Isaiah 44
The Book of Isaiah
܀ ܐܫܥܝܐ ܡܕ ܀
1 ܡܶܟܺܝܠ ܫܡܰܥܰܝܢܝ ܝܰܥܩܽܘܒ ܥܰܒܕܝ: ܘܺܝܣܪܳܐܶܝܠ ܕܰܓܒܶܝܬ.
2 ܗܳܟܰܢܳܐ ܐܳܡܰܪ ܡܳܪܝܳܐ: ܕܥܰܒܕܳܟ ܘܓܰܒܠܳܟ ܒܡܰܪܒܥܳܐ ܘܥܰܕܪܳܟ ܠܳܐ ܬܶܕܚܶܠ ܥܰܒܕܝ ܝܰܥܩܽܘܒ: ܘܺܝܣܪܳܐܶܝܠ ܕܰܩܪܺܝܬ.
3 ܡܶܛܽܠ ܕܶܐܬܶܠ ܡܰܝ̈ܳܐ ܒܰܐܬܪܳܐ ܨܶܗܝܳܐ: ܘܖ̈ܳܕܰܝܳܐ ܒܝܰܒܫܳܐ ܐܶܫܽܘܕ ܪܽܘܚܝ ܥܰܠ ܙܰܪܥܳܟ: ܘܒܽܘܖ̈ܟܳܬܝ ܥܰܠ ܒܢܰܝ̈ܟ.
4 ܘܢܺܐܥܽܘܢ ܡ̣ܶܢ ܒܰܝܢܳܬ ܥܡܺܝܪܳܐ: ܐܰܝܟ ܥܰܖ̈ܒܶܐ ܕܥܰܠ ܬܰܦ̈ܶܐ ܕܡܰܝ̈ܳܐ.
5 ܗܳܢܳܐ ܢܺܐܡܰܪ ܕܡܳܪܝܳܐ ܐ̱ܢܳܐ: ܘܗܳܢܳܐ ܢܶܩܪܶܐ ܒܰܫܡܶܗ ܕܝܰܥܩܽܘܒ ܘܗܳܢܳܐ ܢܰܟܬܶܒ ܐܺܝܕܶܗ ܠܡܳܪܝܳܐ. ܘܰܒܫܶܡ ܝܺܣܪܳܐܶܝܠ ܢܶܬܟܰܢܶܐ.
6 ܗܳܟܰܢܳܐ ܐܳܡܰܪ ܡܳܪܝܳܐ ܡܰܠܟܶܗ ܕܺܝܣܪܳܐܶܝܠ ܘܦܳܪܽܘܩܶܗ: ܡܳܪܝܳܐ ܚܰܝܠܬܳܢܳܐ ܫܡܶܗ. ܐܶܢܳܐ ܐ̱ܢܳܐ ܩܰܕܡܳܝܳܐ: ܘܶܐܢܳܐ ܐ̱ܢܳܐ ܐ̱ܚܪܳܝܳܐ. ܘܠܰܝܬ ܐܰܠܳܗ ܠܒܰܪ ܡܶܢܝ.
7 ܘܡܰܢܽܘ ܐܰܟܘܳܬܝ ܢܶܩܪܶܐ: ܘܢܶܬܛܰܝܰܒ ܘܰܢܚܳܘܶܐ: ܡ̣ܶܢ ܕܣܳܡܶܬ ܥܰܡܳܐ ܠܥܳܠܰܡ: ܘܶܐܬܘ̈ܳܬܳܐ ܕܳܐܬܝܳܢ ܢܚܰܘܢ.
8 ܠܳܐ ܬܶܕܚܠܽܘܢ ܘܠܳܐ ܬܶܬܪܰܗܒܽܘܢ: ܠܳܐ ܐܰܫܡܰܥܬܟܽܘܢ ܡ̣ܶܢ ܩܕܺܝܡ ܘܚܰܘܺܝܬܟܽܘܢ ܘܰܐܢ̱ܬܽܘܢ ܣܳܗ̈ܕܰܝ. ܕܠܰܝܬ ܐܰܠܳܗ ܠܒܰܪ ܡܶܢܝ: ܘܠܰܝܬ ܕܬܰܩܺܝܦ ܕܠܳܐ ܝܳܕܰܥ ܐ̱ܢܳܐ.
9 ܣܪܺܝܩܺܝܢ ܐܶܢܽܘܢ ܟܽܠܗܽܘܢ ܐܽܘܡܳܢ̈ܶܐ ܕܥܳܒܕܺܝܢ ܨܰܠ̈ܡܶܐ. ܘܠܰܝܬ ܝܽܘܬܪܳܢ ܒܰܥܒܳܕܰܝ̈ܗܽܘܢ ܕܪܰܓܘ ܠܡܶܥܒܰܕ ܘܣܳܗܕܺܝܢ ܐܽܘܡܳܢ̈ܶܐ ܕܰܥܒܰܕܘ ܐܶܢܽܘܢ: ܕܠܳܐ ܚܳܙܶܝܢ: ܘܠܳܐ ܫܳܡܥܺܝܢ: ܘܠܳܐ ܝܳܕܥܺܝܢ.
10 ܡܶܛܽܠ ܗܳܢܳܐ ܢܶܒܗܬܽܘܢ ܐܰܝܠܶܝܢ ܕܥܳܒܕܺܝܢ ܐܰܠܳܗ̈ܶܐ: ܘܓܳܠܦܺܝܢ ܢܣܺܝ̈ܟܶܐ ܕܝܽܘܬܪܳܢ ܠܰܝܬ ܒܗܽܘܢ.
11 ܗܳܐ ܟܽܠܗܽܘܢ ܐܽܘܡܳܢܰܝ̈ܗܽܘܢ: ܚܰܪܫܺܝܢ ܐܶܢܽܘܢ ܡ̣ܶܢ ܒܢܰܝ̈ܢܳܫܳܐ. ܢܶܬܟܰܢܫܽܘܢ ܟܽܠܗܽܘܢ ܘܰܢܩܽܘܡܽܘܢ ܘܢܶܒܗܬܽܘܢ ܘܢܰܚܦܪܽܘܢ ܐܰܟܚܕܳܐ.
12 ܕܰܠܛܰܫ ܦܰܪܙܠܳܐ ܢܰܓܳܪܳܐ: ܘܰܒܥܶܫܦܳܐ ܫܰܦܝܶܗ. ܘܰܒܡܰܩܳܪܳܐ ܓܰܠܦܶܗ ܘܥܰܒܕܶܗ ܒܚܰܝܠܳܐ ܕܰܕܪܳܥܶܗ. ܐܳܦ ܟܦܶܢ ܐܳܦ ܨܗܺܝ. ܘܠܳܐ ܐܶܫܬܺܝ ܡܰܝ̈ܳܐ ܘܶܐܬܛܰܪܰܦ.
13 ܓܒܳܐ ܢܰܓܳܪܳܐ ܩܰܝܣܳܐ: ܘܡܰܫܚܶܗ ܘܰܒܬܳܬܳܐ ܕܰܒܩܶܗ. ܘܓܰܠܦܶܗ ܘܥܰܒܕܶܗ ܒܰܕܡܽܘܬܳܐ ܕܓܰܒܪܳܐ: ܐܰܝܟ ܝܳܐܝܽܘܬܳܐ ܕܒܰܪܢܳܫܳܐ.
14 ܘܰܐܩܺܝܡܶܗ ܒܒܰܝܬܳܐ ܠܩܰܝܣܳܐ ܕܰܦܣܺܝܩ ܡ̣ܶܢ ܥܳܒܐ: ܕܰܒܡܶܛܪܳܐ ܐܶܬܪܰܒܺܝ. ܕܢܶܗܘܶܐ ܠܐ̱ܢܳܫܳܐ ܠܝܰܩܕܳܢܳܐ.
15 ܘܰܢܣܰܒܘ ܡܶܢܶܗ: ܘܰܐܚܶܡ̣ܘ: ܘܰܐܦܰܘ ܠܰܚܡܳܐ. ܘܳܐܦ ܥܒܰܕܘ ܐܰܠܳܗܳܐ: ܘܣܳܓܕܺܝܢ ܠܶܗ. ܥܒܰܕܘ ܓܠܺܝܦܳܐ ܘܰܣܓܶܕܘ ܠܶܗ.
16 ܦܶܠܓܶܗ ܐܰܘܩܶܕܘ ܒܢܽܘܪܳܐ. ܘܛܰܘܺܝܘ ܒܶܣܪܳܐ ܥܰܠ ܓܽܘܡܖ̈ܰܘܗܝ. ܘܶܐܟܰܠܘ ܘܰܣܒܰܥܘ ܘܳܐܦ ܫܚܶܢܘ ܘܶܐܡܰܪܘ ܐܰܚܳܢ: ܫܶܚܢܶܬ: ܘܰܚܙܺܝܬ ܢܽܘܪܳܐ.
17 ܘܫܰܪܟܳܐ ܥܒܰܕܘ ܐܰܠܳܗܳܐ ܓܠܺܝܦܳܐ: ܘܰܣܓܶܕܘ ܠܶܗ: ܘܨܰܠܺܝܘ ܠܶܗ: ܘܶܐܡܰܪܘ ܦܰܨܳܢ: ܡܶܛܽܠ ܕܰܐܢ̱ܬ ܗܽܘ ܐܰܠܳܗܰܢ.
18 ܘܠܳܐ ܝܺܕܰܥܘ ܘܠܳܐ ܐܶܣܬܰܟܰܠܘ: ܕܫܺܝܥ ܗ̱ܘ̣ ܚܶܙܘܳܐ ܕܥܰܝܢܰܝ̈ܗܽܘܢ. ܘܣܽܘܟܳܠܳܐ ܕܠܶܒܗܽܘܢ.
19 ܘܠܳܐ ܐܰܝܬܺܝܘ ܥܰܠ ܒܳܠܗܽܘܢ: ܘܠܳܐ ܝܺܕܰܥܘ ܘܠܳܐ ܐܶܬܪܰܥܺܝܘ ܘܶܐܡܰܪܘ: ܕܦܶܠܓܶܗ ܐܰܘܩܶܕܘ ܒܢܽܘܪܳܐ. ܘܥܰܠ ܓܽܘܡܖ̈ܰܘܗܝ ܐܰܦܰܘ ܠܰܚܡܳܐ. ܘܛܰܘܺܝܘ ܒܶܣܪܳܐ ܘܶܐܟܰܠܘ ܘܫܰܪܟܳܐ ܥܒܰܕܘ ܠܗܽܘܢ ܦܬܰܟܪܳܐ ܕܩܰܝܣܳܐ: ܘܰܣܓܶܕܘ ܠܶܗ.
20 ܪܳܥܶܐ ܗ̱ܘ̣ ܒܩܶܛܡܳܐ ܠܶܒܗܽܘܢ. ܘܡܶܛܥܳܐ ܗ̱ܘ̣ ܛܳܥܶܝܢ: ܘܠܳܐ ܡܦܰܨܶܝܢ ܢܰܦܫܗܽܘܢ. ܘܠܳܐ ܐܳܡܪܺܝܢ ܕܕܰܓܳܠܽܘܬܳܐ ܥܶܒܕܰܬ ܝܰܡܺܝܢܰܢ.
21 ܐܶܬܕܰܟܪ ܗܳܠܶܝܢ ܝܰܥܩܽܘܒ: ܘܺܝܣܪܳܐܶܝܠ ܕܥܰܒܕܝ ܐܰܢ̱ܬ. ܓܒܰܠܬܳܟ ܠܺܝ ܥܰܒܕܳܐ: ܡܶܟܺܝܠ ܝܺܣܪܳܐܶܝܠ ܠܳܐ ܬܶܛܥܶܝܢܝ.
22 ܐܰܥܒܪܶܬ ܥܳܘܠܳܟ ܐܰܝܟ ܥܰܪܦܶܠܳܐ: ܘܰܚܛܳܗܰܝ̈ܟ ܐܰܝܟ ܥܢܳܢܳܐ. ܐܶܬܦܰܢܝ ܠܘܳܬܝ ܕܰܦܪܰܩܬܳܟ.
23 ܫܰܒܰܚܘ ܫܡܰܝܳܐ ܡܶܛܽܠ ܕܰܥܒܰܕ ܡܳܪܝܳܐ: ܝܰܒܒܶܝ̈ܢ ܫܶܬܶܐܣܶܝ̈ܗ̇ ܕܰܐܪܥܳܐ. ܐܶܬܦܰܨܚܘ ܛܽܘܖ̈ܶܐ ܒܬܶܫܒܽܘܚܬܳܐ: ܘܥܳܒܳܐ ܘܟܽܠ ܐܺܝ̈ܠܳܢܶܐ ܕܒܶܗ. ܕܰܦܪܰܩ̣ ܡܳܪܝܳܐ ܠܝܰܥܩܽܘܒ: ܘܒܺܝܣܪܳܐܶܝܠ ܐܶܫܬܰܒܰܚ.
24 ܗܳܟܰܢܳܐ ܐܳܡܰܪ ܡܳܪܝܳܐ: ܕܦܰܪܩܳܟ ܘܓܰܒܠܳܟ ܒܡܰܪܒܥܳܐ ܘܥܰܕܪܳܟ. ܐܶܢܳܐ ܐ̱ܢܳܐ ܡܳܪܝܳܐ ܕܥܶܒܕܶܬ ܟܽܠ. ܡܶܬܚܶܬ ܫܡܰܝܳܐ ܒܰܠܚܽܘܕܰܝ. ܘܪܶܩܥܶܬ ܐܰܪܥܳܐ ܡܶܢܝ ܘܠܺܝ.
25 ܡܒܰܛܶܠ ܐܳܬܘ̈ܳܬܳܐ ܕܙܰܟܽܘܖ̈ܶܐ ܘܩܶܨܡܰܝ̈ܗܽܘܢ ܡܰܫܛܶܐ ܐ̱ܢܳܐ. ܡܰܗܦܶܟ ܚܰܟܺܝܡܶܐ ܠܒܶܣܬܰܪܗܽܘܢ ܘܺܝܕܰܥܬܗܽܘܢ ܡܣܰܟܶܠ ܐ̱ܢܳܐ.
26 ܘܰܡܩܺܝܡ ܡܶܠܬܳܐ ܕܥܰܒܕܶܗ: ܘܬܰܪܥܺܝܬܳܐ ܕܡܰܠܰܐܟܰܘ̈ܗܝ ܡܫܰܠܶܡ. ܕܶܐܡܰܪ ܠܽܐܘܪܺܫܠܶܡ: ܕܬܶܬܝܰܬܰܒ. ܘܰܠܩܽܘܖ̈ܝܳܐ ܕܺܝܗܽܘܕܳܐ: ܕܢܶܬܒܰܢ̈ܝܳܢ. ܘܰܠܚܰܖ̈ܒܬܳܗ̇ ܐܰܩܺܝܡ.
27 ܕܶܐܡܰܪ ܠܥܽܘܡܩܳܐ ܚܪܰܒ. ܘܢܰܗܖ̈ܰܘܳܬܳܟ ܐܰܘܒܶܫ.
28 ܕܶܐܡܰܪ ܠܟܽܘܪܶܫ ܪܳܥܺܝܝ: ܕܟܽܠܶܗ ܨܶܒܝܳܢܝ ܢܫܰܠܶܡ: ܠܡܶܐܡܰܪ ܠܽܐܘܪܺܫܠܶܡ ܕܬܶܬܒܢܶܐ ܘܗܰܝܟܠܳܐ ܢܶܫܬܰܟܠܰܠ.