Isaiah 52
The Book of Isaiah
܀ ܐܫܥܝܐ ܢܒ ܀
1 ܐܶܬܬܥܺܝܪܝ: ܐܶܬܬܥܺܝܪܝ: ܨܶܗܝܽܘܢ ܘܰܠܒܰܫܝ ܠܒܽܘܫܳܐ ܕܬܶܫܒܽܘܚܬܳܐ: ܐܽܘܪܺܫܠܶܡ ܩܪܺܝܬܳܐ ܩܰܕܺܝܫܬܳܐ. ܡܶܛܽܠ ܕܠܳܐ ܢܰܘܣܶܦ ܬܽܘܒ ܠܡܶܥܰܠ ܠܶܟܝ ܥܽܘܪܠܳܐ ܘܛܰܡܳܐܐ.
2 ܐܶܬܢܰܦܨܝ ܡ̣ܶܢ ܥܰܦܪܳܐ ܘܩܽܘܡܝ ܬܶܒܝ ܐܽܘܪܺܫܠܶܡ ܫܪܳܝ ܢܺܝܪܳܐ ܡ̣ܶܢ ܨܰܘܪܶܟܝ ܫܒܺܝܬܳܐ: ܒܰܪܬ ܨܶܗܝܽܘܢ.
3 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܡܰܓܳܢ ܐܶܙܕܰܒܰܢܬܽܘܢ: ܘܠܳܐ ܒܟܶܣܦܳܐ ܬܶܬܦܰܪܩܽܘܢ.
4 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ: ܠܡܶܨܪܶܝܢ ܢܚܶܬ ܥܰܡܝ ܒܩܰܕܡܳܝܬܳܐ ܠܡܶܥܡܰܪ ܬܰܡܳܢ. ܘܳܐܬܽܘܪܳܝܳܐ ܒܰܩܛܺܝܪܳܐ ܕܰܒܪܶܗ.
5 ܘܗܳܫܳܐ ܡܳܐ ܠܺܝ ܗܳܪܟܳܐ ܐܳܡܰܪ ܡܳܪܝܳܐ: ܕܶܐܬܕܒܰܪ ܥܰܡܝ ܡܰܓܳܢ. ܫܰܠܺܝܛܳܢܰܝ̈ܗܽܘܢ ܡܰܝܠܠܺܝܢ: ܐܳܡܰܪ ܡܳܪܝܳܐ. ܘܰܐܡܺܝܢܳܐܺܝܬ ܟܽܠܝܽܘܡ ܥܰܠ ܫܶܡܝ ܡܓܰܕܦܺܝܢ.
6 ܡܶܛܽܠ ܗܳܢܳܐ ܢܶܕܰܥ ܥܰܡܝ ܫܶܡܝ ܒܝܰܘܡܳܐ ܗܰܘ. ܡܶܛܽܠ ܕܶܐܢܳܐ ܗ̱ܘ̣ ܡܡܰܠܶܠ: ܘܺܐܝܬܰܝ.
7 ܡܳܐ ܝܳܐܝ̈ܳܢ ܥܰܠ ܛܽܘܖ̈ܶܐ ܖ̈ܶܓܠܰܘܗܝ ܕܰܡܣܰܒܰܪ ܫܠܳܡܳܐ: ܘܕܰܡܣܰܒܰܪ ܛܳܒ̈ܳܬܳܐ: ܘܰܕܡܰܫܡܰܥ ܦܽܘܪܩܳܢܳܐ. ܕܳܐܡܰܪ ܠܨܶܗܝܽܘܢ: ܐܰܡܠܶܟ ܐܰܠܳܗܶܟܝ.
8 ܩܳܠܳܐ ܕܕܰܘܩܰܝ̈ܟܝ ܐܰܪܺܝܡܘ ܩܳܠܳܐ. ܘܰܐܟܚܕܳܐ ܡܫܰܒܚܺܝܢ ܡܶܛܽܠ ܕܥܺܝܢ ܒܥܺܝܢ ܢܶܚܙܽܘܢ ܟܰܕ ܡܰܦܢܶܐ ܡܳܪܝܳܐ ܠܨܶܗܝܽܘܢ.
9 ܕܽܘܨܺܝ̈ܢ ܘܫܰܒܰܚ̈ܶܝܢ ܐܰܟܚܕܳܐ ܚܰܖ̈ܒܳܬܳܐ ܕܽܐܘܪܺܫܠܶܡ ܡܶܛܽܠ ܕܒܰܝܰܐ ܡܳܪܝܳܐ ܠܥܰܡܶܗ: ܘܰܦܪܰܩ ܠܽܐܘܪܺܫܠܶܡ.
10 ܓܠܳܐ ܡܳܪܝܳܐ ܕܪܳܥܶܗ ܩܰܕܺܝܫܳܐ ܠܥܺܝܢ ܟܽܠܗܽܘܢ ܥܰܡ̈ܡܶܐ. ܘܢܶܚܙܽܘܢ ܟܽܠܗܽܘܢ ܥܶܒܖ̈ܶܝܗ̇ ܕܰܐܪܥܳܐ ܦܽܘܪܩܳܢܶܗ ܕܰܐܠܳܗܰܢ.
11 ܥܒܰܪܘ: ܥܒܰܪܘ ܦܽܘܩܘ ܡ̣ܶܢ ܬܰܡܳܢ: ܘܰܠܛܰܡ̈ܶܐܐ ܠܳܐ ܬܶܬܩܰܪܒܽܘܢ. ܦܽܘܩܘ ܡ̣ܶܢ ܓܰܘܳܗ̇: ܘܶܐܬܓܰܒܳܘ: ܫܩܺܝ̈ܠܰܝ ܡܳܐܢܰܘ̈ܗܝ ܕܡܳܪܝܳܐ.
12 ܡܶܛܽܠ ܕܠܳܐ ܒܣܽܘܪܗܳܒܳܐ ܬܶܦܩܽܘܢ. ܘܒܰܥܪܽܘܩܝܳܐ ܠܳܐ ܬܺܐܙܽܠ̱ܘܢ ܡܶܛܽܠ ܕܡܳܪܝܳܐ ܐܳܙܶܠ ܩܕܳܡܰܝܟܽܘܢ: ܘܰܡܟܰܢܫܳܢܟܽܘܢ ܐܰܠܳܗܶܗ ܕܺܝܣܪܳܐܶܝܠ.
13 ܗܳܐ ܡܶܣܬܰܟܰܠ ܥܰܒܕܝ. ܘܡܶܬܬܪܺܝܡ: ܘܡܶܫܬܰܩܰܠ: ܘܡܶܬܥܰܠܶܐ ܛܳܒ.
14 ܐܰܝܟ ܕܢܶܬܡܗܽܘܢ ܥܠܰܘܗ̱ܝ ܣܰܓܺܝ̈ܐܶܐ ܗܳܟܰܢܳܐ ܡܚܰܒܰܠ ܚܶܙܘܶܗ ܡ̣ܶܢ ܕܓܰܒܪܳܐ: ܘܩܽܘܒܳܠܠܶܗ ܡ̣ܶܢ ܕܰܒܢܰܝ̈ܢܳܫܳܐ.
15 ܗܳܢܳܐ ܡܕܰܟܶܐ ܥܰܡ̈ܡܶܐ ܣܰܓܺܝ̈ܐܶܐ: ܘܰܥܠܰܘܗܝ ܢܶܐܚܕܽܘܢ ܡܰܠ̈ܟܶܐ ܦܽܘܡܗܽܘܢ ܡܶܛܽܠ ܕܰܕܠܳܐ ܐܶܬܶܐܡܰܪ ܠܗܽܘܢ ܚܙܰܘ: ܘܰܕܠܳܐ ܫܡܰܥܘ ܐܶܣܬܰܟܰܠܘ.