܳܐ.
25 ܘܢܶܗܘܶܐ ܥܰܠ ܟܠ ܛܽܘܪ ܕܪܳܡ: ܘܥܰܠ ܟܽܠ ܪܳܡܬܳܐ ܕܪܳܡܳܐ: ܢܶܪܕܽܘܢ ܬܰܦ̈ܶܐ ܕܡܰܝ̈ܳܐ ܒܝܰܘܡܳܐ ܕܩܶܛܠܳܐ ܪܰܒܳܐ: ܘܰܒܣܽܘܚܳܦܳܐ ܕܡܰܓ̈ܕܠܶܐ.
26 ܘܢܶܗܘܶܐ ܢܽܘܗܪܶܗ ܕܣܰܗܪܳܐ ܐܰܝܟ ܢܽܘܗܪܶܗ ܕܫܶܡܫܳܐ. ܘܢܽܘܗܪܶܗ ܕܫܶܡܫܳܐ ܢܶܗܘܶܐ ܚܰܕ ܒܫܰܒܥܳܐ: ܐܰܝܟ ܢܽܘܗܪܳܐ ܕܫܰܒܥܳܐ ܝܳܘ̈ܡܺܝܢ: ܒܝܰܘܡܳܐ ܕܢܶܥܨܽܘܒ ܡܳܪܝܳܐ ܬܒܪܳܐ ܕܥܰܡܶܗ: ܘܟܺܐܒܳܐ ܕܰܡܚܽܘܬܶܗ ܢܰܐܣܶܐ.
27 ܗܳܐ ܫܡܶܗ ܕܡܳܪܝܳܐ ܐܳܬܶܐ ܡ̣ܶܢ ܪܽܘܚܩܳܐ ܝܳܩܶܕ ܪܽܘܓܙܶܗ: ܘܰܫܒܺܝܚ ܡܰܫܩܠܶܗ. ܘܣܶܦ̈ܘܳܬܶܗ ܡܰܠ̈ܝܳܢ ܪܓܙܳܐ ܘܠܶܫܳܢܶܗ ܐܰܝܟ ܢܽܘܪܳܐ ܕܝܳܩܕܳܐ.
28 ܘܪܽܘܚܶܗ ܐܰܝܟ ܢܰܚܠܳܐ ܕܓܳܪܶܦ. ܥܕܰܡܳܐ ܠܨܰܘܪܳܐ ܢܶܦܣܽܘܩ: ܠܡܶܕܠܰܚ ܥܰܡ̈ܡܶܐ ܡܶܛܽܠ ܛܳܠܝܽܘܬܗܽܘܢ ܣܪܺܝܩܬܳܐ: ܘܠܰܦܓܽܘܕܬܳܐ ܡܰܛܥܝܳܢܺܝܬܳܐ ܕܥܰܠ ܦܰܟܰܝ̈ܗܽܘܢ ܕܥܰܡ̈ܡܶܐ.
29 ܬܶܫܒܽܘܚܬܳܐ ܢܶܗܘܶܐ ܠܟܽܘܢ ܟܠܺܝܠܳܐ ܕܶܐܬܩܰܕܰܫ ܒܚܰܓܳܐ. ܘܚܰܕܽܘܬܶܗ ܕܠܶܒܳܐ ܐܰܝܟ ܗܰܘ ܕܰܡܗܰܠܶܟ ܒܚܰܕܽܘܬܳܐ: ܠܡܶܐܬܳܐ ܠܛܽܘܪܶܗ ܕܡܳܪܝܳܐ: ܠܘܳܬ ܬܰܩܺܝܦܳܐ ܕܝܰܥܩܽܘܒ.
30 ܘܢܰܫܡܰܥ ܡܳܪܝܳܐ ܫܽܘܒܚܳܐ ܕܩܳܠܶܗ. ܘܰܡܚܽܘܬܳܐ ܕܰܕܪܥܶܗ ܢܚܳܘܶܐ ܒܚܶܡܬܳܐ ܕܪܽܘܓܙܳܐ: ܘܰܒܫܰܠܗܶܒܺܝܬܳܐ ܕܢܽܘܪܳܐ ܕܳܐܟܠܳܐ: ܒܙܳܪܺܝܦܬܳܐ ܕܚܳܒܛܳܐ ܘܟܺܐܦ̈ܶܐ ܕܒܰܪܕܳܐ.
31 ܡܶܛܽܠ ܕܡ̣ܶܢ ܩܕܳܡ ܪܰܒܽܘܬܶܗ ܕܡܳܪܝܳܐ ܢܶܬܬܒܰܪ ܐܳܬܽܘܪܳܝܳܐ: ܘܰܒܫܰܒܛܳܐ ܢܶܒܠܰܥ.
32 ܘܢܶܗܘܶܐ ܒܟܽܠܗܽܘܢ ܥܒܳܕܘ̈ܗܝ: ܚܽܘܛܪܳܐ ܕܫܽܘܥܒܳܕܳܐ ܕܰܢܢܺܝܚ ܡܳܪܝܳܐ ܥܠܰܘܗ̱ܝ: ܒܰܦܠܰܓ̈ܶܐ: ܘܰܒܟܶܢܳܖ̈ܶܐ ܘܒܰܩܪܳܒܳܐ ܥܰܫܺܝܢܳܐ ܢܶܬܟܰܬܰܫ ܒܶܗ.
33 ܡܶܛܽܠ ܕܰܡܛܰܝܶܒ ܡ̣ܶܢ ܩܕܳܡ ܝܰܘ̈ܡܳܬܳܐ ܡܶܐܟܽܘܠܬܶܗ ܐܳܦ ܗܺܝ ܐܶܬܛܰܝܒܰܬ ܕܬܰܡܠܶܟ: ܘܥܰܡܩܰܬ ܘܪܰܘܚܰܬ ܒܶܝܬ ܡܰܥܡܪܳܗ̇ ܣܰܓܺܝܐܺܝܢ ܩܰܝ̈ܣܶܐ ܘܢܽܘܪܳܐ. ܘܰܢܫܰܡܬܶܗ ܕܡܳܪܝܳܐ ܐܰܝܟ ܢܰܚܠܳܐ ܕܟܶܒܪܺܝܬܳܐ ܕܝܳܩܕܳܐ ܒܶܗ.