Isaiah 39
The Book of Isaiah
܀ ܐܫܥܝܐ ܠܛ ܀
1 ܒܙܰܒܢܳܐ ܗܰܘ: ܫܰܕܰܪ ܡܪܽܘܕܳܟ ܒܶܠܕܳܢ ܒܰܪ ܒܶܠܕܳܢ ܡܰܠܟܳܐ ܕܒܳܒܶܠ: ܐܶܓܖ̈ܳܬܳܐ ܘܩܽܘܖ̈ܒܳܢܶܐ ܠܚܶܙܰܩܝܳܐ: ܡܶܛܽܠ ܕܰܫܡܰܥ ܕܶܐܬܟܪܰܗ: ܘܰܚܣܰܢ: ܘܶܐܬܚܠܶܡ.
2 ܘܰܚܕܺܝ ܒܗܽܘܢ ܚܶܙܰܩܝܳܐ ܘܚܳܘܺܝ ܐܶܢܽܘܢ ܒܶܝܬ ܓܰܙܶܗ: ܟܶܣܦܳܐ: ܘܕܰܗܒܳܐ: ܘܒܶܣ̈ܡܶܐ: ܘܡܶܫܚܳܐ ܛܳܒܳܐ: ܘܟܽܠܗܽܘܢ ܒܶܝܬ ܡܳܐܢܰܘ̈ܗܝ: ܘܟܽܠ ܕܶܐܫܬܟܰܚ ܒܓܰܙܩܘ̈ܗܝ ܘܠܳܐ ܫܒܰܩ ܡܶܕܶܡ ܚܶܙܰܩܝܳܐ ܕܠܳܐ ܚܳܘܺܝ ܐܶܢܽܘܢ: ܒܒܰܝܬܶܗ ܘܰܒܟܽܠܶܗ ܒܶܝܬ ܫܽܘܠܛܳܢܶܗ.
3 ܘܶܐܬܳܐ ܐܶܫܰܥܝܳܐ ܢܒܺܝܳܐ ܠܘܳܬ ܚܶܙܰܩܝܳܐ ܡܰܠܟܳܐ: ܘܶܐܡܰܪ ܠܶܗ: ܡܳܢܳܐ ܐܶܡܰܪܘ ܠܳܟ ܗܳܠܶܝܢ ܓܰܒܖ̈ܶܐ. ܘܡ̣ܶܢ ܐܰܝܡܶܟܳܐ ܐܶܬܰܘ ܠܘܳܬܳܟ ܘܶܐܡܰܪ ܚܶܙܰܩܝܳܐ: ܡ̣ܶܢ ܐܰܪܥܳܐ ܪܰܚܺܝܩܬܳܐ ܕܒܳܒܶܠ ܐܶܬܰܘ ܠܘܳܬܝ.
4 ܘܶܐܡܰܪ ܡܳܢܳܐ ܚܙܰܘ ܒܒܰܝܬܳܟ ܘܶܐܡܰܪ ܚܶܙܰܩܝܳܐ ܟܽܠ ܕܺܐܝܬ ܒܒܰܝܬܝ ܚܙܰܘ: ܘܠܳܐ ܫܶܒܩܶܬ ܡܶܕܶܡ ܒܒܰܝܬܝ ܕܠܳܐ ܚܳܘܺܝܬ ܐܶܢܽܘܢ.
5 ܘܶܐܡܰܪ ܐܶܫܰܥܝܳܐ ܠܚܶܙܰܩܝܳܐ: ܫܡܰܥ ܦܶܬܓܳܡܶܗ ܕܡܳܪܝܳܐ ܚܰܝܠܬܳܢܳܐ.
6 ܗܳܐ ܝܰܘ̈ܡܳܬܳܐ ܐܳܬܶܝܢ: ܘܢܶܫܬܩܶܠ ܟܽܠ ܕܺܐܝܬ ܒܒܰܝܬܳܟ ܘܓܰܙܳܐ ܕܰܐܒܳܗܰܝ̈ܟ ܕܰܥܕܰܡܳܐ ܠܝܳܘܡܳܢܳܐ ܠܒܳܒܶܠ ܢܺܐܙܰܠ. ܘܡܶܕܶܡ ܠܳܐ ܢܶܫܬܚܰܪ ܠܳܟ: ܐܳܡܰܪ ܡܳܪܝܳܐ.
7 ܘܡ̣ܶܢ ܒܢܰܝ̈ܟ ܕܢܳܦܩܺܝܢ ܡܶܢܳܟ: ܕܡܰܘܠܶܕ ܐܰܢ̱ܬ: ܢܶܬܕܰܒܪܽܘܢ: ܘܢܶܗܘܽܘܢ ܡܗܰܝܡܢ̈ܶܐ ܒܗܰܝܟܠܶܗ ܕܡܰܠܟܳܐ ܕܒܳܒܶܠ.
8 ܘܶܐܡܰܪ ܚܶܙܰܩܝܳܐ ܠܶܐܫܰܥܝܳܐ: ܫܰܦܺܝܪ ܦܶܬܓܶܡܶܗ ܕܡܳܪܝܳܐ ܕܶܐܡܰܪܬ: ܢܶܗܘܶܐ ܫܠܳܡܳܐ ܘܩܽܘܫܬܳܐ ܒܝܰܘ̈ܡܰܝ.