Isaiah 49
The Book of Isaiah
܀ ܐܫܥܝܐ ܡܛ ܀
1 ܫܡܰܥܰܝ̈ܢ ܓܳܙܖ̈ܳܬܳܐ: ܘܨܽܘܬܶܝ̈ܢ ܐܶܡ̈ܘܳܬܳܐ. ܡ̣ܶܢ ܪܽܘܚܩܳܐ ܡܳܪܝܳܐ ܩܪܳܢܝ. ܘܡ̣ܶܢ ܡܰܪܒܥܳܐ ܘܡ̣ܶܢ ܟܰܪܣܳܗ̇ ܕܶܐܡܝ ܕܟܰܪ ܫܶܡܝ.
2 ܥܒܰܕ ܦܽܘܡܝ ܐܰܝܟ ܣܰܝܦܳܐ ܚܰܪܺܝܦܳܐ ܘܰܒܛܶܠܳܠܳܐ ܕܺܐܝܕܶܗ ܛܰܫܝܰܢܝ ܥܰܒܕܰܢܝ ܐܰܝܟ ܓܶܐܪܳܐ ܓܰܒܝܳܐ: ܘܒܰܩܛܺܪܩܶܗ ܣܰܬܪܰܢܝ.
3 ܘܶܐܡܰܪ ܠܺܝ܆ ܥܰܒܕܝ ܐܰܢ̱ܬ: ܝܺܣܪܳܐܶܝܠ ܕܒܳܟ ܡܶܫܬܰܒܰܚ ܐ̱ܢܳܐ.
4 ܘܠܳܐ ܐܶܡܪܶܬ ܠܙܰܪܥܶܗ ܕܝܰܥܩܽܘܒ ܕܰܣܪܺܝܩܳܐܺܝܬ ܠܺܐܝܬ ܘܝܶܗܒܶܬ ܚܠܰܝ ܠܰܣܪܺܝܩܽܘܬܳܐ. ܫܰܪܺܝܪܳܐܺܝܬ ܕܺܝܢܝ ܩܕܳܡ ܡܳܪܝܳܐ: ܘܰܥܒܳܕܝ ܩܕܳܡ ܐܰܠܳܗܝ.
5 ܗܳܫܳܐ ܗܳܟܰܢܳܐ ܐܳܡܰܪ ܡܳܪܝܳܐ: ܕܓܰܒܠܰܢܝ ܒܡܰܪܒܥܳܐ ܕܶܐܗܘܶܐ ܠܶܗ ܥܰܒܕܳܐ: ܘܰܐܦܢܶܐ ܠܝܰܥܩܽܘܒ ܠܘܳܬܶܗ: ܘܠܺܝܣܪܳܐܶܝܠ ܐܶܟܰܢܶܫ ܐܶܫܬܰܒܚܶܬ ܩܕܳܡ ܡܳܪܝܳܐ. ܘܰܐܠܳܗܝ ܗܘܳܐ ܥܽܘܫܢܝ.
6 ܘܶܐܡܰܪ ܙܥܽܘܪܳܐ ܗ̱ܝ ܕܬܶܗܘܶܐ ܠܺܝ ܥܰܒܕܳܐ: ܘܰܬܩܺܝܡ ܫܰܒܛܳܐ ܕܝܰܥܩܽܘܒ: ܘܬܰܦܢܶܐ ܢܽܘܪܒܶܗ ܕܺܝܣܪܳܐܶܝܠ. ܝܰܗܒܬܳܟ ܢܽܘܗܪܳܐ ܠܥܰܡ̈ܡܶܐ: ܕܬܶܗܘܶܐ ܦܽܘܪܩܳܢܝ ܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ.
7 ܗܳܟܰܢܳܐ ܐܳܡܰܪ ܡܳܪܝܳܐ ܩܰܕܺܝܫܳܐ ܕܺܝܣܪܳܐܶܝܠ: ܘܦܳܪܽܘܩܶܗ: ܠܰܕܡܶܣܬܰܠܝܳܐ ܢܰܦܫܶܗ: ܠܰܕܡܰܣܠܰܝ ܡ̣ܶܢ ܥܰܡܳܐ ܘܡ̣ܶܢ ܥܰܒ̈ܕܶܐ ܕܫܰܠܺܝܛܳܢ̈ܶܐ: ܡܰܠ̈ܟܶܐ ܢܶܚܙܽܘܢ ܘܰܢܩܽܘܡܽܘܢ: ܘܫܰܠܺܝܛܳܢ̈ܶܐ ܢܶܣܓܕܽܘܢ ܠܶܗ. ܡܶܛܽܠ ܡܳܪܝܳܐ ܕܰܡܗܰܝܡܰܢ: ܩܰܕܺܝܫܳܐ ܕܺܝܣܪܳܐܶܝܠ ܕܰܓܒܳܟ.
8 ܗܳܟܰܢܳܐ ܐܳܡܰܪ ܡܳܪܝܳܐ: ܒܙܰܒܢܳܐ ܕܨܶܒܝܳܢܳܐ ܥܢܺܝܬܳܟ ܘܰܒܝܰܘܡܳܐ ܕܦܽܘܪܩܳܢܳܐ ܥܰܕܰܪܬܳܟ. ܘܰܓܒܰܠܬܳܟ: ܘܝܰܗܒܬܳܟ ܩܝܳܡܳܐ ܠܥܰܡܳܐ: ܘܢܽܘܗܪܳܐ ܠܥܰܡ̈ܡܶܐ. ܕܰܬܩܺܝܡ ܐܰܪܥܳܐ: ܘܬܺܐܪܰܬ ܝܳܪܬܽܘܬܳܐ ܕܚܰܖ̈ܒܳܬܳܐ.
9 ܘܬܺܐܡܰܪ ܠܰܐܣܺܝܖ̈ܶܐ ܕܦܽܘܩܘ: ܘܠܰܚܒܺܝ̈ܫܶܐ ܕܶܐܬܓܠܰܘ. ܥܰܠ ܐܽܘܖ̈ܚܳܬܳܐ ܢܶܪܥܽܘܢ: ܘܰܒܟܽܠܗܽܘܢ ܫܒܺܝ̈ܠܶܐ ܡܰܖ̈ܥܝܳܬܗܽܘܢ.
10 ܠܳܐ ܢܶܟܦܢܽܘܢ: ܘܠܳܐ ܢܶܨܗܽܘܢ. ܘܠܳܐ ܢܰܟܶܐ ܐܶܢܽܘܢ ܫܰܘܒܳܐ ܘܫܶܡܫܳܐ. ܡܶܛܽܠ ܕܰܡܪܰܚܡܳܢܗܽܘܢ ܢܕܰܒܰܪ ܐܶܢܽܘܢ. ܘܰܠܡܰܒܽܘܥ̈ܶܐ ܕܡܰܝ̈ܳܐ ܢܰܝܬܶܐ ܐܶܢܽܘܢ.
11 ܐܶܥܒܶܕ ܟܽܠܗܽܘܢ ܛܽܘܖ̈ܶܐ ܐܽܘܖ̈ܚܳܬܳܐ: ܘܰܫܒܺܝ̈ܠܶܐ ܢܶܬܬܪܺܝܡܽܘܢ.
12 ܗܳܠܶܝܢ ܢܺܐܬܽܘܢ ܡ̣ܶܢ ܪܽܘܚܩܳܐ: ܘܗܳܠܶܝܢ ܡ̣ܶܢ ܓܰܪܒܝܳܐ ܘܗܳܠܶܝܢ ܡ̣ܶܢ ܝܰܡܳܐ: ܘܗܳܠܶܝܢ ܡ̣ܶܢ ܝܰܡܳܐ ܕܣܰܢܝܰܡ.
13 ܫܰܒܰܚܘ ܫܡܰܝܳܐ: ܘܕܽܘܨܝ ܐܰܪܥܳܐ. ܐܶܬܦܰܨܚܘ ܛܽܘܖ̈ܶܐ ܒܬܶܫܒܽܘܚܬܳܐ. ܡܶܛܽܠ ܕܒܰܝܰܐ ܡܳܪܝܳܐ ܠܥܰܡܶܗ: ܘܪܰܚܶܡ ܥܰܠ ܒܳܝܫܰܘ̈ܗܝ.
14 ܘܶܐܡܪܰܬ ܨܶܗܝܽܘܢ ܕܫܰܒܩܰܢܝ ܡܳܪܝܳܐ: ܘܡܳܪܝܳܐ ܛܥܳܢܝ.
15 ܐܶܢ ܛܳܥܝܳܐ ܐܰܢ̱ܬܬܳܐ ܥܽܘܠܳܗ̇: ܘܠܳܐ ܡܪܰܚܡܳܐ ܥܰܠ ܒܰܪ ܡܥܶܝ̈ܗ̇: ܐܳܦܶܢ ܗܳܠܶܝܢ ܢܶܛܥ̈ܝܳܢ: ܐܶܢܳܐ ܠܳܐ ܐܶܛܥܶܝܟܝ.
16 ܗܳܐ ܥܰܠ ܦܰܣ̈ܶܐ ܕܺܐܝܕܰܝ̈ ܪܫܰܡ̇ܬܶܟܝ ܘܫܽܘܖ̈ܰܝܟܝ ܠܽܘܩܒܰܠܝ ܐܶܢܽܘܢ ܐܰܡܺܝܢܳܐܺܝܬ.
17 ܒܰܥܓܰܠ ܒܢܰܝ̈ܟܝ ܡܣܰܚܦܳܢܰܝ̈ܟܝ ܘܡܰܚܖ̈ܒܳܢܰܝܟܝ ܡܶܢܶܟܝ ܢܶܦܩܽܘܢ.
18 ܐܰܪܺܝܡܝ ܥܰܝܢܰܝ̈ܟܝ ܠܰܚܕܳܖ̈ܰܝܟܝ. ܘܰܚܙܳܝ ܕܟܽܠܗܽܘܢ ܡܶܬܟܰܢܫܺܝܢ ܘܳܐܬܶܝܢ ܠܶܟܝ: ܚܰܝ ܐ̱ܢܳܐ ܐܳܡܰܪ ܡܳܪܝܳܐ: ܕܟܽܠܗܽܘܢ ܐܰܝܟ ܨܶܒܬܳܐ ܬܶܠܒܫܺܝܢ: ܘܬܶܬܟܰܠܠܺܝܢ ܐܰܝܟ ܟܰܠܬܳܐ.
19 ܡܶܛܽܠ ܕܚܰܖ̈ܒܳܬܶܟܝ: ܘܨܳܕ̈ܝܳܬܶܟܝ: ܘܰܐܪܥܳܐ ܕܰܣܚܺܝܦܽܘܬܶܟܝ ܡܶܟܺܝܠ ܬܶܬܶܐܠܶܨ ܡ̣ܶܢ ܝܰܬܒܳܐ: ܘܢܶܥܪܩܽܘܢ ܒܳܠܽܘܥܰܝ̈ܟܝ.
20 ܘܬܽܘܒ ܢܺܐܡܪܽܘܢ ܒܶܐܕܢܰܝ̈ܟܝ ܒܢܰܝ̈ ܡܓܰܙܝܽܘܬܶܟܝ: ܐܰܠܺܝܨ ܗ̱ܘ̣ ܠܰܢ ܐܰܬܪܳܐ ܐܶܬܩܰܪܰܒ ܠܰܢ: ܢܶܬܶܒ.
21 ܘܬܺܐܡܪܺܝܢ ܒܠܶܒܶܟܝ ܡܰܢܽܘ ܝܺܠܶܕ ܠܺܝ ܗܳܠܶܝܢ. ܕܗܳܐ ܐܶܢܳܐ ܡܓܰܙܰܝܬܳܐ ܐ̱ܢܳܐ ܘܰܡܫܰܘܚܰܕܬܳܐ: ܓܳܠܺܝܬܳܐ ܘܰܡܕܰܘܰܕܬܳܐ. ܗܳܠܶܝܢ ܡܰܢ ܪܰܒܺܝ ܐܶܢ ܐܶܢܳܐ ܗܳܐ ܐܶܫܬܰܚܪܶܬ ܒܰܠܚܽܘܕܰܝ: ܗܳܠܶܝܢ ܐܰܝܟܳܐ ܗܘܰܘ.
22 ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ: ܗܳܐ ܡܪܺܝܡ ܐ̱ܢܳܐ ܐܺܝܕܝ ܥܰܠ ܥܰܡ̈ܡܶܐ. ܘܰܠܥܰܡ̈ܡܶܐ ܐܰܪܺܝܡ ܐܳܬܳܐ. ܘܢܰܝܬܽܘܢ ܠܰܒܢܰܝ̈ܟܝ ܥܰܠ ܐܺܝܕܰܝ̈ܗܽܘܢ. ܘܠܰܒ̈ܢܳܬܶܟܝ ܥܰܠ ܟܰܬܦ̈ܳܬܗܽܘܢ ܢܶܫܩܠܽܘܢ.
23 ܘܢܶܗܘܽܘܢ ܡܰܠ̈ܟܶܐ ܡܖ̈ܰܒܝܳܢܰܝܟܝ: ܘܪܰܘܖ̈ܒܳܢܺܝܬܗܽܘܢ ܡܰܝܢܩܳܢ̈ܝܳܬܶܟܝ ܘܥܰܠ ܐܰܦܰܝ̈ܗܽܘܢ ܥܰܠ ܐܰܪܥܳܐ ܢܶܣܛܕܽܘܢ ܠܶܟܝ. ܘܥܰܦܪܳܐ ܕܖ̈ܶܓܠܰܝܟܝ ܢܶܠܚܟܽܘܢ ܘܬܶܕܰܥܺܝܢ ܕܶܐܢܳܐ ܐ̱ܢܳܐ ܡܳܪܝܳܐ: ܕܠܳܐ ܒܳܗܳܬܺܝܢ ܐܰܝܠܶܝܢ ܕܰܡܣܰܟܶܝܢ ܠܺܝ.
24 ܠܡܳܐ ܡܶܬܕܰܒܪܳܐ ܕܒܰܪܬܶܗ ܕܓܰܢ̱ܒܳܪܳܐ. ܐܰܘ ܫܒܺܝܬܶܗ ܕܥܰܫܺܝܢܳܐ ܡܶܬܦܰܨܝܳܐ.
25 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܕܰܕܒܰܪܬܶܗ ܕܓܰܢ̱ܒܳܪܳܐ ܬܶܬܕ̇ܒܰܪ ܘܰܫܒܺܝܬܶܗ ܕܥܰܫܺܝܢܳܐ ܬܶܬܦܰܨܶܐ. ܘܕܺܝܢܰܝ̈ܟܝ ܐܶܢܳܐ ܐܶܕܽܘܢ. ܘܠܰܒܢܰܝ̈ܟܝ ܐܶܢܳܐ ܐܶܦܪܽܘܩ.
26 ܘܰܐܘܟܶܠ ܠܳܐܠܽܘܨܰܝ̈ܟܝ ܒܶܣܪܗܽܘܢ. ܘܰܐܝܟ ܡܶܐܪܺܝܬܳܐ ܢܶܪܘܢ ܡ̣ܶܢ ܕܶܡܗܽܘܢ. ܘܢܶܕܥܽܘܢ ܟܽܠ ܒܣܰܪ ܕܶܐܢܳܐ ܐ̱ܢܳܐ ܡܳܪܝܳܐ ܦܳܪܽܘܩܶܟܝ: ܘܰܡܣܰܝܥܳܢܶܟܝ ܬܰܩܺܝܦܶܗ ܕܝܰܥܩܽܘܒ.