Isaiah 42
The Book of Isaiah
܀ ܐܫܥܝܐ ܡܒ ܀
1 ܗܳܐ ܠܥܰܒܕܝ ܣܰܡܟܶܬ. ܘܰܒܓܰܒܺܝ ܨܒܳܬ ܢܰܦܫܝ. ܘܝܶܗܒܶܬ ܪܽܘܚܝ ܥܠܰܘܗ̱ܝ: ܕܢܰܦܶܩ ܕܺܝܢܳܐ ܠܥܰܡ̈ܡܶܐ.
2 ܠܳܐ ܢܶܩܥܶܐ: ܘܠܳܐ ܢܪܺܝܒ ܘܠܳܐ ܢܰܫܡܰܥ ܩܳܠܶܗ ܒܫܽܘܩܳܐ.
3 ܩܰܢܝܳܐ ܪܥܺܝܥܳܐ ܠܳܐ ܢܶܬܒܰܪ. ܘܰܫܪܳܓܳܐ ܕܰܡܛܰܦܛܶܦ ܠܳܐ ܢܰܕܥܶܟ. ܒܩܽܘܫܬܳܐ ܢܰܦܶܩ ܕܺܝܢܳܐ.
4 ܠܳܐ ܢܶܕܥܰܟ ܘܠܳܐ ܢܛܰܦܛܶܦ: ܥܕܰܡܳܐ ܕܰܢܣܺܝܡ ܕܺܝܢܳܐ ܒܰܐܪܥܳܐ. ܘܰܠܢܳܡܽܘܣܶܗ ܓܳܙܖ̈ܳܬܳܐ ܢܣܰܟ̈ܝܳܢ.
5 ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ: ܕܰܒܪܳܐ ܫܡܰܝܳܐ ܘܰܡܬܰܚ ܐܶܢܽܘܢ. ܘܰܪܩܰܥ ܐܰܪܥܳܐ ܘܟܽܠ ܕܒܳܗ̇. ܘܝܰܗܒ ܢܫܰܡܬܳܐ ܠܥܰܡܳܐ ܕܰܥܠܶܝܗ̇: ܘܪܽܘܚܳܐ ܠܕܰܡܗܰܠܟܺܝܢ ܒܳܗ̇.
6 ܐܶܢܳܐ ܡܳܪܝܳܐ ܩܪܺܝܬܳܟ ܒܙܰܕܺܝܩܽܘܬܳܐ: ܘܶܐܚܕܶܬ ܒܺܐܝܕܳܟ ܘܚܰܝܶܠܬܳܟ. ܘܝܰܗܒܬܳܟ ܩܝܳܡܳܐ ܠܥܰܡܳܐ: ܘܢܽܘܗܪܳܐ ܠܥܰܡ̈ܡܶܐ.
7 ܕܰܬܦܰܬܰܚ ܥܰܝ̈ܢܶܐ ܕܰܥܘܺܝܖ̈ܶܐ: ܘܬܰܦܶܩ ܠܰܐܣܺܝܖ̈ܶܐ ܡ̣ܶܢ ܒܶܝܬ ܚܒܽܘܫܝܳܐ: ܘܡ̣ܶܢ ܒܶܝܬ ܐܰܣܺܝܖ̈ܶܐ ܠܰܕܝܳܬܒܺܝܢ ܒܚܶܫܽܘܟܳܐ.
8 ܐܶܢܳܐ ܐ̱ܢܳܐ ܡܳܪܝܳܐ: ܘܗܳܢܰܘ ܫܶܡܝ. ܘܺܐܝܩܳܪܝ ܠܰܐܚܪܺܝܢ ܠܳܐ ܐܶܬܶܠ: ܘܳܐܦܠܳܐ ܬܶܫܒܽܘܚܬܝ ܠܰܓܠܺܝ̈ܦܶܐ.
9 ܚܰܕ̈ܳܬܳܬܳܐ ܐܶܢܳܐ ܡܚܳܘܶܐ. ܘܩܰܕܡܳܝ̈ܳܬܳܐ ܗܳܐ ܐܶܬܰܝ̈. ܘܥܰܕܠܳܐ ܢܶܨܡ̈ܚܳܢ: ܐܰܫܡܥܶܬ ܐܶܢܶܝܢ ܠܟܽܘܢ. ܬܶܫܒܽܘܚܬܳܐ ܕܶܐܫܰܥܝܳܐ.
10 ܫܰܒܰܚܘ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ. ܬܶܫܒܽܘܚܬܶܗ ܡ̣ܶܢ ܣܰܘ̈ܦܶܝܗ̇ ܕܰܐܪܥܳܐ. ܢܳܚܬܰܝ̈ ܝܰܡܳܐ ܒܰܡܠܳܐܶܗ: ܘܓܳܙܖ̈ܳܬܳܐ ܕܥܳܡܪܺܝܢ ܒܗܶܝܢ.
11 ܢܶܚܕܶܐ ܡܰܕܒܪܳܐ ܘܩܽܘܖ̈ܶܝܗ̇: ܘܡܰܖ̈ܓܶܐ ܬܶܗܘܶܐ ܩܶܕܳܪ. ܢܫܰܒܚܽܘܢ ܝܳܬܒܰܝ̈ ܫܩܺܝ̈ܦܶܐ: ܘܡ̣ܶܢ ܪܺܝܫܳܐ ܕܛܽܘܖ̈ܶܐ ܢܶܩܥܽܘܢ.
12 ܘܢܶܬܠܽܘܢ ܬܶܫܒܽܘܚܬܳܐ ܠܡܳܪܝܳܐ: ܘܬܶܫ̈ܒܚܳܬܶܗ ܢܚܰܘܢ ܒܓܳܙܖ̈ܳܬܳܐ.
13 ܡܳܪܝܳܐ ܐܰܝܟ ܓܰܢ̱ܒܳܪܳܐ ܢܶܦܽܘܩ. ܘܰܐܝܟ ܓܰܒܪܳܐ ܩܪܰܒܬܳܢܳܐ ܢܓܰܪܶܓ ܛܢܳܢܳܐ. ܢܶܩܥܶܐ ܘܢܶܬܓܰܢ̱ܒܰܪ: ܘܢܶܩܛܽܘܠ ܠܰܒܥܶܠܕܒܳܒܰܘ̈ܗܝ.
14 ܫܶܬܩܶܬ: ܡ̣ܶܢ ܥܳܠܰܡ ܐܶܫܬܽܘܩ ܣܰܝܒܪܶܬ ܐܰܝܟ ܝܳܠܶܕܬܳܐ. ܐܰܬܡܰܗ ܘܰܐܬܘܰܪ ܐܰܟܚܕܳܐ.
15 ܐܰܚܪܶܒ ܛܽܘܖ̈ܶܐ ܘܖ̈ܳܡܳܬܳܐ: ܘܟܽܠܶܗ ܥܽܘܫܢܗܽܘܢ ܐܰܘܒܶܫ. ܐܶܥܒܶܕ ܢܰܗܖ̈ܰܘܳܬܳܐ ܠܓܳܙܖ̈ܳܬܳܐ: ܘܰܐܓܡ̈ܶܐ ܐܰܘܒܶܫ.
16 ܐܶܕܒܰܪ ܥܘܺܝܖ̈ܶܐ ܒܽܐܘܪܚܳܐ ܕܠܳܐ ܝܳܕܥܺܝܢ. ܘܒܰܫܒܺܝ̈ܠܶܐ ܕܠܳܐ ܝܳܕܥܺܝܢ ܗ̱ܘܰܘ: ܐܶܗܰܠܶܟ ܐܶܢܽܘܢ. ܐܶܥܒܶܕ ܚܶܫܽܘܟܳܐ ܩܕܳܡܰܝܗܽܘܢ ܢܽܘܗܪܳܐ. ܘܥܰܪܡܳܐ ܐܶܫܰܦܶܐ. ܗܳܠܶܝܢ ܦܶܬܓܳܡ̈ܶܐ ܥܶܒܕܶܬ ܠܗܽܘܢ. ܘܠܳܐ ܫܶܒܩܶܬ ܐܶܢܽܘܢ.
17 ܢܶܗܦܟܽܘܢ ܠܒܶܣܬܰܪܗܽܘܢ: ܘܢܶܒܗܬܽܘܢ ܒܒܶܗܬܬܳܐ: ܐܰܝܠܶܝܢ ܕܰܬܟܺܝܠܺܝܢ ܥܰܠ ܓܠܺܝ̈ܦܶܐ: ܘܐܳܡܪܺܝܢ ܠܰܢܣܺܝ̈ܟܶܐ: ܕܰܐܢ̱ܬܽܘܢ ܐܶܢܽܘܢ ܐܰܠܳܗܰܝ̈ܢ.
18 ܚܰܖ̈ܫܶܐ ܫܡܰܥܘ. ܘܰܥܘܺܝܖ̈ܶܐ ܐܶܣܬܰܟܰܠܘ: ܘܰܚܙܳܘ.
19 ܡܰܢܘ ܥܘܺܝܪܳܐ ܐܶܠܳܐ ܥܰܒܕܝ: ܘܚܰܪܫܳܐ ܐܰܝܟ ܡܰܠܰܐܟܝ ܕܶܐܫܰܕܰܪ ܡܰܢܽܘ ܥܘܺܝܪܳܐ ܐܰܝܟ ܫܰܠܺܝܛܳܐ: ܘܰܥܘܺܝܪܳܐ ܐܰܝܟ ܥܰܒܕܶܗ ܕܡܳܪܝܳܐ.
20 ܚܳܪܶܬ ܣܰܓܺܝ ܘܠܳܐ ܢܳܛܪܺܝܢ ܐ̱ܢܬܽܘܢ ܘܦܶܬܚܶܬ ܐܶܕܢ̈ܶܐ: ܘܠܳܐ ܫܳܡܥܺܝܢ ܐ̱ܢܬܽܘܢ.
21 ܡܳܪܝܳܐ ܨܒܳܐ ܡܶܛܽܠ ܙܰܕܺܝܩܽܘܬܶܗ: ܕܢܰܘܪܶܒ ܢܳܡܽܘܣܳܐ ܘܰܢܫܰܒܚܺܝܘܗܝ.
22 ܘܗܽܘ ܥܰܡܳܐ ܒܙܺܝܙܳܐ ܘܕܺܝܫܳܐ ܦܰܚ̈ܶܐ ܐܶܢܽܘܢ ܟܽܠܗܽܘܢ ܓܰܕܽܘ̈ܕܶܐ ܘܰܒ̈ܒܳܬܶܐ ܐܰܣܺܝܖ̈ܶܐ ܛܰܫܺܝܘ. ܗܘܰܘ ܠܒܶܙܬܳܐ: ܘܠܰܝܬ ܕܰܡܦܰܨܶܐ ܘܠܰܕܝܳܫܳܐ: ܘܠܰܝܬ ܕܡܰܦܢܶܐ.
23 ܡܰܢܘ ܐܺܝܬ ܒܟܽܘܢ ܕܢܰܫܡܰܥ ܗܳܕܶܐ. ܘܰܢܨܽܘܬ ܘܢܶܫܡܰܥ ܠܰܐܚܪܺܬܳܐ.
24 ܡܰܢܽܘ ܝܰܗܒ ܠܝܰܥܩܽܘܒ ܠܰܕܝܳܫܳܐ: ܘܠܺܝܣܪܳܐܶܝܠ ܠܰܒܙܳܙܳܐ. ܠܳܐ ܗ̱ܘܳܐ ܡܳܪܝܳܐ ܥܰܠ ܕܰܚܛܰܝܢ ܠܶܗ: ܘܠܳܐ ܨܒܰܝܢ ܠܰܡܗܰܠܳܟܘ ܒܽܐܘܖ̈ܚܳܬܶܗ: ܘܠܳܐ ܫܡܰܥܢ ܢܳܡܽܘܣܶܗ.
25 ܐܶܫܰܕ ܥܠܰܝܗܽܘܢ ܚܶܡܬܳܐ ܕܪܽܘܓܙܶܗ. ܘܥܽܘܫܢܳܐ ܕܰܩܪܳܒܳܐ ܐܰܘܩܶܕ ܐܶܢܽܘܢ ܡ̣ܶܢ ܚܕܳܖ̈ܰܝܗܽܘܢ ܘܠܳܐ ܝܺܕܰܥܘ ܘܚܶܒܰܬ ܒܗܽܘܢ ܢܽܘܪܳܐ: ܘܠܳܐ ܐܰܝܬܺܝܘ ܥܰܠ ܒܳܠܗܽܘܢ.