Isaiah 9
The Book of Isaiah
܀ ܐܫܥܝܐ ܛ ܀
1 ܣܰܪܗܒܰܬ ܐܰܪܥܳܐ ܕܰܙܒܳܘܠܽܘܢ: ܘܰܐܪܥܳܐ ܕܢܰܦܬܳܠܺܝ. ܐܘܚܕܳܢܳܐ ܥܫܶܢ: ܐܽܘܪܚܳܐ ܕܝܰܡܳܐ: ܥܶܒܖ̈ܰܘܗܝ ܕܝܽܘܪܕ̇ܢܳܢ ܢܰܗܪܳܐ: ܓܠܺܝܠܳܐ ܕܥܰܡ̈ܡܶܐ.
2 ܥܰܡܳܐ ܕܰܡܗܰܠܟܺܝܢ ܒܚܶܫܽܘܟܳܐ: ܚܙܰܘ ܢܽܘܗܪܳܐ ܪܰܒܳܐ. ܘܰܕܝܳܬܒܺܝܢ ܒܰܐܪܥܳܐ ܕܛܶܠܳܠܰܝ̈ ܡܰܘܬܳܐ: ܢܽܘܗܪܳܐ ܕܢܰܚ ܥܠܰܝܗܽܘܢ.
3 ܐܰܣܓܺܝܬ ܥܰܡܳܐ: ܘܠܶܗ ܐܰܘܪܶܒܬ ܚܰܕܽܘܬܳܐ. ܚܕܺܝܘ ܩܕܳܡܰܝܟ ܐܰܝܟ ܗܳܢܽܘܢ ܕܚܳܕܶܝܢ ܒܰܚܨܳܕܳܐ: ܘܰܐܝܟ ܗܳܢܽܘܢ ܕܕܳܝܨܺܝܢ ܡܳܐ ܕܰܡܦܰܠܓܺܝܢ ܒܶܙܬܳܐ.
4 ܡܶܛܽܠ ܕܢܺܝܪܳܐ ܕܫܽܘܥܒܳܕܗܽܘܢ: ܘܚܽܘܛܪܳܐ ܕܟܰܬܦܗܽܘܢ: ܘܫܰܒܛܳܐ ܕܰܡܫܰܥܒܶܕ ܗ̱ܘܳܐ ܠܗܽܘܢ: ܬܒܰܪܬ ܐܰܝܟ ܝܰܘܡܳܐ ܕܡܶܕܝܰܢ.
5 ܡܶܛܽܠ ܕܟܽܠ ܩܳܠ ܐܶܫܬܡܰܥ ܒܙܳܘܥܬܳܐ. ܘܢܰܚܬܳܐ ܡܦܰܠܦܰܠ ܒܰܕܡܳܐ. ܘܰܗܘܳܐ ܠܝܰܩܕܳܢܳܐ ܘܰܠܡܶܐܟܽܘܠܬܳܐ ܕܢܽܘܪܳܐ.
6 ܡܶܛܽܠ ܕܝܰܠܕܳܐ ܐܶܬܺܝܠܶܕ ܠܰܢ: ܘܰܒܪܳܐ ܐܶܬܺܝܗܶܒ ܠܰܢ. ܘܰܗܘܳܐ ܫܽܘܠܛܳܢܶܗ ܥܰܠ ܟܰܬܦܶܗ. ܘܶܐܬܩܪܺܝ ܫܡܶܗ ܕܽܘܡܳܪܳܐ ܘܡܳܠܽܘܟܳܐ: ܐܰܠܳܗܳܐ ܓܰܢ̱ܒܳܪܳܐ ܕܥܳܠ̈ܡܶܐ: ܫܰܠܺܝܛܳܐ ܕܰܫܠܳܡܳܐ.
7 ܠܡܰܣܓܳܝܽܘ ܫܽܘܠܛܳܢܶܗ. ܘܠܰܫܠܳܡܶܗ ܠܰܝܬ ܣܳܟܶܐ: ܥܰܠ ܟܽܘܪܣܝܶܗ ܕܕܰܘܺܝܕ: ܘܥܰܠ ܡܰܠܟܽܘܬܶܗ. ܕܢܰܬܩܢܺܝܗ̇ ܘܰܢܣܰܡܟܺܝܗ̇ ܒܕܺܝܢܳܐ ܘܰܒܙܰܕܺܝܩܽܘܬܳܐ: ܡܶܟܺܝܠ ܘܰܥܕܰܡܳܐ ܠܥܳܠܰܡ. ܛܢܳܢܶܗ ܕܡܳܪܝܳܐ ܚܰܝܠܬܳܢܳܐ ܥܳܒܶܕ ܗܳܕܶܐ.
8 ܦܶܬܓܳܡܳܐ ܫܰܕܰܪ ܡܳܪܝܳܐ ܒܝܰܥܩܽܘܒ: ܘܰܢ̣ܦܰܠ ܒܺܝܣܪܳܐܶܝܠ.
9 ܘܢܶܕܥܽܘܢ ܥܰܡ̈ܡܶܐ ܟܽܠܗܽܘܢ: ܐܰܦܪܶܝܡ ܘܥܳܡܽܘܖ̈ܶܝܗ̇ ܕܫܳܡܪܺܝܢ: ܒܓܰܐܝܽܘܬܳܐ ܘܰܒܪܰܒܽܘܬ ܠܶܒܳܐ: ܘܳܐܡܪܺܝܢ.
10 ܠܶܒ̈ܢܶܐ ܢܰܪܡܶܐ: ܘܢܶܓܙܽܘܪ ܓܙܺܝܖ̈ܳܬܳܐ. ܘܢܶܦܣܽܘܩ ܫܰܩ̈ܡܶܐ: ܘܰܐܖ̈ܙܶܐ ܢܶܚܠܽܘܦ.
11 ܘܢܰܥܫܶܢ ܡܳܪܝܳܐ ܠܳܐܠܽܘܨܰܘ̈ܗܝ ܕܪܳܨܳܢ ܥܠܰܘܗ̱ܝ. ܘܠܰܒܥܶܠܕܒܳܒܰܘ̈ܗܝ ܢܓܰܪܶܓ.
12 ܠܰܐܕܽܘܡ ܡ̣ܶܢ ܡܰܕܢܚܳܐ: ܘܠܰܦܠܶܫܬܳܝ̈ܶܐ ܡ̣ܶܢ ܡܰܥܪܒܳܐ. ܘܢܶܐܟܽܠܘܳܢܶܗ ܠܺܝܣܪܳܐܶܝܠ ܒܟܽܠܶܗ ܦܽܘܡܗܽܘܢ ܘܰܒܗܳܠܶܝܢ ܟܽܠܗܶܝܢ ܠܳܐ ܗܦܰܟ ܪܽܘܓܙܶܗ. ܘܬܽܘܒ ܐܺܝܕܶܗ ܪܳܡܳܐ.
13 ܘܥܰܡܳܐ ܠܳܐ ܐܶܬܦܢܺܝܘ: ܥܕܰܡܳܐ ܕܰܒܠܰܥܘ. ܘܰܠܡܳܪܝܳܐ ܚܰܝܠܬܳܢܳܐ ܠܳܐ ܒܥܳܘ.
14 ܘܰܐܘܒܶܕ ܡܳܪܝܳܐ ܡ̣ܶܢ ܝܺܣܪܳܐܶܝܠ: ܪܺܝܫܳܐ ܘܕܽܘܢܒܬܳܐ: ܘܕܽܘܢܒܬܳܐ ܘܪܺܝܫܳܐ: ܒܝܰܘܡܳܐ ܚܰܕ.
15 ܣܳܒܳܐ ܘܰܗܕܺܝܪ ܐܰܦ̈ܶܐ ܗܽܘܝܽܘ ܪܺܝܫܳܐ. ܘܰܢܒܺܝܳܐ ܕܡܰܠܶܦ ܫܽܘܩܪܳܐ ܗܽܘܝܽܘ ܕܽܘܢܒܬܳܐ.
16 ܘܢܶܗܘܽܘܢ ܡܰܛܐܒܳܢܰܘ̈ܗܝ ܕܥܰܡܳܐ ܗܳܢܳܐ: ܡܰܛܥܶܝܢ ܘܰܡܛܰܒܥܺܝܢ ܠܶܗ.
17 ܡܶܛܽܠ ܗܳܢܳܐ ܠܳܐ ܢܚܰܕܶܐ ܡܳܪܝܳܐ ܥܰܠ ܥܠܰܝܡܰܝ̈ܗܽܘܢ. ܘܥܰܠ ܝܰܬܡܰܝ̈ܗܽܘܢ ܘܥܰܠ ܐܰܖ̈ܡܠܳܬܗܽܘܢ ܠܳܐ ܢܪܰܚܶܦ. ܡܶܛܽܠ ܕܟܽܠܗܽܘܢ ܚܰܠܦܺܝܢ ܘܒܺܝܫܺܝܢ. ܘܟܽܠ ܦܽܘܡ ܡܡܰܠܶܠ ܫܳܛܝܽܘܬܳܐ. ܘܰܒܗܳܠܶܝܢ ܟܽܠܗܶܝܢ ܠܳܐ ܗܦܰܟ ܪܽܘܓܙܶܗ. ܘܬܽܘܒ ܐܺܝܕܶܗ ܪܳܡܳܐ.
18 ܡܶܛܽܠ ܕܣܶܦܰܬ ܚܛܺܝܬܳܐ ܐܰܝܟ ܢܽܘܪܳܐ: ܘܬܶܐܟܽܘܠ ܝܰܥܪܳܐ ܘܟܽܘ̈ܒܶܐ. ܘܬܶܣܰܦ ܒܣܰܘ̈ܟܶܐ ܕܥܳܒܳܐ. ܘܢܶܬܥܰܪܩܠܽܘܢ ܓܒܰܝ̈ܳܐ ܒܬܶܢܳܢܳܐ.
19 ܒܰܟܐܳܬܶܗ ܕܡܳܪܝܳܐ ܚܰܝܠܬܳܢܳܐ ܙܳܥܰܬ ܐܰܪܥܳܐ. ܘܰܗܘܳܐ ܥܰܡܳܐ ܐܰܝܟ ܗܰܘ ܕܶܐܟܰܠܬܶܗ ܢܽܘܪܳܐ. ܘܰܓܒܰܪ ܥܰܠ ܐܰܚܽܘܗܝ ܠܳܐ ܢܚܽܘܣ.
20 ܘܢܶܓܙܽܘܪ ܥܰܠ ܝܰܡܺܝܢܶܗ ܘܢܶܟܦܰܢ. ܘܢܶܐܟܽܘܠ ܥܰܠ ܣܶܡܳܠܶܗ. ܘܠܳܐ ܢܶܣܒܥܽܘܢ ܓܒܰܪ ܒܶܣܪܳܐ ܕܰܕܪܳܥܶܗ ܢܶܐܟܽܘܠ.
21 ܡܢܰܫܶܐ ܠܰܐܦܪܶܝܡ: ܘܰܐܦܪܶܝܡ ܠܰܡܢܰܫܶܐ: ܘܰܐܟܚܕܳܐ ܥܰܠ ܝܺܗܽܘܕܳܐ. ܘܰܒܗܳܠܶܝܢ ܟܽܠܗܶܝܢ ܠܳܐ ܗܦܰܟ ܪܽܘܓ̣ܙܶܗ. ܘܬܽܘܒ ܐܺܝܕܶܗ ܪܳܡܳܐ.