Isaiah 11
The Book of Isaiah
܀ ܐܫܥܝܐ ܝܐ ܀
1 ܘܢܶܦܽܘܩ ܚܽܘܛܪܳܐ ܡ̣ܶܢ ܓܽܘܙܥܶܗ ܕܺܐܝܫܰܝ. ܘܢܰܦܪܰܥ ܢܽܘܪܒܳܐ ܡ̣ܶܢ ܥܶܩܳܪܶܗ.
2 ܘܬܶܬܢܺܝܚ ܘܬܶܫܪܶܐ ܥܠܰܘܗ̱ܝ ܪܽܘܚܳܐ ܕܰܐܠܳܗܳܐ: ܪܽܘܚܳܐ ܕܚܶܟܡܬܳܐ ܘܰܕܣܽܘܟܳܠܳܐ: ܪܽܘܚܳܐ ܕܬܰܪܥܺܝܬܳܐ ܘܰܕܓܰܢ̱ܒܰܪܽܘܬܳܐ: ܪܽܘܚܳܐ ܕܺܝܕܰܥܬܳܐ ܘܰܕܕܶܚܠܬܶܗ ܕܡܳܪܝܳܐ.
3 ܘܢܶܕܢܰܚ ܒܕܶܚܠܬܶܗ ܕܡܳܪܝܳܐ. ܘܠܳܐ ܐܰܝܟ ܕܚܳܙ̈ܝܳܢ ܥܰܝܢܳܘ̈ܗܝ ܢܕܽܘܢ: ܘܠܳܐ ܐܰܝܟ ܕܫܳܡ̈ܥܳܢ ܐܶܕܢܳܘ̈ܗܝ ܢܰܟܣ.
4 ܢܕܽܘܢ ܒܩܽܘܫܬܳܐ ܠܡܶܣܟܺܢ̈ܶܐ: ܘܢܰܟܶܣ ܒܰܬܪܺܝܨܽܘܬܳܐ ܠܒܺܝ̈ܫܶܝܗ̇ ܕܰܐܪܥܳܐ. ܢܶܡܚܶܐ ܠܰܐܪܥܳܐ ܒܫܰܒܛܳܐ ܕܦܽܘܡܶܗ. ܘܰܒܪܽܘܚܳܐ ܕܣܶܦ̈ܘܳܬܶܗ ܢܡܺܝܬ ܠܖ̈ܰܫܺܝܥܶܐ.
5 ܬܶܗܘܶܐ ܙܰܕܺܝܩܽܘܬܳܐ ܐܳܣܰܪ ܚܰܨܰܘ̈ܗܝ: ܘܗܰܝܡܳܢܽܘܬܳܐ ܚܙܳܩܳܐ ܕܕܰܦ̈ܢܳܬܶܗ.
6 ܢܶܥܡܰܪ ܕܺܐܒܳܐ ܥܰܡ ܐܶܡܪܳܐ. ܘܢܶܡܪܶܐ ܥܰܡ ܓܰܕܝܳܐ ܢܶܪܒܰܥ. ܘܥܶܓܠܳܐ ܘܓܽܘܪܝܳܐ ܕܰܐܪܝܳܐ ܘܬܰܘܪܳܐ: ܐܰܟܚܕܳܐ ܢܶܪܥܽܘܢ. ܘܛܰܠܝܳܐ ܙܥܽܘܪܳܐ ܢܕܰܒܰܪ ܐܶܢܽܘܢ.
7 ܬܽܘܪܬܳܐ ܘܕܶܒܳܐ ܐܰܟܚܕܳܐ ܢܶܖ̈ܥܝܳܢ ܘܰܒܢܰܝ̈ܗܶܝܢ ܐܰܟܚܕܳܐ ܢܶܪܒܥܽܘܢ ܐܰܪܝܳܐ ܐܰܝܟ ܬܰܘܪܳܐ ܢܶܐܟܽܘܠ ܬܶܒܢܳܐ.
8 ܘܢܶܫܬܥܶܐ ܝܰܠܽܘܕܳܐ ܒܚܰܪܡܳܢܳܐ. ܘܰܒܚܽܘܪܳܐ ܕܶܐܣܦܶܣ ܢܰܘܫܶܛ ܐܺܝܕܶܗ ܚܣܺܝܠܳܐ.
9 ܘܠܳܐ ܢܰܒܐܫܽܘܢ: ܘܠܳܐ ܢܚܰܒܠܽܘܢ ܒܟܽܠܶܗ ܛܽܘܪܳܐ ܕܩܽܘܕܫܝ. ܡܶܛܽܠ ܕܬܶܬܡܠܶܐ ܐܰܪܥܳܐ ܝܺܕܰܥܬܶܗ ܕܡܳܪܝܳܐ: ܐܰܝܟ ܡܰܝ̈ܳܐ ܕܰܡܟܰܣܶܝܢ ܠܝܰܡܳܐ.
10 ܘܢܶܗܘܶܐ ܒܝܰܘܡܳܐ ܗܰܘ: ܥܶܩܳܪܶܗ ܕܺܐܝܫܰܝ ܕܩܳܐܶܡ: ܐܳܬܳܐ ܠܥܰܡ̈ܡܶܐ ܘܰܥܠܰܘܗ̱ܝ ܥܰܡ̈ܡܶܐ ܢܥܰܩܒܽܘܢ ܘܬܶܗܘܶܐ ܢܝܳܚܬܶܗ ܐܺܝܩܳܪܳܐ.
11 ܘܢܶܗܘܶܐ ܒܝܰܘܡܳܐ ܗܰܘ: ܢܰܘܣܶܦ ܡܳܪܝܳܐ ܬܶܢܝܳܐ ܕܺܐܝܕܶܗ: ܕܢܶܩܢܶܐ ܫܰܪܟܳܐ ܕܥܰܡܶܗ ܕܶܐܫܬܚܰܪܘ: ܡ̣ܶܢ ܐܳܬܽܘܪ: ܘܡ̣ܶܢ ܡܶܨܪܶܝܢ: ܘܡ̣ܶܢ ܦܰܬܪܽܘܣ: ܘܡ̣ܶܢ ܟܽܘܫ: ܘܡ̣ܶܢ ܥܺܝܠܳܡ: ܘܡ̣ܶܢ ܣܳܥܺܝܪ: ܘܡ̣ܶܢ ܚܡܳܬ: ܘܡܶܢ ܓܳܙܖ̈ܳܬܳܐ ܕܝܰܡܳܐ.
12 ܘܢܶܫܩܽܘܠ ܐܳܬܳܐ ܠܥܰܡ̈ܡܶܐ: ܘܰܢܟܰܢܶܫ ܠܛܳܥܰܝ̈ܳܐ ܕܺܝܣܪܳܐܶܝܠ: ܘܠܰܡܒܰܕܖ̈ܶܐ ܕܺܝܗܽܘܕܳܐ ܢܟܰܢܶܫ ܡ̣ܶܢ ܐܰܪܒܥܰܬ ܟܶܢܦܶܝܗ̇ ܕܰܐܪܥܳܐ.
13 ܘܢܶܥܒܰܪ ܛܢܳܢܳܐ ܡ̣ܶܢ ܐܰܦܪܶܝܡ: ܘܐܳܠܽܘܨܰܘ̈ܗܝ ܕܺܝܗܽܘܕܳܐ ܢܺܐܒܕܽܘܢ. ܐܰܦܪܶܝܡ ܠܳܐ ܢܶܛܰܢ ܒܺܝܗܽܘܕܳܐ: ܘܺܝܗܽܘܕܳܐ ܠܳܐ ܢܶܐܠܽܘܨ ܠܰܐܦܪܶܝܡ.
14 ܘܢܶܦܠܚܽܘܢ ܒܟܰܬܦܳܐ ܕܰܦܠܶܫܬܳܝ̈ܶܐ ܥܰܠ ܝܰܡܳܐ. ܘܰܐܟܚܕܳܐ ܢܶܒܙܽܘܢ ܠܰܒܢܰܝ̈ ܡܰܕܢܚܳܐ ܒܰܐܕܽܘܡ ܘܰܒܡܽܘܐܳܒ ܢܰܘܫܛܽܘܢ ܐܺܝܕܰܝ̈ܗܽܘܢ ܘܰܒܢܰܝ̈ ܥܰܡܽܘܢ ܢܶܫܬܰܡܠܽܘܢ ܠܗܽܘܢ.
15 ܘܢܰܚܪܶܒ ܡܳܪܝܳܐ ܠܶܫܳܢ ܝܰܡܳܐ ܕܰܒܡܶܨܪܶܝܢ: ܘܰܢܪܺܝܡ ܐܺܝܕܶܗ ܥܰܠ ܢܰܗܪܳܐ ܒܽܐܘܚܕܳܢܳܐ ܕܪܽܘܚܶܗ: ܘܢܶܡܚܶܝܘܗܝ ܠܫܰܒܥܳܐ ܢܰܚ̈ܠܺܝܢ: ܕܢܶܬܥܒܰܪ ܒܰܡܣܳܢ̈ܶܐ.
16 ܘܢܶܗܘܶܐ ܫܒܺܝܠܳܐ ܠܫܰܪܟܳܐ ܕܥܰܡܶܗ: ܕܶܐܫܬܚܰܪܘ ܡ̣ܶܢ ܐܳܬܽܘܪ: ܐܰܝܟ ܕܰܗܘܳܬ ܠܺܝܣܪܳܐܶܝܠ: ܒܝܰܘܡܳܐ ܕܰܣܠܶܩ̣ܘ ܡ̣ܶܢ ܐܰܪܥܳܐ ܕܡܶܨܪܶܝܢ.