Isaiah 18
The Book of Isaiah
܀ ܐܫܥܝܐ ܝܚ ܀
1 ܘܳܝ ܠܰܐܪܥܳܐ ܕܛܶܠܳܠܳܐ ܕܟܶܢ̈ܦܶܐ: ܕܒܰܥܒܳܪ ܢܰܗܖ̈ܰܘܳܬܳܐ ܕܟܽܘܫ.
2 ܕܰܡܫܰܕܰܪ ܗܡܰܝܖ̈ܶܐ ܒܝܰܡܳܐ: ܘܰܒܡܳܐܢ̈ܶܐ ܕܦܳܦܺܝܪܳܘܢ ܥܰܠ ܐܰܦܰܝ̈ ܡܰܝ̈ܳܐ. ܐܶܙܰܠܘ ܐܺܝ̈ܙܓܰܕܶܐ ܩܰܠܺܝ̈ܠܶܐ: ܠܘܳܬ ܥܰܡܳܐ ܕܰܡܠܺܝܓ ܘܰܥܩܺܝܪ: ܠܘܳܬ ܥܰܡܳܐ ܕܚܰܝܠܳܐ ܡܶܢܶܗ ܘܰܠܗܰܠ: ܥܰܡܳܐ ܕܰܡܫܰܕܰܪ ܘܕܺܝܫ. ܕܒܰܙܘ ܢܰܗܖ̈ܰܘܳܬܳܐ ܐܰܪܥܶܗ.
3 ܟܽܠܗܽܘܢ ܥܳܡܽܘܖ̈ܶܝܗ̇ ܕܬܺܒܶܝܠ ܕܰܫܪܶܝܢ ܒܰܐܪܥܳܐ. ܡܳܐ ܕܰܫܩܰܠܘ ܐܳܬܳܐ ܛܽܘܖ̈ܶܐ: ܬܶܚܙܽܘܢ. ܘܡܳܐ ܕܰܩܪܳܐ ܫܺܝܦܽܘܪܳܐ: ܬܶܫܡܥܽܘܢ.
4 ܡܶܛܽܠ ܕܗܳܟܰܢܳܐ ܐܶܡܰܪ ܠܺܝ ܡܳܪܝܳܐ: ܐܰܫܠܳܐ ܘܚܽܘܪ ܒܛܽܘܝܳܒܝ: ܐܰܝܟ ܚܽܘܡܳܐ ܨܰܚܺܝܚܳܐ ܕܥܰܠ ܢܰܗܪܳܐ: ܘܰܐܝܟ ܥܢܳܢܳܐ ܕܛܰܠܳܐ ܒܝܰܘܡܳܐ ܕܰܚܨܳܕܳܐ.
5 ܡܶܛܽܠ ܕܡ̣ܶܢ ܩܕܳܡ ܚܨܳܕܳܐ ܓܡܰܪ ܦܶܪܥܳܐ: ܘܗܰܒܳܒܐ ܚܣܰܠ. ܘܢܶܗܘܶܐ ܥܽܘܦܝܳܐ. ܘܢܶܦܣܽܘܩ ܙܰܠܺܝܠܳܐ ܒܡܰܓܠܳܐ. ܘܫܰܒܽܘܩܳܐ ܢܶܥܒܰܪ ܘܢܶܦܶܨ.
6 ܘܢܶܫܬܰܒܩܽܘܢ ܐܰܟܚܕܳܐ ܠܛܰܝܪܳܐ ܕܛܽܘܖ̈ܶܐ: ܘܰܠܚܰܝܽܘܬܳܐ ܕܰܐܪܥܳܐ. ܘܬܶܟܢܰܫ ܥܠܰܘܗ̱ܝ ܛܰܝܪܳܐ. ܘܟܽܠܳܗ̇ ܚܰܝܽܘܬܳܐ ܕܰܐܪܥܳܐ ܥܠܰܘܗ̱ܝ ܬܶܪܓܰܙ.
7 ܒܶܗ ܒܝܰܘܡܳܐ ܗܰܘ: ܢܰܘܒܶܠ ܩܽܘܪܒܳܢܳܐ ܠܡܳܪܝܳܐ ܚܰܝܠܬܳܢܳܐ: ܥܰܡܳܐ ܡܠܺܝܓܳܐ ܘܰܥܩܺܝܪܳܐ: ܥܰܡܳܐ ܕܚܰܝܠܳܐ ܡܶܢܶܗ ܘܰܠܗܰܠ: ܥܰܡܳܐ ܕܰܡܫܰܟܰܪ ܘܕܺܝܫ. ܕܒܰܙܘ ܢܰܗܖ̈ܰܘܳܬܳܐ ܐܰܪܥܶܗ: ܠܰܐܬܪܳܐ ܕܰܫܡܶܗ ܕܡܳܪܝܳܐ ܚܰܝܠܬܳܢܳܐ: ܠܛܽܘܪܳܐ ܕܨܶܗܝܽܘܢ.