Isaiah 38
The Book of Isaiah
܀ ܐܫܥܝܐ ܠܚ ܀
1 ܒܗܽܘܢ ܒܝܰܘ̈ܡܳܬܳܐ ܗܳܢܽܘܢ: ܐܶܬܟܪܰܗ ܚܶܙܰܩܝܳܐ ܠܰܡܡܳܬ. ܘܶܐܬܳܐ ܠܘܳܬܶܗ ܐܶܫܰܥܝܳܐ ܢܒܝܳܐ ܒܰܪ ܐܰܡܽܘܨ: ܘܶܐܡܰܪ ܠܶܗ: ܗܳܟܰܢܳܐ ܐܳܡܰܪ ܡܳܪܝܳܐ. ܦܰܩܶܕ ܥܰܠ ܒܰܝܬܳܟ: ܡܶܛܽܠ ܕܡܳܐܶܬ ܐܰܢ̱ܬ: ܘܠܳܐ ܚܳܝܶܐ ܐܰܢ̱ܬ.
2 ܘܰܐܦܢܺܝ ܚܶܙܰܩܝܳܐ ܐܰܦܰܘ̈ܗܝ ܠܐܶܣܬܳܐ. ܘܨܰܠܺܝ ܩܕܳܡ ܡܳܪܝܳܐ ܘܶܐܡܰܪ.
3 ܐܽܘܢ ܡܳܪܝܳܐ: ܐܶܬܕܰܟܪ ܕܗܰܠܟܶܬ ܩܕܳܡܰܝܟ ܒܩܽܘܫܬܳܐ: ܘܰܒܠܶܒܳܐ ܫܰܠܡܳܐ: ܘܰܕܫܰܦܺܝܪ ܩܕܳܡܰܝܟ ܥܶܒܕܶܬ ܘܰܒܟܳܐ ܚܶܙܰܩܝܳܐ ܒܟܳܬܳܐ ܪܰܒܬܳܐ.
4 ܘܰܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܐܶܫܰܥܝܳܐ ܢܒܺܝܳܐ: ܠܡܶܐܡܰܪ.
5 ܙܶܠ ܐܶܡܰܪ ܠܚܶܙܰܩܝܳܐ ܡܰܠܟܳܐ ܕܺܝܗܽܘܕܳܐ: ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܶܗ ܕܕܰܘܺܝܕ ܐܰܒܽܘܟ: ܫܶܡܥܶܬ ܨܠܽܘܬܳܟ: ܘܰܚܙܺܝܬ ܕܶܡܥܰܝ̈ܟ ܗܳܐ ܡܰܘܣܶܦ ܐ̱ܢܳܐ ܥܰܠ ܝܰܘ̈ܡܳܬܳܟ ܚܰܡܫܰܥܶܣܖ̈ܶܐ ܫܢܺܝ̈ܢ.
6 ܘܡ̣ܶܢ ܐܺܝܕܰܘ̈ܗܝ ܕܡܰܠܟܳܐ ܕܳܐܬܽܘܪ ܐܶܦܰܨܶܝܟ: ܘܠܰܡܕܺܝܢ̱ܬܳܐ ܗܳܕܶܐ. ܘܰܐܓܶܢ ܥܰܠ ܡܕܺܝܢ̱ܬܳܐ ܗܳܕܶܐ: ܘܶܐܦܪܩܺܝܗ̇.
7 ܘܗܳܕܶܐ ܠܳܟ ܐܳܬܳܐ ܡ̣ܶܢ ܩܕܳܡ ܡܳܪܝܳܐ ܕܥܳܒܶܕ ܡܳܪܝܳܐ ܦܶܬܓܳܡܳܐ ܗܳܢܳܐ ܕܶܐܡܰܪ.
8 ܗܳܐ ܡܰܗܦܶܟ ܐ̱ܢܳܐ ܛܶܠܳܠܳܐ ܕܕܰܖ̈ܓܶܐ ܕܢܳܚܶܬ ܒܕܰܖ̈ܓܶܐ ܕܳܐܚܳܙ ܐܰܒܽܘܟ: ܫܶܡܫܳܐ ܠܒܶܣܬܪܶܗ ܥܶܣܪܳܐ ܕܰܖ̈ܓܺܝܢ ܘܰܗܦܰܟ ܫܶܡܫܳܐ ܠܒܶܣܬܪܶܗ ܥܶܣܪܳܐ ܕܰܖ̈ܓܺܝܢ: ܒܕܰܖ̈ܓܶܐ ܕܰܢܚܶܬ.
9 ܟܬܳܒܶܗ ܕܚܶܙܰܩܝܳܐ ܡܰܠܟܳܐ ܕܺܝܗܽܘܕܳܐ: ܟܰܕ ܐܶܬܟܪܰܗ: ܘܰܚܝܳܐ ܡ̣ܶܢ ܟܽܘܪܗܳܢܶܗ.
10 ܐܶܢܳܐ ܐܶܡܪܶܬ ܕܰܒܦܶܠܓܽܘܬ ܝܰܘ̈ܡܰܝ ܐܶܙܰܠ: ܒܬܰܪܥܳܐ ܕܰܫܝܽܘܠ ܫܶܒܩܶܬ ܫܰܪܟܳܐ ܕܰܫܢܰܝ̈.
11 ܐܶܡܪܶܬ ܕܠܳܐ ܐܶܚܙܶܐ ܠܡܳܪܝܳܐ ܒܰܐܪܥܳܐ ܕܚܰܝ̈ܶܐ ܘܬܽܘܒ ܠܳܐ ܐܶܚܙܶܐ ܐ̱ܢܳܫܳܐ ܥܰܡ ܥܳܡܖ̈ܰܝ ܚܶܦܪܳܐ.
12 ܕܳܪܝ ܫܩܰܠ ܘܰܥܒܰܪ ܡܶܢܝ: ܐܰܝܟ ܡܰܫܟܢܳܐ ܕܖ̈ܳܥܰܘܳܬܳܐ. ܐܶܬܩܦܶܕܘ ܐܰܝܟ ܣܺܝܪܳܣ ܚܰܝܰܝ̈. ܘܰܐܝܟ ܢܰܘܠܳܐ ܕܩܰܪܺܝܒ ܠܡܶܬܓܕܕܽܘ. ܡ̣ܶܢ ܐܺܝܡܳܡܳܐ ܘܰܥܕܰܡܳܐ ܠܠܺܠܝܳܐ ܐܰܫܠܶܡܬܳܢܝ.
14 ܐܰܝܟ ܣܢܽܘܢܺܝܬܳܐ ܕܰܡܢܰܨܪܳܐ ܢܰܨܪܰܬ ܘܰܐܝܟ ܝܳܘܢܳܐ ܢܰܗܡܶܬ ܐܰܪܺܝܡܶܬ ܥܰܝܢܰܝ̈ ܠܰܡܪܰܘܡܳܐ. ܡܳܪܝܳܐ ܦܰܨܳܢܝ: ܘܒܰܣܶܡܰܝܢܝ.
15 ܘܡܳܢܳܐ ܐܶܡܰܠܶܠ: ܐܶܡܰܪ ܠܺܝ ܘܗܽܘ ܥܒܰܪ ܘܰܐܢܶܕ ܟܽܠܳܗ̇ ܫܶܢܰܬܝ: ܥܰܠ ܡܪܳܖ̈ܶܐ ܕܢܰܦܫܝ. ܡܳܪܝܳܐ ܥܠܰܝܗܽܘܢ ܢܶܚܽܘܢ.
16 ܡܶܛܽܠ ܗܳܠܶܝܢ ܚܰܝ̈ܶܐ ܕܪܽܘܚܝ ܐܰܚܠܶܡܰܝܢܝ ܘܰܐܚܳܢܝ.
17 ܗܳܐ ܠܰܫܠܳܡܳܐ ܡܰܪܘ ܠܺܝ ܡܪܳܖ̈ܶܐ. ܘܰܐܢ̱ܬ ܨܒܰܝܬ ܒܢܰܦܫܝ ܕܠܳܐ ܬܶܒܠܶܐ ܒܰܚܒܠܳܐ ܡܶܛܽܠ ܕܰܫܕܰܝܬ ܒܶܣܬܰܪ ܓܽܘܫܡܳܟ ܟܽܠܗܽܘܢ ܚܛܳܗܰܝ̈.
18 ܡܶܛܽܠ ܕܠܳܐ ܫܝܽܘܠ ܬܶܪܕܶܐ ܠܳܟ. ܘܳܐܦܠܳܐ ܡܰܘܬܳܐ ܢܫܰܒܚܳܟ ܘܠܳܐ ܢܣܰܒܪܽܘܢ ܠܩܽܘܫܬܳܟ ܐܰܝܠܶܝܢ ܕܢܳܚܬܺܝܢ ܠܓܽܘܒܳܐ.
19 ܐܶܠܳܐ ܢܰܘܕܽܘܢ ܠܳܟ ܚܰܝ̈ܶܐ ܕܰܐܟܘܳܬܝ ܝܳܘܡܳܢܳܐ ܘܰܐܒܳܐ ܠܰܒܢܰܝ̈ܳܐ ܢܚܳܘܶܐ ܗܰܝܡܳܢܽܘܬܳܟ.
20 ܡܳܪܝܳܐ ܢܶܦܪܩܰܢ: ܘܬܶܫ̈ܒܚܳܬܶܗ ܢܫܰܒܰܚ: ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ: ܒܒܰܝܬ: ܕܡܳܪܝܳܐ.
21 ܘܶܐܡܰܪ ܚܶܙܰܩܝܳܐ: ܡܳܢܳܐ ܗ̱ܝ ܐܳܬܳܐ ܕܣܳܠܶܩ ܐ̱ܢܳܐ ܠܒܰܝܬܶܗ ܕܡܳܪܝܳܐ.
22 ܘܶܐܡܰܪ ܐܶܫܰܥܝܳܐ: ܢܶܣܒܽܘܢ ܕܒܰܠܬܳܐ ܕܬܺܐܢ̈ܶܐ. ܘܰܢܣܺܝܡܽܘܢ ܥܰܠ ܫܽܘܚܢܳܐ: ܘܡܶܬܚܠܶܡ.