Isaiah 25
The Book of Isaiah
܀ ܐܫܥܝܐ ܟܗ ܀
1 ܡܳܪܝܳܐ ܐܰܠܳܗܝ ܐܰܢ̱ܬ: ܐܶܪܰܡܪܡܳܟ: ܘܰܐܘܕܶܐ ܠܰܫܡܳܟ. ܕܰܥܒܰܕܬ ܕܽܘܡܳܪܳܐ ܘܬܰܪܥܺܝܬܳܐ ܡܗܰܝܡܰܢܬܳܐ. ܡ̣ܶܢ ܪܽܘܚܩܳܐ ܐܰܡܶܝܢ.
2 ܡܶܛܽܠ ܕܰܥܒܰܕܬ ܩܪܺܝܬܳܐ ܠܝܰܓܪܳܐ: ܘܰܩܪܺܝܬܳܐ ܥܰܫܺܝܢܬܳܐ ܠܡܰܦܽܘܠܬܳܐ ܢܳܘܣܳܐ ܕܢܽܘܟܖ̈ܳܝܶܐ ܠܥܳܠܰܡ ܡ̣ܶܢ ܩܪܺܝܬܳܐ ܠܳܐ ܢܶܬܒܢܶܐ.
3 ܡܶܛܽܠ ܗܳܢܳܐ ܢܫܰܒܚܽܘܢܳܟ ܥܰܡ̈ܡܶܐ ܣܰܓܺܝ̈ܐܶܐ. ܘܰܩܪܺܝܬܳܐ ܕܥܰܡ̈ܡܶܐ ܥܰܫܺܝ̈ܢܶܐ ܢܶܕܚܠܽܘܢ ܠܳܟ.
4 ܡܶܛܽܠ ܕܰܗܘܰܝܬ ܡܣܰܝܥܳܢܳܐ ܠܡܶܣܟܺܢܳܐ: ܘܥܳܕܽܘܪܳܐ ܠܒܳܝܫܳܐ ܒܽܐܘܠܨܳܢܶܗ: ܣܶܬܳܪܳܐ ܡ̣ܶܢ ܙܳܪܺܝܦܬܳܐ: ܘܛܶܠܳܠܳܐ ܡ̣ܶܢ ܫܰܘܒܳܐ.
5 ܡܶܛܽܠ ܕܪܽܘܚܳܐ ܕܥܰܫܺܝܢܳܐ ܐܰܝܟ ܙܳܪܺܝܦܬܳܐ ܒܶܐܣܬܳܐ: ܘܰܐܝܟ ܛܶܠܳܠܳܐ ܒܫܰܘܒܳܐ. ܪܳܡܽܘܬܳܐ ܕܢܽܘܟܖ̈ܳܝܶܐ ܬܶܬܡܰܟܰܟ: ܘܫܰܘܒܳܐ ܒܛܶܠܳܠܳܐ ܕܰܥܢܳܢ̈ܶܐ. ܫܰܒܽܘܩܳܐ ܕܥܰܫܺܝܢ̈ܶܐ ܢܶܬܡܰܟܰܟ.
6 ܘܢܶܥܒܶܕ ܡܳܪܝܳܐ ܚܰܝܠܬܳܢܳܐ ܒܟܽܠܗܽܘܢ ܥܰܡ̈ܡܶܐ ܒܛܽܘܪܳܐ ܗܳܢܳܐ: ܡܰܫܬܝܳܐ ܫܰܡܺܝܢܳܐ: ܘܡܰܫܬܝܳܐ ܢܛܺܝܪܳܐ ܘܫܰܡܺܝܢܳܐ: ܕܡܰܚܝܳܢܰܢ ܫܡܰܝܳܐ ܘܥܰܫܺܝܢܳܐ.
7 ܘܢܶܬܒܠܰܥ ܒܛܽܘܪܳܐ ܗܳܢܳܐ: ܐܰܦܰܝ̈ ܫܰܠܺܝܛܳܐ ܕܫܰܠܺܝܛ ܗ̱ܘܳܐ ܥܰܠ ܟܽܠܗܽܘܢ ܥܰܡ̈ܡܶܐ. ܘܢܶܟܣܬܳܐ ܕܶܐܬܢܰܟܣܰܬ ܥܰܠ ܐܰܦܰܝ̈ ܟܽܠܗܽܘܢ ܥܰܡ̈ܡܶܐ.
8 ܘܢܶܬܒܰܠܥ ܡܰܘܬܳܐ ܠܙܳܟܽܘ ܠܥܳܠܡܺܝܢ. ܘܢܰܥܒܰܪ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ ܕܶܡܥܬܳܐ ܡ̣ܶܢ ܟܽܠ ܐܰܦܺܝ̈ܢ. ܘܚܶܣܕܳܐ ܕܥܰܡܶܗ ܢܰܥܒܰܪ ܡ̣ܶܢ ܟܽܠܳܗ̇ ܐܰܪܥܳܐ: ܡܶܛܽܠ ܕܡܳܪܝܳܐ ܡܰܠܶܠ.
9 ܘܬܺܐܡܰܪ ܒܝܰܘܡܳܐ ܗܰܘ: ܗܳܢܰܘ ܡܳܪܝܳܐ ܐܰܠܳܗܰܢ: ܕܣܰܟܺܝܢ ܠܶܗ ܘܢܶܦܪܩܰܢ ܗܳܢܰܘ ܡܳܪܝܳܐ ܐܰܠܳܗܰܢ ܕܣܰܟܺܝܢ ܠܶܗ: ܢܕܽܘܨ ܢܶܚܕܶܐ ܒܦܽܘܪܩܳܢܶܗ.
10 ܡܶܛܽܠ ܕܬܶܬܢܺܝܚ ܐܺܝܕܶܗ ܕܡܳܪܝܳܐ ܒܛܽܘܪܳܐ ܗܳܢܳܐ: ܘܢܶܬܬܕܺܝܫ ܡܽܘܐܳܒ ܬܚܽܘܬܰܘܗܝ: ܐܰܝܟ ܕܡܶܬܬܕܺܝܫ ܬܶܒܢܳܐ ܒܓܰܪܓܳܪܳܐ.
11 ܘܰܢܦܰܪܶܣ ܐܺܝܕܰܘ̈ܗܝ ܒܓܰܘܶܗ: ܐܰܝܟ ܕܰܡܦܰܪܶܣ ܣܰܚܳܝܳܐ ܠܡܶܣܚܳܐ ܘܢܶܡܰܟ ܥܽܘܫܢܶܗ ܥܰܡ ܫܽܘܘܳܛܳܐ ܕܺܐܝܕܰܘ̈ܗܝ.
12 ܘܒܶܝܬ ܡܶܪܕܳܐ ܕܥܽܘܫܢܳܐ ܕܫܽܘܖ̈ܰܝܟܝ ܢܡܰܟܶܟ: ܘܰܢܫܰܦܶܠ: ܘܰܢܡܰܛܶܐ ܠܰܐܪܥܳܐ ܥܕܰܡܳܐ ܠܥܰܦܪܳܐ.